هنا مدني (علي حلقات)

عزرا أحبائي
في النفس كدر
وفي الفؤاد ود لكم تنؤ بحمله الجبال
يعز علي أن أتيكم وفي ما في
سوف ألحظكم حتي يذول
و آتيكم حابيا

رمضان كريم ياصول سودان وربنا يديك الصحة والعافية وفى إنتظارك

الخريف و ما أدراك ما الخريف
الخريف أجمل فصول السنة فيه الحشائش تخضر و يدر الضرع و تكثر الخيرات ويصفو الجو فيحلي وفيه تتكاثر البهائم و بعده تعقد الزيجات و يمتد الفرح من الحصاد الي العباد فيزيد الدخل و تحل المشاكل ....
طبعا دة كان زمان!!!! و الان
إن الخريف من أسواء فصول السنه فيه تشتد الحرارة و الرطوبة و تقطع الكهرباء بالساعات أو الايام وفيه يزداد حجم و كثافة الناموس الذي يقلق مضاجع العباد بالطنين و العض و الملاريا .. و فيه تستبدل الملاريا العادية بالملاريا الخبيثة و التي لا تقوي عليها كل العلاجات المتوفرة و يكثر إستعمال دربات الكينا و تزيد الهضربة .. وفي الخريف تسد الشوارع الرئيسيه و الفرعية و يتعزر علي العربات و الراجلين المشي فيها و إجتيازها .. يزيد فيه سعر اللبن الحليب و يكثر فيه الاصابات بالإسهالات و الملاريا و تجف فيه الجيوب

رمضان زمان
قبل 6 أيام كان كل الناس في إنتظار المرتبات حتي يقضو حاجات رمضان لان النسوان خلاص إنتهن من الابري الاحمر و الابيض فكانت حينذاك قد راجت تجارة العيش الحب و بهارات رمضان فهي أصناف عديدة تبتدي بالكركدي و العرق الابيض و الغرنجال و الحلبة و الكمون الاسود و العرديب والشمار و القرفة ثم هبهان كما راجت تجارة الحطب و طافت الفلاتيات بالمنازل للعواسة "كان قديما تجتمع النساء و كل وىحدة تعوس جردل مشاركة منها لصاحبة المناسبة فتقوم الاخري بالسداد عندما تعوس الاخري وفي أثناء العواسة تصنع الزلابية و الشاي و الجبنة و الافطار إن كان في وقته فتكون لمه حلوه يختلس الرجال النظر إليها من بعيد و هم في شوق للمشاركة و لو في الونسة الذيذه... تسمع الضحكات تجلجل و القفشات السريعة و التعليق اللذيذ و ربما رأيت بالصدفة ما تحب أن تري من مفاتن جارة حلوه في غفلة من أمرها" صار هذا المهرجان نسيا منسيا فقد ساعد وجود الفلاتيات بكثرة في القيام بعواسة الابري فلا يكون من أهل البيت إلا دفع المبالغ النقدية فتتم العواسة في صمت مطبق تتخلله قليل من توجيهات ست البيت ""ختوه هنا!!!! لا أحسن تعملوا كذا وكذا !!!!
يتزاحم الناس لشراء البلح البركاوي و تعرض التجار أجودة و البليلة العدسية و حديثا ظهر الكبكبي كمنافس خطير للبليلة العدسية ثم تأتي في المرحلة الثانية عملية إختار الويكة فإن إختيار الويكة السمحة اللايوقة لا يتأتي إلا لخبير و لكن الحمد لله هذا العام قد بشرت حقول الجزيرة بالويكة الجديدة (ويكة السنة) ولها من الجودة ما هو مشهود لها ثم يأتي دور البهارات من شمار و الكسبرة و التوم و الشطة القبانيت ثم القرفة و الهبهان و كان قديما تقوم النساء بطحنها و تنعيمها بالفندك و لكن الان قد إنشأت لها طواحين خاصة زهيدة الثمن ... فيأتي بعدهم إختيار أحسن أنواع الزرة لعمل العصيدة .. كان قديما أحسنهم (المايو) وفنافسه (طابت) حتي إنتصر عليه لبياض لونه و رقة قوامه .. منهم من يسوقة للطحان مباشرة و منهم من يقوم بتقشيرة في قشارات خاصة ثم يحطن
....................... نواصل .........................

خالد...ازيك ياجميل ..اولا رمضان كريم وتصوم وتفطر على خير ..كلامك مابنفات دايره قعده بمزاج...بجيك صادى

شكرا أخي نزار علي الزيارة الرائعة و عل أن تكون الانفلونزا قد راحت منك فالايام الفائته كما سمعنا من شمارات أنك عامل ذي أم العروس تجقلب يمين و شمال و لا أحسن مزيعي القنوات الفضائية ... يعني لو الجماعة فنشوك يالتلفزيون جاك زول و أحسن من الحافلات الروزا و شغل المواقف مع الشماشة .. طبعا نحن منتظرين يوم بث البرنامج عشان تلفزيون الجزيرة ما بنفتحو الإ في المناسبات ذي كاس العالم و الذي منو..

كل عام و أنتم بخير و رمضان كريم و تحياتي للاسرة الكريمة

خالد/ سلامات
تعرف موضوع الخريف..بدايه جميله ونهايه ماساويه...لكن الحمد الله برغم انك كتبت رمضان زمان ومازالت تواصل لكن المفهوم حتى الان مافى فرق كبير بين رمضان زمان ورمضان 2006 واتمنى ذلك ياخالد

موضوع المذيع دا ياخالد لو ما البلد ضيقه اخوك كان من زمان شفته فى اشهر القنوات الفضائيه لكن ياحليلنا منها الزايله بعد ماكان الواحد بشبه شاشى كابور بقى اسع اشبه السميح الله يرحمه ..،،،

خالد فى انتظار قصصك الروعه ...ما طول الغيبه..

رمضان كريم
طبعا الايام دي الممسوخة كلو كلو ما قاعدين نشوفها بي النهار و كمان جزء كبير من الليل مع إنو الندوات و البرامج التلفزيونية طلعوا لينا فيها ناس نضاف و لامعين و ملمعين خصوصا إنو الحلاقين في السودان كمان إتعلم ليهم حاجة جديدية "حلاقة مع الصبغة بي 10 الف" كل العجائز و المتصابيين ضربوا ليك اللون الاسود القاتم و في التلفزيون قاعدين يتفلسفوا ليك طبعا الدفع المقدم من فوائدة إستقرار التيار الكهربائي و ترشيده و الذي منو و كلو طلع كلام جرايد ... بس أخوانك قاعدين يقيلوا في المكاتب وده لاسباب عديده أولا عشان الواحد يريح أضانو من أم العيال قوم جيب اللبن و الزبادي ده مالو خفيف و الولد دة ذاكر ليهو و الحركات ديك بعدين كمان في حاجة تانية البت البتغسل عاوزة 7 الف و أدينا الف للسلطة و عاوزين حق العيش .. ثم و أن مكاتب الحكومة التكييف بتاعها مظبوط ميه المية و كلهم يفوتوا يخلوك براك و هاك يا نومة و المحظوظ يكون عندو نت ذي حلاتي يلعبوا ليك راس ... يقوم فجاءة يعاين لي ساعتو يلقاها ليك 5:30 م و يقوم يضرب الجرسة يقفل قوام قوام و بعد خلاص يلقي ليك روحو ناسي الجزمة يرجع تاني يفتش الشراب وين و يزرر ليك الجزمة يقوم يتذكر المكيف يرجع يقفلوا و تنزل علي العربية تقوم تحرن ما تدور يقوم يحنسها جاي جاي تدور و من هناك لي سوق الخضار يلقي ليك العربات دي إيييييك ذي التراب محلة ساي يقرش فيها العربية ما يلقاها كل الناس مارقين من المكاتب في نفس الوقت ... يا زول بعد حب و تحانيس يمشي لي سيد الطماطم يلقاهو قاعد يعذل ..يا خي عليك الله قبال تقفل أديني سلطة ... يازول سلطة بي الف مافي و أنا ذاتي ماشي عليك الله أختانيكدة كدة يقوم جاري علي ست الفول المسحون ... تقول ليهو يا حاج خلص الفول ... يقوم يقول خلاص نمشي للعيش البلدي أصلوا العيش البلدي دة ما فيهو برومونات الباوتاسيوم يعني خالي من المواد المسرطنه .. يلقي ليك سيد العيش كان قريب في موقف شندي فوق ... و أخوك يتحير أسع أعمل شنو ... أعمل شنو يلقي ليك وآحد فارش بطيخ ذي كور الشراب صغاااااار يقول ليهو يا زول الواحدة بي كم ... بي الف! الزول في النهاية يقول ليهو جيب عشرة الف وشيلهم كلهم .... ما هذه الصفقة الرابحة؟ يكاورهم ليك كلهم في منتهي الفرح و من بعيد يضرب البوري و ينده يا أولاد تعالوا دلو البطيخ!!!! يصاب بخيبة أمل كبيرة عندما يخبره الاولاد أن الليله عندنا ضيوف ناس خالتي و راجلها وأولادها كلهم حضروا اليوم ...هذا يوم شؤم من أوله ... لا لحمة و لا خضار و لا سلطة و لا رغيف ..... بطيخ بس

والله ياخالد ..رغم كل المعاناه لكن رمضان عندكم ... والله ياخالد الحريم هم الحريم وخاصه حريمنا ...طلباتم مابتنتهى برغم انه فى بلاد الغربه المعاناه لاتذكر ولكن صداع مستمر طلبات اهل البيت ماتخلص ..عشان كده ياخالد انا بقول لك الحياه فى السودان ولا بلاش والله ياخالد الغربه عباره عن حياه معلبه منظر جميل لوحه رائعه ولكن لا تتاطق ..فما الفايده ..يازول بالفى والمافى نحن راجعين لحياة الكتاحه والمدافره ارحم مليون مره من الحياه المعلبه ...وتسلم ياخالد ..وارجو ان تواصل سلسلة حلقات رمضان..

مع خالص تحياتى اخوك نزار حسن

ملتقي الاصدقاء ذلك البرنامج الرائع و الذي تقدمة الجميلة الذكية عواطف سر الختم وصحبة ..هذا البرنامج بقدرة قادر في رمضان ببقي إسمو (أتنين في مدني) و بالصدفة عرفت أن هذه الاتنين هي الساعةأتنين لان البرنامج يبدأ اتمام الثانية ظهرا ... ورغم أن هذه الساعة هي ساعة الغرغرة و حراق الروح إلا أن مستمعية يزيدون و يزيدون .. هذا البرنامج صاحب الدم الخفيف و التواصل الحلو و الذي عقد شراكة أزلية مع هذا منتدي ودمدني ... صادف و أن أصبح شركاؤه ناس بلو للكمبيوتر و ناس سوداني و خليك سوداني هذا العام...
كنا نظن أن البرنامج سوف يكون هذا الموسم أكثر بهجة و دسما .. ولكن للاسف الشديد فإن مسابقاتهم العشوائية غير المدروسة و التي لمست البنيات الاساسية في البرنامج و دخلت بين فقراته و تواصله أبدلت روح البرنامج فصار رتيبا فقد الدفء و الحنان الذي يجتمع عليه قبيلة المعجبين بهذا البرنامج . وبرغم براعة الاستاذه عواطف و إستوقافها للمشاركين و التعريج و التطواف معهم حول المدينة و الولاية و الاهل و الاصدقاء .. إلا أن المستمع صار ملخوما يتحدث و عينة علي الجوائز و التي هي بمقياس الجوائز الاذاعية في البرامج الناجحة تعتبر فقيرة كل الفقر ...
عودي أختي عواطف لذاك التواصل و تلك الحميمية و عود أخي الصادق لذلك النبض الذي يحرك شرايين آلاف المشاهدين عبر سواح الجزيرة .... فالنضحي بهذه المسابقات الماسخة لنستقبل إحساس الناس الحلو بدلا من (إنطباعك شنو عن التجوال في أرصفة الولاية؟؟ ... و الله عايز أشترك في المسابقة!!!!)

هنا مدني (الحلقة الاولي) ...
بصات المزاد كانت قاعدة تخوف الناس لانو قالوا ما فيها فرامل و الكمساري بطقطقك قبال ما الباص يطلع من الموقف و بعدين النشالين بتاعين مدني متخصصين في ركابوا لانوا بكونوا مسافرين الخرطوم و شايلين مصاريفهم في جيوبهم و الله قال بي قولك لو نبهت واحد من نشال.. بس أسع بصات المزاد حافلات تمام تسمع فرفور لما تتكيف وحكاية السكران القاعد جنبك و قاعد يطرش ديك خلاص ناس الانضباط نامو بيها .. شارع المحطة ذاتوا بقا مظبوط .. اسفلت تمام و أنوار طوال مولعة الشارع كلو و بعدين بالجنبات تشوف أسواق البرعي و حلاويات الاحسان و ناس سلا و الذي منو وبعدين مركز الشباب بقي شرط .. وكلك كلك حلو يا مدني كمان لمان تنزل جنب طلمبة موبيل فارس تلقا بي جاي الاستاد بقي روعة و الخور البين الظلط و دكاكين السوق الصغير بنوهو بي الاسمنت ومركز شرطة الجنوبي تصوروا بنوهو و ظبطوا بس بعديد عنكم الناس الجواهو ذي الجبادة ...

هنا مدني ا(الحلقة الثانية)
مظلة خالدة دي قالوا عملوها لروح المرحومة خالده عباس كتلها خطيبها بالسكين في قلبها والغريبة موقع المظله تقريبا في قلب الجزء الشرقي من المدينة يعني ربطت مايوهات كلها مع بعض و ناس الحافلات قاعدين يعملوا المقصات فيها و كمان لو عايز تشتري كهربة الدفع المقدم لازم تنزل فيها و لو عايز تدفع حق الموية و ناس سوداتيل كما عملوا جنبها إجزخانة جديدة و محلات لبيع الجداد و البيض وأصلوا ما تتحير لو عايز تضرب فوله مكربة وله سمك و حتي لو كنت بتاع شيشه تلقاها جنبك ... يازول بس لو عاينت في إتجاه الجنوب تلقي مستشفي الصائم للعيون و أصلوا دة قصتوا قصة .. العارف بالله الشيخ صايم ديمة عندوا زاوية جميله جدا في هذه الناحية قام إقتطع جزء كبير جدا منها و إتبرع بها للمستشفي ... الكلام دة ما مشي الهواء .. صادف أن كان مدير مستشفي مدني الشاب القيور د. مامون ميرغني له تعظيم سلام من كل مواطني المدينة فقد إنكفي أولا علي المستشفي العتيق تحديثا و تنظيما و ترتيبا و ما كان في وآحد قايل المستشفي العجوز ده ببقي زول .. فقد أبدل د. مامون ثوبه قليلا قليلا يعني يهدم عنبر قديم ليحل محله عنبر جديد ذي الورد و إنتشرت فيه الحدائق و الكافتيرات و عملوا فيه مجمع عمليات بمستوي راقي ... نرجع لي موضوعنا لانوا موضوع مستشفي مدني ده حلقة براهو .. أها ... الفكرة تلقفها هذا الدكتور الفنان مامون ميرغني فأنشاء فيها مشتسفي الصائم للعيون و تفاني في إخلاصه و لم يكل أو يمل ولم يسعي شماعة للامكانات ... إستعان بدعم الحكومة و الولاية و الخيريين و إبتدع حكاية العون الذاتي .. يعني تدخل الاستبالية تدفع ألف .. تنحرق حرقه علي الفك الضاع بس لمان تدخل و تجد المستشفي كما هي الان أكثر رقي و في مصاف مستشفات العالم تقول أصلوا ألفي ده ما وقع واطة .... وبقت عندنا اسبتالية عيون ذي العيون .... الشارع الطالع منها لي مايو جنوب كانت كتاحتوا تعمي العيون و التراب الاحمر ده في الصيف الله لا وراكم ليهو يازول سفلتوهو لي عند ناس عبود علي طه موتروا القديم داك إرتاح من الدقداق

أنفلونزا الطيور .. يالله فينا تدور
يوم الجمعة مشيت الصباح الجزاره في دردق لقيت ليك الجداد دة أبياااض مكوم في الضل و في وآحده قاعده جنبوا قالوا لي دي عايزة توزع الجداد دة مجانا و الناس قالوا ما عاوزنو و ما عارفة تعمل شنو... قايتو يا أنفلنونزا الطيور بالغتي عديل ... الجدادة كلها بي الفين و طبق البيض بي الف و منعول أبو الفول و أخوكم الايام دي قاعد يعذب في الجداد عذاب شديد ... قالوا لو لقيت جدادة في مائدة المسكين أعرف أنو في وآحد من أمرين ... أما الزول المسكين عيان .. و إما الجدادة عيانه .... لذلك نشكر أنفلونزا الطيور جدا علي الكرم الفياض منها و خلتنا ناكل في الجداد شغله بلا شغله .. و الواحد بقا يحوم جنب الناس العندهم قفاصه جداد .. و إتكلم بي طول حسوا ... أمبارح قالوا في الإم بي سي أنفلونزا الطيور وصلت الحاج عبد الله و قربت من الحوش ... يقوم سيد القفص يطلعوا ليك بره جداد أبيااااض و سمان و يقول ليكم يا جماعة الجداد دة لو في زول عايزو يشيلوا بس أخوكم بقي ثعلب .. يعني لو جات الانفلونزا في مدني ما تلقي ليها جدادة ساي ترك فيها كلهم راحو كرش العبد لله و الايام دي خلاص إنقهمنا من أكل الجداد التقول نحنا في السعودية و قاعدين نفكر في (سكري الضان) عشان خرمانين لي لحم الضان الملح

عزيزنا اللذيذ خالد الصول
لي زمن مادخلت على المنتدى.. وأصلا كنت في السودان قبل أسابيع..
جنس جري .. سبعة أيام في سنار والباقي في امدرمان.. 33 يوم أنا مع الفك والربط
وكل أنواع العمالة ضربت معاها الفولة .. نجار كهربجي سباك حداد.. وأخيرا وقبل الإجازة بأيام
قدرت أطلع وسخ المطبخ للشارع واستمتع كبقية خلق اللله بلوري الزبالة يوم الأحد .. وحاجة عجيبة ياخي...
ما تمشي لبعيد وتقول أخوك عمل ليهو بيت... أبدا وحاتك إيجااااار ... وأشواق حلفت تقعد تقرأ في السودان

كتاباتك حلوة وخلت الهوا يخش عبر الخياشيم ..
والله مشتاقين ليكم ولي شلة موبيل فارس لهم التحية
ورمضان كريم

أبو أشواق
في القلب مضغة إن فسدت فسد ساير الجسم و مضغتي لينه هشة بيضاء أحب بها حبكم و كل من يحبكم و أتنسم دائما ريقكم و رضابكم فأنتم بخوري و ندي ...
كل من رمته ريح طيبة مسكته شبكة معاوية فارس .. و كل من مسكتة الشبكة جئنا له عدوا ...
أسفنا لانفراط العقد وذلك الخضاب الاسود الداكن علي رأس عبد الحليم و إن كنا تلتمس له العزر فالزواجة الثانية لابد للعريس أن يكون حلوا حلاوة ... في البال فرح حسن أحمدآدم (فارغات) و لكن فرغت مواعيننا و نحن نبحث عنه ... بدر الصوفي هو صوفي في عشقة دائما وله من رائحة الارض أحلاها و ولابد أن تضمه الي كبدك الحري ولو أبي ...
و ما الدنيا إلا بيت للايجار تسكنه أنت اليوم و يسكنة هذا من بعدك و هنيئا لمن دفع إيجاره و إلتزمه بالصيانة و التعهد ... يزكرنا شيخنا زكريا بالصحابة الاجلاء ... لا تعرف إن كان مكروبا أو سعيدا ولا تعرف فيه إلا بحر من العطاء رغم شح الدنيا ..
أتمني لك من الله عز و جل أن يرزقم بالدار الصالحة التي تضمك و زريتك و زوارك و أحبابك آآآآمين
فنحن نمسك أطراف الثوب و نستميت إن لا تنكشف العورة
لك نسمات هذا اليوم الخريفي الجميل و لك ما بقي من أثار مطرة الامس

موضوع المذيع دا ياخالد لو ما البلد ضيقه اخوك كان من زمان شفته فى اشهر القنوات الفضائيه لكن ياحليلنا منها الزايله بعد ماكان الواحد بشبه شاشى كابور بقى اسع اشبه السميح الله يرحمه ..،،،

هنيئا بك أخي في شبهك للمسيح عليه السلام ... أخالك رقيقا عذبا هينا لينا ... تدمع عينيك من سماعة آيات القرآن و يذوب قلبك وجدا ... تخاف الله كانه تجاهك .. و تحبه حبا لا يوصف .... نقي السريرة كالبرد و اللبن الحليب .... نصير المظلومين و أبو الفقراء و المساكين ... دائما تعرفهم ينزوون لا يسألون الناس الحافا ... تعطي يدك اليمني و لا تعلم اليسري..
خاطرة:
والوجدان أبيض كالملائكة من الصيام أدعوك يارب التوابين يا ذو الجلالة و الاكرام أن يجمعني معك في الحرم النبوي الشريف و المكي و نحن نؤدي فريضة الحج آآآآآآمين

اخوى خالد ... فعلا الظاهر رمضان دخل العضم .. اسع ياخالد الجاب السميح ..للمسيح شنوه.. هوى يابوى ربنا ما آمر بالهلاك كان تعبته افطر ياابوى .. وانشاء الله ياخالد ربنا يجمعنا فى حجه مع بعض ..امين يارب العالمين... اخوك ودحسن

فعلا أخوي نزار الواحد بقي يجلي ... أصلوا لو دخل الكبر بالباب هرب النظر بالشباك ... أخوك بقي ما بشوف إلا بي النظارة و البنات بقومن يلبسنها و يوسخنها ... ولكني شفتك مسيحا متسامحا سمحا تعطي من غير حدود ... فأنت يأخي قد ضمنت لك قصرا في الجنة و ما مسجد النموزجية ببعيد .... و أنت تروي ظمأ تلاميذ المدارس فيروي الله عطشك يوم البعث .... دعواتك

عبرك أخي أرسل التهاني للاخ ود المازون و طولنا ما سمعنا حسو .... عل المانع خير

الأخ خالد الصول

وينك يارجل فى إنتظار الجديد الشديد

خالد الصول..
لكم تحياتنا وسلامنا وأشواقنا
والعقد لمن ينفرط !!! ممكن نقول حباتو زادن
وبقى تقيل ما بتلبس...
وهذا حال الدنيا.. وبس نقول مافي القلب في القلب

طريقة سردك للمواقف والحكايات تذكرني
بذلك اليوم الطلعنا فيهو الرحلة مع الجكس
وشيخ زكريا وقع على قدومو وظل ماسك هدومو..
وغنيت لينا عشه يا عشه والمقشة..
أطال الله عمرك وفي انتظار الجديد

عبرك نهنئ كل الأحباء بالمنتدى بشهر الخير رمضان
أعاده الله علينا مرات ومرات بالخير والبركات

الاخ الصامد خالد الصول ..ازيك وكفينك .خالصرمضان بقى فى العدد التنازلى .. وبينى وبينك فى وعد بى فوله مصلحه من فول كشك انا جاى ودمدنى يوم الثلاثاء 24/10/2006 يعنى ثانية العيد او ثالثة العيد وضرورى نتقابل .. بعدين قريبك ود المازون والله من يوم استلم المراه ..و ودالماحى رسل ليه زيت سمسم تانى ماشفناه لقايت ما قولنا ليه اسمك معلق فى لوحة الاعلانات بتاعت المحكمه الشرعيه حتين ظهر سلم علينا واتانى اختفى اه من ديك ولقايت الليله..

إنت صايم صيام الضب و لا صيام السحلية ؟؟؟؟ الضب يلغف كل ما يقابله حتي دون أن يتذوقه .. بس الضب يلغف الاشياء الصغيرة .. الان صارت هناك ضبوبة بالحجم العائلي تلغف ما تشاء بغير حساب ... و لانني قد قضيت طفولتي في حي البوليس و لي زكريات كثيرة تتدرج من الحلاوة الي القطران. أذكر فيما أذكر تلك الساحة التي تفصل حي البوليس عن حي المطار فهي ساحة كالمشيمة تفلتر الدم الخارج من حي البوليس ذلك الحي الشعبي الذي يوصف في التصنيف العالمي بأنه دون الدرجة الرابعة .. وحي المطار ذلك الحي الارستقراطي و الذي سمي تيمنا بمطار ودمدني و الذي يقوم علي خاصرة المدينة في ذلك الزمان ... تلك الساحة كانت تفلتر المزاج و تعمل علي معادلته حتي لا تكون هناك فروقات طبقية و حقد أزلي طبقي بين الناس الفوق و الناس التحت....ولحكمة لم نكن ندريها في زمانها فقد كانت خالصة لنا لا يشاركنا فيها أولاد حي المطار فقد كنا نرتاد هذه الساحة ونعلب فيها بجميع طيوفنا و أعمارنا و أحجامنا .. فتجد رواد كرة القدم ومتحلقين و ناس البلي تتصاعد الجلبة و الخرخرة من جنباتهم ثم يليهم ناس السيجة و صفرجت و الذين يلعبون و الذين يصنعون العربات من الصفيح و أكلي العنكوليب و وطهات طير الخريف و سمك الترعة النحيفة التي لم تكن أبدا فاصلا بين هذا وذاك ... نتسامر فيها و نتعارك و ننسي أخذيتنا فنذهب لاحضارها فجرا و ندفن فيها ما نسرق من بلي فتتوه منا مكانه و لا نعلم أين ذهب ... هي صفحات الزكريات الحري تتراءي في المخيله ... حتي سرقها هؤلاء الذين لا يعرفون من الصيام إلا صيام الضب!!!!!!!!!!!!!!!!!

أخي ميرلاند
نذوب شوقا فيكم و نتمني أن نتواصل معكم صباح و مساء و لكن فإن ثلاثة من أبناء غرب السودان كانوا مسافرين رفقة علي الاقدام و إحدهما قد أخذ منه التعب ما أخذ فجعلة يسير الهوينا فزادت المسافة بينه و بينهم .. وإذ هم في إلتفاته وجدوه يتعارك مع نمر إختاره لانه قاصي ... فما كان منهم إلا أن قالوا له: "كان كديس خلا فكاك!! الحقنا في المجلد"
فنحن أخي لو كديس الخلا فكانا فإننا سوف نمثل حضورا يوميا

تسلم عزيزنا خالد الصول

وإنشاء الله كديس الخلا يفكك ههههههههههههههههههههه حلوة منك

تعرف انا سمعتها برواية أخرى قالو أثنين من أهلنا الفلاته كانوا ماشين الحج زمن الحج بالدواب والأقدام ويستمر شهور ، طبعا أجره كبير ما زى حق الأيام دى فى ساعات ، أها جماعتك قالو وصلوا غابة بالقرب من القضارف ولما فيهم أسد شب فى واحد والتانى قام جارى وإتلفت لى صاحبوا قال ليهو ( لو كديس خلا ده فكاك نتلاقى فى قضارف ولو مافكاك نتلقاى يوم لا ريب فيه ) هههههههههههههههههههههههههههه .

أخي عماد الصادق:
هي الايام نداولها بين الناس ... لا تبقي علي حال .. بهجتها في لحظتها و ما لحظتها إلا أنتم ... كم أتذكر بالفخر تلك الايام التي قضيتها في رحابكم بسنار و زوجتي ... لا تدري كم هي سعيدة تلك اللحظات و أنا أقود سيارتك و أتحسس مراقد الطفولة و ملاعبها و أتنسم عطر الماضي و أسلم علي الامكان التي كنت أرتادها و أنا يافع ... زرت فيما زرت ضريح الشيخ الصوفي الورع الشيخ فرح و دتكتوك و زوجي فسرحت و أنا إبن السادسة حيث يذهب بناء بص الدقاقة الي الشيخ فرح و دتكتوك كل ثاني يوم في العيد فوجدتهم قد رحلوا فما كان مني إلي و أن ترجلت رغم قلة حيلتي و هواني فوصلت بعد المغرب لا فطور و لا طعام ... فطفق أهلي يبحثون عني حتي أعياهم التعب .. وظنوا أن بحر سنار قد أخذني ...... وذكريات
أحن إليكم حنينا و أرسل لكم سلاما كماء المزن يسقي كل وآدي ..ز سلاما إن راءه الناس يذهوا لمدوا نحوه كل الايادي
.... و أشتاق لكم ... فإن محمدا بن عبد السلام بعد صبر 16 عاما ينتظر مولودا و يطلب دعواتكم أن يغر به عينه ... آمين .. معاوية كما هو ثابت كجبل الطود ,, هو الشمس ندور حوله ....