عرض للطباعة
الغالي الحبيب (سلام قولاً من رب رحيم )
ليك سلام تاني ..
و إنت عارف أنا بحبك
ولا ماك عارف بالمرة ...
والله |أتحفتنا ليس هذه المرة فحسب
بل مرات قبلها ويبدو أن الجايات
أكتر من الرايحات أو كما قال جحا
امتعتني بقصة الجيلاني واللوتري
والفاضل وصفية والعجينة إياها
تقبل مروري ،،،
(1)
في نهار غائظ سموم وكتاحه ... تشاجر الاطفال.. بعيدا عن رقابه الاهل ، أختلفوا حول (البلي وحجاره البطاريه والضراب الحديدي) علت الاصوات أولاً ثم تتطور الأمر لاشتباك بالايدي والارجل وتمزيق للعراريق الباليه... الاهل يغطون في نوم عميق في الرواكيب بعد فطور بائس لا يوازي مجهود (الضحوه) ولايسند (الضهريه)....
النساء يجتهدن في توفير وجبه الغداء (تلاقيط) طالما قام الزوج بتوفير (المؤنه) بالمخزن.
خيم علي الحلة صمت رهيب لم يقطعه سوي تقاذف الاطفال بالعبارات النابئه ...وسؤال فلكي يدور في الاذهان واجابه آمله:( نعم لن يدوم هذا الحال) ... البشتنه فينا كائن يمشي علي ساقين .. التأقيت حالنا والأمل في الغائبين .. ما بال الغائبين تغير حالهم ؟؟.. فالجيلي غاب عن الحلة أربعه شهور عاملا بأفران المدينه وعاد بجهاز موبايل وبنطلون جينز ولم يصلح حال الاسره بشيء .. اما أخاه الاكبر بالسعوديه فتعب من كثره المرسال (للاب والام والاخ والخاله والعمه والحبوبه ..... وصار أضحوكه لغربته الطويله والرصيد الخالي.
الطفل الزين ود موسي صاحب ميول إجراميه ونزعه تملكيه غابت عنه عين الرقيب في زخم الحياه فصار مصدرا للازعاج ومعبرا للخلاف بين الاهل ، والده ساخط ومسخوط لا يعجبه الحال ولا يسعي للتغير ....
آه يابلد....
في ذلك النهار الغائظ قام شقي الحال الزين ودموسي بفلق الطاهر ودابراهيم كان والد الزين مستلقيا علي ظهره في الراكوبه علي عنقريب (القد) متجردا من الثياب الا من خرقه صغيره تستر عورته سمع ضجيج الاطفال في الخارج وفجأه أقتحمت عليه والده الطاهر المفلوق الركوبه :
# أنت نائم هنا ما جايب للدنيا خبر!!
: الحصل شنو يا وليه؟؟
# قوم شوف ولدك (فلق) ولدي الطاهر
: معليش حصل خير ما بكررها تاني
# معليش بس؟ يعني ما بتدقو؟؟
هنا تنفس والد الزين وتنهد .. أدقوا ليه؟ أنا وديتو الحضانه؟ مشي الروضه؟ قريتو في القبس؟ حصل جبيت ليهو بتزا ولاتفاح؟ ياوليه مش كويس أنو ما دقاني هو ذاتو.
حكايه من حلتنا (2)
الكنبوفي حلتنا وعموم قري الجزيره يعني مجموعه من الاشخاص يسكنون تخوم القري ويعمل غالبيتهم بالزراعه..... مشاركهً مع الملاك أو بالاجره ، أشتهر هولاء السكان بالتقوي والورع والصبر علي نوائب الزمان بالاضافه الي الشده والقوه البدنيه، ووسط هذه المجموعه غالبا ما توجد فئه تبيع (المريسه) يستخدمها الاهالي كمشروب مغذي ومقوي ، أما ناس حلتنا والمنفلتين منهم فقد وجدوا في الكنبو ملاذا لغدر الاقارب ومرتعا للمتعه الحرام، ففي ذلك الصباح الصيفي الغائظ وعندما كان (العاقب) في انتظار صديقه (أبوعلامه) للذهاب للحواشات تذكر انه قد نسي البصل (مزه المريسه) وعندما عاد بالبصلتين وجد أبوعلامه ممتطيا حماره المكادي آكل (المسكاب) ، سار الصديقان في طريق الحواشات اليومي وكانت الحمير تحفظ الطريق علي ظهر قلب حتي دون ان ترفع راسها:
# ها زول هه أنا مانسيت ريالي حق الشراب
: آجني ما تخاف ريالي بشربنا
ساد الصمت بين الندمين وكل واحد منهم يمني نفسه لو يقدم معروفا للآخر فالعلاقه بين السكاري ذات شرف ويحكمها برتوكول خفي مجهول التوقيع ، كان في خلد كل واحد منهم سؤال (من نحن ؟ وكيف اتينا؟وما هو مصيرنا؟ وأي غدا ينتظرنا؟وماذا يقول عنا الناس آباندقون ديل؟ وكانت هنالك أجابه معروفه:
(يازول افقش بصلتك واشرب جردلك وربك كريم )
والغريب في الامر ان الواحد منهم عندما تأخذه العزه ويشعر بالذنب مما يفعل يعزي نفسه :
والله أرجل مننا مافي ! لا أكلنا حق زول ! ولا سرقنا ولا زنينا ما زي ناس فلان : الله أخيبوا ويتمايلان من الضحك
بعد نهايه العمل جمع الصديقان اسمالهما الباليه وتوجها بنشاط نحو الدواب ...هنا تبدأ المتعه وتنتهي الاحزان فالطريق الي الكنبو يشبه الطريق الي موسكو ، وفي منتصف الطريق ما بين الكنبو والحواشات توجد مساحه فضاء شاسعه لا يوجد فيها سوي شجيرات شوكيه صغيره وهنالك روايه في الحله ان هذه المنطقه(مسكونه).
في منتصف هذه المساحه الفضاء تفأجا الصديقان بشخص مهيب يلبس ثياب بيضاء ويبدأ الوقار والصلاح علي وجهه توقفا مبهورين من أين أتي هذا الشخص؟ وكيف يسير هادئا رابطاً في هذه (الفنقه)... أدرك الشخص حيرتهما فبادرهما بالسلام :
# السلام عليكم
#وعليكم السلام
ياخوانا عندكم شنو تدوني ليهو لوجه الله؟؟
أنزوي الصديقان وبدأ يتهامسان:
: الزول دا والله أنا لاوزت منو
# ها زول ماتخاف والله أنا عندي احساس غريب
: حاسي بشنو .. كلمني
# الزول الفي خلا براهو دا إكون ...نبي الله الخضر
: والله كلامك صاح .. الزول دا وشو ما وش شحده .. نقوم نديهو ريالنا الواحد ده
# أهـ لكن المرأه دي ما بتدينا المريسه لكن نحاول معاها نحن زبائن.
أستولت فكره نبي الله الخضر علي الصديقين وقاما بطيب خاطر بتسليم الشخص الريال وهما يطلبان منه الدعاء والصلاح ، ثم توجها نحو الكنبو يأملان الهدايه ، وفي مدخل قطيه الشراب وعندما دلفا الي داخلها وللمفاجأه وجدا صاحبهما الذي كان علي الطريق يجلس علي بنبر وأمامه جردل طفح زبد المريسه منه وممسك ببصله بيده اليمين وهنا هتفا بصوت واحد:
ها زول هه آبتشـــــــــــــــــــوف خضرك؟
رائع والله ياابوعمرو
حكايـــــــــــــــــــــــــه من حلتنـــــــــــــــــــــــــــــــــــــــا(3)
عندما علا مكبر الصوت بالاذان للمره الأولي في الحله غشيت الرهبه الكثيرون ، كان الآذان في السابق بصوت الشيخ(ودالهادي) خافتاً وكأنه موجهه لفئه مختاره من السكان ، عدد معلوم من الناس يحرصون علي الاوقات الخمسه بالمسجد دون الحاجه الي تنبيه أو نداء ... أما بعد هذا (المايكرفون) أصبح النداء عاما لايمكن تجاهل دخول الوقت أو التظاهر بالقول....أها جماعه الصلاه ما فاتتنا
الله آكبر .. الله آكبر
(صلاه المغرب)
.. حمل كثير من الاهالي (الاباريق) وشرعوا في الوضوء وبعض منهم كان الوضوء للمره الاولي ودخول المسجد غير الجمعه، حتي أن (دقاش) الذي كان يقيم صلاه المغرب أمام داره نتيجه لخلاف شخصي بينه وبين الامام توكل علي الحي الدائم وقرر الذهاب للمسجد استجابه لمكبر الصوت ، كان (دقاش) تقيا من غير علم يحلل ويحرم استنادا لتجارب شخصيه ... يوزع المواريث وفقاً للوضع الحالي لابناء المتوفي... فميسور الحال من الابناء يأخذ النصيب الأضعف ويفسر (دقاش) ذلك بأن لا حوجه له وان نصيبه أولي به أخيه (المسكين دا)، ففي احدي صلوات المغرب أمام داره فوجئ دقاش بضيف بين المصلين من عشيرته فتوجس خفيهً لاسيما وان الضيف كان ملتحيا ودقاش قراءته للقران (إجتهادا) ، توكل شيخنا وقراء الفاتحه بقدره قادر وشرع بقراءه سوره العصر .. وتتعتع .. وتمتم وقرأ:
: علا الذين أمنوا وعملو الصالحات .. وهنا سمع صوت من الخلف
إلا الذين آمنوا وعملوا الصالحات .. تعجب (دقاش) وعلم أن الضيف يحاول تعليمه القراءه الصحيحه وبحماقته المعهوده اعتبر الموضوع شخصي فقرأ مره أخري:
: علا الذين آمنوا وعملوا الصالحات ، الا أن الضيف قام بتصحيحه مره أخري فما كان من دقاش الا أن قطع صلاته وقام بسحب (البروش) من تحت المصليين غاضبا وهو يهمهم :
يلا..يلا (لا .. إلا .. ولا.. علا .. ماداير زول تاني أصلي هنا). وذلك وسط دهشه المصليين. فهولاء المطرودون من بروش دقاش وجدوا في مكبر الصوت دعوه من المسجد.
(حاج علي) كان من اعيان الحله يمتلك عدد ضخما من الماشيه لا ينام الا وبجانبه عجل رضيع نفقت والدته في الولاده أو (سخل) لم يدرك الطريق لضرع أمه ، كانت الماشيه حياته وكانت لحظة (حليب البهائم) تمثل حصاد اليوم الإقتصادي للأسرة، فبهذا الحليب تحل جميع المشاكل (بيع اللبن بالجركانه - بيع السمن - الروب - العشاء .... الخ) .
ففي ذلك المساء الصيفي وعندما أرتفع مكبر الصوت بنداء الشيخ ودالهادي جفلت البهائم ، نظر (حاج علي) ناحيه المسجد فوجد (ودالهادي) معلتيا سطح المسجد ممسكا بالمايكرفون أحمر اللون وهو يتوجه يمنةً ويسرا فذهب ناحيته وهو ممسك (بالمحويت) والشرر يتتطاير من أعينه، ترجل ود الهادي من علي سطح المسجد بواسطه السلم الخشبي فوجد (حاج علي) بانتظاره:
: ها زول ها ....الداهيه دي جفلت البهائم
* أهـ يا حاج علي دايرينا نخلي ليك الاذان ولا شنو؟
: ود الهادي خلي حسادتك دي .. انتا عارف دا وقت الحليب
* لكين أسوي ليك شنو دا كلام ربنا ودا ميقاتو
: شوف تاني يا تأذن قبل الحليب ولا تنتظرنا بعد ما نحلب!!!!
كان (حاج علي) جاهلا تماماً بأمور الدين معتقدا أن وقت (دره البهائم) للحليب يجب أن تؤجل لها حتي الصلاه ، وقنع أن ود الهادي قد أقتنع بحديثه ، الا أنه فوجي بصوت ود الهادي في اليوم التالي يأتي من أعلي الجامع:
حي علي الصلاه .. حي علي الفلاح
هنا أستشاط حاج علي غضبا وتوجه نحو الجامع وحمل السلم الخشبي ووضعه في الزريبه وهمهم:
آه ياود الهادي شوف ليك طريقه أنزل بيها.
حكايه من حلتنا (4)
عندما طرق (لؤي) باب الفصل للمره الأولي راواد الجميع الأحساس بالانتعاش والراحه ..فهذه المره الأولي التي يدخل فيها العطر الي (سنه خامسه ابتدائي) ، كان نظيفا انيقا حليقا ...يرتدي الرداء (الكحلي) والقميص (اللبني )وينتعل جزمه تعلوها الجوارب ، عموما كانت الطفره كبيره في التحاق ابن الباشمفتش بهذا الفصل الموغل في القرويه .
أسمك مين ياشاطر ؟
* انا (لؤي) ياستاذ.
تنهد استاذ (بشير) باعجاب واسي في نفس الوقت .. وهو ينظر لذلك الاناء المغلق باحكام محتويا فطور (ابن الباشمفتش).
تلفت (لؤي) يمنه ويسرا واحتار في مكان الجلوس... فكلما نظر الي كنبه أفسح له الاخرون مكانا للجلوس طامعين في الفطور وآملين في الصحبه .. نظر الي نهايه الفصل حيث توجد (كنبه سته).. هنا يسكن الاشرار كما حدثته والدته .. هنا يوجد الاشقياء أصحاب الاجساد الفارعه والعقول الخاويه فمنهم يخرج (الالفا- وماسح السبوره - وعامل الرتينه للمذاكره وأولئك الذين يبرعون في شد الذين لاتقوي اجسادهم علي لسع العنج).. يتخرجون من الصف السادس مباشره للحياه.. في الصف السادس فقط تنتهي قدراتهم العقليه .. كانوا ينظرون الي الفتيات في الفصل بنهم يعجز زملائهم الصغار عن فهمه .. بقدر الامكان يزاحمون الفتيات في مدخل الفصل باحثين عن لذه لم تتبلور بعد.
: أسمع ياجنا لوي اتا في مجموعتنا علينا الكنس يوم الاثنين تجي بدري.
* ياجماعه انا ما ح اقدر أجي بدري لانو بابا الصباح بكون شغال
: خلاص ياخوي في الحاله دي انا بقش ليك .. لكن تدفع ريال ..
كان الابتذاز في المدرسه الابتدائيه مستشريا وخصوصا ان كان الطالب من ابناء الذوات ففي هذه الحاله ربما تعيش عليه اسره كامله ويكون التلميذ محظوظا ان كان لديه شقيق في الفصول المتقدمه لتوفير الحمايه.. مع ملاحظه ان ابناء الذوات هم اللذين يملكون في الحد الاعلي لوري هوستن أو تركتر .. أما الذين يملكون (بوكس) فهولا اقطاعيون.. وبالرغم من ان ابناء الاثرياء (أولاد الراحات) هؤلاء يحاولون جاهدين أخفاء النعمه طلبا للستره ومنعا للطمع وتوفيقا للاوضاع الاجتماعيه الا انهم كانوا يفشلون.
* يمه أنا البنطلون والقميص ديل ما بلبسن
: لشينو ياولد ديل جداااد ...جابن ابوك من الخرتوم
* يمه .. لكن كدا الاولاد بقولو لي (حليو)
نعم كانت الغبشه والشده والخشونه هي ديدن الزمان والخروج عن هذا النسق يوقع في دائرة المحظور.
* يا أستاذ انا والله ما هرجلتا ..
: يا لؤي اسمك مكتوب مع المهرجلين
* الالفا قال لي تجيب ريال ولا بكتبك مهرجل
وقد ندم هذا التلميذ المنعم علي افشاء هذا السر طيله فترته الدراسيه ، كان يظن ان باخباره اداره المدرسه بهذه الاتاوات .. ان الامر ينتهي عند ذلك .. إلا أن ( ود ايوما) أتي بمن يشهد أن ود المفتش كضاب وكلاموا كتير وكانت النتجه أن أرتفعت الاتاوه من ريال الي ريالين ، ريال في الصباح .. وريال في درس العصر لذلك لاذ بالصمت.
* انتا يا ياودبلال بسكله لوي دي فيها شنو؟
: ها زول ها .. والله قال ليك فطورو.. بيض .. سمك .. ورغيف .. الجنا دا نهائي ما ضاق كسره.
* لا .. ظاهر عليهو .. والله الكسره دا عملت لينا وجع مراره.
ومنذ ذلك اليوم أرتفعت الاتاواه الي ريالين زائد بيضه مسلوقه يوميا.
حكاية من حلتنا(5)
* قلت لي نزلت وين؟
# أنا شفتها خشت بي شارع الفرن وسألت بعد داك .. ودخوجلي وصف ليها علي بيت ناس ود الحسين!!
* لا خلاص بتكون نزلت عندهون .. أصلو الجماعه ديل عندهون أهل لي قدام!
وهكــــــــذا حلت (ربيعه) ضيفه كريمه علي الحله ، تصادف وجودها في سوق المدينه وهي تتسأل عن مواصلات الحله مع بعض الشبان فعلموا ان (البلد أندخلت) بدخول صنف عالمي غير متاح محليا ، لفتت الانظار بعدم أرتداءها ثوب نسائي أو عباءه ، كانت ترتدي فقط أسكيرت أسود وتي شيرت (بودي) حيموري اللون وقد تحفزت مفاتنها وتكورت مع تلك التعرجات لاسيما عندما تتجاهل رفع الطرحه فوق ذلك الليل البهيم الذي حل فوق رأسها وتموج وتتحدرج ليستقر مسترخيا فوق ذلك النتوء الذي وصفه ودالشائب بأنه يشبه (الكديس في الشوال).
: ياخوانا والله جنيتو ساااااااااكت الزوله دي لاسمحه لاحاجه
* محمود .. محمود استغفر ...الله اسالك ما سمحه؟ .. لا يعني السمح منو..
: بس عشان اللبس المحبزق ده .. أنتو والله حالتكم صعبه .. (التوب المشرور في الحبل أعمل ليكم حمي)
* يازول لبس شنو الضيق بس؟ والله ما طالبني حليفه أنا قعدت وراها في البص الجاي من السوق بالله الذي لاغيرو (التوكه) المربوط بيها الشعر (تهبر) زي القلوبيه كل خمس دقائق .. الشعر غزير خلاص
# لا .. كمان .. يعني .. حكمتو بالغه .. وناسه وظريفه وراقيه وبتقرأ في الجامعه
* ياخي ودالنصيح كمساري البص حلف ما اشيل منها .. وشوف التافه كل مره أقيف قدامها وأطقطق اصابعينو للمرأه القاعده جنبها هههههه
# ود النصيح قالو رجع البيت ولم في مرتو كسر بالعكاز قال السبب شنو (الكسره خميره) هههههههه
ياخوانا حلتكم صعبه خلاص.. كلو ما تجي ضيفه الرجال اتونسو في الدكاكين لحدي الساعه 12 بالليل واخشوا البيوت زي الحراميه.
هكـذا تم استقبال (ربيعه) كانت بحق رائعه وحلت في مكان بور فزاد الألق .. وتقاطرت عليها عزومات شاي المغربيه وكثر الماره بشارع منزل ود الحسين طمعا في نظره وتكسر الشبان حول الضلله المحيطه بالمنزل.
(( ياربيعه .. يا بتي .. انا خالتك ومره عجوز وعشت في الحله دي ساتره حالي .. دحين .. كان مرقتي براه البيت البس ليكي توب .. الناس ما يأكلو لحمنا .
" ما في مشكله ياخالتو
والغريب في الامر عندما توشحت ربيعه بثوب الهزاز فطرت القلوب وادمعت العيون حيث اصبحت مثالا للنموذج المحتشم المطلوب .. زانها الثوب وقارا ولم يسلبها هبه الخالق فاصبحت مثل زجاجه البيبسي المقلوبه :
* اتا .. آراجل .. لي ساعه منتظراك لقروش اللبن بتتحاوم وين؟
: ياوليه .. مشيت لودالحسين داك طالبني قروش وديتن ليهو
*القروش لقيتن وين .. وبعدين مسؤل من الخير .. ودالحسين طالبك ليهو سنه ونص .. بس إلا توديهن في اليومين ديل؟.. وبعدين انا حافظاااك .. الضيفه دي قالو سفيها
: والله سفيها انتي وسفيها أختك (أم النصر) وأبوك السكران اليوم كلو
حكايه من حلتنا(6)
:
السنه دي والله .. الله استر .. الخريف كعب تب
* يازول .. ربك رب الخير ما شقا ليهو حنك ضيعو
: تذكر زمان الخريف كيف؟ يمين بالله المطره فوق المطره .. وقدام الحله بيت ناس (الاسيد) داك القش أغطي الحمار
* الزمن اتبدل
لموسم الخريف ياسادتي في الحله طعم خاص .. ياتي مع بواكير الزراعه المرويه فيغطي الهمبريب الجو .. يعطر الدعاش كل المساحات ويلفح الرزاز الوجوه المتعبه ، وفصل الخريف بتقسيماته المختلفه ابتداء بالتريه مرورا بالنتره والجبهه والضراع والخرسان والسماك والعوا فصل للتكاتف وهزم النوائب (نفير الحش) .. فالذي تحاصره الامطار ولم ينظف الحواشه من الطفيليات فأن النفير علي اتم الاستعداد في (الصبنات) وهي الفتره مابين المطره والأخري والتي تمتص فيها الارض جميع الماء، لا مجال للونسه أو الفارغه :
:أنكرب آزول .. كدب كدب
* آجنا وين بلدك .. اسبوع ماشفناك
: آزول والله حالتي بالبلاء .. ضحوه وضهريه .. يدي بققن ... وضهري نشف ..والله كان ما مسوح الحاجه كان ضهري انقسم.. الواحد داعك اليوم كلو.. إلا تبقي علينا (حكايه حمار الدويم)
و(حمار الدويم) هذا ياسادتي .. من النجمه يظل يعمل في نقل الماء بالبرميل بين الاحياء حتي منتصف النهار (لتوقف البئر عن العمل) بعدها ينتقل لمهنه اخري وهي نقل التراب بواسطه (القليبه) حتي موعد صلاه العصر ، بعدها مباشره يتم شد الحمار للخلاء لاحضار (قش البهائم) ليعود قبل المغرب بقليل لتوزيع (اللبن) حتي العاشره مساء في القري المجاوره ...ويحكي شهود العيان ان هذا الحمار المسكين فكر كثيرا في الهرب إلا ان الفرصه لم تتاح له أصلا نتيجة للعمل المتصل .. ولم يجد فرصه إلا عندما كان علي ظهر (البنطون).. ويحكي الحاضرون .. ان الحمار بكامل عتاده وبملء ارادته قفز في البحر منتحرا منهيا عذابه المتصل.
: مع المطر المافي دا .. بكره .. بإذن الله .. نشد البليله قدام الحله
* مافي حل غير كده .. وبعدين أنا بكلم الشيخ ودا المأمور إقفل عليهو الخلوه .. وإقرا للصباح.
وهكـــــــــــــــــــــذا أجتمعت الحله عن بكره ابيها ، اشعلت النيران من روث البهائم ووضعت عليها القدور كالحه السواد وتتطايرات حبيبات الذره في الهواء وتليت النذور وتعلقت الابصار والقلوب بالسماء.
رويدا .. رويدا ..بدأت (الكتمه) .. ثم (الزنده).. ثم (السكون) وتوقف حفيف الاشجار... وأنفجرت السماء وانفرجت الأسارير .. مرت الساعه والسماء تغازل الارض بالمطر الغزير .. ثم توالت الساعات .. الثانيه.. الثالثه .. الرابعه .. وبدأ الهلع يكسو الوجوه .. ثم بدأ صراخ الأطفال .. وسمع صوت بعض الحيشان وهي تتهاوي ...و
: آجنا ... أجر .. أجر .. أفتح خلوه ود المامؤر ... قليهو نزل يديك .. البيت داير اقع فينا.
حكايه من حلتنا
* الليله بنجضك .. بكتلك بـ
* الليله .. علي القسم .. بطير ليك في حلقومك
: آزول بجاضي مالك .. في شنو
* اتا أمس ما سديت طاقه بيت الحمام .. الكديس..
: أوع تقولي خش علي الحمام
* خش شنو .. الكديس ما عدمنا الحمامه .. ما خلا غير (كيري) أبو شرابات..الفريخات جوا البرمه أداهن عضه عضه.. بس تغرم لي حمامي يا(الناير) بس
: لكين يا (حميد) أغرمو ليك من وين أنا أمس كردوني في البلي .. إلا جيت راجع البيت بالكيس والضراب
هكذا دار الحديث صباحا بين الشقيقين اللذين لم يتجاوزا العاشره .. عندما فرك (حميد) عينيه صباحا لم يصدق حجم (الريش) الذي تتطاير وتناشر في الحوش .. أدرك بنظره واحده ان القط الملعون قد ضرب ضربته ولم يترك مجالا للاستدراك .. لم يعطي(الناير)فرصته لمعالجه النسيان وقفل تلك النافذه الصغيره بقطعه القماش.
وتربيه (الحمام) يا سادتي في حلتنا وعموم قري الجزيره .. نشأت مع نشأه المشروع واستطونت الطيور الاليفه والداجنه منها بالمنازل ولاسيما الحمام والدجاج ، أستعمر الحمام الرواكيب واسطح المنازل فتناثرت الجرادل والصفائح بينما استقر الدجاج بالقرب من البشر يأكل ما ياكلون ويشرب ما يشربون ويتوالد أمام اعينهم وخلف جولات الذره وبعض الدجاج يتوالد بمخازن القصب أما حياء أو هربا من طفل شقي الحال لا يري بيضه الا تمردغ وتمارض ولفظ الكسره.
:يمه المسيني .. أنا عيان
* مالك آجنا ميرود
:جسمك التلج .. ما عندك شي
* أمي والله عيان .. آسه الكسره ضايقا حنضل
: تكون عندك (مراريا) نجيب ليك الحقن
* لا لا لا ..
: آهه سمح داير شنو؟
* داير بيضه
: إتا ... انا ما خابرااااااااك مباري الجداده من الصباح .. أكل الكسره دي .. التكسر رقبتك.
ومن مفارقات الحال ان اللحوم البيضاء ومنتجات الدواجن والتي هي غذاء للشعوب الفقيره وتاتي في المرتبه الثانيه بعد اللحوم الحمراء ، إلا ان اللحم (الابيض) أستعصم علي ساكني الحله ويأتي فقط لفئتين من الناس ... المريض الذي (أبي العيش) أو ضيف كريم حل بصاحب الدار دون سابق إنذار أو كما يقول الشيخ كركاب (بعد نجمتو غابت) ولا احد يعلم بنجمه الضيف هذه ولا ميعاد إيفولها .. وهنالك صنف آخر من الضيوف وهم (المداح) وهولاء امتهنوا أكل (الديوك) فتوردت خدودهم ونعمت أجسادهم .. وكثير من ناس الحله فطن لهذه المهنه وما تدره من وجبات شهيه اضافه لكثره الترحال فامتهنو (المديح) هربا من جحيم الكسره وملاح الروب والشرموط ، ومن هولاء الذمره (ودالنعيم) ذلك الشيخ الضرير والذي يجوب القري بحماره وطاره يرافقه حفيده (للقواده) ... وود النعيم هذا لديه(ديك) مميز في كل قريه يحل بها ولا يرضي باقل منه ويتبع ذلك ان يطلق لحنجرته العنان في الليالي القمريه أو علي ضوء الرتينه عندما يغيب القمر، ويحكي الظرفاء ان ود النعيم يرفض تماما مشاركه أي شخص في هذا (الديك) وشمل هذا الرفض حتي حفيده الذي يقوده ، وقد سئم هذا الحفيد من هذا اللؤم والنكران فهو الذي يقود جده من حله الي أخري وهو الذي يملأ الأبريق ويفرش (التبروقه) وبالرغم من ذلك لا يخصص له طعام ويكون مكانه مع العوام من الناس ، صمم هذا الحفيد الشقي العوده بجده للحله دون ان يخبره بذلك، وقد أنطلت هذه الخدعه علي الجد الكفيف،
:أنزل جدي أتفضل علي الديوان دا؟
* خلاص آولدي نادي علي سيد الديوان عشان أشوف المعلوم.
: سمح .. سمح آجدي
رقد ود النعيم في ديوانه وهو لا يعلم وعندما حان وقت الغداء وضع صحن العصيده بملاح اللوبا وشمر ودالنعيم ممنيا نفسه بقصير ضخم الا ان يده غاصت في العصيده فرفع رأسه مندهشا:
: آجنا .. أت الحله دي وين؟
* دي ما حلتنا يا جدي
: حلتنا تطير في السماء
حكاية من حلتنا
* هـــــــــا جنا هه .. اللاعب أبشعر دا جايبينو من وين السايب؟عيييييك آنمري!!!
# أسكت آودالأعسر ... الجنا جايبينو من الفاو ... شغال مع الجنيات في المحلج!!
* لا .. لكين .. لعبو كيف؟ مجرب .. ما تدو الشنابله ديل فينا فرصه
# شنابله شنو آزول .. هسه من بدأ الدوري في فريق غلبنا ولا عادلنا ساكت
* انتا نسيت لعبتنا مع أبعتود ... ما طلعت تعادل..
#ماتذكرني ... آزول والله اليوم داك ... الناس ديلك لعبن شين تب .... يا أغلبوك ... يا تتحمل العكاكيز..
* آزول ها ...هي عكاكيز نصاح؟ الناس ديل والله ما شاحدني حليفه .. العكاز التقول بضببهو بجلد تمساح؟
# لالالا .. الناس ديل عندون .. الورل والكباجل
* والله بركه الجرينا سااااااكت
# والله أنا جاري وراي عميكه بعكاز وسوط ... ثلاث نمر ... كل ما أتلفت القاهو وراي ... الناس ديل يعني كان غلبناهم يعني ... كان أسوي شنو؟
* والله انا لبد لي واحد بعكاز جنب باب الاستاد الساعه التفا في يدو ونهزني بيهو ... آزول والله الحرامي أبسوليهو كدي...وبعدين حريقا لاعبنا من جاب القون حق التعادل ... جاري تلاته ترع ..
كان الدوري يا سادتي في الحله ... يفوق الدوري الانجليزي اثاره وشغبا .. اجواء المباره تسيطر علي الحله ... الصغير والكبير ... حتي النساء ...ونحن ياسادتي قوم جبلنا علي النصر ....من الله علينا بلاعبين مهره ... ومشجعين فنانين ... كانت البصات تنطلق عند الساعه الواحده ظهرا صوب المدينه ... حيث الاستاد ... وحيث الباسطه...ثم تتطورت هذه الرحله التي تستغرق الساعه الي رحله فنيه عامره بالطرب الاصيل ...تطريبا وتشجيعا.
ومن بين المشجعين فئه لا يعنيها المنتخب .. ولا تعنيها النتجه ... الهدف من الرحله هو استهداف مطاعم المدينه ... فعند مدخل المدينه ... تسمع الطرق:
# آزول اقيف طائر وين؟
* هووو في زول نازل السوق؟
# اقيف آزول ... مالنا وما ل الكوره ... نزلنا هنا!!
ثم يزدحم سوق المدينه بالقادمين ... ويكثر رفع الجلابيه لاخراج (الجزلان) من العراقي .. ويكثر تثمين الاشياء بغرض ودونه ... ثم ينقرض الزبادي من الثلاجات .. وتدمع العيون من البيبسي أبشطه... وأخيرا تأتي المحبوبه (الباسطه) ...هذه الوصفه لا تؤكل هنا في السوق أمام الحاسدين ... هذا الربع للخطيبه ... التي قطعا سوف تحفظ هذا الجميل!!!
ارتبطت الباسطه بالدوري ... شأنها شأن العكاز المضبب والسوط ... وفي المساء وعند العوده ... كانت البصات تأخذ الدوره حول الحله ... تيت تيت تيت تتت تيت ... وخلفها الاطفال يلهثون ... بعضهم لمعرفه نتيجه المباراة ... وأكثرهم لاستلام ربع الباسطه الوصيه.
حكايه من حلتنا
* جيبي لي معاك الشاحن
# وين انتا ختيتو؟
* شوفي تحت السرير بتاع البرنده ... وبعدين قفلي معاك باب الشارع!!
# ساعدني شويه ياخوي .. ناري ولعت قائمه عليها!! ودا العشا بتاعك ما تقوم تنوم!!!
* انوم؟ أنوم كيف؟ انا منتظر اللحظه دي من صباح الرحمن ... قالت انوم (انا ابوك يا الطيب).
# هاك الشاحن... وابقي نجيض وافتح الموبايل
(أبوقرن) .. كهل تجاوز الـ 45 عاما .. كان مؤمنا ان طريقه العيش التي يحيا بها الاهالي تحتاج لقرون للوصول الي معني الحياه الرغده..فالزراعه وتربيه المواشي تكفي شر المسغبه ...إلا انها قطعا لاتسمح باستخدام العطور ومركوب النمر والساعه (السيكو فايف) وكل أدوات الجخ الاجتماعي ... بدأ أبوقرن حياته مجتهدا وصابرا أملا في تغير الحال ... طال صبره ما بين الحرث والحصاد ... وما ان يدخل المحصول المخزن حتي تتكالب عليه المصائب (العمليه القيصيريه) ... مرض الوالده .. الحوش الوقع ... ولا تنقضي هذه النوائب الا بعد فراغ المخزن من المحصول .... لم يأخذ (أبوقرن) العبره من ذلك رغم وضوح الدرس ... فانت تعطي من مال قدر ما تحتاج فقط وكل الزياده تذهب لاشياء غير متوقعه وبعيده عن الحسبان... وفي الاعتقاد ان كثير من سكان الجزيره تنبهوا لهذه الدائره الجهنميه التي لا تتسع إلا بقدر الحاجه.
قرر (ابوقرن) التمرد علي اسلوب الحياه الرتيب ... باع ما يملك من مواشي وحواشه حبوبته بت المنقوري ... ثم طرق أبوابا غير مألوفه وارزاقا غير مقسومه .. باع الدقيق وتاجر في الجمله .. وعرف طريق البيع الاجل ودفاتر الشيكات ... كبرت العمامه ولمعت الجلاليب ... واصبح يشار اليه بالبنان بانه من الاعيان... ثم تبدل الحال واتسعت دائره الديون .. وعرف الكسر وبيع الخساره ... المماطله والحليفه بالطلاق ... ثم الزوغان .
قام (أبوقرن) بفتح الموبايل وهو يلعن الشيطان الرجيم ... وبدون مقدمات رن الهاتف . ....
* يا أبوقرن الحركات البتعمل فيها دي شنو؟
# حركات شنو يا خوي؟
* ماعارف يعني؟ موبايلك قافل من الصباح ... ونفتش عليك سما وطا ما لاقنك؟
# لا والله موبايلي فيهو مشكله ... وانا ...
*أسمع يا أبوقرن .. الصباح بدري يا قروشي ولا أمر القبض جاهز
# يا حاج داير فرصه بس اعمل لي ...
* يا ابوقرن كلامي واضح وما فيهو رجعه
تنهد أبو قرن ... تحسس رأسه من الصداع وشعر بكركبه في بطنه فهو لا يملك عشر هذا المبلغ ... خرج من غرفه النوم ... تناول الابريق للذهاب للحمام . .. وفي طريقه مر بحفره الدخان المستعره ... فما كان منه إلا أن قام بسكب ماء الابريق علي الحفره وهو يهمهم:
(الناس في شنو والحسانيه في شنو).
حكاية من حلتنا
عليك النبي شوف ناس الخرطوم البهائم ديل!!!
# كيفن الكلام دا ... الناس ديلاك متنورين ومتعلمين ... كيف تقول ما فاهمين؟
* أقولك حاجه ... أنا في سوق الكلالكله اللفه ... محل العيش بالطشاتا .. قلت أشتري لي كيله عيش أعملها زريعه ... آها قلتا للجنا أدني كيله عيش ... الجنا اتبوهم ساكت وقعد إعاين لي ... قال لي قصدك ربع ياحاج ... الجنا داير أعلمني الوزن كمان .
# آتا يا العاقب ياها كيلتك حقت المريسه ولا حاجه تانيه؟
* لا ياها ذاتا... لكين يانعوم
# بقيت مثقف والله ... مريستك تجيبا من الخرطوم
كانت (برمه) المريسه تتوسط غرفه قصيه من الدار ... يتم تعبيتها فجرا ... ويبدأ (الغرف) منها من بعد الفطور وحتي المغرب ... ومنعا لإزعاج الاطفال فقد تم تثبيت هذه البرمه في منزل (نعوم) الذي لم ينعم عليه باطفال ولا يملك في هذه الدنيا سوي (عنزه) وحمار وكلبه صغيره الحجم ... كان (نعوم) و (العاقب) يدخلان هذه الغرقه ورويدا رويدا يبدأ الضحك في التعالي ثم الغناء واحيانا يرتفع الشجار وكل ذلك لا يتعدي جدران الغرفه ... حيث علمتهما التجربه ان الخروج بهذه الحاله الي الملأ لاتحمد عقباه ...والمعلوم أن سكره المريسه تختلف عن غيرها من المسكرات المحليه مثل (العرقي)...(فالعراقي) سريع المفعول ... أما المريسه فيبدأ مفعولها بطئيا ويخرج بطئيا لذلك ظهرت مصطلحات (سكران طينا) و (بايتا معاهو) ... الخ.
في ذلك النهار الصيفي ... وعندما شرع (نعوم) و (العاقب) في الشراب... حتي سمعا الثكاليب والعويل... فقد رحل شيخ التوم عمده القريه ... فخرجا مذهولين ونسيا اغلاق البرمه والغرفه ... ودخلت (الغنمايه) الي الغرفه .. وشرعت في الشراب من برمه المريسه .. وعند الساعه الرابعه رشفه (عنز نعوم) أخر رشفه من المريسه .. وحدث الانتشاء واختفي اللون الاسود من العيون ... ثم خرجت من الغرفه وهي تترنح ...و .. و (أي سخيل قابلها بالشارع قامت بإرضاعه.
الاخوة.. الاعضاء
بعض الحكايات التي جرفها تسونامي المنتدي
ونواصــــــــــــــل
ماعارف أعبر .... صدقنى كل الكلمات الجمعتا
شفتا ما بتعبر عن الدواخل ... وغير مُرضية للنفس....
جمال أخاذ .... عمق فى الكلمة ... روعة فى المعانى ...
جازبية ساحرة تأخذك لآخر حرف .....
فلك كل الشكر لمتعتنا اللامحدودة ....
وفقك الله
up
up
up
up
النجم أبوحرازاقتباس:
المشاركة الأصلية كتبت بواسطة أبوحراز
الحلــــــــــــــــــه ولعت بالزياره
وليك علي... من المخزن وبيت الكلاوي
مع تحياتي
ود العمده ياهندسه...... فقدناك في آخر الحكايات وها انت تعود.... ومعك تعود كل الحواديت .. شكرا ياباشمهندساقتباس:
المشاركة الأصلية كتبت بواسطة ودالعمدة
عمنا مبارك(عمنا دي لزوم العمر)اقتباس:
المشاركة الأصلية كتبت بواسطة المبارك ود إبراهيم
تأتينا بالفل والياسمين ونهديك اللوز والدردم ... والعنكوليب
سرني والله انضمامك (للحله) وامتعني متابعتك للحكايا ولو كنت أجيد النظم لجاريتك فيما نظمتاقتباس:
المشاركة الأصلية كتبت بواسطة ابوخالد
شكرا أخي ابو خالد
حكاية من حلتنا
* يابت ... هووي... ناغمي عمك الطيب للغداء.
# قوم آجنا ... شوف ليك زير ساقط املء الجردل .. وجيب ليك كوز.
* آوليد صلح البرش داك ... خت ليهو طوبه... أنهر الكلب ... (جر جر الجابودي اللعوج خشمك).
ما يميز الحله (الغداء الجماعي) وهي عادة توارثتها الأجيال وساهمت بقدر كاف في اضفاء روح التكافل وقاربت بين ابناء الأسره الكبيرة ، فيجتمع في صينية الغداء ابناء العمومة والأخوان ... الكل يحمل (الصينية) .. ويبدأ الغداء عادةً بالصينية الكبري ويتم نقل بعض الاطباق من الصواني الأخري... وفي يوم السوق ترتفع القيمة الغذائية للصينية وتدخل بعض الأطباق الأضافية وتتنوع السلطات وتكثر التجشؤاءات بعد الإفراط في تناول الفجل.... والمثير للدهشة علي صينية الغداء أن الشخص عندما يبدأ في تناول اللحم يبدأ في قضم اللحمة مره أو مرتين ويترك الباقي للمراجعة بعد نهاية الغداء واحيانا للحاق بما تبقي من اللحمة لأن الإنهماك في كد العظم يفوت عليه الكثير من اللحمة الطرية، ويحكي ان ودسعدان قد قام بطرق العظم علي الصينية عده مرات متعشما في ما بداخل العظم من (مخ)، ثم تناول العظم الطويل وبدأ في الشفط ... وفي غفله منه غادر (مخ ) العظم وفي سرعه البرق استقر في معدته دون أن يتلذذ به في فمه .. فإستنكر ذلك وأردف بالقول (مافي نصيب) . ولبساطة هذه الحياة الكريمة ظهرت مسابقات مستمدة من هذه الظروف فقد نظم بعض الشباب مسابقة (لكد العضم)..وتباري في السباق مجموعة من الشرهين الذين يقضون علي الأخضر وخلافه... وقد أشترط (حميد) رئيس اللجنة أن الكد يجب أن يكون علي مستوي عال بحيث لا يترك المتسابق شئيا.. وأخفي علي المتسابقين طريقة تحديد الفائز... أكمل أربعة من المتسابقين كد عظامهم في الزمن المحدد وتم تقديم العظام لحميد لتحديد الفائز... وهنا نادي (حميد) علي كلبه (جركاس) وقدم له العظم الأول فقام الكلب بشمه بتلذذ وبذلك خرج هذا المتسابق من الحلبة... أما (العضم) الذي فاز فإن الكلب لم يستطع الأقتراب منه ... وتعامل معه تعامل الطوبه،،،،،،،
سنعود
[quote=الم
بارك ود إبراهيم;358112]اليوم نزلت ضيفا عليكم حبينا نقول للحبيب أبو عمرو نحن هنا بينكم جئنا نحمل الفل والياسمين لأرض الجزيرة الخضراء جئنا لأناس نعرفهم ويعرفوننا لك ودي ودمت بخير.[/quo
عمنا المبارك
كلنا في الهم شرق
يابتواقتباس:
المشاركة الأصلية كتبت بواسطة بت مارنجان
كرسي ما معانا.. عندنا بنابر
تسلمي
الزول الطيب.. أبوالخاتماقتباس:
المشاركة الأصلية كتبت بواسطة أبو الخاتم
ظروف عديده باعدت بيني وبين هذا البوست .. قريبا نعود..
شكرأ كتيراً
إنتا بتمشي وين يا راجل يا طيب ؟؟ :)
مشتاقين وكده :)
حصل جربت كد عضم الجداد :):) .. بعد ما تاكل الكبسه ههههه
تحياتي أبو عمرو
الحبيب الحكّاي أبو عمرو
و ينك يا لذيذ يا رايق أفتقدنا حكاوي الحلة و مواقفها الظريفة
نتمنى أن تتكرم علينا بنشر عدد من المواقف و الحكاوي
يا ناس الحلة خبر الحلة شنو ؟
* تعال آجنا .. هوي آبتسمع الطرش...
* أمشي أفتح ديوان (الأدرع).. أنفض الفرشات وفتح الشبابيك.
# الليله جايين ضيوف ولاشنو؟؟
* أسمع الكلام وما تلبه ... وفتش معاك أباريق.. وشوف ليك سيد كارو أكب ليهو برميل مويه.
كانت هذه حال (أبوعلامه) منذ ثلاثة ليال ..يدخل ويخرج من غرفة والده لينبه لهذه التعليمات .. يطمئن علي مخزن العيش ثم الديوان .. فوالده (الأسيد) غارق في غيبوبه بعد أن أشتد عليه المرض وفارقت وجهه ملامح الحياة... ولنا ياسادتي فرسان يعلمون بقدوم الموت ولايخطئون علاماته ... وعندما تتحقق هذه العلامات تبدأ التجهيزات علي قلتها حتي قبل أن تفارق الروح الجسد بوقت ليس بالقليل... تبدأ إجراءات الموت بالحله بزيارة بعض النسوة وعندما يبدأن في شرح المرض يكون المريض مدركا لحالته الصحية ثم ينتقلن لمرحله الهمس فيفقد المريض وعيه...
* أصبح كيف اليله...
* سقيتوهو بالمعلقه؟
* آهـ النفس ما هدأ شوية...
* ياجنا ما تسافر... الزول دا بجيبك راجع..
وتبدأ المراحل المتقدمه للموت عندنا عندما تستعجل النسوه في عمل الطعام للحاق بحال (الزول التعبان)... ويبدأ التقاطر نحو منزل المريض ... البعض للموأساه وأكثرهن لحضور لحظة الفعل الحقيقي...ومخافة اللوم.
أما رجال الحلة فأمرهم في الموت غريب ... ليس فيهم من يهتم بمناداة طبيب طالما (يعرفون الموت) ..
* في زول مشي للصيوان؟
* دققتو العيش؟؟
* كلمتو ولدو (الفلاني)؟
وكل الويل لمن يستنكر هذه التصرفات ... يقابل بنهره مستهجنة وعبارة (آزول .. نحن الموت ما بنعرفوا).
(أبو علامة).. قام بكل هذه الإجراءات من ترتيب للديوان ... وتجهيز للدقيق ... وملء لبراميل المويه ... لم يتبق إلا أن تفيض روح والده والتي قاومت الموت في مرات عديده ... يتكسر الناس ويتم التجهيز فيرفع (الأسيد) رأسه وينهر الغنماية التي دفنت رأسها في شوال العيش فينفض القوم.
دخل (ابوعلامه) علي والده المسجي علي العنقريب ووجد معه (اللمين ود الفكي) الشيخ المتخصص في تلقين الشهادة... وفجأة تحرك رأس (الأسيد) ... ثم .. تنحنح ... وأطلق تنهيدة قوية..
آح آح ... أنا وين؟
فما كان من أبوعلامه إلا أن عاجله برد قاس
(أنتا في لظي... ياخ مالك نجضتنا)
اقتباس:
المشاركة الأصلية كتبت بواسطة أبوعمرو
:p:p:p
مبدع دوماً أبو عمرو ...
ها زول ها ...
التصاوير دى بتجيبا من وين ...
بلاي ما تنقطع .
ههههههه يا أبو عمرو .. أحيانا مع .. سوء حالة المريض ... وكثرة الإنتظار .. بكل تنازلاته .. يكون الموت راحة للجميع .. من نجاض ما قبل الموت.. قصة معبرة جدا. :p:p:p
شيخ العرب...اقتباس:
المشاركة الأصلية كتبت بواسطة عوض الكريم الخواض
دي ما تصاوير...ديل شخوص وواقع
والجايات أكتر من الرايحات
مودتي
[QUOTE=عثمان جلالة;426614]ههههههه يا أبو عمرو .. أحيانا مع .. سوء حالة المريض ... وكثرة الإنتظار .. بكل تنازلاته .. يكون الموت راحة للجميع .. من نجاض ما قبل الموت.. قصة معبرة جدا. :p:p:p
عثمان
مافي احلي من الموت (الفجعه) .... كف لامن شاف لا من دري...
واهلك قالوا (الموت ما بتحارس)
نساله حسن الخاتمه...
[QUOTE=أبوعمرو;427589]حبيبنا أبو عمرو ...اقتباس:
المشاركة الأصلية كتبت بواسطة عثمان جلالة
أعيذك بالله ونفسى من موت الفُجآءَة ...
يآخى دى موتة ما حلوة ...
عشان نعافى الناس ويعافونا يااااااااخ ...
ياخى ناس المنتدى ديل برااااااااااهم دايرين ليهم ( شهر ) :eek::eek:
:) :) :)اقتباس:
المشاركة الأصلية كتبت بواسطة أبوعمرو
:) :) :)
[QUOTE=moh_alnour;427992]
:) :) :)[
:) :) :)
ود الجاك
لسه عندك رغبه في بيت ودالحسين
[QUOTE=أبوعمرو;437263]يعني ماناوي تتمها ؟؟؟!!:rolleyes:اقتباس:
المشاركة الأصلية كتبت بواسطة moh_alnour
:):):):)
[QUOTE=moram;437300]:rolleyes::rolleyes:هههههههههه ما ود النور براهو المنتظر يا أبو عمرو .... تمها ياااااااااخ :cool:;)اقتباس:
المشاركة الأصلية كتبت بواسطة أبوعمرو
في داعي للأسئلة التعسفية و المُهرجة دي :( لا ما عندي رغبة في البيت عندي شمار أعرف البت الدخلت في البيت ;)اقتباس:
المشاركة الأصلية كتبت بواسطة أبوعمرو
الرغبة ثنائية يا أبو عمرو ، يلا ورينا الحصل على المُزة شنو مع ناس الحلة ;)اقتباس:
المشاركة الأصلية كتبت بواسطة أبوعمرو
الغريبة إنو من زمن البوست الفات ( السنة الفاتت ):confused: أنا وإنت كنا طالبين يتمها , ولسّة في الإنتظار , يكون ما داير يتمها لييه ؟؟!!!:rolleyes::confused::confused:اقتباس:
المشاركة الأصلية كتبت بواسطة moh_alnour
في حكاية سابقة ... حلت ربيعة الحنكوشة ضيفةً علي حلتنا .. وسار بسيرتها الركبان .. واصبحت حديث (الدكاكين) ... وأفتعل الأزواج المعارك مع الزوجات ... ثم حدثت المصيبه وحلت الكارثة وتوغلت النساء في غابة النحيب....
* * *
- إتا آ الطيب ودالحسين دا عرس من بنات الريف.
* .. هو كان ختا بنات الريف كان أولادو بتقابلو رأسو مسوكب وجبهتو قدر مخاضة الترعه..
- لا ... لكين ... البت الضيفه ريافية مائة المائة.
* والله آ النصيح ما طالبني حليفه ... أنا شفتها مره واحده في بيت ناس ودالفكي ... آهـ من اليوم داك بتكلم مع مرتي مدنقر!!!
- مرتك مالا آ الطيب ... ما زمان بدور تكتل فيها ودالبله!!
*ياخي أريتني كان كتلتو ودخلت السجن ولا قطعوا راسي الزي حبة البطيخة دا وريحوني زاتو!!... (أنسا يااااااخ ...الضيفة دي حصل شفتها بصقت!!! ... ولا بتلحس في أصابيعا بعد الأكل ... تقولي ناس أم حسون!!!.
لم تكن هنالك منطقة وسطي ... وكما نحيا نحن في القرون الوسطي غابت الموضوعية والوسطيه ... ليس هنالك من يوازينا فأما للأعلي أو أسفل سافلين ... وتم تصنيف الزائرة (ربيعه) في الدرجات العلي من حيث الجمال والرقي والتعليم ... وكعادة الطيبين البسطاء يندس بينهم الحاسدون المفترون والذين يحسون بالوضاعه في حضرة السلوك الراقي والمنظر البهيج ... فتتطايرت الشائعات دونما رقيب ...
_ قلت ليك شوفتو بعيني الواحده دي؟
* ياخ الكلام دي عيب عليك ... معاك ناس عندهم عينين أتنين بدل واحده يا ودشاقوق ماشافو حاجه ..تكون شفتو أنتا بي عينك الزي آخر الشريط دي (كان ودشاقوق يبصر بعين واحده بعد أن ضربه سير الطاحون في العين الأخري وأصبحت بيضاء خالية من السواد).
ــــ أنا شايل بطاريتي ... شلعتا علي بيت ود الحسين اشوف ليك الجنا والبيت الضيفة الما بتغباني ..
* كضاب والله ياودشاقوق البيت الضيفة البارح قالو في الحلة الورانيه ...
ـــ خلي كلامي انا الأعور دا ... ودالبلال ما قال شاف في نص حواشه العيش الطوال معاها ودالحكيم لمن حتو القناديل!!!
وهكذا نسجت الاساطير .. وشوهدت ربيعة في الخيال مع أكثر من شخص وفي ذات التوقيت ..فالبعض يروي ... والكل يصدق ... كان ودقردين معجبا بهذه الحكاوي يسمع ثم يرسم صورة خيالية للحكاية ثم يضع نفسه مكان البطل ويغرق في النوم ... ثم كان ذلك الليل الصيفي الذي حلت فيه الكارثة وجعل النساء يتوغلن في غابة النحيب...
تأكد ودقردين من أن الحلة قد غرقت في النوم ... حمل سفنجته بيديه ومشي برأس أصابعه حتي لايوقظ رفاقه في حوش الديوان .. وتيمن صوب بيت ودالحسين.
جديرة بجمعها في كتاب .... لى التصصميم والغلاف