ود المطامير ... ضيف ساخن على الكرسي الساخن

اقتباس:

---

المشاركة الأصلية كتبت بواسطة HaSsOoN

تحياتي ليك ياانسان يارايع وانا من اول ما بدا الكرسي الساخن متابع وشايف الناس ديل ماقصروا تب كفوا ووفوا وواحيك على روحك المرحه وان شاء الله على طول كدا ياود المطامير

---

تسلم لى يا الحبيب وإنت والله ما قصرت
وربنا يديك العافيه وجيتك لى دى اسعدتنى
و لك منى كل الشكر والتقدير والود

اقتباس:

---

المشاركة الأصلية كتبت بواسطة ود المطامير

الله يسلمك ويديك العافيه يا رب
وحامد صاحبنا حلف وعلى رقبتو ألف سيف ما ينزل السودان للعرس إلا والشله معاهو , أنا وأربعه من أصحابنا وفعلاً كان وركبنا طياره واحده وفى مطار الخرطوم كل واحد كسح على أهلو وتواعدنا نتقابل فى حِلّة ناس حامد قبل العرس بيوم وفى اليوم داك سُقت البكسى وبقيت أشاقق بالبلدات وغابات السيال ولون التراب بقى أحمر وظرت قدامى معالم بيئه والله هم أولى بالتمرد , حياه لا تمت للحضاره بِصِله غايه فى البدائيه والبساطه وغايتو بقدرة قادر وصلت ولقيت الجماعه وصلوا كلهم وأكرمونا غاية الكرم هؤلاء القوم الذين يحتفظون بنقاء وصفاء النفوس إلى حد الدهشه أها فى يوم وصلولنا وفى المساء كان فى عرس بالقريه وساقنا حامد ومشيانا للعرس وبس وصلنا أول الدايره وكلنا حرنّا ما عدا حامد ... الدايره ذى شك الكبريت والعريس واقع فى الجماعه جلد والجِلد يلصق فى السوط , بس ربع ساعه ما زدنها وجرجرنا حامد وإتخارجنا وفى الطريق وقعنا فيهو أسئله ..
_ إنت آحامد , أوع يكون فى عرسك فى جلد ؟
_ والله الجلد عندنا أهم من شبكة العروس ؟
وقام ياسر بحرى يطنطن
_ جلد شنو يا حامد ؟ والله دا تخلف عديل كدا .
_ أها يا حامد , طبعاً الضيوف ما بتجلدوهم صح ؟
_ هه , والله ناسنا بتكيفوا لجلد الضيوف كيف جد .
ومعتصم شمّبات قعد يطنطن .
_ والله دى مصيبه , دى وقعة شنو دى ؟
والجماعه قالوا يركبوا عرباتهم ويشتتوا والخواف ربّى عيالو , وقام حامد قال لينا يا جماعه ما عليكم , إنتوا بكره أدخلوا الدايره وتحلفو إلا تنجلدو وأنا طوالى بحلف طلاق ما تنجلدوا وكدا بتكونوا عزيتونى قدام أهلى وكمان البنات بزغرتن ليكم .. وأنا هجت فيهو
_ يا زول الزغاريد تطير, بس أوعاك تنسى الطلاق .
وفى الصباح بقينا نجهز فى العرس وناس الحِله ما صدقوا وجود العربات مره مره يجى واحد ويقول
_ اللخو عاوزين نمشى نجيب الهناى من الهناى .
ويركب قدام ومره مره يمد يدو ويضرب البورى ويتكيّف ,, وأتى المساء والحفله بدت والجماعه وقعوا ليك فى الدايره دق كاروشه بالله العظيم خلّوا الغبار يلوى والجمبك ما تشوفو والغناى يلعلع بالله التقول مغالط ,, كلموهوا لى .. حدسوهوا لى .. أنا يا ناس بريدو ..
وجابو السوط .. ما إياهو الطائع والمرن التقول محرش والدايره هاجت والغبار وصل السحاب والفنان عروق رقبتو إتشحطط .. وبدأ الجلد والواحد فيهم يركز للسوط ولا برمش ونحنا العيون قدر الفناجين والقلوب ذى مكنة لورى التراب وأشر لينا العريس حامد عشان نخش الدايره وعشان الركب ساحت والسيطره مافى دخلنا ونحن نمشى سبعه تمانيه وهم قيلننا بنرقص والفنان قعد يلعلع
_ المغترب أدوهو الدرب ... والبنات يشيلن معاهو .. آاااى ... المغترب حبيب القلب .. آاااى
وياسر بحرى يطنطن ... والله أكان مغترب ما عارف ... والناس طلوا فوق الكراسى عشان يشوفونا ونحن عيونا على حامد ومنتظرين حليفة الطلاق وفعلاً جا وحلف طلاق لواحد عضلاتو قدر كدا وقال ليهو
_ ديل قالوا داخلين معاكم تحدى .. على الطلاق أكان تديهم النجيضه .
وعديت الإجازه وأنا راقد فى السرير وشابك ليك ( أمى )
_ يمّه سوّى لى شوربه .. يمّه سوّى لى شربات ليمون .
وهى تقول لى
_ شهرين والسيطان دى ما بردت ؟ ! .

---

الله يجازيك .... والله انا ضحكت ضحك يقضيني سته شهور وكم يوم ....
انت عارف نفس الفلم حصل لجماعه اصحابنا والله ليوم الليله محاربين العريس والواحد مما تجي سيرة العريس يقعد يحك في ضهرو وعيونو تزغلل .... الله يديك العافية ود المطامير ويجعل الفرحه في قلبك محل ما تقبل يارب

اقتباس:

---

المشاركة الأصلية كتبت بواسطة الشريف الهندي

الله يجازيك .... والله انا ضحكت ضحك يقضيني سته شهور وكم يوم ....
انت عارف نفس الفلم حصل لجماعه اصحابنا والله ليوم الليله محاربين العريس والواحد مما تجي سيرة العريس يقعد يحك في ضهرو وعيونو تزغلل .... الله يديك العافية ود المطامير ويجعل الفرحه في قلبك محل ما تقبل يارب

---

تسلم يا حبيبى الشريف
ونحنا لما رجعنا الإمارات والزمن داك كنت ما متزوج
وساكنين مع بعض خلينا حامد ذى الخدامه يغسل لينا
ويطبخ لينا ونرسلو ذى الشافع
للأمانه .. حامد .. تضعه على الجرح يبرأ فى طرفة عين

عليك الله يا ود المطامير ما تفارق الكرسي ده تب
والله اكان درتو نسجلو ليك باسمك
ونشوف لينا بنبر ولا عنقريب للضيفان والاعضاء الباقيين ...لك كل الود يارجل

لا طالما اتسديتو البطن بااارده ..... ههههههههههه
الله يديك العافية ود المطامير
والله يلمنا بحامد ده مادام عرسو قضى وانتهى ... ياربي ليك الحمد والشكر .

اقتباس:

---

المشاركة الأصلية كتبت بواسطة الشريف الهندي

عليك الله يا ود المطامير ما تفارق الكرسي ده تب
والله اكان درتو نسجلو ليك باسمك
ونشوف لينا بنبر ولا عنقريب للضيفان والاعضاء الباقيين ...لك كل الود يارجل

---

تسلم والله تسلم يا الشريف
وأخوى شبارقه جايى بعدى وهو إنشاء الله راح يمتعنا
بلون آخر من ألوان شرق الله البارد وأنا وهو من طينه واحده

اقتباس:

---

المشاركة الأصلية كتبت بواسطة الشريف الهندي

لا طالما اتسديتو البطن بااارده ..... ههههههههههه
الله يديك العافية ود المطامير
والله يلمنا بحامد ده مادام عرسو قضى وانتهى ... ياربي ليك الحمد والشكر .

---

ولك منه على لسانى
أجمل باقات الورد

السلام عليكم ورحمة الله وبركاته ..... الاخ ودالمطامير لك التحية والتجلة .... انا ضيفة زائرة لمنتداكم ....وعن طريق الصدفه عثرت علي كرسيك الساخن ....واستمتعت بما فيه من سرد ممتع لوقائع حياتك ادامها الله عليك ومتعك الله بها مع ام عمرو .... ودام لك لسانك الرطب والسلام ختام ...ام امجد

جوك حلو لاكين حامد المسكين ده زليتو وشكرتو وقالوا فى المثل .............................. واعتزرلو

اقتباس:

---

المشاركة الأصلية كتبت بواسطة امير عبدالباقي

السلام عليكم ورحمة الله وبركاته ..... الاخ ودالمطامير لك التحية والتجلة .... انا ضيفة زائرة لمنتداكم ....وعن طريق الصدفه عثرت علي كرسيك الساخن ....واستمتعت بما فيه من سرد ممتع لوقائع حياتك ادامها الله عليك ومتعك الله بها مع ام عمرو .... ودام لك لسانك الرطب والسلام ختام ...ام امجد

---

الأخت الكريمه أم .. أمجد
حينما جلست على الكرس الساخن كان شعارى ( الشفافيه المطلقه )
وأنا لا أعرف فى دنيتى شفافيه ورونق وبهاء وسعاده وحبور وهناء غير أم عمرو

أختى الكريمه ... سرنى غاية السعاده أن هناك من إستمتع بشويه من كوم كبير من ما ذكرت لأن ما أتاحه لى الكرسى الساخن ما هو إلا نقطه فى محيط
وتسلمى وربنا يحفظ لك كل غالى للدعوات الطيبات
أخوك ود المطامير .

اقتباس:

---

المشاركة الأصلية كتبت بواسطة mahagoub

جوك حلو لاكين حامد المسكين ده زليتو وشكرتو وقالوا فى المثل .............................. واعتزرلو

---

عمّى الحبيب .. المحبوب
والله حبيتك لله فى الله ساااى .

ود المطامير كيفنك يااخوى والله انا طبعا زعلانه منك شديد لكن دا ما معناه انى ما اسالك دا انا حاتفسح فيك فسحه ما حصلت
حاجه جاتنى لحتدى عندى اصبر بس حاوريك
حسى وينى الاسئله لسه الناس ما سالوك ولا السعال لسه وكتوا ماجاء

ورونى وكتوا متين عشان ابدا والله يسكتنى سااااااااااااااااااااااااااااااااااااااااااااااااا ااااااااااااااى

والله يا ود المطامير دبيب بس
ليك سنة قاعد في الكرسي
بس للامانة منور والله

اقتباس:

---

المشاركة الأصلية كتبت بواسطة مصباحيه

ورونى وكتوا متين عشان ابدا والله يسكتنى سااااااااااااااااااااااااااااااااااااااااااااااااا ااااااااااااااى

---

:D:D:D

بكــــــرة بكــــــــرة

:D:D

الاخ ود المطامير حبابك الله جابك للكرسي الحار دا .
اول حاجة قصة اساميك الطلطاشر ديل شنو انا عرفة قصة عروة امك سمتك عروة لانو ابوك سماك علي ابوه وهي حالفة ماتسميك عليه صاح ولا غلط عشان كدا سمتك عروة .
ثانيا لي عندك طلب لوبيدك حيلة عندي اخي وصديقي وزميل دراستي من اولاد( دلوت البحر )
معاكم بالامارات اسمه / مهند طلحة قسم الباري .
ياريت لو عندك تلفون له ان تخبرني به .
معي مودتي وانا بالرياض والله في بيت العزابة معاي واحد من الشرفة بركات اسمو عمك قاسم الشريف الهندي ومن فصاحتك دي عرفت انو ناس الشرفة ديل كلهم فصيلة واحدة .
واوعدك لي معاك رجعة لانو ماسخنت بيك .
ورمضان كريم

انا لو فى محلك حامد يخدمكم الا ان تعفوه . ده ما سواها فيكم . وادم الله محبتك , وانت جوه الجوه زى ما قال وردى

وتمضى الاعوام وتبقى الذكريات صادقه ونبيله

25-01-2007 الساعة : 12:22 pm #1

تاريخ إنزال البوست في المنتدى ... الجديد شنو ؟؟؟

ود المطامير ألف مرحب بيك في السخانة دي وربنا يديك العافية
ويقدرك ونشوف الحاجات الما شفناها
أهه أنا بعد الترحيب ده بقنص ليك هناك " وأنت القنص ده ما سيدو"
وأي شاردة ولا سؤال كدي بعدين بخش ليك بيه
أهه أقبل متابعتنا والله يديدك العافية

اقتباس:

---

المشاركة الأصلية كتبت بواسطة abomazeen

25-01-2007 الساعة : 12:22 pm #1

تاريخ إنزال البوست في المنتدى ... الجديد شنو ؟؟؟

---

الاخوة الكرام

اشواقي الفائضة


وحقيقة . . .

اقتباس:

---

الجديد شنو ؟؟؟

---

نتمنى طى الماضي . . .
وفتح صفحة جديدة . . .
عامرة بالتواصل والتقدم والنقد الهادف واحترام راي الاخر

نتمنى عودة كل الموقوفين . . .
الحسة والقبل سنين

ونتمنى نفرة المهتمين . . .
القدام والجديدين

نكون لكم شاكرين


تحياتي