لي تلاتة يوم . . راحة يدي اليمين منها و ليها قعدت تاكل فيني . . الجكاية دي كيفتني و بسطتني شديد . . بقيت أمشي في الشارع و أضحك بدون أدنى سبب . . و أمشي فارد سدري لي فوق . . و نخرتي بقيت أمدها و أديها السماء . . قلت خلاس جاياني قروش بعد فلس طويل . . و العقد دايرة تنحلا . . دا كلو بي فضل الله و فضل يدي اليمين . . أولاً بالتبادي جبت لي قطعة قماش و لفيت بيها يدي اليمين . . حفظها الله من جميع الشرور . . كنت خايف عليها من عين الناس . . تقوم الناس تحسدني فيها تطير لي قريشاتي ديل . . و على حس الكاروشة الانطلقت في يدي اليمين . . احسن حاجة فكرت أعملها اني أمشي ادين لي قريشات . . أفك بيها زنقتي دي لحدي ما أقبض القريشات الموعود بيها دي . . ادينت لي خمسن ريال . . و ضربت للولية قلت ليها . . ابشري بالخير يا ولية . . من دربك دا . . تلفحي توبك و تمشي تشيلي ليك تلاجة و تلفزيون بالتقسيط . . و أمشي استلفي ليك قريشات أقلعي ضرسك المسوس داك . . بدل كل يوم يقعد يتاور فيكي . . و قولي لي عبد الجليل بتاع البقالة . . فيفيد قال ليك . . قروشك حا تقبضا في اليومين الجايات على داير ملين و معاها بوسة . . الشيء المكيفني في حناني أنو يدي اليمين دي ماكلاني ليها تلاتة يوم . . و لي حسع قاعدة تاكل فيني . . و القروش ما ظهرت لي حسع . . ظنيتها المرة دي جاياني كتيرة . . قبضة منعة و ليها ضل . . انتو يا ناس الخرتوم قطعة الارض بي سمسرتا عندكم بي كم.
مافي شيتاً موجعني في اليومين ديل عيلا . . عراقيني الهبابة . . أمس حرقتو المكوة . . و ذهب مع الريح . . (Gone With The Wind) . . راح في حق الله . . اللهم أزل حزني عليه و أبدلني بي عراقي خيراً منه . . في لحظة حلول الفاجعة . . اتصلت بي أصحابي كلهم . . و حدستهم بي هول المأساة التي ألمت بي . . و وصفت ليهم أحداث الجمعة الدامي . .و أنا أزرف في الدمع السخين . . أصحابي الله يفتحها عليهم دنيا و آخرة و اديهم الفي مرادهم . . ما قصرو معاي تب . . قاموا بالواجب . . و جوني و واسوني في مصابي الجلل . . و تعبيراً على وقوفهم معي في وقت الشدة . . جابوا لي عراقي هبابة كرت كرتون . . هدية منهم تنسيني ذكرى عراقيني الراح شربت موية . . و لمن لا يعرف عراقيني الهبابة . . أقول ليهو . . عراقيني الهبابة دا . . اشتريتو قبل سنتين . . من سوق الكرنتينة . . اكتشفت فيهو قوة غير طبيعية . . اني لمن أنوم بيهو ديوني كلها قاعدة تنحلا . . و بجيني احساس اني داير أعرس . . لي التعترني . . قمت كلمت الولية . . قلت ليها تعرفي أنو سبب زواجنا هو عراقيني الهبابة دا؟؟؟ . . الولية زعلت كونو يشبهوها بي عراقي هبابة . . مسكينة . . أنا بعزرها لأنها ما بتعرف القيمة المادية و المعنوية بتاعة هذا العراقي . . أصحابي كانو عارفين سر هذا العراقي الفريد . . كانو قاعدين يستلفوهو مني لقضاء حوائجهم . . خسوساً حوائجهم المالية . . وكتو البجيني ضيف و يلبس عراقيني الهبابة دا . . يطلع مني عريس . . من عراقي فيفيد لي بيت عدلو . . الشيء الماغسني و مقطع مصاريني . . اني ما استثمرت عراقيني الهبابة دا الاستثمار الأمثل . . لكن حالف بي جدي الرابع انو العراقي الهبابة الجاني هدية من اصحابي دا . . لو طلع فيهو نفس القوة الخارقة بتاعت عراقيني القديم . . اني استثمرو الاستثمار الامثل . . و أعرضو للإيجار زي فستان زفاف العروس . . و أي واحد داير ليهو عرسة . . يدق سدرو و يدق جيبو حتين يجيني . . حسع انا خايف تكون الولية تكون عملتها و دعت علي عراقيني دا . . باقي هي خايفة علي من العرس . . ما بعيد تكون عملتها . . عارفها هي دعوتها من الخشم لي باب السما.
البارح اتصلت بي السعدية خالتي . . قالت لي القرد بتاعكم قطع حبلو . . و فذّ بالحلة . . ساطا و جاطا . . و قعد يعضعض في الناس من طرف. . عض حاجة محاسن من عرقوب كراعها الشمال . . شوفو القرد الغشيم دا . . ما لقى ليهو مكان يعضي فيهو محاسن دي عيلا عرقوبا؟؟؟ . . حلقومها مالو يا القرد . . كنت تعضيها من حلقوما . . غايتو برضو انا عافي منك يا القرد . . و رضيان عليك دنيا و آخرة . . نعمنو محاسن دي . . مرا لعلاعة و لسانا مطلوق بالحلة . . و ما يندسا في خشما فولة . . أمس قالت شافت فيفيد طالع من بيت ست العرقي . . الدندهوب الوقع فيك شنو يا محاسن . . ان شاء الله العرقي اللقرقروهو ليك بي نخرينك . . فيفيد في السعودية يا محاسن الجابو لي ست العرقي شنو.
الجمعة الفاتت قعدت قدام خشم باب شقتنا . . لقيت الفسحة كلها مليانة عربيات سعوديين . . الله أداكم بي راسكم يا سعوديين . . السعودي من يلدوهو يلقاها مبيضة ليهو في قفص . . البيت و العربية و الشغلانة المجيهة . . السودانيين الله يديهم العافية . . الله حرمهم من الشكل و اللون و الوجه الحسن . . و مرات يشبهوا الواحد فينا بالعبيد الخلوق . . و مالو!!! . . كلو حلو . . احسن ما يشبهوا الواحد فينا بالعبيد اللئيم . . اليومين ديل جاني طبع غريب . . جاتني موجة بتاعت حسد . . بقيت قاعد أحسد من طرف . . النهار كلو أعاين في هديمات السودانيين و أقعد أحسد فيهم في قمصانهم و جلاليبهم . . لكن الليلة نويت أوظف حسادتي دي و أوجهها نحو السعوديين . . هسي شوفو السعوديين المفترين ديل . . يعملوا السبعة و زمتها . . القروش عندهم . . والكعبة جمبهم . . و الله باسطها عليهم . . يسوو الكاكا يمشو الكعبة . . الله يغفر ليهم ما تقدم من ذنبهم و ما تأخر . . احسن حاجة احسد الجماعة ديل فوق عربياتهم الكتيرة دي . . عشان حسادتي دي تدخل عليهم بالساحق و الماحق . . و تبقى ليهم أربحاء و عقاب شهر . . ختيت صلبي في عتبة عمارتنا . . وقعدت أحسد في عرباتهم . . أي كلمة و جملة بتاع حسادة سمعتها . . قلتها فوقن . . السعودي الساكن قصادنا شايفني كل جمعة بقعد قصاد بيتو . . و هو عندو ليكزيس 2005 . . أمس جاء طالع لقاني متفن قدام عمارتنا . . و قاعد احسد فيهو . . قال لي . . يا زول ويش تسوي هنا . . صريت ليهو في حناني . . و قلت ليهو قاعد أحسد . . الرجل بحلق فوقي و مشى . . اليوم التاني الله أداهو عربية مرسيديس آخر موديل. . و انا العبيد الخلوق لسة قاعد متفن قدام بيتو.
بما اني زول ضعيفوني . . كنت بتمنى تقوم لي كريشة اتفاصح بيها قدام خلق الله . . كنت بتمنى تكون عندي كريشة قدر الضربة . . عشان أملص جلابتي و أقعد أمسحها و أدق فيها بي يديني الجوز قدام المرايا .. ذي جار النبي صاحبي . . لكن يخربني . . قدر ما اتلحوستا و رمرمتا و شربت الموية الباردة انتي يا الضعفة أبيتي تروحي . . و أنتي يا الكريشة ابيتي تطلعي . . آخر حاجة اكتشفت أنو الكريشة دي بي ناسا . . يعني ما شيتاً هملة بتقوم لي أي زول . . عشان كدي عمري ما حا تقوم لي كريشة . . السنة الفاتت سكن جمبنا واحد بنغالي . . الله بسعلني . . جاء السعودية ضعيفوني زي حبل الغسيل . . و بطنو مطفوقة لي جوة من شدة الضعفة . . أول ما سكن جمبنا . . اتكيفت . . و قلت خلاس لقيت لي واحد ضعيفوني و بشبهني . . الحاجة دي بسطتني شديد . . و البسطتني و كيفتني أكتر . . اني اكتشفت أنو البنغالي الرائع دا . . شدة ما ضعيف و رقيقوني . . قاعد يلبس مايوه . . ما قاعد يلبس سراويل و لباسات زينا نحنا السودانيين . . بقيت كل يوم . . قبل ما أمشي الشغل . . أعاين بالشبك الفاصل بين شقتي و شقتو . . للمايوه بتاع البنغالي جارنا وهو معلق على سلك التنشف . . و أقول ليهو . . هلوووو يا سيد مايوه . . و انا أكون في قمة السعادة . . لضعفة هذا البنغالي. أطلع الشارع و أقعد أعرض من شدة الفرحة . . وكتي البجي من الشغل . . أمشي للشباك عشان أمسي علي مايوه البنغالي . . مساء الخير يا سيد مايوه . . بعد مرات أعين بالشباك و ألقى مايوه البنغالي مرمي على الأرض . . اقوم أجيب لي عود طويل و أرفعو ليهو في سلك التنشف . . و انا شاعر بالفخر و الاعتزاز لهذا البنغالي النحيف الجميل . . بعد أن أكمل هذا البنغالي شهره الثاني بجوارنا . . بقى يراري من شدة الشحم . . و طلعت ليهو كريشة قدر الزير . . المايوه بتاعو جدعو لي في شقتي بدون ما يراعي لي شعوري . . و مشى اشترى ليهو سراويل ضخمة . . زي السراويل الأنصارية بتاعت السودانيين . . الله بسعلني السروال قدر الخيمة . . الغريب بقى يخت سروالو الوسخان في الشباك الفاصل بين شقتي و شقتو . . الحكاية دي ضايقتني شديد و منعت علي الهواء . . و كنت ماشي أشتكيهو لي ناس البلدية . . عشان يتصرفو مع هذا البنقالي الغتيت . . لكن في رايكم أكتب عنوان شكوتي شنو.
للوصول للجزء الثاني
الجزء الثاني من هترشات فيفيد
