بعاعيت في حياتنا

[align=justify]
الضناقلة قالوا هم ملوك الميلوحة و القراصة و الشفتنة . . الآخيرة دي عندي فيها شكك . . وحاااات سيدي الحسن لا شفوت و لا شافوا الشفتنة . . و الشفتنة البقوا فيها الضناقلة ملوك دي شفتنة طايرة عليهم . . شفتنة قطاع طرق . . تشتري الكورية من محمد . . بعد ما تدفع ليهو قروشو . . يديك الكورية بدون غتاية . . يقول ليك أمشي اشتري غتايتها من هارون . . دا كلو عشان تدفع مرتين . . و الله دي لا شفتنة و لا حاجة . . دا قلع عديييل . . همبتة بي طرق علمية . . نان كان مشيت لي هارون و قال لي كوريتك دي ما لقينا ليها غتاية مقاسا . . اكون اتمقلبت . . و ركبت التونسية . . و كوريتي اللتغشيت فيها دي بعد دا عيلا اسويها طاقية . .[/align]

[align=justify]كما أن الضناقلة هم من اكثر القبايل السودانية ترويجاً و تسويقاً لمنتجاتها الغذائية . . و ليهم باع طويل في الدعاية و الإعلان . . عشان كدي بقوا مشهورين . . بالقراصة و الميلوحة دون غيرها . . يقال أن أول من أدخل الدعاية و الإعلان في التلفزيون كان ضنقلاوياً معتقاً . . و مختوم ليهو في قفاهو انو ضنقلاوي حفاظاً على حقوقه من الضياع . . عشان بعدين ناس التلفزيون ما يقوموا يستكرتو . . و يطلعوهو ملوص . . يمكن يقولوا ليهو غور كدا و الا كدا . . ما عندك حاجة عندنا . . ناس التلفزيون بعملوها . . قبل كدي استكرتو هاشم صديق في قصايدو . . الزمن دا كلو أبو عركي يغني و يبرطع في التلفزيون . . و يغمت في القروش و يقش في خشمو . . بغم ما قاعد يقولا لي هاشم . . هاشم المسيكين طلع ملوص . . هسي هو حردان و فاتح في أبوعركي قضية تعويض . . انتو بالصح أبو عركي دا فيهو عرق ضناقلة؟؟؟ . .[/align]

[align=justify]حبوبتي الله يطراها بالخير . . كانت من المستنكرين للعلاقة بين طبيعة الضناقلة كبشر . . و الميلوحة التي تُحنط و تُدفت في باطن الأرض لشهور عددا . . و هو ما ترفضه الطبيعة البشرية . . و تستهويه الطبيعة غير البشرية . . كانت بتقول لي . . يا فيفيد . . الضناقلة ديل أبعد منهم . . ديل سحاحير و بعاعيت . . عندهم جزيرة اسمها (جزيرة ناوا) . . مليانة سحاحير و بعاعيت . . قاعدين يتمعرفوا فيها كل يوم الساعة 12 بالليل . . و ما قاعدين ياكلو شيء عيلا تماسيح و سمك . . و نحنا العورا واثقين فيهم . . و مخلنهم حايمين وسطنا . . و يا فيفيد لو لقيت ليك ضنقلاوي طايبو و سالمو . . لكن ما تزعلو . . كان زعلتو بسل ليك ضنبو . . و ياكلك في لقمة واحدة . . الكلام دا حيرني حيرة شديدة خلاس . . بقيت قدر ما اطلع الشارع اقعد اتلفت . . لو شفت لي واحد خاتي ليهو جزلان في جيب بنطلونو الورا يقوم يتوارى لي انو دا ما جزلان . . دا ضنب . . ضنب ضنقلاوي . . اذاً دا سحار يمشي بيننا . . اقوم انكرب فسرع فسرع و ازوغ منو.[/align]

[align=justify]كلبي في البيت . . اليوم داك جاب ليهو كرع خروف . . ما عارفو جابا من وين . . حفر ليها في نص البيت . . و دفنها . . اتذكرت كلام حبوبتي . . و اتذكرت ميلوحة الضناقلة . . قلت يمكن كلبي دا كلب ضناقلة . . يقوم ينقلب لي سحار . . و تاني يحلني الحل بلة . . انتو بلة دا منو؟؟؟ . . و مالو؟؟؟ . . الله يستر ما يكون كان موكر ليهو مع ضناقلة.[/align]

[align=justify]قناة ناس النيل الازرق . . الله يديهم العافية . . عندهم مذيعة . . كانت بتقدم ليها برنامج اسمو (مزازيك) . . اليوم داك سمعتها قالت . . مرحباً بكم في برنامج (بعاعيت) . . النوم طار لي . . و قلت احسن حاجة أقفل التلفزيون . . الحكاية جابت ليها سحاحير و بعاعيت . . المذيعة خشمها قدر مطبقة حبوبتي . . اليوم كلو قاعدة تلملم في خشما . . و انا العوير كنت براقب فيها و مستنيها تقفل خشما . . بس انت يا الخشم ابيت تنجمع . . في النهاية قامت فقعتها ضحكة مع ضيف الحلقة . . بعد ضحكتها دي قنعت من قفلة خشما . . قلت بعد ضحكتها ذات السلم السباعي دي الله اعلم خشمها دا ينقفل قريب . . المذيعة دي كنت زمان مفتكرها. . يا إما شلاليفها قصار . . و الا خشما مقاسو اكس لارج . . لكن بعد السمعتو من حبوبتي دي . . البت دي ظنيتها دنقلاوية.[/align]



[align=justify]فيفيد في 24/12/2005م
مع الاعتذار[/align]

تحياتي ليك فيفد
وما عارف شايلنها مع اخوانا الدناقله كده مالكم
الحته العايز اتكلم عنها هي حكاية الفنان المرهف ابوعركي وللعلم قبل فتره قريت مقال بتكلم عن ابو عركي في انو رجل انساني وانه مازال في بيت ايجار ورغم ذلك عايش ليهو اسر كتيره ده غير انو احيا عدة حفلات خيريه وما بتوقف مع جامعة تطلبو لاقامة حفل مجانا وما اظن اي فنان بعمل العملو ابوعركي وبيني وبينك يافيفد انا قبل كده ضربت الميلوحه حقتهم حاجه ماتخلص بس لما تكون نجيضه واهلنا الدناقله وكل اهل السودان بقبايلو المختلفه عندهم معزه كبيره عندنا

العزيز فيفد ... تحية واحترام

اولاً انا من المتابعين وبشغف لكل ما يخطه يراعك الرائع ... لما تتناوله من مواضيع لذيذه وباسلوب راقي ولغة سهلة .. و وبصورة درامية ... تنافس بها كبار كتاب السناريو

ولكن صديقي ... موضوعك هذا اظن ( وإن بعد الظن اثم ) بانك لم توفق فيه ... وكدي النسالك يا اخوي حبوبتك دي الله يطراها بالخير .. مالها مع اهلنا ديل عشان تزرع فيك الخوف ده كلو ...

وبعدين ياخوي حاولت كتير وبعد كذا مرة من المراجعة للموضوع وحاولت اصل لي شي مفيد ولكن للاسف كل ما كتبته عن اهلنا .. وطبعاً انا دنقلاوي واعتز بهذا برغم من عدم اجادتي للغة اجدادي ... الا انني لم اجد في ما كتبتب غير الاساءة الى هذه القبيلة دون ان تذكر لنا سبب واحد يجعلك ..تنهال عليم هكذا ... وان تصفهم باوصاف من ضمنها البعاعيت والسحاحير ... وجابت ليه كمان ضنب وهذه الخرافات
لا اريد ان ادخل معك في جدل حول من هم الدناقلة كجنس ... ولكن اخي حاول ان تتجنب ما يدخلنا في مهاترات لا فايدة منها ... فنحن في ظل هذا المنتدى كلنا اخوان جمعتنا هذه الرائعة ودمدني بغض النظر عن من اي قبيلة كنا .. او اتينا .. وفي النهاية كلنا سودانين وكلنا اولاد ادم ...
اخي فيفد لا ادري ان كنت انا الذي لم افهم موضوعك ...وتكون انت قصدت شي ... استعصى علي انا فهمه

لك الود مجدداً وفي انتظار تعقيبك

وكن بخير ........

؟؟؟؟؟؟؟؟؟؟؟؟؟؟؟؟؟؟
!!!!!!!!!!!!!!!!!!!!!!!!!!!!!!!

حيرتنا عديل كده..
ما عارف نصنفك تبع ناس منو؟؟؟؟
والاعتذار ده لزومو شنو!!!
شنو يعني تقد ليك عين واحد.. وبكل بجاحة تقول ليهو ... سوررري
على كل رغم أني دنقلاوي
لكن نسيت لبرهة واعتبرتها ابتسامة
في زمن عصيييييييب...
يعني شكرا برضو .. خليتنا نبتسم رغم المرارة
ورغم بعد المسااااااافة..
رغم بعد المساااااافات..

سلامات يا حلوين

ما تزعلوا يا اخوانا

و قصص الدناقلة دي الناس بتعتبرها من القصص التراثية

و حتى الدناقلة لا ينكرون القصص التي تقال عنهم

و الدليل على دا انو اتصل بي ثلاثة من الدناقلة بخصوص الموضوع دا

و وافقوني في ما قلت

بصحة القصص التي تحاك عن سحورية الدناقلة