تراجيكوميديا الضحك والدموع
تراجيكوميديا الضحك والدموع اخر اعمال الرائع هاشم صديق بعنوان انفلونزا الصقور .. نشرت بجريدة الصحافة يوم الخميس 16/2/2006 احببت نقلها علها تعجبكم ...
انفلونزا الصقور
***************
***************
حجيتكم ما بجيتكم
خيراً جانا وجاكم
اكل عشانا
مص دمانا
فات خلانا
................
يا زول ما تكتر
قول الحجوة
ما دايرين كفوه
محمد معانا
ما تغشانا
...............
سمح
اسمعوا
هي قونقوليسه
وعاملة منقه
شينه مره
وعاملة شنه
طار ولمه.
في كلامها
الخير علامه
وبالفعايل
نار قيامه
رقعوها
ركبوها
جته
جبه
سمينة جقه
وقادله ملكه
نافخه لهدومها
وكضوما
كلوشا منفوش
راسها منكوش
صاحية شهرين
داخله كوما
...............
اها
دي شني تبقى
يا مطيميس
ود بلومه
ياخي دي ساااااهله
ما ياها الحيكووومه ؟!!!
***...***...***...***
عطسه ثانية
**********
..**..**..
الذاتية
*****
انحنا زحفنا
وكل العالم ما بوقفنا
استوردنا
حديد ياباني
استحسنا
قمح نصراني
( اتسحسحنا )
لبان نرويجي
اتمسحنا
كريم دنماركي
اتستفنا
عذاب سوداني
اتقاسمنا
نبق ايراني.
استوردنا
بخور اسباني
واستصحبنا
طلح براني.
استحسنا
كلب امريكي
واستفضلنا
كديس بريطاني.
استوردنا
خروف ايرلندي
واستعجلنا
( سماد ) يوناني.
استلهمنا
خطب من مالطا
واستصحبنا
ضمير ( كوزاني )
...................
استوردنا
تلج من كندا
واتدينا
( مدمس ) غاني
استنفرنا
سيوف من بورما
واستعجلنا
كلبش انساني
................
اتعاقدنا
مدرب هندي
واستصحبنا
شُراب اوغندي
واستفضلنا
كفر صومالي.
استحسنا
قُلل كوبية
استوردنا
( فلل ) بوذيه
استصحبنا
تيوس تركيه
اتهافتنا
قرود كينيه
اتداولن
بِنس روسيه
استعجلنا
( ودك ) الماني
آآآآآآهـ يااااني
استوردنا
قطن سوداني
...................
فلناكل مما نسمع
ولنطرح مما نجمع
ولنخمش مما نلبع
ولنسمن مما نبلع
*******
انحنا ولاد
الجوع والمحنه
انحنا الفقرا
وسرقوا قمحنا
خريفنا الرازه
واحلامنا حرازه
مخاصمه سمحنا
عطسة ثالثة
************
..**..**..**..
الاغاني
******
زمن الغنا
العولاق
صبح الطرب
دقداق
حتى الاسامي
تميل
عشمانه غرب النيل
كوكو سن الفيل
كباشي ود صارقيل
.................
يا مصنفات حي ووب
يا لجنة قلنا الروب
ما سمعتو
( بت عنتيل ) ؟!!
بتغني نص الليل
يا شوشو لايف بوي
اركب عديل ركشه
يا فقري .. يا شطه
نتلاقا في الكبري
شان نرسم الخطه
تمشي وتقابل ابوي
يا شوشو قرر
هووي.
.....................
يا لجنة الاشعار
يا لجنة الالحان
ما فيش حقوق انسان؟؟!!
..........................
أنا راكب الدفار
اسمع ( سماح تُرعه )
اركب كمان تكسي
اسمع ( خميس نقعه )
او افتح الرادي
يفلقني ( بالمنقه )
اتحاوا بالتلفاز
القا العمم واقعين
الربه زي تمرين
اتنين يغنو انين
اللبعه باللبعه
والبادي ( ود بنزين )
...........................
اصحا الصباح
نعسان
اقرا الجرايد اموت
امشي الشغل
مهموم
ضبلان تقول هلفوت
ادخل لجمر السوق
يبلعني زي الحوت.
اشرب عصير ليمون
القا الغنا الربراب
لاحقني بالدراب
فالقني بالنبوت
................
ارجع لسجن البيت
افتح اذاعة ( جيم )
القا المذيع طربان
من صوت
( منال برسيم )
ويسال كمان
فرحان
عن ( دور غنا البنوت )
..........................
انا امشي وين
لي وين ؟
اطلب لجوء
للصين ؟!!
.................................................. .........
................ القصيدة طويله وللعطسات بقيه .. سوف اعود اليها لاحقاً ........
مع محبتي ........
