عرض للطباعة
صباحك زين ابوعلا
1/ حبوبتي أم شنقــنق في قعر البيت تنــنقــنق .... دي شنو ؟؟؟
والله كان ماخانتني الغربه دا نقاع الزير
2/ قاعدة في ديــوانه تأكل في مصــرانه ..... دي شنو
دي لمه الجاز
3/ من تحت حيوان و من فوق أنسان و بي الجنبات حديد .... عرفتوه ؟؟
والله عاد ي قويه
نطلب الاستعانه بودالماحي
او اعطاء خيارات
سموحـــــة
مشكورة على المحاولة و الإجتهاد
عندك واحـــــــــــــــــدة بس صاح
نقول يا ربي الجملة ديك عرفتي تردديها كويس و لا يفتح الله
عموماً كان انتي ما عرفتي ناس مدنية دي ميييييييييييييييييييييييييييح أبيض يا لبن
حل الواجب
حبوبتي ام شنــنق في قعر البيت تنقــنق
دي الباعوضة و في رواية اخري المطرة
قاعدة في ديوانه و تأكل في مصرانه ( دي لمبة الجاز و انتي حليتيها صاااح )
من تحت حيوان و من فوق أنسان و بالجنبات حديد ( دا بتاع اللبن راكب في الحمار و رابط تمنات اللبن بالجنبة )
و الغلوتية دي عملناها مخصوص للحناكيش عشان يفهمو معانا شوية
أهــا شنو ليك ما قلت ليك بتطلعي برة الشبكة !!!!!
من تحت حيوان و من فوق أنسان و بالجنبات حديد ( دا بتاع اللبن راكب في الحمار و رابط تمنات اللبن بالجنبة )
و الغلوتية دي عملناها مخصوص للحناكيش عشان يفهمو معانا شوية
أهــا شنو ليك ما قلت ليك بتطلعي برة الشبكة !!!!!
هههههههههههههههههههه
والله جات في بالي لكن قلت ماللدرجه دي
فعلا طلعتني بره الشبكه
زيدنا من الشعر بيت
لانو والله مافضل لي الا اتصل بي ابوي
جننتني حقت سيد اللبن شديد
لكن الحنكشه ماعندك ابوعلا
المميز ابو علا
والله مقرراتك صعبه لما غلط !!!!!
وياريت مع الاسلئه الصعبه شوية دوبيت عشان غلبنا الرد نترنم مع الدوبيت .
ابو علا العديل وفضيل
في بيتُ ماهو بخيل
وفي شعر ماهو كليل
وفي فهمُ ماهو قليل
وينك يالزين ابوعلا
ابو علا كان تدينا فرصة
ليه حليت الواجب سريع
نحن ماحناكيش
لكن ساسموحة طلعتي.......
محتاجة دروس خصوصية
اقتباس:
المشاركة الأصلية كتبت بواسطة معتز- حمدتو
المتفرد روعةً و بهاء
حمدتو
آسف اذا تأخرت في الرد عليك و لكن مصايب الدنيا آآآخزين ماسكانا من إيدنا اليمين
كان غلبتك الدراسة يا ود عشاي ما تخاف بنسجلك مستمع لي السنة الجاية تجي تدرس معانا عديل
النم ما غالي عليك يا عشاي و تستاهل اكتبو فيك معلقة كاملة بس انت شوف لينا محل نعلقها فيهو
عشاي الضيوف دايما بتوقد نارو
فرتاق الصفوف يوم الرجال يتجارو
في شينة و ملام قط ما بجيبو اخبارو
ود عز الملوك العامرة ديمة ديارو
في الجود و الكرم دايماً حميدة خصالو
حافظ لي العهود تب ما بخون لي جارو
حمدتو الاصيل مشكورة ديمة فعالو
درب السلامة للحول قريب
الحول : السنة
أي أن الطريق الذي يوصلك بأمان مهما بعد وطال زمنه أفضل من الطريق المختصر الذي قد يعرضك للمهالك و هو شبيه بالمثل الذي يقول في العجلة الندامة و في التأني السلامة ، فالعبرة بالخواتيم ..
العود لو مافيهو شق ما بقول طق
العود : الجزع أو القصن او الفرع
طق : اسم صوت
بمعني انه ليس هناك شي أو كلام ياتي من فراغ لابد ان يكون له اساس مبني عليه و هذا شبيه بالمثل ( مافي دخان بدون نار ) و هو دلاله على انه لكل شئ سبب
البَرْدَانْ يْحَطِبْ
البردان : من يشعر بالبرد
يحطب : يحتطب أي يجمع الحطب
أي أن الشخص الذي يشعر بالبرد عليه ان يجمع الحطب لكي يشعل النار و ينعم بالدفء
و هذه دعوة لأن يهتم كل شخص بأموره الخاصة و يسعي في تحقيقها و يقابله المثل ( ما حك جلدك غير ظفرك فتولي انت جميع أمرك )
كان جريت جري الوحوش غير رزقك ما بتحوش.
الوحوش : الحيوانات المفترسة
تحوش : تحصل على الشئ
أي مهما بلغت من السعي و الجهد في طلب الحاجات فأنك لا تحصل إلا على ما كتبه الله لك و هذه دلالة على أن الأرزاق مكتوبة و مقسمة من عند الله و لذلك اشار الشاعر حميد بقوله
نحن عارفين الله أعظم
و الرزق بنزل مقسم
لي البجاهد و لي المعسم
النـــية زاملة سيدها
الزاملة : الدابة
بمعني أن النية هي بمثابة المطية أو الدابة التي توصل سيدها الى مراده و مبتغاه
و فيه اشارة الى الحديث ( إنما الأعمال بالنيات )
اقتباس:
المشاركة الأصلية كتبت بواسطة samah
سموحة الصبوحة
زمان قالوا في المثل ( كان ما الدقسات كانوا لعبنها البنات ) و المقصود الكشتينة
بس هسي الظاهر لي البنات بقوا يعلبوا الكشتينة و حاجات تانية حامياني
معليش يا الغالية و خيرها في غيرها
اشخطي في الواطة جنبك و قولي وااااااااحـــد
بدينا إن شاء الله مليـــنة
الواجب المنزلي رقم ( 3 )
قال يوسف ود عبشبيش من أهلك الشكرية لي آسيا بت اختو:
أمرقى يا آسيا و برعيهو قرينك
أمرقى و زغردى وشوفى الكتال بى عينك
كان ما نحفلك شكره و نزيل غبينك
تنقطع الشراكه الباقيه بينا وبينك
1/ أشرح معاني الكلمات الآتية
برعيهو :
قرينك :
الكتال :
نحفلك :
غبينك :
الشراكة :
2/ أكتب المعني العام للأبيات
برعيهو : شجعيه
قرينك :شبيهك ( اخوك ، زوجك )
الكتال : القتال ( ربما ما تكون الحرب )
نحفلك : نزيدك
غبينك : ما يعتلج في الصدر
الشراكة : الصله - الرابط
الشفيف ابو علا شوق الشوق للشوق مشتاق ولمتابعات دروسك وبوستاتك اشواق ارتال ارتال
المجـــادعة في الشعر الشعبي
من فنون الدوبيت المجادعة او ما يعرف أدبياً بالمساجلات الشعرية و هي ان يتبارى الشعراء في قول الشعر فيبتدر احدهم قولاً فيرد الآخر عليه بشعراً مثله في المعني او مشابه له في القافية و قد يتناوب الشعراء الحديث عن موضوع واحد من المواضيع التي تهمهم و ليس شرطاً ان تتم المجارة في الشعر في نفس المكان و الزمان فقد يقول احدهم شعراً في مناسبة ما فيسمع به شاعر أخر في مكان و زمان اخر فيرد على ابياته بأبيات مثلها تحمل نفس القافية أو تدور في نفس مضمون القصيدة
قال الطيب و د ضحوية واصفاً حال الدنيا و تقلباتها مشجعاً و مصبرا لرفيقه طه الضرير
يومأ فى السجن، ويومآ رقاد متحدر
ويومــآ بالصــــفايح للبـــحر بنبدر
القيــــد إن ظبط قط للقلِب ما بودر
أطرى السمحه يا طه الضرير لا تودر
هكذا حال الهمباتة فأنهم يوماً في السجن و يوم ينامون هادئين و يوماً اخر هو يوم السعد عندهم عندما يحصلون على مرادهم من الأبل
فالقيد هنا بمعني الحبس اي انهم مهما طال حبسهم و شددت عليهم القيود فأن القلب ثابت على مبدأئه لا يتأثر بذلك
و انهم يتحملون كل كذلك في سبيل إرضاء المحبوبة
فرد عليه طه
درق البازا جـاك زى السحابة الجارة
حس اب جقرة والقربين صوقعن كارة
أركز للتجيك اطرى ام حـــمد والسارة
هنا يوصف الشاعر الحالة التي تصيبهم عندما يحلقهم اهل الأبل و ما يتخلل ذلك من حرب معهم و يحثهم على الثبات اكرما لتلك المحبوبة حتى تظل مكانتهم عندها في اعلى المقامات
فقال الطيب
باكل حارة ماضُقْ باردة ماك دارينى
أســـعل منى رُبْعَاي البعرفوا قرينى
حِسْ أب جقرة والقربين دوام بارينى
انا خو السارة كان يبقى الكلام عانينى
فرد الطيب في زهو بأن عيشته كلها صعاب فلم يعرف طريق اللين و العيش السهل فان كنت لا تدري بتلك الحالة فأسل مني ربعاي اي ربعي و اصدقائي فأنهم يعرفونني جيدا
و من روائع المساجلات التي قرأتها قول شاعرنا الكبير الحاردلو في قصيدته التي يتغي بها استاذنا الفنان عبد الكريم الكابلي
الزول السمح فات الكبار و القدرو
كان شافوه ناس عبد الله كانوا يعزرو
السبب الحماني العيد هناك احضرو
درديق الشبيكي البنتوه فوق صدرو
البيت الأخير يحكي قصة الزول السمح الذي منع شاعرنا الرقيق من السفر لحضور العيد مع اهله و أصحابه ناس عبد الله ففيه بيان لتلك المحبوبة صغيرة السن التي قد بدأت بعض البروز تظهر علي صدرها .
و التبنيت في الأصل يستخدم في السيجة و يقصد به عمل نتؤاءت صغيرة بطرف الأصبع على صفحة الرمل
فرد عليه الشاعر يوسف حسن عثمان بقوله
كتاب القصيدة الليلة كلو و فترو
دايرين يوصفوها الملكة اظن ما قدرو
السبب الخلاني جمالا اتيه في ذكرو
شفت ( الحار ) فتر و عصاهو شيطان شعرو
بت انديرا غاندي المن سلالة نهرو
كملت الجمال ورست معالمو و سحرو
كلمة الحار : اشارة لشاعرنا الكبير الحاردلو
فلك ان تسرح في هذا الجمال اللامتناهي في قول الحاردلو ( فات الكبار و القدرو ) أو تعرج على الجمال الهندي في إشارة لطيفة من شاعرنا يوسف في قوله ( بت انديرا غاندي المن سلالة نهرو )
و قول الحاردلو في موضع اخر يصف الساقية
من عز نوما قامت لازمت لي انينها
من كترت بكاها دموعها تروي جنينة
هنا وصف دقيق و قمة في الروعة لحال الساقية و صوت الصرير الذي تحدثه عند دورانها اذ شبهه بالأنين كما شبه تدفق الماء من القواديس ( القواديس هي الجرادل التي تربط في الساقية و تعمل على غرف الماء من البحر ) بالدموع
فرد عليه الشاعر يوسف حسن عثمان
شايلة و لافة ديمه بشوف جيوبها ملانة
كل ما تشيل كتير ما بتشكي من شيلانة
كل ما اشوفا لافة بقول خلاص فايتانا
و العجب العجيب بلقاها واقفة مكانا
أما شاعرنا يوسف فقد شبه القودايس بالجيوب
اقتباس:
المشاركة الأصلية كتبت بواسطة abu_ola
يا جكاعة الخير مالكم غير حمدتو مافي واحد داير يحل الواجب دي الحالة انا قلت اساعدكم شوية في درجات الإختبارات بعدين و اخفف عليكم من هسي بس الظاهر انكم ما بتحبو المساعدة
شبرقية وينك يا بت امي ما قلتي ما تحلوا الواجب انا بجي بحلوا مالك ليك إسبووووع ما جيتي و لا بتجي تحت تحت
الواجب دا انا بلحو ليكم لاكين تاني بي رأي فيكم
1/ أشرح معاني الكلمات الآتية
برعيهو : اجدليهو ( اجعليهو جدايل )
قرينك : تصغير قرنك و المقصود به ضفاير الشعر
الكتال : القتال ( الحرب )
نحفلك : نحفك و المقصود نزيدك شكرا و فخرا
غبينك : الغبن من الغبينة و هو ما يعتلج في النفس
الشراكة : الصلة او الرابط و المقصود صلة الدم و الرابط الأسري
2/ أكتب المعني العام للأبيات
في هذه الأبيات يدعو الشاعر أسيا بنت اخوو يقول ليها اخرجي يا اسيا و و اشهدي فراستنا و شجاعتنا و قوة عزيمتنا و صبرنا في الحرب و معرفتنا بفنون القتال و انثري شعرك تهياً و فخراً و زهوا فنحن قد عزمنا على جلب ما يسرك و يزيل ما اعتلج في نفسك من كدر و إلا فيحق لك ان تنفينا من القبيلة و النسب و لا تفتخري بنا و لا تذكري الصلة و الرابط الأسري الذي يربطنا
السلام عليكم يا طلاب المدرسة و يا أوليـــاء الأمور
غايتو انتو الواحد كان غاب و لا مات عدييييل كده ما بتيجبوا خبرو و لا بتسألوا منو نقول يا ربي ديل طلاب شنو ديل ؟؟؟؟
عموماً كان ما دايرين تواصلوا تعليمكم و تفكوا حنكشتكم دي ادوني قروش الدروس الماضية و تاني العفو في العافية و الكوفي داي انا بسوي ليهو قبة من فوق و بقلبوا جامع
أهاا بتجتو تصلوا و لا دي برضوا باااااااااص ؟؟؟؟
وعليكم السلام ورحمة الله
هي يا استاذ انت زاتك شكلك كدا متسيب واذا كان رب البيت بالدف ضاربا اكيد التلاميذ ح يكونوا زيه :rolleyes:
عموما العود احمد وفي انتظار بقية القروش هي قصدي الدروس :D
ابوعلا والله منور المنتدي
اجازة طويله لكن........
اقتباس:
المشاركة الأصلية كتبت بواسطة samah
الغالية سماح
دي اجازة لكل السنوات الماضية
أها رجعنا تاني للدراسة و كلام الحبوبات
بس يا ريتك تجــي و تشاركينا الإبداع
و بالمناسبة دي في مدرسين جداد انا بحاول اقنعهم يجو يساعدوني في التدريس ، غايتو كان ديل رضوا يدرسوا يا بت امي بختكم بتنجحوا من أول حصة
اه ياجنه كدي كم مره بجي بتاوق في الكوفي ده اه ان كنت قايلو بتاع بنادر اه يولد كدي ادني جبنه كاربه اصلو امس احلام بزرديات والمفكات اه ابوعلاء بضم العين بجيك صاد كدي نمشي نشوف الحشيان الحاصل فيها شنو
اقتباس:
المشاركة الأصلية كتبت بواسطة صلاح ودالطاهر
ود الطاهر استاذ الأدب و النم
في نغمو الجميل نرتاح و ننجم
من شعر الغزل خلينا نتعلم
و لي أدبو الجميل يا ريتنا لو نفهم
مشكور يابا على الزيارة و نفخر بيك شديد و يا ريت يا عشاي تستقر معانا شوية و تدرس معانا الحناكيش ديل و ينوبك الأجر و الثواب
ابو علا والله مشتاقين وحمد الله علي السلامه والبركه الشفناك طيب
اه مشيت لحاجه ام بليناه وقالت الروب بقوهو غباشه وهو مختوت في المشلعيب وتمشي تشيل الشب تختو في الزير يمكن ينقع كويس وتمشي جنب التكل تلق الدوكه اه شوف يمكن يكون الزير كراد وبعدك تمش تجيب المحركه وتخت فيها العيش عشان يبقي دراش اه بجيك صاد درسهم الكلام الملون
والبرّاق بَرَقْ ..
مِنْ مِنّا جاب القِرّة
شوف عيني الصِّقير بجناحو كَفَتْ الفِرّة
تلقاها ام خدود الليلة مَرَقَتْ بَرّة
مَرَقَتْ بَرّة ..
مَرَقَتْ بَرّة تغلي مديدة الحِلْبة التَسَمِّن رِدْفَها
السَمِنْ المبَسْتَرْ يانْكي
والويقود بعيرات الدُّخان في العين
وفي الفَشْفَاشْ يسوِّي عمايلو
شِنْ فايدة مديدة الحلبة والويقود بشيلو اليانكي ؟؟
يا ابو السُّرة
تعرف يا أبو السرة اخوي
مديدة الحلبة دي هسي إلا تعملها بالفرن ما دام الياكني شال الويقود
بس نقول الحناكيش ديل بعرفوا مديدة الحلبة و لا الويقود
اها انت رأيك شنو في الجردقــة و المخبازة و أم حليبين و القاشيــت
سلام لي ارقي كوفي شوب ولي ارقي شخصيه عمنا ابو علا الغالي اشتقننا ليكم ياجماعه واشتقنا للقعدات الحنينه على جنبات الكوفي شوب ...طال غيابنا عنكم لظروف الدراسه وخفت عننا شويه قلنا نطل عليكم نمسيكم ونسلم عليكم ونطمن .....وياجماعه وين الجرسون ابراهيم اشتقنا ليو ......تقبلو تحياتي وان شاء الله الفتره دي نحاول انو نتواصل معاكم باذن الله
اقتباس:
المشاركة الأصلية كتبت بواسطة HaSsOoN
الغالي حسون
الشوق بحر و عليهو شوية من إعصار غونو
وينك يا رائـــع متخفي عن الأنظار
اشتقنا لي ضحكاتك و لا طلاتك البهية
ما تحرمنا من الطلة يا راقي
همسة :
إبراهيم يا حبيب خلي شغلة الجرسون دي زمااااااااااااااان و دخل الحيكومة عديل و بقي مشرف المنتدي الثقافي و كلامو بقي من الموشحات الأندلسية و لي فوق
يديك العافيه ياابوعلا وشوقنا ليكم بالكراتين ...بس ظروف الدراسه هي الحرمتنا منكم وهسي الايام دي فترة اجازه ان شاء الله نحاول نواصل معاكم في الفتره دي ...اقتباس:
المشاركة الأصلية كتبت بواسطة abu_ola
وياحليلك يابراهومه من جرسون للحيكومه طوالي .....تعال هنا اتحفنا ببعض من موشحاتك
ودمتم يااحبتي
اقتباس:
المشاركة الأصلية كتبت بواسطة صلاح ودالطاهر
تعرف يا استاذ صلاح روب حاجة ام بلينا دا زي اليورانيوم المخصب الحناكيش ديل ما بنفع معاهم إلا تسوي داردمـــة بس كمان بخاف كان سويتو داردمة الجماعة ديل يبقوا اخوان في الرضاعة
بعدين الشب دا كان كبيتو في الزير بقدو باقي زير مدنية الحنكوشة دا عاملهو من الورق و ضارباهو منكير بدل الحيـــمور ،، و أخاف كان شافت المشعليب تشيلو تقول شنطة تراثية باقي هي مرات مرات عندها اهتمامات بتعرفها براها
بعدين التكل و لادوكة و المرحاكة ديل الجماعة إلا يشوفهن في المتحف الوطني حليل زمن الرحل المدرسة للمعرض و الحدائق .
آه يا قبلة أقدامي، إذا شكت الأقدام أشواك الطريق
وبريقاً يظمأ الساري له أين في عينينك ذياك البريق ؟
الواحد مشتهى الكلتشينو بتاع الركن الهادى
لكن اطلال الكوفي شوب غالطتني
يا جماعة أنا كنت هنا و كان في ناس كتاااااار حوالين الكوفي دا
يا ربي هسي برجعونا تاني نقرأ و لا عفى الدهر
اي زول من دفعتي يرفع يديو
و الما دفعتي برضو يرفع ايـــــدو
اشتياقات ما ليها عــــــــــــــــــد
والله ياابو عُلا بالجد نورت المنتدي
وين الغيبة قدر كدا!!
الف حمد الله علي السلامة
حمد لله علي السلامة
الحبيب ابو عُلا
والله نورت المنتدي من جديد
سلامات ام جمالاقتباس:
المشاركة الأصلية كتبت بواسطة مدنيّة
شوق الشوق لكل الأخوة و الأحباب في المنتدى
قالوا في المثل ( العرجا لي مراحها )
يا ربي المراح بيكون فاتنا قدر شنو
بت عبد الرحمن كيفنكاقتباس:
المشاركة الأصلية كتبت بواسطة آلاء عبد الرحمن
عساك طيبة يا بت امــي
مشكورة على الترحيب
ربنا يقبل حمدك
الحبيب أحمــــداقتباس:
المشاركة الأصلية كتبت بواسطة ahmed algam
ربنا يرحم الوالدة و يجعل مثواها أعلى الجنان
...
النور نورك يا عشا البايتات
الفريق منور بي ناســه و أهله