من مواقفي مع البوفيه المفتوح
العولمة وهي ما تعرف بفتح الثقافات على بعضها البعض مع التطور التكنلوجي الهائل في اجهزة الاعلام وكذلك انتشار الهجره جلب الينا كثير جدا من عادات الغرب .. ودون ما يكون هناك تبادل عكسي .. وخاصة في الطعام . بل بدات بعض هذه العادات الغربية تتسيد وتطغى على عاداتنا .. اختفت من بيوتنا صينية الغداء الشهيره بكسرتها وملاحها .. ليتناول الناس وجباتهم بالطريق من محلات سندوتشات اما شاورما او هامبرقر .. لقد تطرقت لهذه النقطة في موضوع البيتزا ... واقول ان صينية الغداء لم تكن مجرد صحن كبير فيه كسره بملاح مرافقا لها صحن سلطة وواحد صغير للشطة بالليمون .. انما كانت منتدى يومي تجتمع فيه الاسره مع الاب ويبدا طرح عدة مواضيع ربما متعلقة بدراسة الابناء او السياسة او حتى الكورة ... كما انه كون الناس كانوا ياكلون من نفس الماعون تولد نوع من الالفه والتقارب بينهم .. وانتظار الوالد والابناء بالغداء فيه نوع من الوفاء والالتزام تجاه بعضنا البعض ..
لكن من ضمن العادات التي استوردناها من الغرب هي ظاهرة البوفيه المفتوح .. وهي التي ساتطرق لها الان .. ولكي لا اوصف باني شخص متطرف ومتعصب لعاداتنا ساتطرق لمحاسن البوفيه المفتوح ...البوفيه المفتوح فيه حسنة وهي عدم الاسراف والتبذير بحيث يتناول كل شخص من نوع الاكل الذي يختاره قدر كفايته فقط ويترك الباقي .. ولكن اعتقد انه نحن في عالمنا العربي لم نصل المرحلة التي تجعلنا نقدر الكميه الفعليه في كفايتنا .. لذلك لا نستطيع التعامل مع البوفيه المفتوح .. ما دعوت الى بوفيه مفتوح هنا في الرياض وعادة يكون في الفنادق وبصفة خاصة في رمضان .. والا لاحظت ان العرب من كل الجنسيات لا يستطيعون التحكم في الكميه التي تكفي الواحد .. فهو يغرف كميات كبيره من كل نوع وبعد ذلك لا يستطيع ان ياكلها كلها ..
من ضمن هذه المواقف التي تعرضت لها انا شخصيا دعوت الى احدى الاسر السودانية لتناول الغداء .. وهي اسره ميسورة راقيه لا نغبطهم ولله الحمد ... ولكن المفاجاه كانت انه الغداء بوفيه مفتوح .. والمواعين المستطيلة التي تحتها شمعة للتسخين .. وهي نفس الاواني التي توجد بالفنادق ولكن بحجم اصغر .. ورب الاسره بدا معي جولة تعريفيه على الاطباق .. وانا احمل صحني اصبح منظرنا كانه هو كابتن فريق بيعرفني باللاعبين
وبدا كالتالي :
(دي مكرونا بالبشميلة ..ماشي . ودي استاكوزا بالاسباكتي .. ما معانا ... ودا بفتيك بالفنيك .. ودا استيك بالبلاستيك ..... هو لازم حاجة بحاجة.... لا ما لازم ... ودا جمبري بالبطاطس .... ودي باميه مطبوخة ( يعني انا ما بعرف البامية كمان ؟؟؟.. ما للدرجة دي يا ابو الشباب نحن برضو قعد ناكل ... دا كلام في سري طبعا )ودي سلطة بازنجان مخلل .. ودي سلطة مايونيز بالخردل .. ( والجردل دا شنو كمان ؟....... الخردل ما الجردل ) .. الا ان وصلنا صينية دائرية فقط وعليه شئ اشبه بالكسرة ولكن مقطع في شكل معينات مثل الباسطة ولكن الشكل شكل كسره بصراحة سالته ... ودي شنو؟؟ .. رد لي معقولة يا ابوالدر ... دي ما كسره سودانية...... كسره سودانية ؟؟؟ والجابه هنا شنو ؟؟؟ وحاياكلوها كيف مع الشناكل بتاعتكم دي ؟؟؟؟ بسيطة كدا ،، ادخل قطاعة بتاعة الباسطة تحت احد المعينات بتاعة الكسره ووضعها في الصحن بتاعي وفتح احد المواعين وغرف منه خضره مفروكة وكب ملعقتين على الكسره ... وانا اعاين باندهاش .... ودا ملاح خضره مفروكة وانا رديت .. لا عارفه ادونا ليه في تانية ابتدائي ..... لكن دي ما المشكلة المشكلة يا كلو كيف ؟؟؟؟؟؟
وبدات عملية الشرح ... مسك شوكة وسكين وقال كدا ... ضغط على الكسره بالشوكة وقطعها بالسكين وطعنها بالشوكة وغمسها في الخضره وتناول لقمة .... تخيلوا من الخضره بالكسره بالشوكة والسكين واكلها وقال هممممممممم لذيذه .....
انا بغيظ شديد ... اقول ليك حاجة ..... شيل شيل شيل ..... اشيل شنو .؟؟ طلع من صحني الانت مسميهم كسره بملاح خضره ديل ... خليني على الشناكل ديل احسن ... ليييه يا ابو الدر انت ما بتحب الكسره بالخضره .... كيف انا بموت فيهم واكلتي المفضلة .... لكن ما بالشوكة والسكينة ... ونحن الخضرة دي كان ما غطسنا يدنا فيها لا عند الكوع ما بتملا بطنا ولا عينا ...بعدين الخضره عايزة صحن كبير حتى الصحن الصغير ما بينفع معاها ..
ثم ان لقمة الخضره بملاح الكسره تحتاج للفتين تلاته في الهوا قبل ما تدخلها خشمك .. كيف حا اعمل اللفتين ديل بالشوكة افرض الكسرة طارت ولبست في وش واحد من ضيوفك الحناكيش ديل .. نبقى في امسحها لينا في وشنا واعذار ما لها داعي من الاول ...
خلاص يا ابو الدر دخل واحضر صحن ووضع فيه عدد من مثلثات الكسره وغرف لي فيه من ملاح الخضره وجدعت الشوكة والسكين وسبت صحن الشناكل في محله وشمرت قميصي ونزلت ليك بيدي في ملاح الخضره ....
رفعت راسي لقيت الحناكيش يعاينو لي بتغزز كانهم شايفني داخل الحمام بالشراب .. وانا في سري ادعو انشاء الله الشوكة تلبس ليها في حلق واحد ولا يده عشان تعرفوا نعمة اليدين والاصابع ... قال شوكة قال ...
