(مصطلحات سودانية بالعامية قد تصعب معانيها على قاريء القصيدة)
(حداي: جانبي)
(ولِيد: بكسر اللام تصغير كلمة ولد أي طفل صغير)
(الشُـفع: بضم الشين، جمع كلمة شافع أي طفل صغير)
(حبوبته: جدته)
(الملاية: ما يغطى به السرير)
(الإندعك: أي الانفرك (مِن فَرَكَ) ولكن من جانب عدم البياض أو الاتساخ)
(ملحوظة: ليس القصد من التوضيح قلة الدراية أو عدم معرفة معاني لهجتنا الجميلة ولكن صعوبة القراءة ومواقع الكلمات المختلفة حتى يبرق معنى القصيدة)
لكم احترامي وفائق ودي
تخيل .. دنيا أعيشها وأنا فاكراك معاي
اجتاز فيها أي مسافة .. وألوح بأي راية .. وأسافر في أعند كون
أتاريك انت ما حداي....
وأنا في حضن التعب
أشقى وأداري في بكرة الصعب
بالفرح .. لحظة صدق
لحظة تأمل
لحظة مُـحال
والجرح صافي .. نقي
حل مكانه الابتسام العذب
رغم فجوة الفراغ الرحب....
وأتجمل وأتزين
وأتكمل وأتفنن
وأنا في نفس المدى
مافي غير حس الصدى
وحسك انت لسه ما اقترب...
دنيا رهيبة مليانة بشر
وأقول انت غير كل البشر
وأتمعن في كل الخلق....
جواهم تباين
جواهم تضاد
جواهم تناقض
جواهم فرق
انت ملك
انت ساطع برق
وأنا جواي فؤاد بيتحرق...
أحنس في عينيك البالية
واسكت في صرخاتي العالية
اسكن في آلامي الطاغية
اجفف دمعات قلب باكية
بيقطع في أوتار مرة حزينة أكثر من بـُعد الحشا ما بتخترق
ونتحاوم بلاد وبلاد
ونتصادف من غير ميعاد
والترحال ينطق يقول:
حسه العجيب والكلو معاي ما كان بيتحسب
وفي لحظة ميلاد .. لحظة عشم
يغمرنا وحشة الزمن المستلب
ويتجرعني كاس السيل الجارف
والفيهو الغرق أخِير من العدم...
تصبح معالمك الظاهرة خافية
والخافية استحالة تتعلم
حتى ملامح ثوراتك الطاغية تتخدش بالنزيف السادي وما ممكن تتم..أو تجس نبضة لي أو بحواسي تتحس تتفهم
وكل مجاهر الدنيا تتجرد عيون
تتعقد جباه...
وما بين حقيقة ما بين وهم ترجع تاني تنهزم
ألقاك شنو؟؟
ويلقاك منو؟؟
ألقاك (ولِـيد) يحاكي الكبار في أماسيهم لما يتغنوا للهوى والريد
وطول الليل ما يهجع
يجافي النوم .. يتحسس .. يتلمس
يداعب في هديمات باكر العيد
يتحاوم...
يتجارى....
يتشاقى مع الشفع...
يتلبك...
يتجنن لما يتفضل حلاوة ولا يلمح قدامو طيبة من أطايب العيد
ويتجاهل في الوصايا ...
يخمج للنهاية...
يصارع في حبوبته ....
ويمسح في الملاية
يستطعم
يبحلق بعويناته
بدور يفتش عن مكامنه
ويتساءل في مخيلته
كيفن ينهل أكثر من نصيبه ويزيد؟؟؟؟
حتى لو كان الثمن
إعادة زمن
وسؤال خوف نابع عن جبن
الاندعك بيرجع جديد؟؟؟
ألقاك أنا
قضية يوم
قضية شهر
قضية سنة
والأنات تتوالى تتردم
وقتن يكون جواك نغم
جواي الم
جواي نغم
جواك أغم
ونتوه وسط اقل زخم
ساعة أنين الصمت جوه الحنايا
يتعرى
يتحفر سُـكات
يحل مكانه رماد السجم..
يبقى الزمان البينا عدى....
طيفه خلى في الوجدان شكاوي
يمكن ولو بعد فات الأوان نتمنى
نفس الجرح
نفس الشقا
نفس الآهة الكثيفة
تتحدى وتعزف أحلى غناوي
لأسقام وجع السنين كان تقدر تداوي..........
