خواطر حول رحلتي للفلبين 2011 بالصور

عندي رغبة جامحة في تعليم اللغة الانجليزية ( مخاطبة ) لانو اخوكم مشكلتو بفهم انجليزي كويس لكن ما بعرف ارد يعني عندي صعوبة في تركيب الجمل ..زي ( محس + دناقلة الخرطوم ) ماعندي غير الانجليزي العرفتو عبر كراتين الصابون . اها قلت اشوف اي من الدول ممكن ادرس فيها انجليزي مخاطبة (conversation ) اصلو اخوكم في الانجليزي خلوها سااااي .. اها بعد جري ومساككة .لاي سفارة اوربية تقبل اخوكم يدرس عندها شهر او شهرين فشلت كل المحاولات ووصل الخيار النهائي لدولتين الهند او الفلبين .. واخيرا فاز خيار الفلبين لان الشعب لو ما كله معظمه بتكلم اللغة الانجليزية .. ولقوة التعليم فيها بعد استشارة بعض الاخوان . وكذلك جمال الطبيعة فيها فالفلبين دولة جميلة جداً وفيها مناظر طبيعية روعة في الجمال وشعبها طيب جدا ومتعاون . قل ما تجد او تعاني من مشكلة معهم خلونا نمشي مع بعض الى الخواطر واحدة واحدة ابتداء من الوصول ومرورا على التعليم والحياة الجامعية وكيفية الدراسة هناك لانني التقيت مجموعة من الطلبة السودانيين هناك وكذلك الحياة العامة وتكلفة المعيشة إذا رغب اي واحد منا ارسال ابنه او بنته الى الدراسة هناك . لذا توجهت صوت السفارة الفلبينية بالرياض للحصول على تأشيرة زيارة سياحية .. نواصل
http://hh7.net/Aug/9/hh7.net_13128870383.jpg

اخ محمد حمد على السلامة وبركة الجيت طيب . ورحلة موفقة ان شاء الله
والفلبين بقولوا انها بلد جميل . والحقيقة بانت امامنا الآن .. العلم طلبه مطلوب
كما جاء في الاثر أطلبوا العلم ولو كان في الصين ... في انتظار الحكاية ...
اخي محمد وكتر الرز ... اقصد كتر الصور ههههههههههه تسلم محمد ....

اقتباس:

---

المشاركة الأصلية كتبت بواسطة ابو عبد الرحمن

اخ محمد حمد على السلامة وبركة الجيت طيب . ورحلة موفقة ان شاء الله
والفلبين بقولوا انها بلد جميل . والحقيقة بانت امامنا الآن .. العلم طلبه مطلوب
كما جاء في الاثر أطلبوا العلم ولو كان في الصين ... في انتظار الحكاية ...
اخي محمد وكتر الرز ... اقصد كتر الصور ههههههههههه تسلم محمد ....

---

نسلم يا ابو عبد الرحمن . فعلا بلد جميلة جدا وشعبها طيب لابعد الحدود انشاء الله الرز اقصد الصور حتجيكم واتمنى ان اعكس صورة حقيقية وواقعية كي يستفيد منها من يرغب في ارسال ابنه او بنته للدراسة هناك فهناك العجب والتعجب والندهاش ..

حمدا للسلامة اخي العزيز محمد النويري
وحتما سوف تبحر بنا في هذا البوست عبر مشاهد سوف نستفيد منها جميعا
تحياتي العزيز محمد وفي انتظارك

أخى محمد تصوم وتفطر على خير ورحلة موفقة مكللة بالنجاح

نصحني احد الاصدقاء وهو اخ لزميلي بالشركة لديه سابق معرفة بطريقة السفر للفلبين ، بان يكون تقديم طلب الفيزا للسياحة (tourism ) وليس للدراسة حتى للطلبة الذين يرغبون في الدراسة الجامعية هناك. لان طلب تاشيرة للدراسة يحتاج قبول جامعة من هناك واجراءات طويلة تؤدي للتعطيل لذا الواحد لو عاوز يدرس بعد ان يصل الى مانيلا يمكن له ان يقوم بتغيير الفيزا من سياحية الى إقامة بغرض الدراسة بعد ان يقدم لأي جامعة يرغب الدراسة بها ويستلم القبول ونوع الدراسة المرغوبة ( من السهل الحصول عليه ) يمنح إقامة لمدة أقصاها سنة تجدد سنوياً وهناك الجامعات ممتازة جدا بها كل التخصصات طبعا هناك في مكاتب خدمات تساعدك للحصول على اقامة دراسية .

[url=http://hh7.net/]http://hh7.net/Aug/10/hh7.net_13129616961.jpg[/url

http://hh7.net/Aug/10/hh7.net_13129632843.jpg

[url=http://hh7.net/]http://hh7.net/Aug/10/hh7.net_13129632844.jpg

http://hh7.net/Aug/10/hh7.net_13129632845.jpg

الله اديك العافية اخي محمد الجزولي .. مشكور ياغالي

الله اديك العافية اختي تغريد وربنا يتقبل من الجميع انشاء لله .. مشكورة

تسجيل حضور و متابعة بشغف عالي جدا

و مشكور يا النويري

تسلم ياغالي اتمنى ان اعكس صورة حقيقية ومعاشة لكي يستفيد منها الجميع وبكل شفافية .. ( شفافية دي خت تحتها 3 خطوط ) هههههههههههه

ركبت عربيتي ومشيت متوجها نحو السفارة الفلبينية بحي السفارات بالرياض . هناك وجدت دفتر تسجيل وضع امام الباب تكتب اسمك ورقم هويتك وتلفونك في دفتر وضع امام الباب والكل يأتي ويستطف اي كان رجل او امرأة. من باب دخول السفارة بتشعر بروح السماحة في استقبالهم لكل زائر . وانسيابية في كل شئ لا بتسمع كواريك او صوت عالي كأن السفارة دي ما فيها ناس ،طبعا مافي حاجة اسمها رسوم دخول زي الثلاث ريال رسوم لإجراء اي معاملة الكنا بندفعن زمان في السفارة حقتنا في الرياض. استقبلتني موظفة الاستقبال بابتسامة جميلة ( ديل ما بعرفن اكشرن او اقولن امشي وتعال والسيستم عطلان ) اها وجهتني على الموظفة المختصة ومشيت عليها لقيت صف إلى ان وصل دوري وكالعادة سؤال بابتسامة عن سبب ذهابي للفلبين واخوكم بدون تردد ( للسياحة ) ورطنت معاي كمية من الكلام طبعا فهمت ورديت عليها وتميت الباقي بيدي. استلمت منها طلب الحصول على تأشيرة دخول مدون فيها الشروط : خطاب من جهة عملك محدد الراتب والمهنة وحجز ( reservation ) فندق في مانيلا طول فترة الاقامة وتذكرة سفر ذهاب وعودة مع صورة من تأشيرة الخروج والعودة السعودية . وعدتني اجيها بعد اسبوع لان الموافقة غير فورية ع الاقل اسبوع وبحمد الله استلم الجواز . نواصل

سردك شيق و انا متابع بشوق لمعرفة القادم
لك التحية أخي محمد النويري و رمضان كريم

تسلم اخي امين ولك التحية اضعاف مضاعفة .. شكرا ع المرور

وكان السفر يوم 1/7/2011م من مطار الملك خالد بالرياض الرحلة تستغرق 9 ساعات متواصلة مع ملاحظة انو هناك فرق 5 ساعات ما بين المملكة والفلبين. ودا كان في عز الصيفية يعني المطار كان زحمة بطريقة عجيبة . إتعنقلت في الطائرة كنت انا الوحيد سوداني وقليل من السعوديين والبقية فلبينيين ونحن في المطار كمية كبيرة من النسوان الكل عبايات ولبس اسلامي مية المية . اخذت لي غفوة وصحيت لو ما قلت بسم الله كنت افتكرت اني في طائرة غير الركبت فيها شكل الطائرة كل اتغير بناطلين وتي شيرتات وشعر مفكوك ياحليل طائراتنا وبلدنا كانت جنبي فلبينية مكمكة اسود في اسود بعد ما صحيت لقيتها حاجة تانية سالتها : هل دي نفس الطائرة المتوجهة لمانيلا ؟ اجابت : نعم انت ماشي لبلد الحرية والجمال والانتعاش !!! الكلام دا ما فهمتو إلا بعد ما نزلنا في مانيلا نواصل ..

نزلنا في مطار مانيلا على الساعة 5 مساء تقريباً كان جو رهيب ممطر والله روعة شكرتنا المضيفة على اختيارنا الخطوط السعودية ونزلنا في المطار استقبالات وابتسامات من الكل وصلت لضابطة الجوازات ورطنت معاي كمية من الكلام ، انا شبكتها ليك ( yes ) شيتا فهمتو وشيتا خليتو للزمن ، سلمتني جوازي بكل احترام . مشيت خطوات وانشغلت باتصال هاتفي وما مشيت في نفس خط الجماعة الكانو راكبين معاي ( خط سير عفش الخطوط السعودية ) صادف نزولنا طائرة الخطوط البريطانية والفرنسية دا لو عندنا ما عارف كان حيكون الصالة كيف ؟ صالة الوصول اتشكلت بألوان الطيف من البشر بالجد الامور جاطت في راسي اول حاجة العملية مقلوبة ( البنات لابسات اردية نص كم ) والرجال متحشمين بالبناطلين !!! المشكلة مافي عربي تسال منو وتقول شنو ؟ تهمس باي كلمة إجوك جاريين ( نعم يا سيدي ) مافي حاجة اسمها نرفزة او صرة وش او استهداف ( عليك الله اشتري لي علبة لبن من الاسواق الحرة ) بخدموك مجاني وبابتسامة عريضة لو الزول ما مسك نفسو وبقى رزيين حيسكن جوة المطار . جاتني ملامح مطارنا وحياتنا ( حياتنا الما حياتنا ) المشكلة يا جماعة دي اول مرة اشوف بلد اسيوي او اطلع شوية من ذاكرة الدول العربية .المطار منظم جداً واللوحات الارشادية واضحة للزول (النجيض ) وعندو انجليزي لكن عينة اخوكم دا ياهو البتعب ههههه .نواصل ..

حمدا ً لله على سلامة العودة من الفلبين و الطلة عبر المنتدى و رمضان كريم
و أتفق معك أخي محمد فمن خلال إقامتي في السعودية أستطيع القول بالفُم المليان
بأن أكثر الشعوب رُقي في التعامل من بين الأجانب الموجودين بالسعودية هم الفلبينيين و الأندنوسيين

اقتباس:

---

المشاركة الأصلية كتبت بواسطة محمد النويري-الفقراء

لانو اخوكم مشكلتو بفهم انجليزي كويس لكن ما بعرف ارد يعني عندي صعوبة في تركيب الجمل

---

و أنا كذلك أتشارك معك هذه المشكلة فأنا أفهم و أكتب و أقرأ الإنجليزية جيدا ً و لكن أجد
صعوبة في المخاطبة ، و كم تمنيت أن أجد فرصة لتعلم الإنجليزية على أصولها عبر التخاطب المباشر مع أهلها

اقتباس:

---

المشاركة الأصلية كتبت بواسطة moh_alnour

و أتفق معك أخي محمد فمن خلال إقامتي في السعودية أستطيع القول بالفُم المليان
بأن أكثر الشعوب رُقي في التعامل من بين الأجانب الموجودين بالسعودية هم الفلبينيين و الأندنوسيين

---

أخوانى الكرماء محمد النويرى وأبويذن تصوموا وتفطروا على خير
أتفق معكم فى هذه الجزئية شعب منظم بمعنى الكلمة بعملوا حاجات تحير

أهه يا النويري واصل


وبابتسامة عريضة لو الزول ما مسك نفسو وبقى رزيين حيسكن جوة المطار


كنا واقفين هنا

اقتباس:

---

المشاركة الأصلية كتبت بواسطة moh_alnour

حمدا ً لله على سلامة العودة من الفلبين و الطلة عبر المنتدى و رمضان كريم
و أتفق معك أخي محمد فمن خلال إقامتي في السعودية أستطيع القول بالفُم المليان
بأن أكثر الشعوب رُقي في التعامل من بين الأجانب الموجودين بالسعودية هم الفلبينيين و الأندنوسيين
هلا بالحبيب محمد .. نعم الفلبينين شعب راقي لدرجة لاتوصف .. عندهم رقة واسلوب عالي في التعامل .. نقطة سطر جديد : عندهم جمال طبيعة وبشر لدرجة الاندهاش .. مشكور ع المرور الجميل يا جميل



و أنا كذلك أتشارك معك هذه المشكلة فأنا أفهم و أكتب و أقرأ الإنجليزية جيدا ً و لكن أجد
صعوبة في المخاطبة ، و كم تمنيت أن أجد فرصة لتعلم الإنجليزية على أصولها عبر التخاطب المباشر مع أهلها

---

نعم اكثر حاجة عندهم فوة التعليم من اول يوم نزلت وكل الناس بتتكلم انجليزي ابتداء من الحبوبة وانتهاء بالطفل الصغير

اقتباس:

---

المشاركة الأصلية كتبت بواسطة تغريدا

أخوانى الكرماء محمد النويرى وأبويذن تصوموا وتفطروا على خير
أتفق معكم فى هذه الجزئية شعب منظم بمعنى الكلمة بعملوا حاجات تحير

---

الله اديك العافية تغريدا .. فعلا ولو شفتيهم في بلدهم وكمية احترام الضيف والرقي في التعامل تحتاري اكثر .

اقتباس:

---

المشاركة الأصلية كتبت بواسطة مصطفى هاتريك

أهه يا النويري واصل


وبابتسامة عريضة لو الزول ما مسك نفسو وبقى رزيين حيسكن جوة المطار


كنا واقفين هنا

---

تسلم يا رائع حنواصل من هنا .. اشكرك ع المتابعة الجميلة

كل طائرة وعندها سير للعفش براها . اخوكم ( راسو داش ) من العلي ما براي سويتو في نفسي .. اللوحات دخلن في بعض وحاجات تانية زغللت لي عيوني ماعرفت شنطة ملابسي في ياتو سير ( انشاء الله سير مكنة ) الفيوز كلها ضربت والمشكلة عاينت في الناس الكانو معاي ماعرفتهم مشو بياتو طريق وماحاولت اسال اي واحد قلت خليني النعمل بفهم زائد ( والفهم الزائد مشكلة ) المهم قلت مافي طريقة غير اعمل ( يا إيدي ختيني ) شختك بختك واقيف في اي صف وخلاص ، مشيت وركبت صف ناس كلهم ( نضاف ) انا الوحيد الخاطف لونين في نصهم ، لبسهم لبس عادي جدا ( اردية نص كم والباقي انتو عارفنو ) وزولي الفلبيني برة عامل لي قلق اشيل وإتصل بي وين انت ؟ وين انت ؟ ماعارفني انا هنا دايش ومدشدش . نواصل ..

http://hh7.net/Aug/15/hh7.net_13133673771.jpg

http://hh7.net/Aug/15/hh7.net_13133673772.jpg

http://hh7.net/Aug/15/hh7.net_13133673773.jpg

فكرت اسيب شنطتي واشتري غيرها وخلاص لكن اتراجعت وشفتها شينة المهم لشلاقتي في واحدة جنبي متمرة التقول مودينها الدلالة قلت اتظارف معاها واسألها بلطف بطريقة الهمس الجميل سالتها عن ياتو خطوط دي ردت علي بالفرنسي وما فهمت من ردها اي حاجة عرفت نفسي اني اتشعلقت في سير الخطوط الفرنسية . قلت دي ما ظبطت شفت سير تاني جمبهم وركبت فيهو الشنط لافة وكل الشنط حتة حتة شنط جميلة ياحليل سير العفش عندنا في مطارنا شئ براميل مربطة ،وشئ شنط مربطة بحبال ( كانها حتجري منهم ) وكراتين واشياء ما بتلقاها إلا عندنا نحن بس ما بتعرف دي طائرة ولا لوري عفش . سرحت بعيد انتبهت لصوت ناعم همس عجيب ( can u help me please ) . نواصل ..

http://hh7.net/Aug/16/hh7.net_13134810181.jpg
http://hh7.net/Aug/16/hh7.net_13134810192.jpg

حضور ومتابعة وكتتتتتتتتر من الصور

محمد النويري ... رمضان كريم
صراحة سردك جميل ومشوق كمان
عجبتني صورة مدينة (كلامبا لاقونا شديد Calamba Laguna)
وتشتهر ضواحي المدينة بعمل المنحوتات الخشبية المتنوعة
ويا ريت لو شرحت بتفصيل مسهب طريقة الحياة هناك

مشكورة ع المتابعة ومروركم يسعدني ..

اقتباس:

---

المشاركة الأصلية كتبت بواسطة abomazeen

محمد النويري ... رمضان كريم
صراحة سردك جميل ومشوق كمان
عجبتني صورة مدينة (كلامبا لاقونا شديد Calamba Laguna)
وتشتهر ضواحي المدينة بعمل المنحوتات الخشبية المتنوعة
ويا ريت لو شرحت بتفصيل مسهب طريقة الحياة هناك

---

تسلم اخي ابومازن .. الله اكرم .. فعلا مدينة قمة في الجمال وروعة والله ابهرتني كل الفلبين انا اكثر مدة كنت في مدينة Baguio اشياء لا توصف وشعب طيب لابعد الحدود فعلا بلاد تستحق السفر إليها . اها باين عليك كنت هناك من خلال معرفتك بمدينة لاقونا . مشكور ع المرور الجميل

عاينت ليها من شدة ما متنعمة الدم في عروقها شايفو جاري ناولتها شنطة وقعت من السير وبقيت منتظر شنطتى وقنعت وقلت اسيبها ليهم انشاء الله تنفعهم . لكن الحمد لله جاتني موظفة من موظفات المطار ماشاء الله ( ترقش زي اللمبة ) يا جماعة الناس ديل بجيبو النضافة دي من وين ؟ مافي غبشة كلو بيلمع وبيرقش رجال كان نسوان . هناك ما بتنادي على زول او تكورك الكلام كلو همس ( yes sir ) تعامل راقي جداً من كل القائمين في المطار وانقذتني لانو شافتني زي الشامة واقف متشنط وسط الفرنسيين السمحين ديل أتلفت زي مروحة الطربيزة. دلتني على سير الخطوط السعودية ولقيت جماعتني الكانو معنقلين معاي في الطائرة.. شلت شنطتي وعلى الباب ، بعدها عملت تبديل للعملة من الريال للفلبيني ( بيسو – peso طبعا الريال يساوي 11 بيسو ) ملاحظة عجبتني شديد . وانت داخل اول مرة بتعمل تبديل من ريال او دولار حسب العملة الجايبها معاك الى عملتهم المحلية . وانت راجع في نفس المطار بترجع ليهم اي عملة محلية معاك وبتاخد العملة الاجنبية الانت عاوزها وطلعت لبرة المطار . نواصل ..

http://hh7.net/Aug/17/hh7.net_13135716731.jpg
http://hh7.net/Aug/17/hh7.net_13135769642.jpg
http://hh7.net/Aug/17/hh7.net_13135769643.jpg

عندي زميلي فلبيني بالشركة عمل لي تنسيق مع اخوه هناك عشان يستقبلني في المطار طبعا لا بعرفني لابعرفو . لانو الفكرة اني امشي ادرس عندهم في مدينتهم .عند الباب وجدت الجماعة عاملين لوحات وشفت زولي معاهو مرتو من خلال اللوحة الرافعها فوق كاتب عليها ( Mohammed Alnuwari ) طبعا كلو انجليزي ما في عربي بعد ما سلمت وحق الله وبق الله ، ملاحظة مهمة عندهم حكاية التصوير دي مهمة وعادي جدا ممكن اتصوروا في المطعم او الشارع او اي حتة ما زي عندنا لو مسكت ليك كاميرا في الشارع الجماعة اقولو ليك (شوف العوير دا ) إكرهوك الصور زاتها. طبعا اتصورنا ( مافي زول اقول لي نزل صور استقبال المطارههههه ) اها حصلت دهشة صغيرونة زولي جاني هو ومرتو لابسين زي اللبس الشفتو في المطار، مرتو سلمت علي عادي جداً ( والله نحن في نعمة نسوانا تسلم عليك وهي آخر حشمة ) كلام عجيب من خلال الشارع العام توصلت لان البلد كلها دي حياتهم كده .. لبس اوربي الواحد لو استنكر اللبس حيكون هو الغريب .. عادي جداً فنادق بها كل الخدمات بارات مفتوحة طوال اليوم . المهم مشيت الموضوع لان دي حياتهم كده . مشيت معاهم هم ساكنين على بعد ساعتين من مانيلا في مدينة اسمها (laguna ) سبحان الله عندهم ( لاقونة ) وعندنا ( زقلونة ) ! مابين زقلونة ولاقونة فرق كبيييير بلد جميلة جداً اكبر مشكلة واجهتني كنت خائف من اكلهم لانهم بياكلو الخنزير ولحم الكلاب ومشكلتي نسيت كلمة خنزير بالانجليزي شنو ( Pork ) وحسيت بجوعة شديدة سالني ناكل شنو ؟ قلت ليهو بنزل معاك المطعم اشوف بعيني قلت من باب الوقاية خير من العلاج عيني للدجاج المابغباني قلت ليهو انا اديني دجاج وانت اكل الاكل البتعرفو انت . الاكل عندهم رخيص جداً وجبة دجاج مشوي تآكل وتشيل باقي الاكل معاك بقيمة 12 ريال فقط !! طبعا طول الطريق امطار نازلة بكثرة .. نواصل .

http://hh7.net/Aug/20/hh7.net_13138250631.jpg
بلد جميلة بالفعل
http://hh7.net/Aug/20/hh7.net_13138250632.jpg
http://hh7.net/Aug/20/hh7.net_13138250633.jpg
http://hh7.net/Aug/20/hh7.net_13138250634.jpg

اقتباس:

---

المشاركة الأصلية كتبت بواسطة محمد النويري-الفقراء

تسلم اخي ابومازن .. الله اكرم .. فعلا مدينة قمة في الجمال وروعة والله ابهرتني كل الفلبين انا اكثر مدة كنت في مدينة Baguio اشياء لا توصف وشعب طيب لابعد الحدود فعلا بلاد تستحق السفر إليها . اها باين عليك كنت هناك من خلال معرفتك بمدينة لاقونا . مشكور ع المرور الجميل

---

حباب الحبيب النويري الفلبيني (حلوة الفلبيني دي)
لكن بعد وصفك الجميل وكلام عن البلدي دي
وبصراحة أنا ما مشيت الفلبين قبل كده
لكن عندي صديقي في مدينة Laguna
وأول ما شاف الصور بتاعتك عرفها
وقال لي صاحبك مشى Laguna
كدي قول لينا سعر الإيجار لمدة شهركم ؟
وسعر الوجبات في المطاعم وأنواعها ..؟
أكيد في مطاعم (عربية/مسلمة) مش كده ؟
وطبعا مدينة (مندناو المسلمة) أشهر مدينة مسلمة
يلا واصل لينا وصفك وسردك الجميل (وصااف)
لكن يا النويري ... ما لقيتك وصااااف شديد ...!

اقتباس:

---

المشاركة الأصلية كتبت بواسطة abomazeen

حباب الحبيب النويري الفلبيني (حلوة الفلبيني دي)
سوداني معدل فلبيني هههههههه

لكن بعد وصفك الجميل وكلام عن البلدي دي
وبصراحة أنا ما مشيت الفلبين قبل كده
لكن عندي صديقي في مدينة Laguna
وأول ما شاف الصور بتاعتك عرفها
وقال لي صاحبك مشى Laguna
كدي قول لينا سعر الإيجار لمدة شهركم ؟
وسعر الوجبات في المطاعم وأنواعها ..؟
أكيد في مطاعم (عربية/مسلمة) مش كده ؟
وطبعا مدينة (مندناو المسلمة) أشهر مدينة مسلمة
يلا واصل لينا وصفك وسردك الجميل (وصااف)
لكن يا النويري ... ما لقيتك وصااااف شديد ...!

---

المدينة جميلة شديد انا ماقعدت فيها إلا يومين وسافرت بعدها لمدينة باجيو بلد الجمال والحرية والإندهاش . ما لاقتني مطاعم عربية هناك ولا مسلمة لكن كنت بآكل الدجاج معروف واللحم ( البقري ) كان للوصف اوصف ليك لمن تعرف حاجة لكن بحاول اختصر عشان ما اطول على الناس .. اتمنى ليك تمشي زيارة وتشوف بعينك روعة وجمال الطبيعة ...

http://hh7.net/Aug/20/hh7.net_13138302921.jpg

http://hh7.net/Aug/20/hh7.net_13138302932.jpg

المساء نزلني الفلبيني في بيتهم تتكون اسرته من زوجته وطفلين ووالدة زوجته . حبوبة كبيرة في العمر كلموها بأني ضيف عندهم لقيتها ماشاء الله بتتكلم انجليزي فل بس حيرتني شوية . لابسة ليها ( برمودة وفانيلة ) والله طبعا استغربت جداً بعد شوية لقيت البيت كلو كده من هنا استوعبت انو دا لبسهم وحياتهم ، والحيرني اكثر لقيت اخت زوجته ساكنة معاهم بأطفالها سالتهم وين بيتها ردت مرتو قالت اختي ساكنة معاي لانو راجلها شغال برة الفلبين فيهم صفاتنا الجميلة ( تكافل اجتماعي ). بعد الترحيب والاستقبال الجميل انتقلت للمبيت في شقة مفروشة ملاصقة لسكنهم . واتفقت مع الفلبيني عشان اشوف اي جامعة او معهد أدرس فيهو كورس مخاطبة لغة انجليزية .اليومين الاولين عيوني زغللن ما عرفت اعاين في منو الأول ؟ في الاشجار والطبيعة ولا في الناس .هناك مافي زول شغال بزول من جميع النواحي ومن ناحية اللبس او السكن الكل واحد . ماعندهم حكاية انت ساكن فوق ولا تحت اهم حاجة عندهم الاكل والشراب ( البيرة ) ما بشيلو هم لقفة الملاح ( هم زاتم اكلهم ما ملاح ) اصابني الاندهاش نواصل ..[/[/COLOR][/SIZE]http://im9.gulfup.com/2011-08-23/1314086620381.jpg

http://im9.gulfup.com/2011-08-23/1314086620162.jpg

تسجيل حضور ومتابعة

اقتباس:

---

المشاركة الأصلية كتبت بواسطة تغريدا

تسجيل حضور ومتابعة

---

الله اديك العافية حضورك يشرفني ومرورك يسعدني

اقتباس:

---

المشاركة الأصلية كتبت بواسطة محمد النويري-الفقراء

كان للوصف اوصف ليك لمن تعرف حاجة لكن بحاول اختصر عشان ما اطول على الناس ..

---

:):):)
لك التحية أخي محمد.:)

ما شاء الله،
مُتابعين لوصفك الجميل للرحلة،
وإن شاء الله ما بتطول على الناس،
فنتمنى تواصل وبلا اختصار لو سمحت.:)


:):):)

اقتباس:

---

المشاركة الأصلية كتبت بواسطة moram

:):):)
لك التحية أخي محمد.:)

ما شاء الله،
مُتابعين لوصفك الجميل للرحلة،
وإن شاء الله ما بتطول على الناس،
فنتمنى تواصل وبلا اختصار لو سمحت.:)


:):):)

---

الله اديك العافية اخت مرام واشكر لك المتابعة الجميلة .. وما بيدي اطول على الناس ولكن لظروف الشغل جيت ولقيت شغل مردوم ردم .. بحاول ادخل واكمل كل ما تتاح لي الفرصة بذلك . وانشاء الله حيكون الموضوع متوصل بلا انقطاع

شقيق زميلي بالشركة عندو صاحبو بيحضر ماجستير صيدلة بالفلبين وقال لي لزوم التواصل لازم تمشي ليهو في مدينة اسمها ( Baguio ) مدينة جميلة جداً بها طاب لي المقام لمدة شهر كامل .. مدينة مرتفعة على الجبال امطار غزيرة لشهور عدة .جوها طول السنة روعة، مخضرة وسبحان الله كلها اشجار وخضرة ووجه حسن يرتادها معظم الاوربيين تبعد عن مانيلا 7 ساعات ، سكانها قمة في الرقى والبساطة بها 3 من اكبر الجامعات واقواها وهي : جامعة ( اس ل يو - SLU-Saint Louis University و جامعة ( يو بي - UB-University of Baguio ) وجامعة ( يو سي - UC- University of Cordillera ) بهم كل التخصصات . لذا تجد كمية كبيرة من الطلبة ومن جميع الجنسيات . من الناحية الاقتصادية البلد رخيصة جدا ، اتصلت على ذاك الدكتور السوداني وسالني وين انت الان ذكرت ليهو المدينة ( لاقونة ) قال لي تركب تجي بكرة الصباح بدري وتجينا هنا في مدينة ( باجيو ) مدينة التعليم والسياحة والجمال وحتعجبك جداً سبحان الله فينا ميزة جميلة وهي سودانيتنا مهما تمشي اي بلد في العالم بتجد روح التعاون والمساعدة من بني جلدتك ، ذاك الطبيب واخوه و3 من الطلبة السودانيين مثلوا معاي هناك أدوار من الرجولة والشهامة والإخاء فقد كانوا عوناً وسندا لي ابتداء من استقبالهم لي عند محطة الوصول للمدينة وانتهاء بوداعي بنفس محطة الوصول راجعاً الى مانيلا . نواصل ..
http://hh7.net/Aug/24/hh7.net_13141865361.jpg
http://hh7.net/Aug/24/hh7.net_13141865362.jpg
http://hh7.net/Aug/24/hh7.net_13141865363.jpg

[quote=محمد النويري-الفقراء;625633] الصباح بدري وتجينا هنا في مدينة ( باجيو ) مدينة التعليم والسياحة والجمال وحتعجبك جداً سبحان الله فينا ميزة جميلة وهي سودانيتنا مهما تمشي اي بلد في العالم بتجد روح التعاون والمساعدة من بني جلدتك ، ذاك الطبيب واخوه و3 من الطلبة السودانيين مثلوا معاي هناك أدوار من الرجولة والشهامة والإخاء فقد كانوا عوناً وسندا لي ابتداء من استقبالهم لي عند محطة الوصول للمدينة وانتهاء بوداعي بنفس محطة الوصول راجعاً الى مانيلا . نواصل ..

ياهو دا السودان والسودانين أينما حلوا
طبيعة ساحرة سبحان الله أخى محمد النويرى والله ضربت عصفورين بحجر واحد جبت أجلهم دراسة وسياحة:)
متابعين بس ماتكتر الفواااااااصل:)

[quote=تغريدا;625641]

اقتباس:

---

المشاركة الأصلية كتبت بواسطة محمد النويري-الفقراء

الصباح بدري وتجينا هنا في مدينة ( باجيو ) مدينة التعليم والسياحة والجمال وحتعجبك جداً سبحان الله فينا ميزة جميلة وهي سودانيتنا مهما تمشي اي بلد في العالم بتجد روح التعاون والمساعدة من بني جلدتك ، ذاك الطبيب واخوه و3 من الطلبة السودانيين مثلوا معاي هناك أدوار من الرجولة والشهامة والإخاء فقد كانوا عوناً وسندا لي ابتداء من استقبالهم لي عند محطة الوصول للمدينة وانتهاء بوداعي بنفس محطة الوصول راجعاً الى مانيلا . نواصل ..

ياهو دا السودان والسودانين أينما حلوا
طبيعة ساحرة سبحان الله أخى محمد النويرى والله ضربت عصفورين بحجر واحد جبت أجلهم دراسة وسياحة:)
متابعين بس ماتكتر الفواااااااصل:)

---

ههههههههههه .. تغريدا بركة الجبت اجلهم بحجر واحد وما جبت اجلي انا .. لانو بالجد بلد جميلة حد الاندهاش لو الواحد ما شاف بعينو كان ممن ما اقدر استوعب كل ذاك الاندهاش والجمال الطبيعي بالجد الراجل الهناك واخوه واصحابو ما قصروا معاي فعلا اولاد مأصلين والعاجبني فيهم ما زي بقية الطلبة السودانيين الهناك بالجد حاجات تحير وتكمل الفهم .. مرورك اسعدني

طول الطريق ذاك الطبيب على اتصال دائم بي وسؤالي وين انت الآن ومن الظريف انو كلو اجاباتي نحن في حتة عالية وجبال خضراء طبعا قعد إضحك لانو كلو الطريق كدا . وصلت مدينة ( باجيو ) على الساعة 6 مساء استقبلوني الشباب اجمل استقبال واحر ترحيب ( ديل أهلي مكان قبلت القاهم معاي معاي زي ضلي ) فعلا اثلج صدري استقبالهم وترحيب بعد السلام والتحايا عرفتهم بنفسي وعرفوني بنفسهم 2 منهم بحضروا ماجستير صيدلة وواحد مختبرات وواحد اقتصاد. بعد الضيافة والترحاب قال لي صاحبي هذا ( بقينا اصحاب طبعاً ) انو يمكن ان استاجرغرفة في فندق 5 نجوم وجاهزة الان ولكنه اقترح أني اسكن مع طبيب زميلهم لانه مستاجر 2 غرفة وهناك غرفة غير مستخدمة تم تجهيزها لي ودفع قيمة السكن بدلا عن الفندق حيث كانت بنصف السعر وبها كل الخدمات . وانتقلت للاقامة بها . شقيق صاحبي ( اقتصاد ) ومقيم معه بشقة . قال لي انو عندو معهد درس فيهو وانو طريقة التعليم فيهو ممتازة جدا واتفقنا على ان نتقابل صباح اليوم التالي للذهاب والتسجيل في ذاك المعهد . وفعلا التقينا على الساعة 9 صباحاً وتحركنا سوياً ، اجمل حاجة عجبتني انو صاحبي يتكلم معهم باللغتين المحلية ( تاقالو tagalo ) وانجليزي . في الطريق شقيق صاحب قال لي اول حاجة لازم اشتري ( مظلة - Umbarella ) لانو فعلا المطر نازل يومي وساعات طوال دا لو نازل عندنا كنا طلبنا الإغاثة والميزة الحلوة مافيهو رعد ولا برق صااابي بقوة وبدون رعد .. بعدها اتوجهنا للمعهد .. بعد السلام وحق الله وصلنا باتفاق ودفعت القروش شهر كامل مخاطبة (one by one ( الرسوم 1300 ريال فقط 5 ساعات دراسة متواصلة والله حاجة روعة . نواصل ..

في الطريق الى باجيو بالبص السياحي

http://im9.gulfup.com/2011-08-27/131443419281.jpg

http://im9.gulfup.com/2011-08-27/131443419282.jpg

http://im9.gulfup.com/2011-08-27/1314434193393.jpg