عرض للطباعة
جلس الاثنان فى حالة صفاء حالهم كحال اى اثنين مقبلين على الزواج ... يبنون بيوتا من الاحلام الورديه
وجسورا فوق كل هاويه او مطب يعترض طريقهم ...
كانت خطبتهم قد طالت نوعا ما ... ولكن الحب الذى جمعهم تلاشت من خلاله الازمنه .. وانطوت عبره السنين ...
....... .......
نظرت اليه نظره اودعتها حنان الدنيا كله ثم خاطبته قائله :
يا محمد يا خى لازم بعد كده نحدد مواعيد العرس ... انا نفسى نكون مع بعض طوالى ياخى!!!!
والله يا ريت يا سوسن لكن انتى عارفه الظروف ..وحكاية البيت دى عامله لى هاجس !!!!
انا ما عندى اى مشكله يا محمد .. انا مستعده اسكن معاكم فى البيت .. غرفه واحد بى تشيلنه ياخى ..
ومشكلة المطبخ محلوله .... مع امك انا بشتغل ياخى !!!!
والله يا سوسن ما عارف اقول ليك شنو لكن كان نفسى والله ابنى ليك بيت او على اسؤا الفروض بالايجار لكن ...!!!!
ما تلكنه يا روحى .. انت بكره تجى لى ابوى وتحدد معاهو يوم العقد .. خلاص اتفقنه .؟؟؟؟..
اتفقنه يا ستى !!!
اتى اليوم الموعود ونصبت الخيام وكانت ليله من احلى ليالى العمر ... ثم تفرق الكل بعد عقد القران وانتهاء الحفل الساهر
واخذ محمد عروسته الى شهر العسل فى افخم الفنادق .... ولان لكل شء نهاية فقد انتهت ايام العسل سريعا ورجع محمد وزوجته سوسن الى عش الزوجيه يملؤهما الامل والتفاؤل ... لتبدأ قصه حياه اخرى !!!!!
دخل محمد على زوجته بعد يوم مضنى من العمل فوجدها تشاهد فى التلفزيون ...
ابدل ملابسه ثم خرج ليسلم على والدته فوجدها ساهمه واجمه وحزن الدنيا كله يبدو على محياها ..
فى شنو يمه .؟؟؟. مالك .؟؟؟؟.. حاسه بى حاجه ؟؟؟
لا لا يا ولدى ... عندى صداع بس ... بلعت ليهو حبة بندول واسى بروح ان شاء الله
طيب يا امى ... عاوزه حاجه ؟؟
سلامتك يا وليدى ..
رجع محمد الى غرفته وما ان استلقى على سريره حتى بادرته زوجته
اسمع يا محمد... امك دى كرهتنى ياخى ...
فى شنو يا سوسن
فى انو امك دى طوالى شابه لى فى حلقى ... بس ما اعمل لى حاجه فى البيت ده الا هاك يا نصائح
وسوى كدى وما تعملى كدى ... انا زهجت يا خى
يا سوسن ياخى اسه انا كنت مع امى وكلمه واحده قالته فى حقك مافى
ااااى .. هى بى تقدر تتكلم ... ما عارفه نفسه غلطانه !!!
وبعدين ياخى شوف حل .. دى ما عيشه دى ... كل يوم الواحده خارقه اعصابه .. فوق ام كم ياخى ...
انت يا راجل هوووى ..
. التفتت الى محمد فوجدته قد استغرق فى نوم عميق ... فكتمت غيظها وشدت عليها البطانيه ونامت من الغيظ ...
اصبح هذا ديدن محمد وسوسن ...
والام تعانى ما تعانى بصمت ودموع مخنوقه خوفا من تعمق الخلافات اكثر بين محمد وزوجته ...
حتى اتى يوما جلست فيه سوسن مع زوجها محمد وفاجأته بقولها
شوف يا محمد ... انا و امك دى مستحيل نقعد فى بيت واحد ... شوف ليك حل للمسأله دى؟؟!!
يا سوسن انتى عارفه ظروفى .. حكاية اأجر بيت ومصاريف انا ما بقدر عليها !!
وبعدين يا سوسن انتى نسيتى كلامك قبل الزواج وانو ما عندك مشكله تسكنى مع امى .. ؟؟؟!!!!
قبل الزواج شئ واسى شئ يا محمد ... وبعدين يا زوجى العزيز منو القال ليك انو نأجر بيت او نشترى بيت؟؟؟؟
حيرتينى معاك يا سوسن .... يعنى نعمل شنو ؟؟؟؟
حل بسيط ومناسب لكل الاطراف يا حبيبى ... !!!
قولى خلينه نسمع ؟؟!!
نودى امك دار المسنين ؟؟!!
بهت محمد وسكت فجأه ... واستدرك قائلا : قلتى شنو يا سوسن ؟؟؟!!!
يا حبيبى ما فيها شئ ... ما تضخم الامور ساهى ... بعدين هناك والله تلقى رعاية اكثر من هنا
انتى عليك الله اسى فاضى ليها .. ما بى تطلع الشغل من الصباح وترجع باليل وبعدين ياخى.............................................. .................................................. ..................................................
نقاش طويل استمر حتى الصباح بين محمد وزوجته انتهى على وعد من محمد بان يفكر فى الموضوع
بعد عدة ايام لبس محمد افخر ثيابه وتعطر باجود انواع العطور وامر امه بان تلبس احلى ثيابها هى الاخرى
نظرت سوسن الى زوجها محمد وخاطبته :
وين الليله قاشر كدى ... وكمان امك شايفاها قاشره ؟؟
اجابها محمد : مش قلتى نودى امى دار المسنين ... خلاص ... امرك يا ستى !!!
ابتسمت سوسن ابتسامه جزلى ثم صاحت ...
والله يا محمد ده اسعد خبر سمعتو ... ما تتصور انا بحبك كيف ... وحبى ليك كل يوم زايد ... وتاكد انا ح اسعدك يا حبيبى الغالى
ابتسم لها محمد ابتسامه فاتره تنم عن خيبة امله ثم القى عليها سلاما باردا واصطحب امه وخرج
مرت الساعات سريعا وسوسن تجلس فى بيتها والسعاده تغمرها حتى انها لم تلحظ غياب محمد الذى طال
حلقت فى اجواء قصرها الذى ستكون فيه الامره الناهيه بعد ان تخلصت من ( حماتها) تلك الانسانه الطيبه
وطارت باجنحه من الزهو والغرور بين ارجاء المنزل .... ثم قبعت باثقال من الانانيه وحب الذات فى ركن قصى من اركان المنزل فى انتظار زوجها الذى طال غيابه ولا تدرى سببا لذلك
وفجاءه قطع افكارها صوت الباب يفتح وضحكات رقيقه عذبه انسابت من بين ثنايا حلمها المتقوقع
نهضت بسرعه نحو الباب لتجد زوجها محمد بكامل اناقته وامه باحلى ثيابها تتوسطهم فتاه احلى من القمر وقد خضبت الحناء ارجلها وايديها الناعمتين وابتسامه جزلى تشع من عينى ام محمد املا فى الوعد القادم
بينما تهاوت سوسن حيث تقف خوفا من الوعد القادم
.... انتهــى .....
الرائع ود الجزولي
تسلم على السرد الجميل
و القصه الواقعيه التي التي تجسد المثل
المرأه بدقوها بي اختها
تخريمه
اجمل شي انك خليت باقي القصه مفتوحه
يعني انا بتخيل انو محمد طلق القديمه
خصوصا انو ما عندو منها اولاد
اذا لم يرد في النص ما يشير الى ذلك
والله دى كانت اجمل نهاية والراجل الما عندو خير فى امو ما عندو خير فى زول تانى .............قال امك قال ثم من قال امك قال ثم من قال امك
تسلم على السرد الرائع
صباحات شوقنا بخيرا وصباحك طل بالياسمين
هترشة
ما ده المحير بوبي زاااااتو
اقتباس:
المشاركة الأصلية كتبت بواسطة عمرسنهوري
العزيز عمر سنهورى
تعرف انا خليت النهاية مفتوحه عشان كلو زول يضع لها نهايات حسب درجة تعاطفه مع ( الحاجه ) ام محمد
اسعدنى مرورك اخى عمر سنهورى
ولك من الود والاحترام ما يليق بمكانتك عندى
الاخت الكريمه تيلكوماقتباس:
المشاركة الأصلية كتبت بواسطة telecom
الرائع هو وجودك هنا ... فقد اسعدنى وافرحنى
وكما قلتى فان الذى ينتصر الى زوجته امام امه لا تتوقعين منه خيرا سؤاءا له او لاسرته من بعده
وقديما قيل كما تدين تدان .. فسوف يفعل فيه ابناؤه كما فعل فى امه
لك الود والاحترام تلكوم على مرورك الرائع
اقتباس:
المشاركة الأصلية كتبت بواسطة ابوالنور
ابو النور يا ظريف
بالجد مشتاقين لهترشتك ديك
وصحى والله الرجال معادن .... وانت معدنك دهب والله
هترشه تانى: الفى الصوره الرمزيه ده بن ولا انا غلطان
محمد القصة جمليه
والنهايه اجمل
المراءه العاقلة لاتخير الزوج بينها وبين امه .
ودمت بالف خير
اقتباس:
المشاركة الأصلية كتبت بواسطة بدر الدين احمد الطائف
استاذ بدر الدين شخصيا
نوزرت المكان والله
وكما قلت اخى بدر الدين فان الزوجه التى تطلب من زوجها ايداع امه لدار المسنين ليس فيها خير
ولن يكون فيها خير لاولادها لان فاقد الشئ لا يعطيه
دمت بالف خير اخى بدر الدين
ولك عميق ودى
يا ود الجزولي اخوي اتحداك اكيد في الشوقاقتباس:
المشاركة الأصلية كتبت بواسطة محمد الجزولى
نحنا ناس بتاعين مزاج وونسه بننتهج نوع تانى من التنفيس تعرف ما عارف ليه التنفيس ده طوالى بيذكرنى سيرة ( الخريف في شارع النيل وشارع الدكاترة في قفلت شارع المستشفي ) . الحمد لله الزمن ده فى تيوبليس وفى بناشر كتير ممكن تعالج النفخ لو حصل . المهم بقترح انو قبل نبدا تواصل الهترشة
اها نسيت اقول ليك انو ده بن ومقلي بي جمر فوق لي قلايه
الحبيب محمد الجزولى
قصة غاية فى الروعة ومعبرة جداً .... تحمل كثير من الدروس والعبر
تعرف يا جزولي سوسن دي من نوع
مخطوبين يحننو
معلاسين يجننو.
لكن برافو ود الرجالز
جزولي يا أبداع لا يعرف الراحة وحروف تضج
وكلمات تعانق السماء
عفيت منك ياود الجزولى
لكن تعال النسعلك ...
نواعم المنتدى ياكافى البلاء
ما لين ماجن بهنا خبارين...
ياربى اكونن خايفات من
راجل المره دا التمبلولا:rolleyes:
**
تحياتى واشواقى
ود الجزولي .. اديك العافيه
وده ابلغ رساله نتمنى ان تكون عبره لاصحابها
ما في أجمل من رسالتك هذه لحواء ياود الجزولي
لكن أصابع اليد ما واحدة .
والله رسالة رائعة وأكثر من رائعة وعظة لمن يتعظ
وأجمل ما عجبني في الرجل محمد هو عدم الدخول معها في نقاشات مطولة وعرف آخر رأيها
وأجاب عليها بطريقة واضحة وجلية
لك خالص الود
الجزولي دوما محمل بالروائع والعبر
كانت اجمل درس وعنوان لضعفاء النفوس
القصة التي هي كتير ما بدت واقعية
واثبات لحسن التربية فمحمد فاز بجدارة وبين ان للأم ليس هناك بديل
جازاه الله الجنة فكان خير مثال
ههههههههههههاقتباس:
المشاركة الأصلية كتبت بواسطة ابوالنور
ابو النور والله يديك العافيه
ياخى مش قلت ليك توقيعك بشبهك شديد وما صدقتنى
بالمناسبه دى ممكن اسال سؤال ثانى : العلاقه بين الرجال معادن والصن شاين شنو؟؟؟؟
تسلم استاذنا وحبيبنا عوض صقيراقتباس:
المشاركة الأصلية كتبت بواسطة عوض صقير
من ضمن الرسائل فى هذه القصه هى شكل العلاقه بين الزوجه وحماتها ... والمشاكل التى تحدث عندما تعيش زوجه الابن فى منزل اهل زوجها
وهى ظاهره موجوده فى مجتمعنا اذ ان الزوج يعيش فى كابوس دائم بسبب مشاحنات زوجته مع امه
عميق شكرى على مرورك مستشارنا عوض
ودمت بالف خير
اقتباس:
المشاركة الأصلية كتبت بواسطة عاطف عولي
ولدنا ود عولى هنا
يا مرحبا يا مرحبا
تعرف يا عاطف حقو تعمل دراسه عن سر التحول الكلى فى شكل العلاقه ما قبل الزواج وما بعده
وليه ما نتمسك بى ( بعض ) مثاليتنا عندما نصبح ازواجا .. ونتغلب على كل الصعاب بالتفاهم والموده والرحمه
صدقنى ح تطلع بى دراسه خطيره وانا عارفك ( بى تكرب) الدراسات والحاجات دى
لك منى كل التحايا وسلامى الخاص الى روان
يا نزار مشتاقين واللهاقتباس:
المشاركة الأصلية كتبت بواسطة نزار حسن محمد
والله سؤالك وجيه ياخى فعلا نواعم المنتدى ديل وين ؟؟
القصه اصلا لمناقشة شكل العلاقه بين الزوجه وحماتها
والمفروض يجن بى جاى نسمع منهم
مع العلم ان كل واحده منهن رايها يتوزن بالدهب
همسه : ياخى ما تجى يوم تتعشى معانا
ياجزولي صباحك سوداني
القصة جميلة ومعبرة مافي شك
لكن سين سؤال
باقي ليك الزي محمد دا في زمنا دا كتار ؟؟؟؟
الحبيب رويشاقتباس:
المشاركة الأصلية كتبت بواسطة روبش
يسعد صباحك
ضغوط الحياه وحب التملك والانفراد يؤدى الى نماذج مثل سوسن
لا تفكر الا فى نفسها وتنسى ان لولا هذه الام لما ظفرت بمحمد اصلا
شاكر لك مرورك الكريم اخى رويش الذى اسعدنى جدا
اقتباس:
المشاركة الأصلية كتبت بواسطة ياسر عبدالرحمن
العزيز ياسر
ومافى اجمل من مرورك هنا والله العظيم
وفعلا اصابع اليد ما واحده
وهناك نماذج كثيره جدا كانت زوجة الابن خير عون وسند لحماتها
اسعدنى مرورك حقا اخى ياسر ودمت بكل الود
ابو جودى الحبيباقتباس:
المشاركة الأصلية كتبت بواسطة أبو جودي
اول حاجه مشتاقين
والرائع هو وجودك هنا
وفعلا تصرف محمد كان فى غاية الحسم والعقلانيه
تسلم اخى ابو جودى
الراقى محمد الواثقاقتباس:
المشاركة الأصلية كتبت بواسطة محمد الواثق
اسعدنى جدا مرورك
واضافتك الجميله
واكيد امثال محمد هذا سوف يجد جزاء احسانه لامه
لك شكرى وامتنانى اخى محمد الواثق
ها ناااساقتباس:
المشاركة الأصلية كتبت بواسطة محمد الجزولى
الزول ده أقرعوهو مني شكلو داير يموت براهو
وزمان قالو الغرام قسمة وزمان قال الشاعر
فلو جُني مخلوقٍ من الحسن جننت
فزولنا ده مجنون بأبداعه براه !!! وسيجن من حسنه براه !!! وسيجعل من قلمه سيفاً للهاري كاري ولكنه يريد ان يحملني دمه !!!
لذلك اريد ان اشهدكم انني لست السبب
يعني خليكم شاهدين
اردت ان اعطيه هذه المداخلات لكي اخدره قليلا عسي ان اجد فيه الغفله
او القي فيه الملكة
هترشة
الملكة : =( مسطلح في المصارعة الشعبيه القديمة وهي ان يتمكن المصارع من الاستحواز علي وسط خصمه
واحاتطه بكلتا يديه فيصرعه ويكسب الجولة )
الاخت الكريمه مدنيهاقتباس:
المشاركة الأصلية كتبت بواسطة مدنيّة
صباحك ( زين)
شاكر لك مرورك الراقى
والله يا مدنيه حواء والده ... والدنيا لسه بخيرها
الرااااااائـــــــع ودالجـزولي
حقيقـه قصـه راائعـه
تجســد واقع اليــم وتفكيــر قبيـح من بعض الزوجــات
شكرا على هذه القصـه
والله انسان وبار بوالدته ومليء بالشهامة والرجولة
تسلم يا محمد
تسلم ايها العبقري كاتب السيناريو الذي كتلنا من المغسة ونحن نقرأه فما بالك لو عشناه
تحياتي
ود الجزولي .. تحيات بحجم الروعة التي سكبتها هنا .. قصة جميلة ومعبرة .... وتحياتي عبرك لـ محمد ود البلد الأصيل .. وأشكر عبرك بوست الترشيحات وصاحبه ود عولي .. والذي لفت إنتباهي لهذه الروعة
وعذرا ولكن أن تأتي متأخرا .. خيرا من أن لاتأتي أبدا
لك الود ... محل ما تقبل
الراقى ابو النوراقتباس:
المشاركة الأصلية كتبت بواسطة ابوالنور
وانا اشهد انك كسبت الجوله وبجداره
بى كلامك الطاعم ده ... وروحك الخفيفه
دمت بكل الخير اخى ابو النور
دمت اخى المميزاقتباس:
المشاركة الأصلية كتبت بواسطة محمد حسين (المميز)
واتمنى ان يرجع الزمن زنرجع للبيت الكبير الذى يستوعب الجد والجده والاب والام والابناء والاحفاد
اتمنى ذلك فعلا
شكرا جزيلا لك اخى العزيز المميز
شكرا يليق بقامتك اخى منعماقتباس:
المشاركة الأصلية كتبت بواسطة monim
فقد اسعدنى مرورك
ورأيك يعنى لى الكثير اخى منعم
فانت صاحب فكر وفكره
دمت بكل الود اخى العزيز منعم
عزيزى ود جلالهاقتباس:
المشاركة الأصلية كتبت بواسطة عثمان جلالة
شكرا لك على انيق حرفك
فقد سرنى مروك هنا
دمت بكل الخير اخى الغالى جلاله
ولك كامل احترامى
جاب أمه وأبوه وهو في بلاد الغربة علشان يعالج أبوه, زوجته ما إستحملتهم يومين, وخلَت زوجها يطلع شغلو الصباح وطردت أمه وأبوه في الشارع وكمان رمت ليهم شنطهم برة!!! (إتخيلوا ناس في غربة وجديدين وكمان كبار في السن, ينطردوا ومن منو؟؟؟!! لا حول ولاقوة إلا بالله العلي العظيم)
لحسن الحظ جاء واحد قريبهم يسلم عليهم, ولقاهم برة الشارع, سألهم ماشين وين؟ قالوا ليهو مستنين فلان (اللي هو ولدهم) جايينا ( سبحان الله من طيبتهم بعد ده كلو خايفين عليها!!), قام قال ليهم إلا تمشوا معاي بيتنا تقعدوا معانا كم يوم , وإتصل لولدهم وكلمو إنو حيسوقهم بيته, طبعا ده كلو ومافي زول عارف بالحاصل, المهم قعدوا كم يوم مع قريبهم ده, ولدهم إتحسس من موضوع القعاد ده, وقال ماظريفة الراجل شغال ومرتو تخدم فيهم وهو بي بيتو, الأم رفضت قالت ليهو بما معناه تطلع من البيت ده وعلى المطار طوالي,
لما شاف إصرارها على كدة أصر هو برضو على إنو يعرف الحكاية شنو, وحكت ليهو, طوالي مشى طلق زوجته وحجز ليها علشان ترجع أهلها.
القصة دي حقيقية, وحصلت قبل سنوات عديدة.
غايتو في جنس من البشر, فيهم قسوة ما عادية حتى على الضعيف والكبير بيقسو!!!!
مبروك ود الجزولي