وتنفست الأغنام الصعدأ

أيوه سمعتها بي أضاني البياكلها الدود دي

قالت ماااااااااااااااااااااء


سمعتها أنا مع الصدى والهواء العليل لاااااااااااااااااااااااا


والقصة طويله

وفصولها عديده ..... أبطالها راعي .. وغنمه ... ومرعى أخضر على مد البصر ... ومويه ما تديك الدرب من كترتها وعذوبتها

كان الراعي يظن أن أغنامه .. مجرد أغنام مسالمة فقط ..فقط اغنام... ليس لها أن تستخدم قرونها أبدا لتنطح

بينما كانت الأغنام تظن الراعي واعي

المهم

كلنا اكيدفي انتظار ما ستسفر عنه دراما هذا المسلسل

كدي فاصل قصير وراجعين ليكم بعد دعاية شامبيون البتقول .."مهما ح يحصل في حياتك شامبيون شنو كده ما بعرف" ;)

بخش ليكم تواااااالي في الحلقة الأولى

موسيقى تصويرية


ماااااااااااااااااااء :mad::mad:

الصوت عالي صااااح؟؟؟

جلاله كيفنك ..
غنمك ديل عملوا لينا وجع راس ..
تعال راجع قوام وما تطول علينا ..

وهدي قعدة الهمباتي ماتطول عليك الله

العفو يا أخوانا واخواتنا

كان من المفترض والضروري .... وحيث إنو نجيكم صادين طوالي بعد الدعايه ... لكن لأنو الكهربا قطعت وكده .. ولأنو ده شي طبيعي في الخلا والصي حقنا دا فـ أمسحوها لينا في وشينا

نرجع لقصتنا ما بعد الدعاية

ولأنو نحنا بطبعنا بنحب التعليق ... عندي تعليق واقف لي في حلقي دا بخصوص الدعاية حقت الشامبيون ... المعنى يعني قاعد احس فوقها استفزاز كتير لمشاعرنا ... كيفن يعني البنيه تمشي لمعاينة وظيفة وما يشيلوها ؟؟؟ مش عشان ما مؤهلة .. لكن عشان ما عندها واسطه ... تجي راجعه وبكل بساطه تشرب ليها قزازة شامبيون وتنسى الموضوع؟؟!!! أصلها قزازة شامبيون ولا قزازة شربوت :mad: البتنسي إحباط الوظيفه .. وده كلو ما مزعلني المزعلني هي لقت قروش القزازه وين من الأساس ..... حاجات تحير والله :rolleyes:

الحلقه الأولى:

عشان نختكم في الصورة ... أولن بالتبادي أنا راعي .. والقدامكن ديل غنيماتي ... أي صاح ما هن غنيماتي البمتلكن .. لكنهن غنيماتي البصرف فوق رعايتهن راتب شهري ... لكني يالحبان بمتلك كل الأرض الشايفاها عينكن دي ... بشجرها ودوابيها ... ومويتها ... ولالوبها ... وهواها العليل .. وبمتلك بعد دا كلو .. وأهمهن في نظري .. قلب كبير ... وضمير مرتاح .. و جيب نضضضضضضضضضضيف وشرف نضيف ما فيهو لا طق ولا شق .. وعلى دين كيفي في الخلا والصي أدوبي وأكورك .....وأغني في بنوت الفريق ..... وبعد دا كلو على قول ود البشرى ... "كدوسي وحقتي مزروده ... وسكيني ملسنه بالجنبات هييييييييييع"

وزي ما عارفين للضرورة أحكام ... في شان كدي بقيت راعي مودرن .. عندي موبايل ولابتوب في شان الواحد يفسبك وكده ويعرف الحاصل في العالم ويسمع صوت أمه .. البديني احساس بالإلفه ويدوزن فوقي عصب .. هذا الزمن الأشتر .. أي والله زمنا أشتر بالحيل.

أها ما سألتوني ... الرماني جنس الرميه دي شنو .. رعاية الغنم؟؟

النقول ليكم؟

أنا يا الحبان واعوذ بالله من كلمة أنا ... اتخرجت من كلية الاقتصاد جامعة جوبا .. ومتخصص علوم سياسية ... "حليلا جامعة جوبا بقت بين يوم وليله جامعه في دولة تانيه" وحلمي أدخل وزارة الخارجية السودانيه .. مش عشان أحكم الناس ؟ لا أبدا عشان أخدم بلدي وناسها ... وأطورها من أخطر وأهم مكان ... وزارة الخارجية

أها طبعن الموضوع دا ما ظبط نوهائي .. لأنو الخارجيه في بلدنا بقت ما بالمؤهل العندك !!! بقت بمؤهل تاني سموهو الولاء .. والولاء هنا ما بتعني ولاء للبلد .. بتعني ولاءك للحزب الحاكم فقط لا غير وما مهم لو كنت متأهل ولا قاري ولا ما بتجر الخط زاااااااتو .. في شان كده خارجيتنا السودانيه عمرها ما اتقدمت ولا قدمت البلد .. المهم.

ولأنو قنعت من خيرا فيها البلد الأي حاجه فوقها بالواسطه .. قلت أدقش الخلا بس ... أسوق معاي غنيماتي ... وأقعد في هوا الله البارد قدامي الخضره والمويه ... والسخيلات ;);)

وفي نفس الوقت أقتداءا برسولنا الكريم "محمد" صلى الله عليه وسلم ... رعى عليه أفضل الصلاة والتسليم .. وبعد داك جا حكم كل العالم.

في شان كدي بعد ما انتهي من ماجستير القانون الدولي البعمل فيهو دا ... وبعد ما تجي حكومة نضيفه تعين الناس حسب مؤهلهم ... بخش وزارة الخارجية كان الله هون ... وبقترح عليهم إنو كل كوادر الخارجيه .... مفروض أول حاجه وقبل ما يشغلوهم في الخارجيه ... يشتغلوا رعاه لفترة ما بين الـ 6 شهور إلى سنة ... لأنو الخلا والصي دا بعلم الكتير زي ما ح تعرفوا .. ومش الخلا براهو البعلم .... الغنم ديل ذاتن ما هن هينات ... زي ما بقول المثل يضع سرو في أضعف خلقو.

ما تخافوا المستقبل اللينا نحنا المهمشين ديل ... زي ما عمنا الطيب قال:

أحـمر لونـو مـن دم الرجال دُكَّـرنا

وتتبعنا السباع في رواحنا وإن بكَّـرنا

ويـن يجد المجال عازِلناشِنْ أنكـرنا

تعـرفنا الدهـور تثبت نبانا ذِكِــرنا


بجيكم صاد ... كدي النتلقى الغنيمات الـ سربن ديل ما تبقي علي قصة ... الجفلن خلهن أقرع الواقفات ههههه ..... تك تك هيع هيع ... أش أش:)

ياسلام مستمتعين مع القصه ياريت توصل متشوقين نعرف الحصل شنو

كيف طعم اللبن من الضرع
وصلنا نصف المطلوب من حكاية غنمك
والماء والوجه الما بيشبهك
بس حكومة الجن دى ما تصلك فى خلاك

دوماً نحن في المتابعه
ولك تحياتي
ودمت بود

^_^
متابعين
بث ماتطول

اقتباس:

---

المشاركة الأصلية كتبت بواسطة ريمون

جلاله كيفنك ..
غنمك ديل عملوا لينا وجع راس ..
تعال راجع قوام وما تطول علينا ..

---

منوره يا ريمون ... أصلها السعيه دايما فاضحاني مع الضيوف :;)

كدي هاك أقطعي عطشه المشوار والانتظار بـ كورة "اللبا" دي .... عندنا الليله الغنماية الحميرا "ستهن" جابتلها عتود لو ما قلتي ما شاء الله ما بتقدري تملي عينك فيهو :rolleyes:;)

حبيب القسا ... كيفنك مطول الغيبة

والله ياجلالة عارف انا بحبك لاني بشوف روحي فيك وحالتي زي حالتك بالضبط ونحنا اولاد دفعة واحدة وانا برضو قريت علوم سياسية وحضرت ماجستير والله والله هدفي زي هدفك وبرضوا وبرضوا رحت للبعيد واخترت لي صي وسط سخيلاتي واقوم اسرح من الفجرية وارجع بعد المغرب مهدود الحيل بس الضمير مرتاح وحالتك زي حالي العلي

الله فى
يا الحبيب اول حاجة الموضوع دا توديه لينا النفاج او تعمل لينا " مس عام: مس عام دى على وزن مس كول يعنى تورينا فى حاجات سمحة زى دي عشان نجيها طوالى "
ثانى السعيد يكون زيك
قالوا واحد لقى الامام الغزالى يرعى فى الخلاء " الخلاء والا الرفيق الفسل "قال ليه ايها الامام أليس تدريس العلم ببغداد خيرا من هذا ، فنظر اليه الامام وقال:
تركت هوى سعدى وليلى بمعزل
وعدت الى مصحوب اول منزل
ونادت بى الاشواق مهلا فهذه
منازل من تهوى رويدك فانزل

ياخى الرعى دا ما علم ونحن منتظرين تعلمنا ، وسيدنا موسى كان راعى وسيدنا محمد( اللهم صلى عليهم وسلم)
ونحن فى انتظار غنيماتك دى
وكان لقيت لى معاك طريقة تكون ما قصرت ( عشان نرعى بى قيدنا)

جلالة والغنم

متابعين معاك -

ويا جلالة الكديسه (الله يرحمها ) وعرفناها -
هسي الغنم ديل خلي بالك منهن سمح -

ما يقومن يجفلن وبعدين تقعد تكوس

الحلقة الثانية

الغنماية الحميرا ... "ستهن" الغنماية الوالده جديد ... الـ جابتلها عنبلوقا سمح بالحيل وبطران ... يرتب النهار كلو ... ومن رتبيهو الكتير دا جات المشكلة ... الغنم سارحات بياكلن من قش الوطا في أمان الله .... والحميرا تاكل شويه وترفع راسها ... تفتش لـ وليدها شويات .. إنتو عارفين قلب الوالد .. المهم العنبلوق في شان سغير وجاهل .. اتعدى الحدود المتفقين عليها أنا والغنم ... خط السكه حديد .. أقصد الـ كان خط السكه حديد ... البهم قطع بغادي للخط القديم وبقى يرفس ويتناتل عشان يرجع لأمه أمو الغنمايه الحميرا حاولت تقطع ليهو وتجيبو معاها .. وفي أثناء ما بتحاول تقطع الـ كانت سكع حديد ضربتها حديده من بواقي السكه حديد الشالوها "نسوها" الجماعة .. وكسرت كراعها ... والله زعلتنا زعل ...مشيت أنا بزعلتي ديك جبت ولدها في الأول ختيتو جنبها .. وجريت جرى جبت عيدان قطن في شان أطبب ليها كراعها المكسوره ... وقلت ليها .. معليش هينه إن بقت علي كسرة الكراع .. نحنا مشروع كامل وعامر بالخير كسروهو ... وفتتوهو ... والشايفاها عينك دي كانت "يا ستهن" سكه حديد تهز وترز ... بجن فوقها القطارات محملات القطن من مناطقنا دي .. مناطق الانتاج ويودنها للمحالج عشان قطنا الابيض زي قلوب أهلنا يتصدر ويجيب العمله الصعبه تكفي السودان كلو وتفيض وتجي الجيران .... لكن الزمن غدار ... هيييه ..... تعرفي يا غنمايتي الحميرا البعزها .. قرينا زمان إنو تتطورات المجتمعات بتكون كالتالي : المجمتع الرعوي بتطور ويبقى مجتمع زراعي .. والزراعي ببقى صناعي ... صناعات خفيفه .. من منتجات الزراعه .. تعليب وتجفيف وغيرها ... بعدها بتجي الصناعات الثقيله ... زي الحديد والصلب مثلا .. وكان اتطورو تب .. بتخش الصناعات الذكيه ..... وكلهن ديل الذكرتهن ليك ... جايات من أرضنا دي أرضنا المعطاءة .. أرضنا الطيبه البتي بدون حساب .. بتدي الطيب وبتدي الكعب .. بتدي الحرامي وبتدي الشريف.

كدي النسألك كان ألقى عندك إجابه .. الفايده شنو من إنك تدمر مشروع مؤهل ومنتج ... في شان تقعد تفتش لمدخلات انتاج تانية؟ هههههه زمان المستعمر كل همو كان إنو جدودنا ينشغلوا بس بالزراعة ... الأسرة كلها تطلع مزارعيه ... عشان أولادهم ما يتعلموا و يعرفوا معنى الاستعمار وضرورة طردوا .... عشان ما يفرقوا بين الاستغلال ... والاستقلال ... لكن جدودنا زمان ... قروا أولادهم .. وجابوا الاستقلال ... وكان في وقتها مشروع الجزيرة أفضل مشروع في أفريقيا والشرق الأوسط لكن الاستقلال دا كان عمرو قصير ... يمكن يكون سنتين بس .. ودخلنا بعدها في الاستغلال حتى يوم الليله ... استغلال من مجموعات قليلة لا تتعدى أصابع اليد الواحده .. فشلوا أيما فشل في إنو يقودوا البلد لى قدام .... وأقرب دليل على كلامي دا ... أنا القدامكم دا ... رجعت ... زي ما جدي زمان جا بغنيماتوا .... ولقالوا جزيره بين بحرين ... مرتع خصيب .. لـ سعيتو.

حالنا الآن يغني عن سؤالنا ... مشردين .. ومتغربين ... زراعتنا بايره .. ومويتنا مافي أو شارده في شقوق الأرض ... زمنا أغبر تب ... وحاله تزيد الهم زي ما قال الشاعر:

إتغيرنا وإتبدلنا وأصبح طبعنا غريب
إجافينا كم قربنا بعيد وبعدنا قريب
نسينا القالة والكاسرة والكجرة والكاجريب
ضاع رأس الخيط علينا وأصبح دربنا صعيب
حتي البحر جفل خلانا وأصبح شاطينا جديب

عليك الله يا الحبيب ما تطول الغيبه من البوست ده

اقتباس:

---

المشاركة الأصلية كتبت بواسطة فراس

وهدي قعدة الهمباتي ماتطول عليك الله

---

فراس .. مرحب بيك حبابك ألف .. ماني مطول لكن براك عارف محاحاة السعيه .. صعبه بالحيل .. وربنا يقدرنا بس

منور البوست والله

اقتباس:

---

المشاركة الأصلية كتبت بواسطة وداد محمد

ياسلام مستمتعين مع القصه ياريت توصل متشوقين نعرف الحصل شنو

---

أهلا وداد ... يا سلام يااخ وجودكم معاي في البوست دا .. بديني إلفه في الخلا والصي دا ... أنا بقول ليكم العندي .. وإنتو وروني الحاصل شنو ؟؟؟ في شان أنا وغنيماتي ديل ما خابرين الحاصل. ;)

اقتباس:

---

المشاركة الأصلية كتبت بواسطة mahagoub

كيف طعم اللبن من الضرع
وصلنا نصف المطلوب من حكاية غنمك
والماء والوجه الما بيشبهك
بس حكومة الجن دى ما تصلك فى خلاك

---

حبيبنا المحبوب . عمنا المحجوب .. أسكت ساي يا الحبيب لبن من أمو .. بدون رتوش ... طاعم وهني .. ومشبع في شان طالع بـ رضا وحنان وحب.

الله يسترنا بس ... الله في .. الله معانا في الخلا والصي دا

اقتباس:

---

المشاركة الأصلية كتبت بواسطة عاشق الترحال

دوماً نحن في المتابعه
ولك تحياتي
ودمت بود

---

الغالي عاشق الترحال ... والله اسمك سمح بالحيل ... عاشق ترحال زي حالنا ده مع السعيه كل يوم في بلد ... لكن مهما البلد بقى بعيد ياهو بلدنا وياهي أرضنا

ولك من الود أطنان ... شاكر لك متابعتك.

اقتباس:

---

المشاركة الأصلية كتبت بواسطة آلاء عبد الرحمن

^_^
متابعين
بث ماتطول

---

ألاء ... شرفتينا ونورتينا والله

وعلي الطلاق الليله كان ما أكلت في ضبيحتنا دي تب ما بتمشي .... شيه بس ... شيه حطب عليك الله ضوقي وأديني رايك ... أجمل وألذ شيه البعملوها في الحطب .... أنا عارفك الغاز خرب طبعك هههههه

الحلقه التالته

غنمي ديل يا اخوانا حاسي بيهن متغيرات ... ليهن يومين ما بياكلن سوا في مكان واحد .. متفرزعات ولا مختلفات مع بعض ما عارف؟

فيهن تيسين كل واحد فيهن عامل أفهم منو مافي .... وكل واحد فيهن داير يفرض رايو على الغنم كلهن ... وطبعن كل واحد فيهن داير يستأثر بأكبر عدد من المعجبات الغنمايات وكده هههههه.

سألت صاحبتي الحميرا ... الحاصل شنو؟ ما تستغربوا إني بتكلم مع الغنمايه ... لأنو لامن تكون مع روح بتتنفس وبتاكل وتشرب وبتعبد ربها زي ما بنعبدو نحنا ... بكون بيناتكم تفاهم وحوار حتى لو ما كان بلغة .. المهم سألتها منو ريسكم في التيسين ديل ؟

قالت لي : قالت لي والله غلبنا النسويهو زاتو .... كل واحد فيهم ما داير يسمع التاني ... وداير يصادر رأيو ... وشايف إنو رايو بس هو الصاح ... وبعمل بكل السبل لإلغاء الآخر ده.

قلت ليها : استخدموا ديمقراطية التصويت المباشر أو غير المباشر عشان تختاروا منهم الاتنين رئيس واحد بس بدل مكومين لي الغنم كيمان كيمان ... ما بتعرفوا الديمقراطية أنتو؟

قالت لي: ياما قعدوا ... واتفقوا .... لكن من يبقى الموضوع على التنفيذ ... كل واحد فيهم بيلحس الكلام الوقع عليهو ... وترجع حليمه لى قديمه ... بعدين كلام الديمقراطيه دا ما بمشي معاهم كل واحد فيهم عندو عيون وجواسيس في مجموعة التاني ... يعني كان واحد فيهم اتأكد إنو واحده من الغنم ما دايراهو .. بيحاربها في القش البتاكلو دا ... بيحاربها في وليداتها ... وكانت عملتها ظاهرة ... ما بخاف ربو ومستعد ينطحها بـ قرونو الكبار ديل يشرط بطنها عديل ... أنت لقيت كم غنامية بطنها مشروطه؟

قلت ليها : لحد أسي أربعه ... أها والحل شنو؟

قالت لي الحل ... إنو الغنم دي كولها تتحد وتقول لا ... وتعارض طريقة التيسين الماشين بيها دي كل واحد فيهم عامل فيها أشرف من التاني واحسن منو .... وبراهو هو ح تخرب ... كل الغنم ديل واحد خلقهم رب اسمو الكريم ما فيهو فرق بين غنمايه والتانيه بيضا كانت ولا سودا .. لو ما حصل دا ...يا خوفي من مراحك دا يتقسم لـ أربعه أو خمسه مجموعات ... ربنا يكضب الشينه بس.

سرحت براي وقلت في نفسي ... حتى إنتو يا الغنم الطيبات ؟؟؟!! والله زمن يحير .. القصة عدوى هي حب السلطه والرئاسة والمحسوبيه وإلغاء الآخر ولا شنو؟؟؟

مرفعينين ضبلان وهازل

شقو بطن الأسد المنازل

نبقى حزمة كفانا المهازل

نبقى درقة وطني العزيز

كيف ما أرعى الوطن الرعاني

أسعاه وأشيلو وأعاني

الشباب والشيب شجعاني

قالو نفدي الوطن العزيز

من حلوق الريف لي خدوده

البلاد معروفات حدودة

سودنا درقه النبقالو خوده

يلاقي ضرر الوطن العزيز

بضيع أعشق صيدو ورمالو

ماببيعو وأقول مالي مالو

مابكون عارف البي حبالو

ساقية تسقي في وطني العزيز

ما بهاب الموت المكشر

ما بخش مدرسة المبشر

عندي معهد وطني العزيز

عندي وطني بقضالو حاجة

كيف أسيبو وأروح لي خواجة

يغني وطنو ويجيبلي حاجة

في هواك ياوطني العزيز

نحنا للقومية النبيلة

مابندور عصبية القبيلة

تربي فينا ضغائن وبيلة

تزيد مصايب الوطن العزيز

مالي مال تاريخ القبيلة

نحنا حبة وحيدة وأصيلة

علومنا جديدا وقبيلا

أمة واحدة بوطني العزيز

اقتباس:

---

المشاركة الأصلية كتبت بواسطة naz_imam

حبيب القسا ... كيفنك مطول الغيبة

والله ياجلالة عارف انا بحبك لاني بشوف روحي فيك وحالتي زي حالتك بالضبط ونحنا اولاد دفعة واحدة وانا برضو قريت علوم سياسية وحضرت ماجستير والله والله هدفي زي هدفك وبرضوا وبرضوا رحت للبعيد واخترت لي صي وسط سخيلاتي واقوم اسرح من الفجرية وارجع بعد المغرب مهدود الحيل بس الضمير مرتاح وحالتك زي حالي العلي

---

يا سلام يا حبيب القسا ... وقت قلت أقوم أسرح من الفجريه وارجع بعد المغرب مهدود الحيل .. بس الضمير مرتاح

الله يرحيك في الدنيا والآخره

الدنيا أم قدود .. دار الغش ام بنايا قش .. غاشه ناس كتار ... النوم دا طاير من عيونهم ... في شان ساكنها ... ومشغولين بيها شديد ... ناس ناسين إنها ما دايما ليهم ... لأنها زماااااان ما دامت لفرعون وأسى في الزمن العلينا دا .. ما دامت للقذافي

أرقد قفا يا حبيب ... حقنا ما بضيع تب كان لحقناهو نحنا وليداتنا بلحقوهو

القلوب عند بعضيها ع قولة أخوانا أولاد النيل هههههه :)

تعرف يا جلاله لو جابوا زول من الاساس وسألوه البلد دي مشكلتها تتحل كيف حيقول ليهم مشروع الجزيرة ..!!!

جلاله تعال صاااد يابا

مانــــــــــي الفاسد ال بي الكِضبْ بِتنبّــــى

سارح بى العــــُروض لي جارتي ما بدبّى

ياستــــــــــار من نضم الخشوم والسِبـــــــــــّة

انا اخــــــــو الزينة عند حل الرفيق والضّبـــّة


البلد اللبَـــــــوك عُمدو وجفوك نظـــــــــــــــارو

ليــــــه المتلنا يقدل ويحــــــــــــوم في ديـــــارو

النلوى حكارى في العند مشيهو حاكى عصارو

منو البانينا غير المولى واسعــــــة ديـــــــارو ؟

زي ما قالوا فوق أهلي الهمباته .. دحين آآآ الجنيات الجزيره دي بقت ما بلد سعيه تب ..... واطاتها كلها أصبحت شقوق .. النهار كلو أنا أعتل في الغنم الباركات في شقوق الأرض ؟؟؟!! الله يجازي الـ كان السبب .. الجزيرة أم بحرا حمى .. بلد الخير بقت عادمه الخداااااار .. والله ياهو آخر الزمن زاتو ... الجزيره الـ كان بجوها الناس بسعيتهم ... وبـ وليداتهم بقت ما فيها الحبه ؟؟؟!! هيييييه ... أها أنا بدور أختر بى بهايمي ديل ... النمش ع الصعيد لأنو الجوع كافر .. وربنا سبحانه وتعالى يوم القيامه بحاسبني علي جوعهن .. أتوكلت عليك يا الله ... ويا صعيد بلدنا أنا في دربي عليك .. وفي شان آخد معلومات كافيه عن البلد الماشي ليهو دا .. كدي النخش النت نشوف صعيدنا فيهو شنو؟؟؟

ولاية النيل الأزرق احدي الولايات التي ظهرت بعد قيام ثورة الإنقاذ الوطني في العام 1989م وتبني قادة الثورة مفهوم الحكم المحلي وتقصير الظل الإداري بعد أن كانت البلاد بها تسعة أقاليم كان نصيب النيل الأزرق أن يكون جزء من الولاية الوسطي سابقا والتي كانت عاصمتها ود مدني ،في يوم 14 فبراير 1994م أصدر السيد رئيس الجمهورية المرسوم الدستوري العاشر والذي بموجبة ظهرت منطقة النيل الأزرق كولاية ضمن ولايات السودان ال26 وكان ذلك المرسوم تعديل للمرسوم الدستوري الرابع والخاص بتأسيس الحكم المحلي لسنة1991م .تمتد ولاية النيل الزرق في مساحة قدرها38500 كليومتر أي حوالي 808 مليون فدان، وتقع بين خطي عرض 9,30 و12.34شمالا وخط طول33.5 و35.5 شرقا.
تقع ولاية النيل الأزرق في وسط جنوب شرق السودان وبهذا تمتد حدودها الشرقية مع ولاية القضارف وحدودها الشمالية مع ولاية سنار وجنوبها وغربها تقع ولاية أعالي النيل أما الحدود الدولية مع إثيوبيا تمتد شرقا وجنوبا بطول 388 كيلومتر ، وبهذا تكون الولاية شمالية الهوي بالتاريخ او ما وثقتة اتفاقية السلام الشامل cpa.
جغرافيا تأخذ الولاية شكل مثلث يضيق في الجهة الجنوبية من محلية الكرمك ويتسع في شمال الولاية في حدودها مع ولاية سنار في محلية الروصيرص.تاريخيا عرفت بإقليم جنوب الفونج وتضم ألان محليات الدمازين والروصيرص وكرمك وقيسان والتضامن و باو وهي تمثل مدن كبري في الولاية.
اعتبرت المنطقة هي منطقة تداخل وتلاقح سكاني وتضم قبائل افريقية أصيلة في المنطقة ومجموعات عربية مهاجرة تلاقحت مع السكان المحليين وهجرات من غرب السودان ومجموعات وافدة من غرب أفريقيا. المنطقة تاريخيا عرفت بأنها المكون المهم في السلطنة الزرقاء وكانت احدي مناطق الإشعاع الديني في السودان. وفيها عرف اقوي أنظمة الإدارة الأهلية القائم علي تدرج المستويات لينتهي بناظر عموم قبائل النيل الأزرق في القمة

ياجلالة صباح الخير
دحين ياهمباتي لو صعدت
الغنم دي مابتناكر اصلو
الجزيرة دي عفا والصعيد
وخيم والبعشوم راقد
وكان لما في كر البهم
ببشتنو دحين خليك في
جزيرتنا دي بي شقوقا
لانو اهلنا قالو الشقوق
ولاالمخلوق.
عثمان آآخوي واصل
تسلم

:):):)

لك التحية أخي عثمان جلالة.:)

و
ما زلنا في إنتظار العودة.

:):):)

ودجلالة جمعة طيبة
نحن في الانتظار
لا الغنم اتنفسن الصعدا
ولانحن غايتو لي
بكره جيت جيت ماجيت
بجيب ناس القطعان‎:-d‎
تسلم

الاحباء الكرام اعتذر بشده لهذا الانقطاع لظروف خارجه عن ارادتي

أتمنى أن تزول بسرعه لنعود .. ونواصل هذه الرحلة في خواطرنا الطيبة

كل الود،،،

هسي انا قلتة الخريف في الصعيد كعب وخشيت لي جوه ..

حمدلله علي السلامه ..

تقبل تحياتي .

اقتباس:

---

المشاركة الأصلية كتبت بواسطة عثمان جلالة

الاحباء الكرام اعتذر بشده لهذا الانقطاع لظروف خارجه عن ارادتي

أتمنى أن تزول بسرعه لنعود .. ونواصل هذه الرحلة في خواطرنا الطيبة

كل الود،،،

---

:):):)

ربنا يعينك ويهوِّن كل أمورك.

:):):)

كدى اول شئ وبالتبادى كدا غير لينا صورتك الخايف عليها

مالى بيها الحيطة كلها كلام نسمعو وكلام ما نسمعو

زى صورة العمدة ياخ

سغرها شويه عشان نقدر نقدر نشوفك ات كاتب شنو

وانت قايل روحك براك الراعى وسارح ومراح فينا كدا ؟

زمان اخوك برضو اخد ليهو شويه سرحة كدا

زمن السرحة كانت بالشوبه يا حليلها

وزمن بتشيل عصيدة عيشك فى كورة ووتدرعها فى مخلايتك

وتلقى ليك راعى ود حلال تحلب غنمو

اخوك كان راعى موديرن كمان

اى صح الزمن داك لا فى موبايلات ولا فى فيسبوك لكن الرادى معاى ومعاى علبة سجاير برنجى تقول وا غربتى

وكان بقر ما غنم الغنيمات ساهلات يعنى مهما كان عامل فيها شفت فى النهاية (رقة ) واحدة فى راسو بتجيب خبره

وأحسن حاجة ليك يا صاحبى لما الغنم يلدن

تجى شايل عتودك فوق ضهرك

وما تسألنى من السلى انت حر محل توديهو ياخ :p

ياخ والله ذكرتنى رواية (مزرعة الحيوانات ) للكاتب البريطانى جورج أورويل ,,

ونضميك سمح

يخلينا نجيب غنمنا ونجيك

ونخليهن يدغن هنا

وعندى ليك نكتة برسلها ليك فى الخاص :D:D:D:D:D

فوق ياود جلالة
شنو حكايتك