ديك وديك (مسلسل نصف منقول)

اقتباس:

---

المشاركة الأصلية كتبت بواسطة ahmed algam

واصل يامبدع

---

نشكرك جدا يا علقم

وعشانك الليلة حا اطلع الجداد في راسي كله

الحلقة التاسعة

اول ما شاهد الدجاجات فافا وامها منكبات نحو كيكي بفرح رددننا بشهقة تدل على الدهشة ... : هو كيكي سلطان الطرب زوجك ؟؟؟؟
وقالت لهم ام فافا .. كييييف هو انتو بتعرفوه ..

قالوا كييييف .. واحدة تقول هو فنان حفلة زفافي واخرى تقول هو غني في عيد ميلاد بيضتي الاولى ..
واحدة من الدجاجات سالت سلطان الطرب الديك كيكي قائلة له ..

يا استاذ كيكي صحي تركت الفن واعتزلت ..

كيكي : اعتزل شنو يا فروجة الحلال ( على وزن بت الحلال ) عمرك شفتي ليك فنان سوداني اعتزل ولا وزير استقال ؟؟

انفجر الدجاج بالضحك بمن فيهم ديكسون ..

وفاجا كيكي الجميع عندما قال :

يا اخوان عشان نكسب الوقت قبل ما يجوا الحراس الثقيلين يحرمونا من اللحظات

الجميلة وانا انتهز الفرصة دي يا ابو كاكا واطلب يد العروسة كاكا لصديقنا وولدنا البطل

العالمي ديكسون ..

كانت المفاجاة التي الجمت الجميع وجعلت كاكا تتوارى خجلا خلف اجنحة امها .. وقبل

ان ينبث فم العم ديكو بكلمة انطلقت الزغرودات من باقي الدجاجات .. لولا ان ان امر

بتهدئة الوضع والعم ديكو رادا ..

ديكو: طبعا طلبكم على العين والراس والبطل ديكسون ما بترفض له طلب ويشرف اي

قفص في الحتة .. بس طبعا انا لازم اشاور خيلان البت وكدا .

كيكي : يا راجل بلا لبط معاك هو في دجاجة عندها خيلان قول تم خلينا نفرح وبعدين

اوعى تقول لي اشاور البيت لانه اي سوسيو صغير في الحتة عارف انه كاكا مرتبطة مع ديكسون وبيناتهم حب ملهلب .

ديكو : غلبتني لكن يا كيكو ماشي الف مبروك يا عروسة .

ولتنطلق الزغرودات من جديد بل يدخل البنات ( اي الدجاجات في الغناء ) وتبدا احداهن

تنقر على جركانة الموية ممثلة ايقاعات الدلوكة ..


اهوي بي اهوي بي ... ديكسون العريس ........

لولا ظهور هادم المتعة الحارس بصوته الاجش هاشا الدجاج نحو اقفاصه ..

وفي زحمة الدخول نحو الاقفاص يقترح العم ديكو ان يكون الفرح يوم الخميس .. عقد

ودخلة على طول ما عاوزين يطولوا الموضوع لانه الايام دي ما في ضمان خاصة بعد

انتشار انباء عن امراض اصابت الابقار واخرى للخراف وازداد الطلب على اللحوم البيضاء

والدجاج ولو ما كان هم من دجاجات البيض كان تم تعليقهم في اسياخ الشاوما من زمان .

نشوفكم يوم الخميس

في يوم الاربعاء

انتهز العريس ديكسون جولة العصر اليومية وخرج لوحده واعدا عروسته كوكا باحضار شيلة ( ما حصلتش)

وفعلا اتجه ناحية مزرعة النعام والارانب واحضر من هناك شيلة اصبحت حديث المجالس عفوا المزارع ردحا من الزمان .. وكما وصفتها الخالة ام فافا ..

قال ليك : جاب ريش نعام للنوم دستة .. وجاب ليها ريش كبار دا قال ليها ممكن تعمليه ستائر .. واهها وصوف الارانب دا بالشئ الفلاني ( ماهو هذا الشئ الفلاني الذي تقوله النساء) ..
اها وقال ليك جاب ليها قشرة بيض نعام كبيرة قال ليها دا حيكون سرير مولودنا الاول ( اول مره اشوف شيلة فيها سرير اطفال .. يعني ضامن خالص؟ )
اها في ذلك اليوم حضر الفنان كيكي واحيا حفلة حنة العروسة للصباح .. وقد صدح حتى بح صوته .. وقال له العريس ديكسون خلي حاجة لبكرة ياخي الليلة الكبيرة .

درديري كباشي


منتظرين باقي المسلسل ....


الشئ قرب يبقى مسلسل تركي


منتظرين بشدة

الله يطراك بالخير ويعود قلمك ينور من تاني