اقتباس:
المشاركة الأصلية كتبت بواسطة ود المطامير
عمدة القريه
عمدة القريه .. رجل تخطى الستين بسنتين ، رجل متسلط يحب المال كحبه للنساء
فتزوج من النساء خمس مرات ، ماتت الثانيه وطلق آخرهن ومن المستحيل أن يمر عام
ولديه خانه فاضيه إذ لابد أن يسدها بعروس تكون فى عمر أصغر بناته
فهو صاحب أملاك وأراضى ، على النيل لديه بستان رائع
ويمتلك مساحات شاسعه فى المزارع المطريه ولديه زرايب مدّ البصر
ممتلئه بالأبقار والماعز والضان
_ هاااا جنا هووووووى تعال هنى تجيك الطاويه حبالها
_ أيّا يابا العمده
_ أجر بسراع لعمك ود الفكى قولو أبوى العمده جايى يشرب معاك قهوة الفطور
_ سمح يابا العمده
_ أجئ ، دا كلام شنو آلعمده ؟ ما هدى تراها القهوه بتغلى فوق المنقد
_ لا ، أنا بشربها مع ود الفكى عندى معاهو غرض
_ غرض شنو دا كمان الخلاك تلبس الجلابيه والعمه والشال وتمرق مركوب النمر
الما مرقتو لعرس بتك ؟
_ يمرقوك فى عنقريب بركة سيدى لحاق بعيد
_ تمرق يا يابا وغرضك الماشى ليهو دا تلقاهو مكوجن
_ إتى آلسره ؟ غرضى المعا ود الفكى شن خابراهو هو شنو ؟
_ كيفن مانى خابراهو ؟ يمين الله مركوبك حق النمر دا أنا متشاومه بيهو
كلما تمرق بيهو بتجيب لينا مره جديده فى حبالك
_ هع هع هع هع والله يا البقيتى ذى لورى التراب أتاريك ما هينه تب هع هع هع
وسرعان ما كان تحت راكوبة دكان ود الفكى ، جلس معه يحتسيان فناجين القهوه
مر بهما بله صاحب الطاحونه وجلس يشاركهم إحتساء القهوه ثم إنضم لهم المبارك الجزار
وعبدالرحمن معلم المدرسه الإبتدائيه
كان العمده يتململ فى قعدته لوجود بله والجزار والمعلم لأنه أراد الإنفراد بود الفكى
ولما طال إنتظاره لمغادرتهم بدأ يستعمل معهما تكتيك التطفيش وخاصه وهو مشهور
بأنه ذو لسان لازع وجارح ومتسلّط
_ إتا آلمبارك ؟
_ أيّا يا العمده
_ ماك مشيت لاعند ناس ود محجوب ؟
_ خير ؟ مالو ؟
_ قالو عندو تور بسل فى الروح أمش كاوشو منو بكم جنيه وجر فوقو سكينك
_ دا كلام شنو يا العمده ؟
_ مالو كلامى ؟ قلت أكلمك كان تستفيد
_ المعنى أنا قاعد بضبح المرضانات يعنى ؟
_ أُمال نحنا المارضنا شنو غير فطايسك ؟
_ والله يا العمده إت بدورلك معاى سبب ساااى
_ سبب شنو عاد ؟ حرّم ما شفنا لينا خروف ضبحتو قعد يفرفر ، بتجيبهن جاهزاااات
_ عاد آعمده الله يكفينا شر لسانك المتل سوط العنج
ونهض وهو يطنطن وذهب فى سبيل حالو ، ثم إلتفت على بله صاحب الطاحونه
_ إتا آبله ؟
_ أها يا العمده
_ إتا طاحونتك دى ماله بقت تدقق حصحاص حصحاص ؟
_ خلاص يا العمده ، طفشت المبارك من القهوه وبقلت على أنا ؟ ما تقول حاجه يا ود الفكى
_ النصيحه لله ، كلام العمده صُح
_ صُح ؟ والله البسمع تعيدك ليهو تقول داير يناسبك
_ تأييد ، تأييد يا ما موثقف
_ الثقافه خليناها ليك إتا وصاحبك دا والبركه فى راديهو البشخشخ
_ العيب ما فى رادى العمده العيب فيك إتا ما بتفهم كلام الرادى
_ حرّم آود الفكى البسمعك تدافع ليهو يقول داير يناسبك
رقص قلب العمده بين أضلعه لسماع كلام بله ، وبدأت الهواجس تساوره
يا ربى بله دا قرا أفكارى ؟ وإنتظر رد ود الفكى لبله لكن ود الفكى إكتفى بضحكته الكبيره المشهوره
و أراد العمده أن يستفيد من كلام بله وقال لود الفكى
_ عليك الله يا ود الفكى قولّو ، حرّم نسب العمده نفتخر بيهو تب
نظر إليه ود الفكى و قد شعر بأن العمده قد أحاك له شرك لعلمه بأن العمده فى قمة الذكاء
والدهاء والمُكر وفكر بأن يرد له بطريقه يفهمها خاصه وقلبه قد حدثه بأن العمده ومرساله وجيته لكى يشرب
معه قهوة الفطور وراها ما وراها من الأكِمّه
_ نسبك بنفتخر بيهو تب آعمده ودا ما داير كلام ، عِلا يوسف ولدك متلكم فوق بت الطاهر
بلع العمده ريقه وقال لبله
_ عليك الله هسى إتا بتشرب فى الجبنه بمزاج كيف والدقيق ماليك لرموشك وبقيت ذى حلاوه لكوم
_ آلعمده خصمتك بالنبى قول ما شاء الله
_ هع هع هع هع
_ هع هع هع هع
_ وكمان بتضحك معاهو يا ود الفكى ؟ أها أنا الغلطان القلت أشرب معاكم القهوه فتكم بعافيه
نهض بله وذهب فى حاله وهو يقرأ فى سره سورة الإخلاص لعلمه التام بأن عين العمده ترمى الصقر من الجو ، سرح العمده وهو يحدث نفسه ، أهاا إتخارجنا من ناس بله
لكن المدرس دا يحلنا منو الحلا بله ، الجنا دا موثقفاتى درجه أولى عاد أكاوشو كيفن دا ؟
_ إتا يا أستاذ عبدالرحمن ؟
_ هو الدور وصلنى ؟ أكان كدا النقوم بكرامتى ودعتكم الله
_ هع هع هع هع
_ هع هع هع هع
وعندها إنفرد العمده بود الفكى ، برم شنبه وتنحنح وقال له
_ إتا يا ود الفكى ؟
_ أيّا يا عمده
_ أنا والله لما رسلت ليك وقلت ليك جايى أشرب معاك القهوه عشان راقد لى فوق راى
_ قول يا العمده ، شنو الراى ؟
_ بتقدر عليه تب إن شاء الله
_ أها قول ، أنا كنت حاسى تطفشك لناس بله ما ساااى
_ هع هع هع ، إتا عارف نسوانى التلاته راقدات صلطه
_ الله يديهن العافيه
_ ياخ قول الله ياخدهن
_ هع هع هع هع وبعدين ؟
_ وبعدين قلت بدل ما شبابى ومالى يضيع ساااى النقاسمو مع ود الفكى أخوى وحبيبى دا
_ كيفن يعنى ؟ ما فهمت
_ سعاد
_ ماله ؟
_ بدورها على سنة الله ورسوله ، شن قولك ؟
_ عليك الله يا العمده ، إتا الله قاعد تصلى ليهو ؟
_ ود الفكى
_ والله أكان أضيع شبابى ما عارف ؟ دا إنتا بتقوم من قعدتك ذى طيارة الرش
لما تصل هناااك عشان الضهر ينعدل
_ يا ود الفكى ما تغلط
_ أغلط أنا ولأ إتا الجايى تشترى منى سعاد بتى ؟
_ طيب يا ود الفكى يا أنا يا إتا فى الحله دى
_ حرّم إياكا المفارقها إتا يا عمده
نهض العمده وهو يلملم أطراف توبه وركب حماره وهو يسب ويلعن ويتوعد
بينما كان ود الفكى يشيعه بنظرات قويه وهو يقول فى نفسه
_ حرّم إلا على جثتى
وظهرت العقدة ...... مع حبكه دراميه موفقة ...
ود المطامير سيناريست من الدرجه الاولى ... نقلتنا الى موقع الحدث وعشنا فيه ..... فى انتظار ربط ( العقدة ) جيداً وحلها .......
متابعين ....
