كود HTML:[B][SIZE="5"][COLOR="navy"]ننوه الى أن احداث الحلقات قد تتشابه مع تجارب مماثلة لبعض القراء كما ان الأسماء الواردة فى جميع الحلقات ليست بالضرورة متطابقة مع الواقع بالرغم من أن الروايات جميعها مقتبسة من تجارب حقيقية .
جميع الحقوق محفوظة .[/COLOR][/SIZE][/B]
الحلقة الرابعة
قطع ناشف
فى نموذج من ناس نجيضون بيفرض نفسه على الأحداث و ده موضوع حلقتنا اليوم .
واحد من أخوننا المنجضين انتهى من بناء بيت العمر و فكر يرسل ليه هايس عشان مصاريف الأولاد . رسل الهايس و دفع الجمارك و كده . و مشى السودان اجازة و اتفق مع واحد سواق بالنسبة . و قال ليه كل يوم تجيب الأيراد و تديه للمره .
أخو المره تطوعا بقى يستلم الأيراد و يحاسب السواق و لما يحصل عطل يبقى سيد الموضوع . ودوا العربية الميكانيكى . جيبوا قطع الغيار . ودوا العربية المغسلة . و الكلام ده تم ليه سنه بالحالة دى و طبعا متوصى بى رقبته من الأيراد .
بعد سنة رجع صاحبنا فى اجازته السنوية . أخو المره قال ليه يا فلان ياخى أنا لى سنه متابع العربيه دى و مراقب السواق و بقوم بكل المستلزمات المطلوبه . أهه يا أخوى أنا عايزك تعمل لى مرتب .
صاحبنا اكتفى بالنجاض السابق و قال ليه شوف يا أخينا . أنت كنت طول السنه الفاتت منصب نفسك مسئول من العربيه دى و قاعت تبرشت من الأيراد و أنا عارف و ساكت . لكن يا أخوى من الليله دى العربيه دى كان لقيتها مقلوبة ما تقيف ترفعها .
و ده نموذج نجيضون اللى قطعوه معاه ناشف .
مرت الأيام و عاد صاحبنا فى اجازة و فى يوم من الأيام مشى الموقف سأل من السواق . قالوا ليهو طلع مشوار حفلة مدنى . و طبعا حفلة مدنى بى 400 ألف جنيه . آخر اليوم جاء السواق و جاب ليهو50 ألف قال ليهوا الليلة نص اليوم راح مع الميكانيكى لأصلاح الفرامل . صاحبى قال ليهو خلى لى العربية يومين تلاته أنا عندى بيها مشاوير خاصة . و تانى يوم من الصباح نزل الشارع بى نفسه . ماجات الساعة 11 الا وكان عامل 60 ألف و مع نهاية اليوم ارتفع الأيراد الى 180 ألف .
تانى يوم الصباح وهو واقف فى الموقف جاهو الكمسنجى قال يا أخوى فلان وين . قال ليهوا فلان مسافر و أنا سايق مكانه . قال ليهو طيب ما كلفك بى قروش الصندوق . قال ليهو صندوق شنو . قال ليهو يا أخى الراجل ده داخل معانا فى صندوق الخته فيهو 5 ألف يوميا و هو داخل بى صرفتين و الكمسارى بى صرفة . ضرب للسواق تليفون قال ليهوا يا أخينا مافى داعى تجى تستلم العربية لأنو أنا قررت أوقفها . السواق قال ليهو والله كنت عارفك من وشك ده . و لا يهمك يا أخينا أنا هسه سايق روزا بتاعت واحد مغترب استلمتها من الكرين و أنضف من عربيتك دى 100 مرة. الله فكانا من الهكرة بتاعتك دى .
و الى اللقاء فى الحلقة القادمة .
أخوكم بدرالدين
