تــــبـــــتــــبـــــــا ....
تــبــتــبــا
محجوب شريف
........................
تبتبا تبتبا تبتبا تبتب
باكر تعرف تقرا وتكتب
وياما ترتب
نحنا بنحلم وكم نتمنى
هي تحقق كل ما تحب
تبني حياتا الند بالند
اي مكانة وخانة تسد
هدهدا هدهدا هدهد
كل الورد ينوم ويفرهد
زي عصفورة تطير وترك
تحبا وتمسك وتاني تفك
سيبا تلكلك سيبا تفكفك
عايزة تنطط
بكرة حترسم وياما تخطط
بكرة حا يبنوا مدائن ضو
مابيعكر صفو الجو صفارة حرب
تشطب من قاموس الدنيا
الضرب الشك الخوف
بينعموا كم بالشم والشوف واغاني الحب
تفتح بابك آمن تب
زي ما النهر بيلقى مصب
اي حمامة بتلقى الحب
تلقى الوردة الندى في الكم
تلقى حداها جناها الام
يرضع صافي حليب الحب
نقدل نحن الجد والعم
تملا عيونا كهارب سد
باباً جاب الهم والزم والصد ينسد
نفرح لما ندمع جد
مد البصر الامل يمتد
العمل يشتد البنا ينتم الغنا يمتد
هدهدا هدهدا
اكتب اكتبي الف المد
حمام وسلام وسعادة بجد
اكتب اكتب ياء المد
سرير وعصير وعبير ينشم
اكتب امتبي واو المد
حقول وعقول تقرا المجهول وكتاب الغد
اكتب علم وسلم
لا حد يئن لا تسمع بم
لا ينزف دم
لا يعجز رد
لا يعجز طب
لا دمعه في خد
تبتبا تبتبا تبتبا تبتب
....................
مع خالص الود
