كشكول ود مدني

تعالو معاي

فضفضوا مواقفكم الطريفة

والذكريات والقفشات الحلوة في ود مدني

أهلا بكم :



http://www.thehiddenroom.org/b3ta/rain.gif

حريقة

أشهر سمسار في ود مدني

خلف ظرفاء ود مدني زراع أطال الله عمره وغيره

موجود في كل برنده في سوق مدني الكبير

ويعرف وبالتفصيل متي يحضر المغتربين للمدينه ويكون لهم بالمرصاد 00 ويبدأ موسمه ابتداء من شهر مايو من كل سنة وتنتهي
في سبتمبر حسب قوله !
وأنا أحرص في كل إجازة لي أن يكون بجانبي بعد ترضيته لأستمتع بقفشاته وأخبار المدينة

يعرف ودمدني بيت بيت وكل من هب ودب يثمنه

يعني كان لقي ليهو غنمايه ساكت ماشه يقول ليك دي سعرها كده

يحرضك بوجودك في المدينة وأن لا تفكر بالخرطوم بتاتا

يقول لك مشروع الجزيرة خلاص بنتعش في اليومين ديل
والمطار وصلت معداته في بورتسودان قادمة من النرويج ومكانه شرق حنتوب !

لو جاتك ملاريا يقول ليك عليك ( بالعتي ) أو أمشي الدباغة أكويها بالنار !
وتأكل بليلة اللوبيا العدسي باستمرار وتشرب العرديب وتأكل الموليته !!

بعد افطارنا في يوم جميل بالغيوم عند عمك الفوالي في فبراير الماضي

وجدنا اتنين من أبناء شرق النيل كان والدهم توفي عليه رحمة الله قبل مدة
يتغالطون في مكان قبر أبيهم الذي دفن في مقابر ود مدني 0

وكان خلافهم في أن القبر الذي ذهبوا اليه لم يكن هو بالتحديد فالتفت اليهم حريقه وكانوا من معارفه :

انتو أبوكم ده 00 دايرين تدوا الفاتحة ولامصاريف !

ههههههههههههههههه :D:D

قمة في الامتاع والظرافة وسرعه البديه لك الشكر عم تنقو علة هذه اللفته الحلوة منك

شكراً عمك تنقو لتطرقك لموضوع اشتهرت به ودمدنى وتميزت به عن سواها من المدن فالتعليق الساخر تجده فى السوق وتجده فى الإستاد مع جيركى وجبر بل تجده فى المقابر مع رجل البر شيخ العرب تغمده الله بواسع رحمته و أثابه الله عنا خيراً بقدر ماقدم من احسان وأزيد .
أقترح إفراد مساحة للطرائف بهذا المنتدى علها تغسل عنا بعض الأحزان ، وأبدأ بهذه الطرفة وكان مسرحها حى الهوارة مطعم حاجة زهرا وتصادف وجود الصاروخ وبعضاً من رفاقه من حى المدنيين وكانوا بصدد دفع حسابهم بعد تناول العشاء ودار الحوار التالى بين صابر والصاروخ:
الصاروخ : أها حسابنا كم ياصابر.
صابر : طيب عندكم 4 فول - 3 طعمية - 2 سلطة - 8 بيض
الصاروخ : 8 بيض أصلو نحن اتعشينا ولاخبزنا
هنا انفجر الجميع بالضحك ومضوا فى سبيلهم حامدين للمولى أن أسكنهم مدنى الجميلة معنى ومبنى.
ود الماذون

هههههههه

خطير عمك صابر

وشكرا للمداخلة يا ابوبكر وفي انتظار المزيد

وحلوه ، 8 بيض دي

حدث ذات يوم بمقابر مدنى والظلام الدامس يلف المكان فأحضر أهل المتوفى مولد كهربائى " جنريتر " ولسبب ما تعطل الجنريتر فأقترح البعض عمل مجرى فى الأرض وسكب الوقود من الجنريتر وأشعلت النار للإستعانة بضوئها فى حفر القبر وبينما الجميع منهمك بالحفر إلتفت شيخ العرب لجثمان المتوفى وخاطبه بصوته الجهورى قائلاً :" الله إستر عليك شايف نارك ابتدت من هنا " .
وهنا انفجر الجميع بالضحك بما فيهم أهل المتوفى وتلك كانت إحدى وسائل التعزية التى يقدمها شيخ العرب عليه رحمة الله لأهل المتوفى إضافةً لحفر القبر دون أجر اللهم إلا أجر الآخرة والآخرة خير وأبقى.

ود الماذون

الله يخليك يا ود المأذون
وشكرا لهذه الطرائف الرائعة روعة أهل مدني
وعمدانها أهل الخير

شيخ العرب الرجل الزاهد الكريم العابد المحبوب لدي كل أهل مدني
ولا ننسي له خفشاته في أشد المحن وهي شيمة الصالحين

الفرح والحزن متساويان عندهم !

حريقة السمسار عرض ليهو بيت يتكون من غرفتين وبرندتين لواحد من اخوانا مغترب في السعوديه

قال ليهو البيت ده بي كده ! وحدد ليهو السعر

أخونا قال ليهو السعر ده كتير والله وأنا مشيت الحج السنة واصحابي في مكه قالو لي الأوطين والبرنتدين بي كده في مدني 00 وأقل من سعرك ده بي كتير !
وبعد شد وجذب حريقه عرف الزول ده نط !
التفت قال ليهو :

أسمع يا اخي مكه دي فيها خلف خلاف !

والله قفشاتكم جميله
بمناسبه الصاروخ:::: في عيد الضحيه طبعا الناس بتشتري الخروف من القبه والزريبه عمك عشريه الله يرحمه كان لابس اسود في اسود واشتري خروف لونه اسود وفيه بقع بيضاء وجي ماشي لبيتهم وسايق الخروف قدامه بحي المدنين وكان الصاروخ واقف وشاهد الموقف وقال لعشريه اه الكوره الليله وين الحاكمه دي؟
طبعا عمك عشريه رجع الخروف خاف من العين وبدله

ههههههههه

حلوة لكن يا أمير

وبمناسبة اللون الأسود والعين
ذكرتني نكتة الكديس الربيان ولونه أسود نايم في كرسي الصالون
جا واحد عينو حارة شديد ومعروف لدي الجماعة
عاين للكديس كده وكان ما شايف ضنبو

قال ليهم :

يا اخوانا التلفون مبروك

أنقر تاني الكديسة قامت !!!

قبل حوالى سبع سنوات إشترينا خروف الضحية وزارنا أحد أصدقاء شقيقى عثمان وسالنا إشتريتو الخروف بى كم فأخبره عثمان بالسعر وكان 165 ألف وهنا انفجر الرجل ضاحكاَ وهمس لعثمان " كان تكملوا عليها وتشترو أرض بالشرق" .

ود الماذون

ههههههههههه والله ياود المأذون الراجل ليهو حق 00 زمان اهلنا قالو اللوري
ب ح سفنجة من الورقة تسليم بورتسودان بي الفين ونص تصور أكان عندكم سعر الخروف ده زمان !

القفشة الآتية فيها بعض الغرابة إذ حدثت داخل المحكمة الشرعية بمدنى وذلك أمام مولانا عركى وكان النزاع بين رجل وطليقته حول تكلفة إنشاء مبنى فى بيت الزوجة ، ويتواجد داخل قاعة المحكمة أطراف النزاع والمحامين إضافةً لحاجب المحكمة ويدعى إدريس وهو من عيال شرقنا الحبيب وأهم مايميز إدريس هو الشلاقة بكل معانيها ، وعند استجواب أحد الشهود أفاد الشاهد أن المدعى عليه تكفل بمنصرفات البناء فهو على سبيل المثال أحضر أربعة أدوار رملة ، وهنا فاجأ إدريس الحضور موجهاً سؤاله للشاهد " الرملة باللورى ولا بالقليبة " وهنا صعق الجميع بإستثناء مولانا عركى " أدب متصوفة " وقد تواصلت الجلسة وعند الإنتهاء من استجواب الشاهد وجه مولانا عركى سؤاله للحاجب قائلاً :

" أستاذ إدريس عندك سؤال للشاهد " وهنا ضجت قاعة المحكمة بالضحك إذ السؤال يوجه عادةً لمحامى الأطراف غير أن مولانا عركى وجهه لحاجبه إدريس الذى نال من القاضى لقب أستاذ.

ود الماذون

من الطرف الجميله حكاها لي امس الفنان الحردلو
قال وبدون ان اذكر اسماء في واحد من مشاهير مدني سافر مع احد الفنانين الي سنار لقيام حفل هناك واخونا بدا يشرب في العرقي من خروجهم من مدني لما وصلو سنار نزلوه بالعافيه سكر لط المهم عشوه معاهم بعشاء الفنانين ورجعوه الحافله تاني عشان ينوم لما الحفله خلصت وهم في مشارف مدني ماعرفو يودو اخونا وين ودخلو بالحله الجديده وجدو كسار واقف في امام بيتهم وقفهم وقالو ليه خلي الزول ده ينوم عندك وكانت الساعه 7 صباحا ؛ كسار طلع عنقريب في الحديقه ونوم اخونا؛
وفي العصر كسار جاب الخرطوش ويرش في الحديقه صاحبك قام من النوم شاف كسار قدامه قال ليه الجابك سنار شنو ياكسار

سمو الأمير ......
حلوة وملعوبة.
على ذكر المبدع محمد مصطفى الحاردلو ماهى أخبارو والله ياأمير فى بالى كتابة بوست عن المظاليم فى دنيا الفن وفى بالى الحاردلو الذى تربطنا به وشائج القربى إضافةً لصداقته المميزة بعمى د.محمد الأمين حامد وهو معكم بالطائف.
ود الماذون

ود المأذون

والأمير

حكايات وذكريات وطرائف 00 روعة

أتحفتم المنتدي بهذا الابداع


شكرا للتواصل وفي انتظار المزيد

واحنا صغار

خاشين فيلم جانوار

طبعا هو اشتغل في سينما الخواجة سنة كاملة

في يوم خاشين الدور الاول من الساعة ستة مساء
الصف قطر بس

في حلبي جايب ليهو عسل انجليزي في علب مرسوم عليها الاسد والله نسيت اسمه وكان مشهور في السودان 00 والعسل ده علبه ( طاقة ) يعني Expiry date مدته منتهيه وشايلو في قفة وقاعد جنب ست التسالي مع مدخل باب السينما وبكورك 00 العلبه بي قرش ونص بس !
طبعا ده زمن خرافي بالنسبة للجيل الحالي

حيدر قطامه الله يرحمه كان في الصف
في واحد من العرب ديل 00 شلقان
قام قال للحلبي 00 اسمع الواحده بي قرش ونص 00 أديني عشرة

قام حيدر قطامه قال ليهو 00 عشرة !

علي الطلاق واحده تجيب أجلك !

إطول عمرك ياعم تنقو .

شقيقى الأكبر محمد " كوارة " مشهور بعشقه للأهلى مدنى ويتعصب أحياناً ويشتم الحكام ، مما يعرضه للطرد من الإستاد بواسطة ضابط إسمه حسنين من شرطة أمن الملاعب ، وفى إحدى المرات ذهب كوارة للإستاد وأعطى موظف التذاكر مبلغ ألف جنيه ، وهنا احتج الرجل بإعتبار قيمة تذكرة المساطب الجانبية ألفين جنيه وهنا أصر كوارة على طلبه قائلاً :
" أقطع لى شوط واحد لأنو الثقيل ده ما ح إخلينى أكمل الكورة " .

ود الماذون

عمك تنقو ..............
وين مختفى
عاوزين نسمع عنك
ود الماذون

هههههههههههههه

حلوة منك يا عمك تنقو

الخال يعقوب " الشيخ " مشهود له بسرعة البديهة .
يحكى أنه وإبان عمله بالرى وكان هنالك كشف ترقيات سنوى وتتوقف الترقية فى المقام الأول على تقرير مديرك المباشر ومدى تقييمه لمستوى أداءك
وعند مطالعة الخال يعقوب لكشوفات الترقية لم يجد اسمه بين المترقين ، فذهب يبحث عن تقييم الأداء من خلال تقرير مديره ، وهنا فوجىء الخال يعقوب بالتقرير الذى انحصر تقييمه فى عبارة " وسط " ، فما كان من الخال يعقوب سوى اقتحام مكتب المدير ، وهنا تفاجأ المدير بإنفعال يعقوب الذى لم يترك له
مجالاً للتوضيح إذ ابتدره قائلاً :
" ياخى كل مرة تقديرى وسط ، شنو الحكاية أنا موظف وللا مجلس بلدى " .

ود الماذون

مشكورين أخي أبوبكر علي هذا التواصل الجميل
في كشكول ود مدني

ونرجو المزيد من هذه الروائع والابداعات

ونواصل 0000

قالوا سنطه
الله يطرا بالخير مؤجر ليهو كشك لي واحد ببيع فيهو السمك !
كل يوم سنطه ناطي بالفيزبا بتاعتو ويجي ليك للراجل في الكشك
إيه يا معلم
الراجل المسكين يومي يدي ليك سنطه 00 سمكتين

قام الراجل زهج واشتكي سنطه لي زراع
زراع جا ولبد ليك في المحل تاني يوم

جييييييييت سنطه جا بالفيزبا

إيه يامعلم !

بس قام ليك عليهو زراع

أسمع يا سنطه الراجل ده إنت مؤجر ليهو الكشك ولا البحر !!

ههههههههه حلوه

حلوة خالص ياعم تنقو.
على سيرة زراع يحكى إنو زراع اختلف مع واحد من بياعين الشاى فى السوق الكبير وكان معروف عن بياعين الشاى التأشير فى جدران البرندات لزوم حساب مديونية كل دكان ، ويحكى أن زراع غضب من أحدهم وهدد بطلاء جدران السوق بالجير وكده يروح الحساب على أخونا بتاع الشاى.


النكتة التانية لزراع مع سواق كارو من النوع الذى تجره الحمير وقد صاح صاحب الكارو فى زراع مستنكراً عليه عدم إفساح الطريق للكارو وهنا رد زراع غاضباً:
إنت ياخوى قايل نفسك سايق عربية
إنت بنزينك قش ... وفراملك بس .

أيام الثانوية في مدني بنات عندنا شلة جنها ضحك 00 غير الضحك ماعندنا حاجة
ويومنا الما نلقي ضحك نمشي نشتريهو ( في الداخلية ) من التايه الله يطراها بالخير وهي بت عرب اصيلة من ضهاري الجزيرة والنكته عندنا معلقة في حبل بس تتناول !
زميلتنا في المزاد توفي والدها عليه رحمة الله ومشينا العزا والشلة كلها تضحك قبلي ما ندخل نعزي !
حبينا نخلق أي حزن ونطرد الضحك ما قدرنا 00 المهم دخلنا فاذا بها نفاجأ بالتايه وهي تسكلب ( الليلة ووب علي ) 00 واردفتها بكلمة ( الفاتحة يا شباب )
ومات الجميع من الضحك حتي اهل العزاء !

هههههههههههههههههههههههه
مرحب عمك تنقو وتسلم على البوست الرائع والذكريا ت الأروع وقفشات أهل مدنى المبدعين ، وأذكر للرائع زراع هذه الطرفه ، أنه كان فى الصباح يذهب للسوق الكبير ويمر على الجميع وهو يشاغل وينادى وعند مروه على زنك اللحمه وكالعادة اليومية له يذهب لهم ويأخذ لحمة الحلة للقعدة بالمساء وبقية أغراض الحلة ، وفى أحد الأيام ناداه ........ الفادنى الجزار وقال لزراع عندى إبن أختى كان فى ليبا ووصل وعايز أعمل ليه قعدة اليوم وبنجى عليك بعدين وهاك اللحمة دى جهز لينا حلة كاربة وفى المساء ذهب الفادنى وإبن أخته لزراع وجلسوا معه ودارت الكأس وعندنا سكروا قام إبن أخت الفادنى بمشاجرة زراع وبعد شد وجذب شديد وعراك أخذ الفادنى إبن أخته وخرج وفى صبيحة اليوم الثانى وعند مرور زراع على زنك اللحمة ناداه الفادنى فرد عليه زراع لو جايب لى ود أختك دا أدينى مزتك لزق وشرايط .
:D :D :D

تحكي لنا التاية في أيام الثانوية ويالها من >>زكريات - يأن أول أيام لها في مدني >زهبت السوق لتشتري لها بعض الاغراض وهناك من الحوامة عطشت ودايره تبل ريقها بي عصير وجاءت علي استحياء جنب كشك الحاجه البارده ونادت :

هوي يا اللخو
عليك الله عندك موية شربات !!

أديك العافية يا مهيرة والله باين عليها التاية دى كانت برنامج ممتع ليكم ، أهل العوض حلوين والطيبة والبراءة فيهم زايداهم نكهة حلوة وسجيتهم وروحهم الشفافة ، مشكوره يا مهيرة وواصلى فى قفشات التاية .:D :D :D

زراع قاول جمعة " جمعة الفار أسم الشهرة" عشان يعمل ليه ضفيرة بالطوب " ما بالسيراميك " في البيت وجمعة قام بالواجب وأكتر عشان خايف من لسان زراع " وطبعاً جمعة ده دفعتنا في مدني الثانوية" وبشتغل بناء في الحلة الجديدة وراجل فوراوي لطيف وياريت يكون واحد حضر العرس بتاعه في الحلة ،، المهم زراع غنج علي جمعة وما أداه حقو وجمعة قام زاع ليك الموضوع في الحلة بأنو زراع ما أداه حقو " ونيتو أسمع ليه قفشة من زراع بدل المقاولة بتاعتو ،، وجمعة الفار كل ما يشوف ليك زراع يزوغ عشان عارف لسانو ويوم زراع قبض ليك جمعة بتعشى في دكان في الحلة ومعاه الشلة بتاعتوا قام زراع عاين لجمعة " وطبعاً بتاع الدكان عارف الموضوع " عاين لجمعة وعاين لبتاع الدكان والجميع منتظر ردة فعل زراع فقال لبتاع الدكان بأدب شديد عليك الله يا مصطفى من عندك سم فار بتاع الدكان أستغرب شديد قام زراع قال ليه والله عندي فار الأيام دي مجنني وعاوز ليه سم يسكتوا

أيام الثانوى العام كانت حلوة والحياة جميلة ، وأذكر كنا فى مدرسة المؤتمر المتوسطة فى بانت وكنا أكثر شقاوه ، وكان ممنوع الخروج فى فسحة الفطور للشارع يعنى تفطر داخل المدرسة ونحنا بنحب فتة الفول من مطعم عمك السر فى سوق بانت ربنا يرحمه فكنا بنط الحيطه ونخرج نفطر فى سوق بانت بمزاااااااااااج ونرجع ومعى أصدقائى بدرالدين محمد الأمام من حى القبة وسعد يعقوب من الدباغة وفى يوم رجعنا من الفطور وكانت الحصة الثالثة تاريخ مع أستاذ التاج هليس ربنا يرحمه ودخل الفصل قبل وصولنا وقام كل الفصل قيام للأستاذ التاج وطبعا نحنا لما نرجع من الفطور ما بنقدر ندخل من الباب لأن وضع المدرسة فى شكل دائرى ولو حاولت الدخول بكشفوك أنك كنت خارج المدرسة عشان كدا كنا بنط من الشباك ، ولحظنا السيىء اليوم داك أستاذ التاج دخل الحصة بدرى ولا نحنا تقلنا فى الفته ماعارف أها نطه بدرالدين قدامى من الشباك طبعا تخيلوا معى شكل النطه تمسك فى حلق الشباك وتنط بعد الدرجين الأوائل بعد الشباك يعنى فى الممر وما كنا متخيلين أستاذ التاج داخل الفصل لأن شكل الطلبه جايطين وبعده أنا نطيت وأثناء وصولى الأرض أسمع ليك طاخ كف قوى شديد وطبعا المرحوم أستاذ التاج كان أشولنجى فكفه كان له صدى فى المدرسة وبعده أنا أدانى كف ما بنساه حتى اللحظة الله يرحمه فعندما سمع سعد يعقوب الكفوف وضحك الطلبة رجع وجاء من عند الباب الرئيسى وفى تلك الأثناء كان أستاذ التاج يوبخ فينا أنا والأخ بدر الدين أمام السبورة وأمام الكل ويقول صعاليق عاملين كاوبويات بالشباك كمان طيب بوريكم الليلة وفى تلك اللحظات وصل سعد ونقر الباب ورد عليه أستاذ التاج بكف من النوع الأصلى و رد سعد على الأستاذ يا أستاذ لكن أنا جيت بالباب وهنا رد أستاذ التاج لو واحد نوى الحج ومات ربنا بكتب ليه حجه . وقام خلى الحصة وساقنا مكتب الساتذة فى آخر الفصول وطلب من عم الريح الغفير بتاع المدرسة كمية من سياط النيم وعندما دخلنا المكتب وجدنا أستاذ ميرغنى وداعة جالس بصحح فى كراسات الطلبة وأستاذ التاج يسب فينا فقال له أستاذ ميرغنى ديل من أميز الطلبه عندى فى الفصل فرد عليه ديل صعاليق دخلوا على الفصل بالشبابيك يا ميرغنى . ووصل عم الريح بالسياط وأخذنا جلده لن أنساها طول عمرى .

ناس النسيج طبعاً بشتغلوا ثلاثة ورديات ويوم في أيام البرد الشديد زراع جاي من حفله ونزلوه قريب للبيت الساعة كانت أربعة ونص صباحاً فهو داخل ليك على الزقاق بتاعم كده لقى ليك جماعة تحت الحيطة ومعاهم بنات واقفين في السقط الشديد داك هي بسم الله ما لكم ياجماعة إن شاء خير في زول مات في الفريق ولا في زول عيان مالكم واقفين في السقط ده قام واحد قال ليه منتظرين بص الشغل يازراع قاليهم شغالين وين أنتو وده شغل شنو ده البقومو ليه قبل حاج أبكر بتاع الجامع ده واحد قاليه شغالين في النسيج يازراع وده أكل عيش فقام زراع عاين ليه كده قال ليه كان دايرين تاكلوا باسطة كنت عملتو شنو يعني

الأخت مهيرة ... شكراً لك وللتاية ونرجو مدنا بالمزيد والتاية دى باين عليها مسرح متجول.
أبوريلان ..... مدير المؤتمر على أيامكم كان الزبير تميم الدارولاواحد غيرو ، كان عندكم مدرس إسمو جونى ، ميرغنى وداعة من ظرفاء المدينة وتربطه بشقيقى صداقة حميمة .
الرشيد ...... ماشاء الله عندك حصيلة وافرة من نكات زراع ، انت متأكد ساكن حى البان؟ سؤال بريئ .
ود الماذون

ههههههه

الأعزاء :

Myrelan
Rasheed
أبوبكر حامد

شكرا لهذه الذكريات الجميلة وهذه الطرافات الحلوة وقطعتوا مصاريني عديل !

وبتاعت الباسطة خطيرة يا رشيد
ومبدع يا Myrelan

والشكر موصول لأستاذنا الكبير ( عمك تنقو ) 00

هههههههههههههههه

أديك العافية يا مهيرة والله أديتى للمنتدى نكهه بمداخلاتك الحلوه .



بعض الذكريات من السودان – ود مدنى – الدباغة – نادى الموردة الرياضى بالدباغة وطبعا خلف النادى حى الفلاته وهم ناس ظريفين وحلوين وكلامهم جميل شديد وهذه الذكريات فى أيام الإنتخابات وكان مرشح الدائرة الغربية السيد/عوض صالح على والرمز الشجرة على ما أعتقد فتم دعوة الفلاته فى نادى المورده حتى يشرح لهم خطة عمله بعد الفوز وحضر الفلاته كلهم فى النادى وحضر عوض صالح وصعد المنبر وخاطبهم بمشروعاته لحى فلاته بعد الفوز ووعدهم بكل شىء وبعد أن ألقى كلمته قام أحد برفع يده وأذن له عوض صالح بالحديث فقدم نفسه ( مظبط مدنكل الأرنؤطى ) من سكان الإمتداد الغربى شوف يا عوض صالح طبعا الكلام بلغة الفلاته نحنا قبل كدا نزلت عبدالمنعم عبدالعال وما عمل لينا حاجه بس أنت وعتنا شوف نحنا مشاكلنا بتتلخص فى ثلاثة أشياء مهمة ( الكهرباء – والمويه – والنور ) نمسكها مشكلة مشكلة :
1/ مشكلة الكهرباء – نحنا والله ناس الكهربه ديل عاملين نايمين من زمان ختوا العواميد وما جونا تانى قايلننا نحنا ما سودانيين والله نحنا بدل الجنسية عندنا جنسيتين .
2/ مشكلة الموية – والله يا عوض صالح نحنا بنعانى من مشكلة الموية شديد – والله هسه حاج أبكر العجوز دا بشيل قيروانه بتاع المويه ويمشى المقابر يشيل مويه من الصهريج بتاع المقابر والله نحنا مضايقين الميتين فى مويه الشراب حقتهم .
3/ مشكلة النور – والله ظروف الحياة ومتطلبات الحياة اليومية تضرانا نمشى جوه البلد ونرجع وبعد تنزل من المواصلات بتاعت الدباغة دى وتشق ميدان الموردة فى الليل وبينما أنت ساير فى الظلام الدامس ومن هيس لا تعلم ولا تدرى فإذ بك عكاز فى رأسك فكيف تتصرف ؟؟؟؟

طبعا أهم شىء ثلاثة مشاكل – كهرباء وموية ونور هههههههههههههههههههههههههههههههههههههههههههههه

Myrelan تشكرات ألى الهاجات الهلوة الزى باستة سلا دى.
الفلاتة فى مدنى مميزين جداً عن غيرهم من فلاتة السودان .
حى الدباغة حى عريق وشامل لكل ألوان الطيف الأثنى .
خالنا يعقوب كانت لديه مقولة مشهورة أو رهان على أن من يستقل مواصلات الدباغة ذهاباً وإياباً فسيجيد الرطانة لامحالة !!
الفلاتة تربطهم علاقة محبة بالشيخ مدنى السنى ولعلنا نلاحظ بعد انقضاء الإحتفال بالمولد النبوى يبدأ المولد بعد ذلك فى الإنتقال من ميدان بانت إلى قبة مدنى السنى وهناك تجد الفلاتة بملابسهم الزاهية يعبرون عن أروع إنسجام بين طوائف المجتمع فى توائم لايعرف التمييز العنصرى .
ود الماذون

أديك العافية ود المأزون الفلاته وخاصة فلاته الدباغة ناس أخوانا وأصدقاءنا وبنعزهم شديد وتربطنى بهم صداقات حميمه

الغالى ماى ريلان .................

علاقاتك مع الفلاتة هى دليل وعى متقدم بالإنسان كقيمة كرمها الله بالإستخلاف فى الأرض ، والتواصل الإنسانى مطلوب دون التمييز بين بنى البشر بسبب العرق أو اللون أو الدين أو الجنس .
ولو أدرك الجميع ذلك لكفينا أنفسنا شر الإقتتال الدائر فى الجهلت الأربع للسودان ، نرجو أن يكون الجميع قد وعى الدرس .

ود الماذون

جابو لينا أستاذ بتاع إنجليزي في مدني الثانويه كان معار في ليبيا 00 يوم كان في محاضرة عن ليبيا وأسهب في وصف الشعب والمدن والاقتصاد والعلاقات وحكم الادريسي والعمالة هناك وغيره وكانت بحق محاضرة قيمه !
وجاء دور الاسئلة وأول ما رفع يده أختنا ( التايه ) !!

وكان سؤالها :

يا أستاذ ليبيا فيها فلاته ؟

ولم يستطيع أستاذ بشير تكملة الندوة نسبة لنوبة الضحك التي أصابته !!!

الاخوه الاعزاء لكم التحيه وانتم تمتعوننا بهذه النوادر الرائعه.. شكرا جزيلا

عمك تنقو علي هذه الفكره الرائعه...

الاخ ميرلان اظاهر انك كنت ولد شقي زمان ..

الاخت مهيره صاحبتكم التايه دي ما علمتكم شويه ..


تحاتي للجميع ....