كشكول ود مدني

برضو عمك النو كان راجع الي بيته ومصلح طبعا وفي الطريق لقته عربيه الالطه
المعروفه (بالعيفونه) للتوضيح معليش ياشباب) قامو ركبه معاهم عشان يوصلوه وطبعا عمك النو اضايق من الريحه ولماقلبته قاليهم ياجماعه العمله يقول مايخجل

و على ذكر أستاذنا الكبير النو
كان ليهو برنامج هو و شلتو ... الشربه على الشله و الفى بيتو القعده عليهو العشا ، و فى يوم العشا كان على استاذ النو لأنو القعده فى بيتو ، و كان اليوم داك الجيب فاضى ، بعد المغرب قال للوليه جهزّى حلتك و أمليها بهارات و ختيها فى النار و بعد الواطه ضلّمت شويه مشى الكوشه و اخد ليهو كم عضم غليد كده غسلهم كويس و رماهم فى الحله و بعد ما الشله خلاص اكتفوا من الشربه قالوا ليهو جيب العشا يا استاذ ، جاب ليهم الحله و الجماعه بدوا ياكلوا و يضربوا ليك فى الحله واحد قال ليهو ياسلااااام بالله الحله دى عاملها بى شنو يا أستاذ ؟؟
قام استاذ النو قال ليهو : بى شليل !!

هههههههههههههههههههههههههههههههههههههههههه
ههههههههههههههههههههههههههههههههههههههههه
ههههههههههههههههههههههههههههههههههههههههه

يالجد خيالية عديل

والله نكتة الموسم !!

أبو الهبك
اشهر نجار في مدني (( مخرطة )) فنادك والحق البسو فيهو الريحة والضريرة
والمشغولات المنزلية زي العنقريب المخرطة والبنبر الما خمج 00

أبو الهبك بتاع سطلة معروف وبمشي لي زول واحد عندو دكان صاحبو !
أبو الهبك بقيف في خشم الدكان بس بتاع الدكان فاهمو علي طول بناولو السجارة والدفتر !
يوم أبو الهبك جا وقف ولقي الدكان متروس لي عينو ناس وصاحبو مشغول والمسافة طوّلت ؟
قام أبو الهبك طقطق اصابعيهو لصاحبو وقال ليهو الدفتر عليك الله !
قام صاحبنا باللخمة ديك أداهو كراس مدرسة صحي صحي

أبو الهبك عاين ليهو كده 00 وقام قال ليهو :

عليك الله امرق لي بره أنديك الاملاء دي 0000

كل جمعة يأتينا أو يذهب صوتنا الي ديار الأهل في مدني الحبيبة ومن هناك
تستقبل الشعور المذهل بفرح اللقاء عبر الأثير وبعد تفريغ الأشواق تبحث عن أخر خبر أو نكتة أو شمار حار ههههه !
وكانت آخر النكات التي سمعتها بالآمس عبر الأثير من مدني قالوا في :

واحد مسطول عايز يتزوج 00 لكن أمنيته يتزوج ليهو واحدة سمييييييييييينة !
المهم في واحد من التجار ديل بتو بايرة وعايز يزوجها بأي شكل كان 00 لكن مشكلته أنو البت ضعييييييييييييييفة لدرجة قف !
سمع بي جارهم المسطول ده عايز يتزوج وسمع كمان بي شروطه 00 فقال في نفسه مسطول ماجايب للدنيا خبر قام اتفق معاهو يزوجو البنت 00
يوم الزفاف قام التاجر لف ليك بتو العروس بي جرايدالشهر كله عشان تظهر قدام العريس سمينة
تم الزواج والبت بعد الحفلة ذهبت مع راجلها القريب من البيت !
المسطول داير يشوف عروسه للزمان 00 قال ليها وريني وشك ياقمر ؟
قالت ليهو شوفو براك 00 وبدا يفك في الجرايد الليل كله عشان يشوف وشها
في النهاية زهج وقام كورك بالشباك :

ياعم عبد الوهااااااااااااااااااااااب 00 بتك دي في صفحة كم ؟؟؟

ههههههههههههههههههههه
والله رهيبه يامهيره قطعتي مصاريني من الضحك

[SIZE=5]خدورى من أبطال مدنى فى الملاكمة ، وقد شارك فى البطولة القومية للملاكمة ممثلاً لولاية الجزيرة ، ولعب أولى مبارياته مع ممثل إحدى الولايات الجنوبية ، والراجل ماقصر مع خدورى إذ أشبعه ضرباً حتى سقط على الأرض وهنا هتف أحد المشجعين " أرفع راس الجزيرة ياخدورى " فرد عليه خدورى وهو يئن من الألم " وانا قادر أرفع راسى عشان أرفع راس الجزيرة" !!!!!![/SIZE

ود الماذون

العائلات فى مدنى

تتميز مدنى بالتواصل الحميم بين سكانها وتتألف من عدد من العائلات تستدل به على الشخص وان جهلته وهذه محاولة لرصد بعض العائلات والمهن التى اشتهرت بممارستها

عائلة الخواض وامتهن معظم أفرادها التجارة - عائلة أبوسنون وهى أيضاً عائلة امتهنت التجارة - عائلة أبو ستة وقد مارست التجارة ومنها سفير السودان السابق بالمغرب بشير أبو ستة - عائلة السر خال العيال - عائلة بحر - عائلة علقم - عائلة معلا - عائلة كعورة - عائلة الإمام - عائلة دشين - عائلة المدنيين - عائلة البحيرية -عائلة كشك - عائلة أبو ظريفة - عائلة الدى - عائلة الحناوى - عائلة السنارى - عائلة حمدتو - عائلة نقد الله - عائلة الهواوير - عائلة أبوزيد - عائلة شقدى - عائلة شدو - عائلة العيساب - عائلة عساكر - عائلة البوشى - عائلة الليثى - عائلة السناهير - عائلة الكوارته - عائلة الرمضانية " نسبة لرمضان " - عائلة عبد الفضيل ومنها العضو السفير - عائلة شقا الناله - عائلة الدمياطى - عائلة شاطوط - عائلة الكارب - عائلة الدرنية - عائلة العرضى - عائلة البصيلية - عائلة الجعلى - عائلة دياب - عائلة حسوبة -عائلة سعدابى - عائلة كنان - عائلة أولاد القبتين - عائلة محمد سعيد العمدة - عائلة كرار - عائلة الحربياب - عائلة الفرنساوى - عائلة شيخ العرب - عائلة حسين عوض - عائلة الشامى - عائلة دوليب - عائلة سنجر - عائلة الخانجى - عائلة سليم ومنها المدرب القومى سيد سليم - عائلة شمبول - عائلة أبو الناس - عائلة الركبى - عائلة الكومى -عائلة سربل - عائلة نقد - عائلة القدال - عائلة السعيد - عائلة شيخ النيل المكاشفى - عائلة الكرنكى - عائلة التلب - عائلة النويرى - عائلة دبلوك - عائلة أب قرط - عائلة أب زبد - عائلة إبراهيم سعد - عائلة البطرى - عائلة الإزيرق - عائلة قرضة - عائلة الشيخ " تجار جلود بمدنى ومنهم الرائع د. طارق الشيخ - عائلة مكى مدنى - عائلة خدرى - عائلة كسلا - عائلة الصوفى - عائلة علوب.

كانت تلك محاولات لرسم خارطة ودمدنى من حيث المجموعات البشريه ، ويلاحظ انحصارها فى وسط المدينة لجهلى بأطرافها ، كما يلاحظ أنها جاءت عفو الخاطر ولم أتبع معياراً للترتيب بل ماتجود به القريحة ينال حظه فى الأسبقية ، ومؤكد أننى نسيت ضعف هذا العدد من الأسر وآمل من الأعضاء إضافة من فاتنا ذكرهم .

طالما توثيق يا بكري وين عائلتكم ممكن نقول عائلة شيخ حامد رحمة الله وبعدين كوارة ده براه عائلة هههههها ،، عائلة فراج ومنها الدكتور فراج رحمه الله وشخصي الضعيف وعباس ركس لاعب أهلي مدني والمنتخب القومي في السبعينات وعائلة أحمد عواض بالقسم الأول وبركات وهم تجار أيضاً وعائلة أبو عموري شيخ المنطقة الصناعية وعائلة حسن عبد الرحمن ومنها الوجيه عبد القدير وعائلة أولاد الحاج وهم الصياغ وعائلة مكرنجة وعائلة سليم ومنهم العم بله سليم ودامبا وجكن وبدر كلما ومرتضى ( كورة) وعائلة مليجي (فن وإبداع) وعائلة الصقرية ، وعائلة أبو زيد أحمد وعائلة عبد الستار ، والبقية علي الأخوان ،، وسلام

والله يارشيد دائماً ما أشتم فى مشاركاتك ومداخلاتك عبق منى وروح الأصالة ، بس لو تخلى الكسل وتتحفنا بالروائع .

نعود للعوائل ونضيف لما سبق ذكره :

عائلة أحمد ابراهيم حمد - عائلة الجرارى وهى تتوزع بين مدنى وقرية عبود قرب المناقل - عائلة فرينى - عائلة كنين بأم سنط - عائلة عشرية ومنهم الراحلين ميرغنى وخالد وهو رحالة شهير - عائلة عشيرى - عائلة عرمان - عائلة الجمَّال - عائلة الديمقراطى - عائلة جحا - عائلة النوحى - عائلة وَدَّاد -

معليش في الدرجة الاولي بس :

عائلة شاور

الجمري

أحمد عبد اللطيف


ولكم التحية

شكراً مهيرة على الطلة البهية وفى انتظار المزيد .

في الحقيقة من الأسباب الرئيسية الني جذبتني لهذا المنتدي (( الكشكول )) الذي سمعت عنه كثيرا 00 وهو بجانب طرافته الا أنه ينقلك مباشرة الي قلب ود مدني نسبة لوجود الاحداث المكتوبة هناك 00

مرحب بالجميع في قلب ود مدني /

موسي الثعلب جنن ناس مدني جن 00 ببيع الحاجات البايظة 00 العراريق المهرية 00 الساعة الواقفة الحاجات الصّابة فيها المطر 00 علي العموم كل تجارته طاقة
وغير شرعيه 00 قام قبضوا ناس الكشة أيام مايو وذهبوا به الي محكمة العمد
والتي يترأسها ستة من اهلنا الكبار 00 بتلقي فيهم دايما 3 نايمين و3 صاحيين
وبعد شد وجذب وكواريك في موسي الثعلب بأنه مستهبل حكموا عليهو بي 5 آلاف جنيه 00 موسي قعد يتماطل ويحكحك في راسو قام اتلفت علي الشباك
كان زراع صاحبو مادي راسو بالشباك بسمع في الحكم

قام قال ليهو 00 موسي احسن ليك تدفع00 كنكان ستة ده كان صحي بدبلوها ليك 0

ألف مرحب بيك ياملكية فى منتديات ودمدنى ، وماشاء الله بدايتك قوية ومنتظرين المزيد من المشاركات.

اخي .. ابو بكر
من طرائف زراع .. عنده صاحبه من الكريبة وأصر على زراع ان يفطر معاهو يوم .. وبعد إلحاح منه قبل زراع الدعوه .. وقام الراجل ووصف لزراع البيت بأن جواره جزاره ...
ركب زراع بكاسي الكريبة .. ونزل في اخر محطة .. وقام يسأل عن الشخص .. وقدر ما وصف .. الناس ما عرفوه .. قام زراع قال ليهم بيته جنب جزاره .. قالوا ليهو الجزارة ده الانت واقف جنبها .. قال ليهم ده الجزاره .. قام قابل الشخص الداعيه للفطور .. قال ليهو ده جزارتكم شابكني بيتنا جنب الجزارة .. جزارة فيها شنكلين .. نحن حكام ساي خمسة شناكل

ههههه حلوة منك ياروبش وعاوز اعرف العلاقة بينك وبين اسامة مهدى صاحب هذا اللقب ايام روابط مدنى؟

لك التحية يا بكري ..
ياهو انا زاتي ( اسامه مهدي ) ..
دائماً متحفنا بروايعك ... يا روعه
ما خليت عائلة في مدني ... كتر خيرك كتير

شكرا للتواصل أخي العزيز أبوبكر (( ود المأذون ))

والشكر موصول للاخوان ملكية وروبش

وبمناسبة موسي الثعلب يا ملكية :

قامت مظاهرة أيام نميري من المدرسة الصناعية وذهبت جنوبا لتقابل الهوارة والسني ومدني الثانوية مرورا بالمزاد 00 موسي الثعلب طالع من بيتهم ماشي السوق عندو دلالة هناك ولاقتو جارتو قالت ليهو عليك الله يا موسي جيب لي معاك لحمة وخضار وهاك القروش 00 موسي في طريقو للسوق لاقتو ليك المظاهرة
والجماعة في المظاهرة قالو يا اخوانا موسي ده بتاع دلالة وصوتو جهوري ومسموع خلوهو يهتف 00 موسي ما كضب قلع قميصه وهاك ياهتاف 00 تسقط مايو 00 تسقط مايو 00 ودخلوا حي المزاد في طريقهم للمدارس عشان يمشوا رئاسة الحكومة 00 جارة موسي دخلت المظاهرة وبدت تهتف معاهم وماعارفها ده موسي البهتف 00 بعد شويه شافت ليك موسي الما بختاها 00 ياموسي هوي 00 ياموسي هوي 00 اللحمة وينها !!

موسي اتلفت وقال ليها :

الليلة 00 أكلي عدس !!!

تسلموووووووووووووووووووووووووووووووووووووووووووو
يا ناس مدني ...
بالجد موضوع حلو..
انا عشت في مدني وسمعت اهلي بيحكو بي ناس حموري والزول الفي القبة العينو حارة .. الله يرحمو ..
وبرضو من العائلات عائلة ناس برير / الصوفي / دوليب
وعائلة بلة احمد بابكر / وخضر احمد عبدالحي / المرحوم د.مدنى احمد عيسى

ولكم تحياتي ...

اهلاً حبابك ياقمر الزمان وياريت لو تعرفنا على اسمك .

تسلم يا ابوبكر ..
واسمي آلاء شاكر علي يوسف ..

ملكية وروبش لكم التحية من على البعد ويا روبش جينا قطر وما قابلناك وما لينا حظ كان الواحد متشوق ويا ملكية شاذ ولكم التحية

كانت في كورها حارة طرفها الأهلي والفريق التاني زاير 00 كلفو موسي الثعلب يجيب قنا عشان يعلقو فيهو شعار الاهلي لجمهر الاهلي لزوم التشجيع 00 الثعلب مشسي لي محجوب قنا تاجر القنا في السوق الكبير المعروف بي محجوب قنا 00 ومحجوب عارف استهبال موسي 00 موسي قاليهو عايز لي قنايتين اعلق فيهم شعار الاهلي 00 بي كم ؟
محجوب قال ليهو بي 25 الف جنيه
موسي قال ليهو :
لي شنو ؟
عكسة الكورنر مابي بالسعر ده 00

بسم الله الرحمن الرحيم

الاخوة الاحباب ارجع بكم الي ذكر العوائل

ومن المدنين عائلة ابو السعود 0 وهو اب العائلة التي لها عدة فروع في مدني وكثير من قري الجزيرة وكثير من مدن السودان عائلة ابو ظبط جدي من الام 0 عائلة جنقول 00 عائلة سيداحمد جدي من الاب اولاد حسن 00 عائلة سعدابي وحنفي 00 اولا محمد التوم 00 والفروع كثيرة

سلام يا ناس مدني .... بالجد كأني عايش في مدني ، كل الناس اللطيفة اللي حكيتوا عنهم ، برضه بسأل عن بعض الشخصيات الغريبة والطريفة ، ما شفت زول جاب طاريهم ..عسى المانع خير(وإنشاء الله هم في صحة وعافية ) ... مثلاً (عثمان مانو ) ود السناهير ورقصاته الشهيرة في الحفلات مع (إخلاص بريتش) ... وشكلو وهو راجع من المنطقة الصناعية في العصر هدومو مليانه زيت تقول أحرف ميكانيكي ... وهو ما عنده أي علاقة بالميكانيكا ..
وزول مهم جدا في مدني (باردبس ) ...؟؟؟؟؟؟؟؟؟ موجود دائما في الخفلات مع الكمنجة الوهمية في اياديهو ... وكلماتو الشهيرة (تشن تشن .. جبان جداً)



كل الود