رحلة زيارة وسياحة في السودان

كيفكم يا شباب،

عايز أسألكم سؤال..

مثلا واحد ما شاف السودان في عمره كله..
وعايز يمشي يشوف السودان يزور الأهل يتعرف عليهم..
وبعد ذلك القيام بزيارة سياحية مثلا لمدة شهر كامل..
ماهي المناطق التي ترون أنها تستحق الزيارة وتقترحونها ليمكن زيارتها.
.

ياخواجة الزمن ده ان ماختيت البياض الوداعية مابترمى الودع ، دحين رسل لينا دولار حار يادوب عملوهو وبنوريك تمشى وين بعد داك .
طبعا كسلا وجبل توتيل نمرة واحد .
الشرق عموما فى الخريف جميل وبديع.
جبل مرة ايضا ساحر ، بس ماعارف التدابير الامنية شكلها كيف مع الحرابة المدورة .
منطقة البجراوية غنية بالآثار التاريخية.

شكرا كثير يا أبوبكر على أقتراحك للمناطق التي ذكرتها..
وسيتم تقديمها وتزكيتها للشخص الزائر.
طبعا أخوك الخواجة السودان دا ما ناقش فيه أي حاجة
يعني ما كنت بسافر في الداخل كثير.. ومعرفتي محصورة فقط بين مدني والخرطوم
وسنار علشان كدا ما قدرت (أفتي) أو أعطي إقتراح للمناطق التي يمكن زيارتها..
تقول لي جبل مرة.. غايتو الشخص السائح دا إلا يبقى جانجويد علشان ما يصل هناك..
ومسألة البياض اليومين دي ضرورية خاصة من الناحية الأمنية..
على الأقل ست الودع تشوف ليك (السكة).. أنا ما عندي مانع أدفع بياض
بالدولار.. لكن إنت نسيت الدولار في السودان قيمته نازلة يعني ست الودع حتخسر.
وتقعد تقول ليك (يا حليل الريال أبوعشرة)..

الأخ العزيز / عزيز ..

قريبا جدا سيتم انتاج واخراج فلم توثيقي عن السياحة في السودان
وانشاءالله بمجرد الإنتهاء منه سأرسل لك نسخة كاملة منه ..

لك الود ..

العزيز الغالي عم عزيز

طبعا زي ما قال الغالي أبوبكر حامد

كسلا وجبل توتيل وبوصيك على حته اسمها الرميله في خشم القربه دي حتى بقى خليها سااااااااااااااااااي

على امتداد نظرك ما بتشوف غير الخضار وكمان بورسودان لكن بعيد عن فصل الصيف

وتاني عندك القضارف ورمال الأبيض .............. ديل أنا شفتهم بأم عيني ويسنحقو الزياره خاصه الرميله ( طبعا دي برنامجي الثابت في الاجازات)

على العموم يا حبيب السودان غني بي خيراتو وانشاءالله يجو باقي الشباب ويروك الحاصل

وليك فائق الحب والتقدير