هل (بطاقه الانتماء ) للمنتدى ... تكفى ....!!؟؟

وانا مثلك ياعنكوليبه ..

فى هذه الدوحه الوارفه الظلال اجتمعنا .. نسينا كل همومنا مع نضاره احساس الاحباب هنا

جمعنا المكان .. رتبنا الدواخل من خلال حروف .. دفوف .. ووحدنا الصفوف




لذلك اجد نفسى يعتصرنى كل الحزن .. عندما اجد حرف مشاتر .. او تعبير مجافى

لحقيقه اننا هنا .. جمعنا هذا الحب العجيب ..

نحن اساسا هربنا من عالمنا الخارجى .. بحثا عن الصدق والدفء والامان .. وبحثا عن

الاحساس الرائع بالاشياء .. عندما تدور كلها فى دائره متصله تغذيتها المرتده دوما

الاخوه الحقه


عنكوليبه .. رغم معرفتنا بمزرعه احساسك السكر (منذ فتره قصيره ) جمعتنا هنا ... لكن احساس الصادق

صادر طول السكه

وسهل حته انو نكون جوااااك

ناخد منك وهج النور

النااابع منك

وننشد سويا

غااااااااااااايه انو نكوووووووووووووووووووووووون

عشان احساسك هو اللوووون

يلا ارسمى لوحه جميله تضم الكل

سؤال ساااااى

يبحث عن اجااابه


هل (وسام فخر المنتديات ) مثلا يمنح على اساس (مدناوى ) .. ولا على اساس تواجد .. تفاعل .. مشاركه ...؟؟


ومع الاجابه لو كان فى نموذج يدعم من الاجابه

ابومزن يا رائع متابعين بس ما فاهمين القسة و يبدو انه نهايتها لسه هذه يا ابومزن قسة انسان حب الانسان من اجل انه انسان و اتضح لم يكن ذلك الانسان فهذا انسان من ذلك الزمان ما يوصف بالقبلي قبل الحضارة و الانارة و كان مثل هذا الانسان انقرض من ذلك الزمان الا في بعض النماذج التي كانت تعيش في الظلام و لا ترضى بغير هذا الظلام .
و لكن انسان مدني لم يكن بمعزل عما يدور في العالم اجمع
فردتي و ودخالتي كان شغال في ايرلندا و بيحضر في لندن و كان احيانا كل اسبوع عنده سفره للندن في ذات مرة استوقفه احد ضباط الجمارك و قال له اكثرت من الطلة يا من لا تشبههنا لونا و انتماءا من خلال جواز سفرك وبعد ان تيقن الضابط بان لصاحبي له الحق في البرطعة ما بين ايرلندا و لندن بما فضله الله على الاخرين بالاستنارة و الهداية اعتذر له بشده فما كان صاحبي ان قال لهذا الخواجة لماذا استوقفتني من دون خلق الله آلانني اسود البشر و لا انتمي لهذا المكان بمقياسك الخاص
فصديقي قال لي ان هذه عقوبة يحاسب عليها القانون في تلكم البلاد الراقية التي تعامل الانسان من اجل انه هو انسان او كانها تترجم اغنية مصطفى سيداحمد والله نحن مع الطيور اللي ما بتعرف ليها خرطة و لا في ايدها جواز
فما كان من ضابط الجمارك ان اكثر من الاعتذار و اتي له بمدير المطار شخصيا و اكالوا من الاعتذارات بما خفف شوية عن صاحبي ولكن يبقى ان هناك سلالة لذلك الانسان الظلامي الخفاشي المنغلق على ذاته
و هذا ابو مزن يكون في ذمة من تحاوز هذه الاوهام و ايقن بضرورة تساوي الانام في شكل حضاري يعكس صفاء النفوس و كنوز المحبة التي تحدث عنها الراحل المقيم .
و لكن اخي ابومزن نستحضر مقولة الامام الشافعي ان احكم الناس اعذرهم للناس و ان هذه الامراض طفحت للسطح في تزامن مع كثير من السوالب الاخرى التي نراها في المجتمع عامة .
اخر الحكي صديق عزيز من اولاد مدني تشالق و تقدم لواحدة ( مرطبة ) شوية معانا هنا في الرياض و هي من بنات الخرتوم فلما تقدم لها حتى اوعدته اللقيا و عندما عاد من اللقيا كان وجهه يقمر عيش زي ما بيقولوا المصاريا
وسالت عن السالفة فقال لي البت قبل ما تعرف انا منو قال لي انت من وين يا جنى قال لها انا من مدني الجميلة
قالت معليش انا ما عايز عريس من ( الاقاليم )
فلا زلت ابومزن اضحك حتى تدمع عيناي بالرغم من انه الحكاية لها اكثر من ثلاث اشهر
فالحالة عامة ابومزن و لاتخص مجتمع ما ، هذا ليس دفاع عن هذه العادة السالبة او هذا المجتمع و انما محاولة للتخفيف عليك

تسلم اخي العزيز عبد الرحمن مدثر ..

حبينا نسجل حضور في البوست الرائع الى حين ان تتجمع الافكار لنكون مشاركة هادفة ومفيدة ..

اقتباس:

---

المشاركة الأصلية كتبت بواسطة عبدالرحمن مدثر

سؤال ساااااى

يبحث عن اجااابه


هل (وسام فخر المنتديات ) مثلا يمنح على اساس (مدناوى ) .. ولا على اساس تواجد .. تفاعل .. مشاركه ...؟؟


ومع الاجابه لو كان فى نموذج يدعم من الاجابه

---

هو على حسب اللائحة لا يخصص حامله ولا يصفه بوصفة منطقية وانما كل من قدم خدمة للمنتدى او المدينة لكن لا اعتقد انه يخص ابناء مدني وحدهم وهنالك ممن يحملون الوسام وهم ليسو من مدني ..

العقاد .. دائما مشاركاتك عناقيد ..

وعناقيد العنب .. ياخى الدلال من غير سبب .. والمساكين اكيد ليها رب

جميله السياحه بتاعتك دى .. اكيد بتكون جوووه القصه العائمه هنا مابين نهذيب اجنبى

وادب الاعتذار (وكمان باصرار ) .. وبين عصير دهشه ودسيداحمد المعهوده

واحد صاحبى عندو حساب فى الفيس بوووك .. بس لمشغولياته ماقاعد يخش .. فمرات بقول لى انا اخش اعمل شنو

قلت اكتب مايخطر ببالك ...

اها الله قدرو على كتابه مقوله معهوده



الكلمه الطيبه جواز سفر


اها والناس المرابطين ليهو كانوا كتار ... فندموا على مقولتو دى ... واحد يعمل ليهو تعليق

- انا لو داير اسافر السعوديه اعمل شنو هاها


مرات ياعقاد .. الكلمه بتجرح .. القصه ومافيها .. لما تجيك كلمه مشاتره مثلا

-
ياخى انت اساسا مامن مدنى ....!!


بجيك احساس بالدونيه .. او انت دخلت غلط .. زى صاحبك الوقفوا من دون خلق الله

انا متاكد انو مافى تمييز داخل المنتدى هنا .. لاكن مرات كدا فى حاجات كدا بتظهر (ضمنيا )

طبعا الكلام دا بعيدا عن جدليه

هل منتدى ودمدنى للجزيره .. ام لمدنى ؟

هل مدنى تمثل مدنى (الرقعه ) ام تتحرر لتشمل كل الجزيره ؟


طبعا الحته دى كان فيها نقاااش مستفيض ..


لكن ممكن تقول بتكلم بلسان من لاعلاقه لهم بالجزيره ذاااتو .. لكنهم احبوا هذا المكان

وطابت لهم الاقامه ...

اقتباس:

---

المشاركة الأصلية كتبت بواسطة عبدالرحمن مدثر

هاهاها ياباشا منور والله

انت معانا يعنى ... نحن بتلقانا فى طرف الشدره .. عينا قويه .. ومفرجخيييين

ياخ ماتجى راااجع

تتم لينا باااقى الشمار

---

زمان ناس الانقاذ ناسنا الحلوين جابوا لمدني حاكم اسمو عبد الوهاب كل ما اعملوا معاه لقاء اقول ليهم انا كلامي دراب دراب اها انا ذاتي زيو كلامي دراب اقول ليك شكلي ذاتو دراب المهم عملت ليك فيها خبير ومشيت اشوبرته في المسابقة بعد داك عينك ماتشوف الا النور انت وانت وضربت ليك لقيت جوالك مقفول والرسايل تطاقش ما فضل ليهم الا اقولوا لي رقمك الوطني كم تلاته مراقبين وانور النور ذاتو ماقصر معاي رقعني بحصة عصر

شفت الدراب بعمل شنو امرقك من الشدره وضلها

ابواسيل .. منور والله .. خاصه مع (الستااات ) البتلخم دى

وشكرا لحضوركم الانيق .. ونطمح فى المزيد ... انا سالت السؤال دا تحديدا

لانو بتذكر مره جمعتنا لمه كدا (منتداويه ) ولكنها ليست (مدناويه )

وقتها كان هناك بوست مثبت (لوسام فخر المنتديات ) طبعا هى جائزه (مثيره للجدل ) اكيد

فماتظنه انت يستحق

يجده غيرك لا

وهكذا النفس البشريه تتباين فى افكارها ورؤاها

وعلى انغام الونسه ... جات سيره الوسام .. خزنت من ذاك الحوار بعض الدردشه والاختلاف

- انا شايف انو فى ناس بستحقوا الوسام دا ماادوهو ليهو

- وانا ذاااتى شايف انو فى ناس اساسا ماعندهم اسهامات عشان ياخدو الوسااام

- انتو عارفين الوسااام دا اساسا عاملين مقاسوا لناس مدنى بس


الونسه دى مخزنه فى حته قصيه استدعيتها لزوم مايلزم .. ابواسيل مشكور ... ولو لقيت لى لسته بالناس المامن مدنى

واخذوا الوسام تكون ماقصرت .. عشان تزيل ماعلق من ظنون

اقتباس:

---

المشاركة الأصلية كتبت بواسطة عبدالرحمن مدثر

هاهاها ياباشا منور والله

انت معانا يعنى ... نحن بتلقانا فى طرف الشدره .. عينا قويه .. ومفرجخيييين

ياخ ماتجى راااجع

تتم لينا باااقى الشمار

---

زمان ناس الانقاذ ناسنا الحلوين جابوا لمدني حاكم اسمو عبد الوهاب كل ما اعملوا معاه لقاء اقول ليهم انا كلامي دراب دراب اها انا ذاتي زيو كلامي دراب اقول ليك شكلي ذاتو دراب المهم عملت ليك فيها خبير ومشيت اشوبرته في المسابقة بعد داك عينك ماتشوف الا النور انت وانت وضربت ليك لقيت جوالك مقفول والرسايل تطاقش ما فضل ليهم الا اقولوا لي رقمك الوطني كم تلاته مراقبين وانور النور ذاتو ماقصر معاي رقعني بحصة عصر

شفت الدراب بعمل شنو امرقك من الشدره وضلها

البوست دا إحساسو جميل خلاص
وبصراحة أكتر خفف على كتير
وأكيد المعاي كتار برضو

عبدوش أقول لمن قال

انت أساسا ما من مدني

- يا سيدي الفاضل
هكذا هى الحياة - لامة الكل بمسمى نطلق عليه
الدنيا
وربما فهمنا للمنتدى بأنه ليس مكان
وانما مجموعة من الاشياء المعنوية
متجسدة ومتجمعه بتدينا تشكيلة كدا ما مفهومة
بس حلوة وجميلة

فرفقا بأناس يحملون كل الود والخير داخلهم لمدني
وكل السودان
وأحبو من فيها من غير حتى أن يروهم
واعتب عليك (العنصرية) التي طالما نحاول نبزها في مجتمعنا ككل

--------------------

بوست بنكهة العتاب الجميل
وكمان سلطة فواكهه فيها ليمون بسيط
تحياتي ليك

بوست طاعم ،،،

- عشان كدة واصل بنفس الشبكة " وما تفك اي شفرة "

الخرباش ... يا راقي الإحساس
تعرف يا أبو مزن ..زمان لما غني وردي لطيور شاعرنا الجميل ( بالله يا طير قبل ما تشرب تمر ...الخ ) كنا نحن نحط رحالنا كما تلك الطيور في أرجاء مشروع الجزيرة العظيم ...
وكان الهوى يعبرنا مع نسائم ارض الخير الغرة .. كنا نغازل تلك الفتاة التي( تحيك ) منديل الإنتماء رغم تعدد الأمكنة... ورغم تعدد اللهجات والسحنات ...
كان منا من يغني لعثمان اليمني .. ومن يغني لعثمان حسين ... ومن يغني لدوشكا .. ومن يطربه عبد القادر سالم وعبد الرحمن عبد الله ..ولكن إلتقاء أرواحنا كان هو البطاقة التي تمنحنا حق الإنتماء..
ليس من الضروري أن تكون من أين أتيت .. ولكن حديث أرواحنا كان يحدثنا بوحدة المكان ومدى أثره في تشُكل وجداننا وأحاسيسنا...
الخرباش .. يا صديق .. لك في الوجدان كل الإنتماء

ود مدثر يا هامتنا ويا قامتنا المدادية

سعيد أنا بالمتابعة والإستمتاع بكل حرف سكبته هنا ليتني ألتقيك لأرتشف من هذا الرحيق صورة وصوت

واصل ياحبيب معاك هنا وبرجاك هنا وبرجاك لو مليون سنة

البوست دا أنا برشحو من الأن لنجومية شهر مارس وتعال يا الجندي أعرش على كده

اقتباس:

---

البوست دا أنا برشحو من الأن لنجومية شهر مارس وتعال يا الجندي أعرش على كده

---

،،،،،،أُثني ،،،،،

باشا ( بتاع الدراااب ) هاها

الفكره ومافيها انو وجهات النظر يجب ان تحترم طالما ليس هناك مساس بشخص .. خلينا (شخصنه )

للامور .. اكيد على الكل احترام وجهه نظرك مهما كانت .. ومقارعه الحجه بالحجه .. بدون اقصاء

والمؤلم حقا انو الاقصاء يرتدى عباءه سوداء تسمى التمييز .. او العنصريه

وقلاده الراى .. والراى الاخر

ماقاله الامام الشااافعى

راى صواااب يحتمل الخطأ ... وراى غيرى خطأ يحتمل الصوااااب

ام ريم (فرده جناحى التانيه )

الله على كلماتك العذبه

رفقا بأناس يحملون كل الود والخير داخلهم لمدني
وكل السودان
وأحبو من فيها من غير حتى أن يروهم

وهنا نحن نؤكد على اواصر الاخوه الحقه .. والمحبه ..

جمعتنا صفحات بيضاء ... لذلك نطالب بحاجه ماصعبه شديد

بيضوا النيه ياحبااان

والبيت كبير بشيلنا

يعنى تبقى علينا (دسته غربه )

غربه احساس

وغربه داخل جلباب الوطن البالى

وغربه حرف ياخذك من سدره منتهاك ... ويضرب بيك الدلجه

مشاركه للانيق اشرف السعيد (سيد الركشه ) جيت بها لتزين المكان والدواخل




سأكتب هنا ..
فأنا رجل أصارع الواقع وإن صرعنى إرتضيته وعشته حتى أصيره ما أنشده من واقع هكذا أقتنعت بما قاله لى صديق شفيف..
سأكتب هنا..
وسأجعل هنا مدائن تسع كل أحلامى وأفعالى ومقدراتى..
سأكتب هنا..
لن أدعو أحدا للكتابة هاهنا..فهاهنا المجيئ طوعا..والعمل طوعا..والحب طوعا..والقناعة طوعا..
سأكتب هنا..
حتى يعمر المكان أو أدفن تحت أوهن البيوت ..بيوت العنكبوت..

خربشه ساى

بخصوص ترشيح نويرى وتثنيه عنكوليبه .. على العين والراااس اكيد

لكن انا طماااع .. وقائد لتنظيم مناهض .. عشان كدا اقل شى دايرين عن طريقو

نشيل (رئيس مجلس اداره ) .. طالما مستشارنا فى جنينه (على الميرغنى ) هاها

سيدي / رئيس مجلس الأدارة ،،،

تحية واحتراما ،،

هلا أنصفنا ،، نصفنا الجميل الراقي ،،،
انهم يدعون أننا لا نعطيهم كل مايجب علينا اعطائه لهم ،،، وقد توالت
التدحيضات لما أشاروا له بهمس الكلمات ورقيق القول ،،، تفانى أهل
مدني لهم ، بأنهم منهم واليهم ،، وانهم لا يشعرون بما يحسون به هــــم
وأننا أكثر حرصا عليهم ، منهم ،،،

منهم من هو جدير بالتكريم والثناء ،،،

تخريمة : لقد تعاهدنا على الشفافية أعزائي ،،،،،

خربش جابت ال م ال ع

كتاحه بث حلوة

أسئلة بث ما ممنوعة

تطلعات بث مشروعة

بعد الكتاحة بتجي الهبايب ام بروق ورعود

بجيك م ال إ

ماأنت في أخيرة قلت شنو كدي ما عارف

ولو جو

ح تكون المرة الأولي

ومن جنينة لي جنينة

وما بين الروض وتم الباقي خيال

الجزولى صديقى الذى لم التقى به .. لكنه احسه (يتقدل ) فى كل منطقه احساس نديه

انه حديث الروح الذى اكدت عليه من خلال حرفك وتعاملك .. والذى سيجعل المكان راكوبه

يدخلها الهوى من حيث شاء دليل توحد الاحساس والمكان كذلك ...

لكن ياصديقى فى قمه هذا الاحساس الممراح .. قد تجد من يعكر هذا الجو الجميل

قد تكون احيانا (من دون قصد ) .. هذا الذى اتحدث عنه .. وبصحى فى جوانا حاجه

منسيه .. يعنى غربه احساس قاعد ع الهبشه ..


كسره


الاغنيه دى جميله يااااخ ياجزولى .. تعال نشرك بيها سوا ومعاها (طُعم ) تداعيات

السنين ضاعت واحسرتي
لا الطيبة أجدت لا دمعتي 
وكم في الخيال زينت بيك دنيتي
وإحتضنتو غرامك خبيتو في مهجتي
ما كنت متصور في يوم خداع في هواك أصادف
ياريت
ياريتنى كنت عااااااااااارف

اقتباس:

---

ما كنت متصور في يوم خداع في هواك أصادف

---

خليتنا صُغــــــــــــــــــــــــار يا أبو مُزن ،،،،،

حكمه اليوم :

نقل بوست واحد ... يخلف وراءه 5 بوستاااات ساخطه



اذا المشكله فى (النقل )

اقتباس:

---

المشاركة الأصلية كتبت بواسطة عبدالرحمن مدثر

ابواسيل .. منور والله .. - وانا ذاااتى شايف انو فى ناس اساسا ماعندهم اسهامات عشان ياخدو الوسااام

- انتو عارفين الوسااام دا اساسا عاملين مقاسوا لناس مدنى بس


الونسه دى مخزنه فى حته قصيه استدعيتها لزوم مايلزم .. ابواسيل مشكور ... ولو لقيت لى لسته بالناس المامن مدنى

واخذوا الوسام تكون ماقصرت .. عشان تزيل ماعلق من ظنون

---

تسلم يا خرباش ..
وانا معاك في بعض ما كتبت .. واعتقد انه توجد بعض المجاملات ايضاً ولا ننكرها ..
وهناك من عمل في الاشراف لفترة طويلة ورأت الادارة انه يستحق فمنح .. الوسام ..
على فكرة يا عبد الرحمن عندنا في منتدى الجزيرة بنعطي الوسام للاعضاء الذين ينضمون لنا وهم ليسو من آل الجزيرة لأننا نفخر بوجودهم بيننا وهنا الكلام عكس كلام البوست مش كده ؟ ما عارف الصاح نحن هناك ولا الصاح نحن هنا ؟

وتأكد لو الوسام بي يدي لكنت اعطيته وخصصته لغير ابناء مدني لأننا نفخر بأن يكون احد ابناء أي منطقة اخرى بيننا وهذا يشجع البقية الذين يترددون في الانضام للمنتدى ان كانو من اي منطقة اخرى غير مدني .. ولا رأيك شنو ؟
وصراحة انا شايف انه في اعضاء بستحقو الوسام لو نظرنا لمشاركاتهم من حيث الكم والكيف .. مثل الاخ الرائع ود المطامير ومايسة وانت يا عبدالرحمن وغيركم كثر ...

اقتباس:

---

المشاركة الأصلية كتبت بواسطة عبدالرحمن مدثر

-
ياخى انت اساسا مامن مدنى ....!!

...

---

عندى ودخالتى ياودمدثر اتولد فى مدنى وقعد فيها فترة بسيطه وبعد كده رحل الخرطوم .
الان عمره تعدى 35سنة ولوسالته انت من وين يقول من مدنى.
الموضوع ما موضوع بيت وشهادة سكن بقدر ما انه احساس بالانتماء والالفه .
تحياتى ياعبدالرحمن.