ازيك ياابوعلا كيف علا وام علا اها قول لي ام علا قالت ليك سماح اديني فندوكم ندق ونديكم
بري مابدور ادق فيهو محلب هدي ويكه ضرابه قبل تجي بهمة الماحي تاكلها
بمناسبة بهمة ودالماحي بتعرف المحويت
عرض للطباعة
ازيك ياابوعلا كيف علا وام علا اها قول لي ام علا قالت ليك سماح اديني فندوكم ندق ونديكم
بري مابدور ادق فيهو محلب هدي ويكه ضرابه قبل تجي بهمة الماحي تاكلها
بمناسبة بهمة ودالماحي بتعرف المحويت
اقتباس:
المشاركة الأصلية كتبت بواسطة شبرقية
الغالية شبرقية
أنتي عارفة أختنا مدنية دي حنكوشة الحناكيش
و ما دايرة تعترف بالكلام دا مع العلم بأنو قالت
دايرة تقعد جنب سماح عشات تشف منها
و بعد دا كلو تجي تقول لينا عشان نمحو حنكشة ناس شبرقية
اقتباس:
المشاركة الأصلية كتبت بواسطة مدنيّة
شفتي جنس المحن دي
عشان كدي أنا قلت ( أبو سنينة بضحك على أبو سنينتين )
يعني العندو سن واحدة ( مدنية ) بتضحك على العندها سنين ( أنــتي )
يعني بالعربي المكشوف المارعارف حاجة بضحك على العارف أحسن منو
أهـــا وقع ليك كلامي و لا ترجي عمك ود الماحي في الكريبة
اقتباس:
المشاركة الأصلية كتبت بواسطة samah
حبوبة سماح
قومي الصباح
أحلبي اللبن
سوي الملاح
خلينا نفطر بإرتياح
نفرح نقول بي إنشرح
أخدر ضراعك يا سماح
الويكة الضرابة و الشطة القبانيت دقيهن من بدري قبل ما تدخل النواية
باقي الرشاش قرب
و أعملي حسابك اليومين دي هبايب و سموم ما تشري الصلصة فوق راس الراكوبة بتقع و الصينية بي تتطرقع و الغنم باكلوا الصلصة
غنم ود الماحي شكيتن لي الله كان حايمات فرق البيوت يلقطن في الأكياس و الدلاقين
أم علا بتقول ليك الفندق داقــة فيه قرض داير تدبغ بيه القربة
باقي الصيف قرب و أبو علا دا ضيوفوا كتار خلااااص
بمناسبة المحويت دي كان خليتي واحد من العيال يجي يمسك لي العجول يكون بارك الله فيك يا بت أمي
وينك يامدنيه تعالي شوفي الابداع
والله ياابو علا انت زول صاح ومفخره وانا سعيده اني بتعامل معاك
اها والله بهم ودالماحي علا احدث ابحمد يناحيهن علي واطه حاج النور خلي يودوهن الزريبه عشان يدفع دم قلبو
اها ام علا اكان هزت رسلو لينا فرصه مع الدرافين
ياحليل القربه والله يقطع التوكنولجيا
اقتباس:
المشاركة الأصلية كتبت بواسطة samah
والله ياسموحة اخونا ابوعُلاء دا مفخرة للمنتدي بالجد وانتي لسة ما شفتي حاجة ياقول المصريين التقل وراء
ياختي شايفاك خلا اتعلمتي الرطانة :p
همسة : هسي قاطعة الكونكلوجيا دي مالك ؟؟ كان ما هي كان عرفنك وين ياعثل ;)
اقتباس:
المشاركة الأصلية كتبت بواسطة samah
ود الماحي دا يا بت أمي راجلاً مبسوط و خيرو كثير ، الزريبة ما بتسوي ليه الترابة
بس كان عندك بنيـــة نجيييضة خليها تنهر غنم ود الماحي ديل علي البلدات يسألني ما يسألك
ياكلن العدار الشايفاهو عيني دا كان ينقـــرن من الصباح
الفرصة و الحشكل و السمن كلهن فضلت خيرات موجودات
إلا بس وكاي السعن أنقطع كان عندك دبارة و لا باقي سدأيــة في المترار رسليها لينا
و بي المرة أديني شوية ودك أسمح بيهو شطور البقيرات ديل
عارف نفسي تقلت عليك يا بت حشاي بس زي ما قالوا في المثل
الجار الما بي دين و لا بتشحـــد منـــو قوات الأمم المتحدة أحسن منـــو
الدوبيت هو أحد الفنون الشعبية الأدبية المنتشرة في السودان منذ القدم، ويسمى أحياناً بالمسدار وجمعها مسادير، وهو عبارة عن مقاطع شعرية يتكون كل مقطع من أربعة أبيات من الشعر و يسمي أحياناً مربعات الدوبيت ويتناول الدوبيت موضوعات مختلفة ولكن كلها تدور حول معاني الشجاعة والكرم وذكر المحبوبة وغالباً ما تأخذ أبيات الدوبيت طابع الفخر حيث يفخر الشاعر في أبياته إما بكرمه أو شجاعته أو أي معنىً آخر من المعاني السامية ، وينتشر فن الدوبيت في السودان بصورة أساسية في المناطق الرعوية حيث يعيش السكان في هذه المنطقة حياة يغلب عليها طابع البداوة .و الدوبيت من ضروب الشعر السماعية التي يتداولها الناس فيما بينهم دون الحاجة الى التدوين و الكتابة و يحلو الدوبيت دوماً مع ليالي السمر أذ تنشط المجادعة وهي ان يبتدر احد الشعراء مقاطع دوبيت فيرد عليه اخر بمقاطع دوبيت أخري كذلك فن المجاراة و هي مجارات الشاعر في القافية أو المعني
و سوف نتطرق في هذا المقرر الى بعض نماذج الدوبيت المختلفة
و من شعراء الدوبيت المشاهير
عكير الدامر و الطيب ود ضحوية ، طه الضرير أحمد عوض الكريم أبو سن ، يوسف الشوبلي ، الحاردلو ، يوسف حسن عثمان و ود ام سيالة ود جلي و غيرهم من الشعراء الفحول
ومن الرباعيات التي تلخص زمان الجاحدين وناكري الجميل رباعية عكير الدامر
كتير الفيهم أحسنت وعليك إتباهو
جاهم ريش طغوا وكفك نسوهو جباهو
ود الدابي بالصح بلدغ الرباهو
وأب قنفد حقيقة بجرح الحباهو
معاني المفرادت
أتباهو : أفتخروا
الدابي : الدبيب ( الثعبان )
الرباها : من قام بتربيته
أب قنفد : هو حيوان ابو القنفد المعروف , هو حيون من الزواج يمتاز بوجود أشوك على جدله
المعني العام
ما أكثر الأشخاص الذين أحسنت فيهم و تكبروا عليك و تباهو بفضلهم عليك
و عندما جائتهم قليل من النعمة طغوا و تكبروا و نسوا عطفك عليهم و مسحك لجباههم
صحيح أن الثعبان الصغير عندما يكبر فأنه قد يلدغ من رباه و أحسن فيه و ابو قنفد و هو حيوان شوكي فإنه يمكن أن يجرح من حباه و عطف عليه
و في البيتين الأخرين صورة بلاغية رائعة في تشبيه ناكري الجميل و المعروف بالدابي ( الثعبان ) و أبو قنفد
و المعني العام لهذه الأبيات يشبه الى حد كبير تلك القصة التي وردت في العصر الجاهلي إذا يقال
أن أمرأة كانت تسكن بالقرب من الغابة و ذات يوم و هي في طريقها الي البيت وجدت ذئباً صغيراً مشرفاً على الهلاك فعطفت عليه و أخذته الى بيتها و كانت لديها شاة واحدة فأخذت ترضع الذئب من لبن الشأة حتى كبر و أستوي عوده
و ذات مرة خرجت المرأة من بيتها و تركت الشاة و الذئب في الحظيرة و لما عادت وجدت أن الذئب قد أكل الشاة فأنشدت قائلة
بقرت شويهتي و فجعت قلبي
و كنت لشاتنا طفل ربيب
غذيت بثديها و ربيت فينا
فمن أنبأك أن أباك ذئب
إذا كان الطباع طباع سوء
فلا أدب بفيد و لا أديب
هوي يا جماعة الخير الأولو شرط أخرو نور
الكلام دا لاوم تحفظهو على ظهر قلب
الإمتحان بعدين بكون عن طريق المسنجر
وطبعاً و انتو يا حلوين عندكم المايك و الكاميرا
يعني ما في طريقة تعملوا نسخ و لصق و بعدين مافي اي طريقة واحد يجيب لي واحد من أهل العوض يمنتح بدلوا
فاهمين يا حنــا...................... كيش
ياإبراهيم كدى قول لينا قبل مانجى
اهم حاجة ريحة قلية البن
عشان تكون جبنة بى تحديقتا
صلاة النبي علي النضم السمح
صلاة النبي علي ابوسن والشوبلي
ومحبوبي الحردلو
وهاك دي وبندور المضمون ياابوعلا
حليل بناتنا وحليل السماحه
وحليل اللوادن القدلن بالراحه
سارات القلب زايداتنو شراحه
مستورات توبن مابلفحنو لفاحه
ملعون ابوك يا زمن كسيتن قباحه
التوب اترمى والمحاسن مباحه
جاريات جري الوحوش حبسن الساحه
وان اقبلن قبال تمامن تسبقن كتاحه
اقتباس:
المشاركة الأصلية كتبت بواسطة samah
عليك الله ياسموحة مالي حق اقعد جنبك ؟؟
اقتباس:
المشاركة الأصلية كتبت بواسطة samah
حليل التوب يا سماح و حليل النسوان البلبسو التوب
حليل زمن شوف عيني الحبيب بي حشمة لابس التوب
و حليل زمن تمشي الهوينى كما يمشي الوحي الوجل
سموحة خدي المربعات دي هدية متواضة منــــي
و يا حناكيش عشان ما تقولوا أبو علا لقى سماح و قلبوها مجــادعة المربعات التحت دي و أبيات السموحة الفوق ديل من ضمن مقرر المطالعة
حليلك يا سماح و حليل زمن السماح المات
حليل زمن النفوس زي اللبن صافيات
حليل زمن البنات البشبهـــو الأمات
و حليل زمن الجمال عفة و أدب و صفات
حليل زمن البنات لابسات عفيف و نضيف
صاينات للعروض ما بعرفــن التزيـــيف
في عزة و شموخ قادلات على التشريف
ما بســـون غلــط و ما بعرفن التخريف
حليل زمن البنات الزي قمر دورين
لا ســـون كــلي لا نيفـــيا لا شتين
صادقات في الكلام ما جكسن نفرين
حافظات لى عهود الماتو و الحيــيين
حليل ناس عبير وحلاة التوب عليهن
غزلان البر يغيرن والله من مشيهن
وقمر السما إختفى لما شاف وشيهن
والأخلاق حقتهن والحشمه منهن وفيهن
ديل ناس عبير كيف أقدر أكافيهن ؟
بخاف أظلم ومع بنات آاااه أساويهن
فى الجمال زايدات وحبل الدلو حنن يديهن
ويدين غيرهن حلاوه قطن ما بتجاريهن
ديل بنات الجروف ودروب الغابه ما بتصعب عليهن
حوريات رمال البحر والموج فرحان بيرقص ليهن
أخوات الرجال فى الحاره قدام بتلقيهن
ما طماعات فى الدنيا القليل برضيهن
دايرات ستر الحال يارب تحفظن وتغطيهن
الحرف اليدوية و اثرها في تطور الإقتصاد و زيادة الدخل
تر القطن
اليوم شكلو الموضوع صعب من عنوانو غايتو نسوي شنو الليلة الناس البطلعو برة الشبكة كتااااااار الله يكضب الشينة
تمشياً مع سياسة الكونفردرالية و بما أن غالبية حناكيشنا من الجزيرة رأيكم شنو نرجع خطوتين لي وارء و نتحدث عن موضوع تر القطن المشهور جداً في قري الجزيرة و بعض مناطق النيل الأبيض
تسبق عملية تر القطن عملية اللقيط اذ تقوم النسوة بلقيط القطن في موسم الحصاد و من ثم تبدأ عملية نفش القطن إذ أن قديماً كان يتم نفش القطن يدوياً و تجتمع الأسرة في المساء لنفش القطن كما تقوم بعض البنات بعملية نفير مصغر لمساعدة بعضهن البعض في نفش القطن
و أحيانا تحمل إحداهن كرتونه مليانة قطن و تذهب في زيارة جارتهم او صديقتها و يقوم أهل البيت بمساعدتها في نش القطن
ثم تطور الحال قليلا فتم إكتشاف القوقاية و هي عبارة عن آلة شعبية تتكون من شعبة و سيطان اثنين اذ يقوم شخص ماهر بعملية صناعة القوقاية و هي عبارة شعبة قصيرة في شكل (( Y و يتم تخريم رأسي الشعبة بالنار لتمرير السيطان من خلالها و السيطان هذه اما أن تكون عبارة عن مطارق من اللعوت أو تتم صناعتها من السيخ علي شكل منفلة و يتم لف السيطان بقطع قماش قديمة في منتصف المسافة بين رأسي الشعبة لتضييق المساحة بين السوطين
و بعد صناعة القوقاية بالطريقة المذكورة أعلاه يتم حفر حفرة في منتصف البيت أو الراكوبة تضع فيها القوقاية و يدفن الجزء الأسفل منها لتثبيتها و منعها من الحركة و بهذا تكون القوقاية جاهزة للعمل اذ يمرر القطن من خلال فتحة صغيرة تترك بين السوطين علماً بأن تشغيل اللآلة يدوي يقوم بها شخصين يقومان بلف السيطان في أتجاهين مختلفين كذلك يكون أحدهما مسئول عن عمليةتغذية القوقاية بالقطن بيمنا الأخر منشغل بأستلام المنفوش الطالع من القوقاية و يجب عليه المتابعة الدقيقة و الأنتباه حتى لا يلتف القطن في السيطان مرة أخري و يعمل على تعطيل القوقاية
و تمشياً مع الطفرة الحديثة التي غزت العالم تم إدخال بعض التحسينات في القوقاية اذ تم الإستغناء من الحفرة و تم استبدال الشعبة بعودين يوضعان في علبة كبيرة بشكل متوازي و يتم عمل خلطة من التراب و الحصي و الأسمنت و توضع في العلبة لتثبيت العودين و بذا يحصلون على قوقاية عصرية متحركة يمكن نقلها من بيت لآخر .
بعد نفش القطن يتم جمع الغلغل و أستخدامه كعلف للسخيلات الصغار أو الغنماية الوالدة بعد ذلك يتم جمع القطن و وضعه في عنقريب و ضربه بالسياط و المطارق للتخلص من الغبار و الشوائب المتعلقة به و هذه المهمة غالباً ما تقوم بها الفتيات أو الشباب ثم تأتي بعد ذلك عمليه فرز و أختيار القطن الأبيض الناصع ليدخل مرة أخري من مراحل التصنيع أما القطن المتبقي فيتم أستخدامع في تنجيد المراتب و المخدات من ثم يدخل في مرحلة اخري من مراحل الإنتاج و هي مرحلة تر القطن
يتم تر القطن بإستخدام المترار و هو عبارة عن عود رفيع مسنن الراس و مشطوف مثل المرواد و يتم تركيب درة في رأس المترار و الدرة عبارة عن قطعة دائرية من الفخار مقدودة في الوسط و فائدة هذه الدرة تثبيت المترار و مساعدته على الحركة بسرعة
تبدأ عمليه تر القطن بوضع رأس القطنة على الشطفة الموجودة في بدأية رأس المترار و مط المتبقي من القطن في اليد اليسري و من ثم وضع المترار بشكل متقاطع ( أفقي ) على أحد الفخذين و غالباً ما يكون الفخذ الايمن و وضع اليد اليمني علي المترار و اليد الاخري يتم امساك القطن بها إلا أذا كان المرأة عسرا ( شولا ) فأنها تقلب الأية . ثم بعد ذلك تبتدى عملية تحريك المترار الى الامام و الخلف في حركات حركات خفيفة و سريعة و من ثم دفعة بحركة مفاجئة و تركه معلقا في الجوء ليدور حول نفسه عدة دورات مكوناً في الوقت نفسه خيطاً رفيعاً من القطن ثم يشد الخيط بحركات خفيفه لإكسابها المرونة و المتانة و من ثم يتم لف الخيط في المترار في المنطقة خلف الدرة مباشرة و يتم تكرار هذه الحركة مراراً و تكرار و كلما كررنا نفس العملية حصلنا على خيط جيد مع المحافظة على أن يكون الخيط متواصلا غير مقطوع و بهذه الطريقة تتكور و تكبر كرة الغزل الموجودة في المترار و عندما يصبح حجم كرة الغزل كبيرا تتم استخراجها من المترار و لفها في شكل كرة تسمي كرة الغزل
فإذا كانت الخيوط المكونة لكرة الغزل رقيقة و ناعمة تسمي السداية أما اذا كانت الخيوط غليظة و غير متساوية في حجمها فيه ما تعرف باللحمة
و نحتاج الى النوعين ( اللحمة و السداية ) في صناعة الغزل
ففي عملية النسيج يتم استخدام اللحمة أولاً و يتم نسج خيوطها في شكل طولي و هي بمثابة الأرضية لقطعة القماش التي نقوم بنسجها كذلك يتم استخدام السداية لنسج خيوطها بشكل عرضي متقاطعة مع خيوط السداية لتكون لنا قطعة قماش
يستخدم هذه النسيج الرائع في صناعة الفراد و جلابية القنج و الشالات كما يستخدمه بعض الموسرين في صناعة أكياس السكر
و بعد نسج الفردة أو الشال يتم تزيين اطرافه و صبغها بالوان غالباً ما تكون خضراء أو زرقاء أو عنابية و ذلك حسب نوع الصبغة المتوفرة في البيت
و من ثم يتم بيعها للمساهمة في زيادة دخل الأسرة و توفير المستوي المعيشي المطلوب كذلك قد تقوم بعض النسوة ببيع الغزل لواحد من النساجين دون الدخول في عملية النسيج علماً بأن كرة الغزل يتم وزنها بالرطل و غالباً ما يتراوح وزن الكرة بين رطل أو نصف رطل
علماً بأن رطل السداية اغلي من اللحمة و اكثر طلباً منها و لكن النوعين مهمين في عملية النسيج و لا يمكن الإستغناء عن احدهم علماً بأن كل رطل سداية يجب ان يقابله نصف رطل لحمة في عملية النسيج .
و قد قامت الكثير من النساء السودانيات منذ قديم الزمان بممارسة عملية تر القطن و عملية الغزل و النسيج تطبيقاً لشعار الإكتفاء الذاتي و الإعتماد على المنتجات المحلية و مساعدة رب الأسرة في تحمل المسولية الأسرية
معاني الكلمات
تر القطن ( بفتح التاء و سكون الراء ) غزل القطن
اللقيط : عملية الحصاد و جني القطن
نفش القطن : تنظيف القطن و إستراج الغلغل
الغلغل ( بضم حرفي الغين ) : بذور القطن
القوقاية : ألى شعبية لحج القطن
الشعبة : عود على شكل حرف ( Y ) يتم استدامها كدعامة في البيوت و الرواكيب
السيطان : عبارة عن عودين رفيعين
مطارق : المطرق و هي عبارة عن عصا رفيعة متوسطة الطول
اللعوت : نوع من الأشجار الشوكية
السخيلات : جمع سخلة و هي بيـــبي الغنامية
المترار : آلة لتر القطن
الدرة ( بكسر الدال و سكون الراء ) قطعة دائرية من الفحار
السداية : خيوط الغزل الرفيعة الناعمة
اللحمة : خيوط الغزل غير متساوية الحجم
الفراد ( بضم الفاء ) : جمع فردة و هي حاجة سودانية خالص تشبه الشرشف أو الملاية
جلابية القنج ( بفتح القاف و كسر النون ) : جلابية تصنع من القطن يلبسها أولاد الذوات
النساجين ( بفتح النون و تشديد السين ) جمع نساج و هو الشخص الذي يقوم بعملية النسيج
اقتباس:
المشاركة الأصلية كتبت بواسطة abu_ola
هوووووووووووي يا ابو علا
لا دايرين نمحو الحنكشة
ولا دايرين نقرى عشن نخلي الحنكشة
اريت الحنكشة تتعمم على المدارس
بررررررررررري ياود امي ده شنو ده
انا اقعد اقرى وافتش مراجع تاني وارجع للبحوث وغيره
ما دددددددايره
من حسه انا سحبت ورقي وطالعه
:D :D :D :D
اقتباس:
المشاركة الأصلية كتبت بواسطة salwa
هوووي يا أحمد فتحي عينك زي الريال أبو عشرة
و الله كان نرسل ليك المقرر في البيت و نعمل دراسة عن بعد و لا بالإنتساب ما بخليك ما بخليك
و بيني و بينك كان ما محيتي الحنكشة بتاعتك دي بعدين بعد ما تناسبونا إلا تجيبوا ليكم مترجم
و كان انتي ما دايرة تقري شيلي المقرر لي حمــودي و درسيهو و راجعي معاهو عشان بعدين يعرف
يتفاهم مع البينة دي
بعدين شيلي الورقة كان شايلاها أسمك مقيد عندي في الداهـــي الأسمو الكمتيـــتور دا
اذكر في عام 86م تم عمل نفير في الجزيرة للقيط القطن في الحواشات التى على طريق بركات ، كنت بفتكر المسأله بسيطه جدا لكن اتضح إنُ من دون معرفه نحن بنضر في المزارعين وما بنساعدهم ورغم إن الواحد عرف حاجة عن قرب الا إنُ شرحك يابو علا غاية في الروعه والتسلسل .
الا ان إستوقفتني بعض الكلمات التى لها معاني اخري مثل المطارق ( ام مطارق ) ( المراه ام شلوخ ) .
وتر القطن ( عند بعض اهلنا ) ( تعني ابعد او امشي _ زح _ ) .
الفرده ( مااجمل الفراد وخاصه فراد تمبول وشندي للنوم ( ذي البطانيه ) وفراد كسلا البقت حاجة عجيبه ) وفرده ( صديق ، رفيق ) .
وعشان خاطر عيونك يافردة جناحي الثاني لما الناس تطير لعالما .
لك الود ابو علا وربما لا تكون المشاقه في مكانه ... ولك الود مره ثانيه .
دقر دقر صلاة النبي
عيني باااااارده عليك ابوعلا ويابختك ياعلا
اها بالنسبه لدرس اليوم
مشيت اللقيط كتير لكن امي كانت بتدني علقه صاح
اها ولي يوم الليله اكان رجعت حالفه الا امشي اللقيط
ونفش القطن ياحليلو كان عندي كرتونه صابون بملاها وامشى انفش تحت شجره يمه عشه
وحبوبتي تقول لي جيبي معاك الغلغل وماتخلي لي بهمه حاجه عشه
والقوقايه لي الليله عندنا
وتر لقطن بعجبني الا ماجربتو وبتابعها بكل اعجاب عند حبوباتي
اها عاد اللحمه والسدايه يطرشني ماسمعت بيهن
اها والله نضمك سمح بالحيل لكن وين الناس اريت يخبرو الكلام ده
وانا والله ممتنه وشاكره لهذا الجمال
ودمت بعافيه وصحه ويديك طول العمر
اها ماتكلمنا حبه عن مدرستكم زمان وكانو بدوكم شنوووووو
اقتباس:
المشاركة الأصلية كتبت بواسطة abu_ola
لالالا ............عليك الله كله الا بنتك دي
بعمل اي شيء ان شاء الله عيوني دي تتفقع زاته من القراية
كله الا نبطل نسبك .........معقول لكن
انت ما فهمت:rolleyes: :rolleyes:
انا كان قصدي تاني بس انت لفحت الكلام سااااااااااي
:p :p
نظام جقلبة
برجع ليك عشان تدرسني
اقتباس:
المشاركة الأصلية كتبت بواسطة معتز- حمدتو
المتفرد دوماً حمتـــدو
تزداد ألقاً و بهاء كل يوم
و نزداد شوقاً لرؤياك
الخدود رمان
و الشلوخ مطارق
جوز البرتكان
لي قلوبنا حارق
يا قمر دورين
يا ضو المشارق
الشلوخ المطارق دي يا حمدتو هي الشلوخ المستقيمة و بتكون عديييلة زي المطرق
و سموها مطارق تشبهاً بالمطرق ( و هي الغضن الرفيع الرقيق الناعم الندي المستوي )
بعدين تر ( بصم التاء ) بمعني زح أو ابعد شوية ( تر يا جني الدم ما يملاك )
تر ( بفتح التاء ) بمعني غزل و نسيج القطن
و هذا يدل على أصالة و غزارة مترادفات لغة اهل العوض
و بعدين كلمة ( فردة ) حسب لغة الشباب تعني الصديق الحميم
و هي تشبهاً بفراد شندي و كسلا لما لفردة القطن من دفء و نعومة و الفردة بتكون ملازماك طووووالي و توفر لك الراحة و الأمان من البرد و تقيك الأمطار و الزيفة كالصديق تمام
و عندما تستخدم كلمة ( فردة ) مجازاً للبنت او الصديقة ترمز الى النعومة و الدفء و الراحة و الأمان
هذا و الله أعلم
و لا شنو يا فـــردة
اقتباس:
المشاركة الأصلية كتبت بواسطة samah
الرائـــعة سمــــوحة
درس اليوم دا دير ليهو ورشة عمل و تطبيق عملي عشان كدي شوفي كان شجرة يمة عشة لسه في ارسل ليك سلوي و مدنية و شبرقية و باقي الحنكوشات و أنصاف المدلعين تديهم حصة عملي
بس عليك الله ما تخلوا الغلغل جيبهو عندنا غنامية والدة جديد
كان ما اخاف الكضب يا سموحة اقول نحن أولاد حفــرة واحدة ولا طـــورده بس من تالا أننا قريبين بعض قريبين تــــب ما فيها شك
زمان في المدرسة ما كانو بدونا التــــــــرابة ، غير طه القرشي مريض ، و طه القرشي في المستشفي يعني قراية الحكومة دي حاجة حشو ساااااااااااكت ما فيها فايدة زي الفشار حق الحناكيش و بعدين يا بت أمي حبوبة فاطنة الله يرحمها قالت لي يوم القلم ما بزيل بــلم أها من اليوم داك انا صاقرتها و بقيت المدرسة ما بمشي إلا ابوي يكون موجـــود
عموماً يا ستي أنا مواليد منتصف السبعنيات الميلادية و قريت المدرسة قبل مرحلة الأساس بس وقت جينا الجامعة لقينا ثورة التعليم حقت ابراهيم احمد عمر دي كبيييرة ليها كم سنة .
و على العروبية العلينا الجامعة زاته عربوها و أزيدك في الشعر بيت في الجامعة ما لقيت فــرقة إلا في كلية الآداب عشان كدي جنس النضمي دا ما غريب على يا بت عشاي
و لا شنــــــــــــــــــــــو
اقتباس:
المشاركة الأصلية كتبت بواسطة ود المطامير
ود المطامير هـــا جنا هـــــا
خبارك واقف بالشباك زي الحــيديـــــدون
عبير خلاص لحست عقلك و لا شنـــو ؟؟؟
غايتو وليدات الزمن دا الواحد ما يشوف ليهو طرف طرحة سااااكت يباريها لــي البحر
كدي و قت الله جابك شيل سرج حمار النــاظر دا ختــو في الضل داااك خليهو كان يبرد شوية
و تعال لي بي بجوة بيجهك تــب
أنا جني و جن الصبيان البتحــاومــوا لا شغل و لا مشغلة
و كان طلعت زول دوبيت و مسادير سااااكت
أرجــي الجمعية الأدبــية يوم الأثنين
بقطع نفســك بالنـــم و الطمـــبور
الواجب المنزلي رقم ( 2 )
مستخدماً الجــل و الفير أند لفلي دون الإستعانة بعمك ود الماحي
الرجاء حل الغلوتية التالية
1/ حبوبتي أم شنقــنق في قعر البيت تنــنقــنق .... دي شنو ؟؟؟
2/ قاعدة في ديــوانه تأكل في مصــرانه ..... دي شنو
3/ من تحت حيوان و من فوق أنسان و بي الجنبات حديد .... عرفتوه ؟؟
ردد الجملة التالية بصوت عالي ( 5 ) مرات دون أخطاء أو تلعثم
بنــبر مريــم رمى مـــره رميــــة
اقتباس:
المشاركة الأصلية كتبت بواسطة abu_ola
سموووووووووووووووووحة
وينك ياخ تعالي حلي الواجب دا
هسي يجي التوم يحله ويقولوا ليه شاطر :(
ثقافة عامة
في هذه المادة سوف نتناول بعض المقتطفات و المواضيع الغير مدرجة في أي من المقررات الأخري و التي تهدف الى زيادة الوعي و الثقافة العامة لدي الطالب و هي المادة التي تتيح للطلاب المشاركة في النقاش و الإجابة على كافة التسأؤلات المطروحة من قبل الطلاب كما يمكنكم في هذه المادة ان تطرحوا بعض القضايا أو الإستفسار عن أي من المواضيع الخاصة بالثقافة الشعبية العامة فقد تم تصميم هذه المادة العلمية لتزويد الطالب بالذخيرة الثقافية العامة و التعرف على الأحداث و القضايا التي تهم الفرد السوداني .
العملات السودانية
يعتبر الجنية هو العملة السودانية الأولي في السودان و قد تم إعتماده كعملة وطنية منذ فجر الإستقلال و بالرغم من تعاقب الحكومات الوطنية على الحكم فظل الجنيه هو العمل السائدة حتى عهد قريب إذ عزم بعض منظري الإقتصاد إلى تغير العملة السودانية و إعتماد الدينار كبديل وقد تم إعتماد تداول الجنية و الدنيار في فترة ليست بالبعيدة . و نسبة لتمسك عامة الناس بالجنيه فقد اصبحوا يحسبون بالجنيه و يدفعون بالدنيار و بعد مضي فترة وجيزة تم الرجوع للجنيه مرة أخري وإعتماده كعملة رئيسية في البلاد و يتم حالياً تداول الجنية الجديد و الدينار في ما يعرف بفترة التداول المزدوج و نسبة لعودة الجنيه مرة أخري و حتى لا يختلط الحابل بالنابل و نعتبر أن الجنيه الذي يتحدثون عنه الآن هو ذات الجنيه السابق فهذه دعوة مني للرجوع الى الوراء و أستذكار الجنية السابق بشئ من الحسرة و التأمل
أجزاء الجنية
الجنيه = 100 قرش
القرش = 10 مليم
و مع زيادة التضخم و تمشياً مع التطور الإقتصادي و زيادة الدخل القومي ظهرت الحاجة الى طباعة عملات ورقية ذات فئات أكبر فظهرت عدة فئات من عملة الجنية تختلف من حيث الحجم و جودة الورق و الصور المطبوعة في العملة تمشياً مع الحكومة السائدة في كل فترة ، و لكن هناك بعض الصور مثل صقر الجديان و الجمل و التي تعتبر بمثابة رموز و شعار للدولة لم يتم تغيرها في الكثير من الأوقات
كان الجنيه في السابق عبارة عن عملة ورقية مطبوع في أحد جانبيها صورة بنك السودان و في الجانب الأخر صقر الجيدان و هو الشعار الرسمي لجمهورية السودان
ثم ظهرت بعد ذلك الخمسة جنية و العشرة جنية و المائة جنية و هي عملات ورقية تختلف في الحجم اللون و الصور المطبوعة عليها ، كذلك نجد هناك بعض الفئات المعدنية و هي فئات أقل من الجنية
كذلك نجد فئة الخمسون قرشاً و هي عملة ورقية بها صورة صقر الجديان
و فئة الخمس و عشرون قرش و هي ما تعرف شعبياً بالطرادة و سبب تسميتها بالطرادة يقال انه يرجع الى مزارعي الجزيرة و النيل الأبيض اذا ان تكلفة حرث الحواشة في ذلك القوت كانت تساوي 25 قرشاً و قد كانت تدفع لصاحب التراكتور للقيام بعملية الحرث أو الطرد كما يسميها الأهالي لذا تعتبر القيمة الفعلية لها بالنسبة للمزارعين هي حرث ( طرد ) الأرض لذا اطقلوا عليها أسم الطرادة
و فئة العشرة قروش و هي عملة معدنية فيها صورة الجمل و تسمي الريال و هي عملة معدنية بيضاء كبيرة الحجم نسبياً و يضرب بها المثل في جمال العيون و بياضها و كبرها فيقال ( فلانة عينها بيضاء زي الريال ) و تستخدم التعبير مجازاً بالقول ( فتح عينك متل الريال أبو عشرة ) أي بمعني كن متيقظاً و مراقباً لكل ما يدور حولك
ثم فئة الخمس قروش و هي ما تعرف بالشلن أو نص الريال
و فئة القرشين و هي ما تعرف بالحتة ام قرشين او ام قرشين او الفريني و هي عملة معدنية بيضاء صغيرة الحجم نسبياً تكاد تكون أصغر أنوع العملات المعدنية و تكني البنت الشابة الناعمة الممتلئة الجسم بالفريني أو ام قرشين تشبهاً بهذه العملة
ثم القرش و هو عملة معدنية اكبر حجما من القرشين و تصنع من النحاس و فيها صورة الجمل و يستخدمها الشباب في ما يسمي بضرب البطيخ و هي عبارة عن عملية تدريب على الرماية حيث توضع البطيخة على بعد عدة أمتار و يتباري الشباب في قذف القرش داخل البطيخة و يكون الرابح فيها من يستطيع إدخال القرش داخل البطيخة
ثم فئة التعريفة و هي تساوي 5 مليم و هي العملة التي كانت تدفع كهدية للأطفال علماً بأنها كانت تكفيهم لشراء الحلوى و التمر و البسكويت
فئة المليم و هي عملة معدنية مصنوعة من النحاس الأحمر و هي ما تعرف شعبياً بالدمجة و يضرب بها المثل في الفلس فيقال ( ما عندي المليم الأحمر ) و هي كناية عن شدة الفلس .
و تمشياً مع أنتشار تداول العملات المعدنية فقد قام المجتمع بإبتكار الجزلان و هو عبارة عن كيس قماش مستطيل الشكل يتم وضع العملة فيه و لفة عدة لفات و ربطه بخيط أو حزام من القماش تتم خياطته على فتحة الجزلان و يعتبر هذا الجزلان خاص بالرجال ، كذلك تم إبتكار المفحضـــة و هي عبارة عن كيس مصنوع من الجلد أشبه ما يكون بالشنطة و توجد به عدة جيوب كما يوجد بها لسان شبيه بخيط الجزلان يتحكم في فتح و إغلاق المحفضـــة كما تزود المحفضــة بيد طويلة مصنوعة غالباً من خيط الحرير لتقوم النساء بتعليقها في رقابهن و تتدلي بين الملابس و الجسد حتى لا تتعرض النساء للسرقة
اقتباس:
المشاركة الأصلية كتبت بواسطة مدنيّة
مدنية يا أخــتي قالوا الصقر كان وقع كترت البتــــابت عــيب
سموحة غايبة الليلة يا أختي
أها عاد الشورة كيف
غايتو يا أختي لي دور الليلة الواجب رأجيك راجيل
دحين بطلي الجرسة و تعالي حلي سااااهي