الفوضى الخلاااااقه

اضاءه

لازالت صوره تلك الصبيه الصغيره تخنق المشهد .. وتكتب على الدموع الجريان .. المشهد تقريبا كان فى استاد عطبره

المعرف بحديده وناره المشاكسه .. المناسبه مباره للمريخ والاهلى .. وبعدها بدت الفوضى .. تعليمات اطلاق الغاز المسيل للدموع

بتلك الصوره الغريبه (فوضى ) .. من اين جاءت التعليمات (برضو فوضى ) ... انها الفوضى عندنا

والمشهد دوما يتكرر .. البنيه الصعنبوتيه دى لابسه عبايه سوداء .. تاكيدا على سواد الصوره .. وترمى بصينيه ترمسها وتهرول

بحثا عن مخرج .. وتسقط قرب دائره السنتر .. فى مشهد يدمى القلب ..





صوت فلوت من بعيد ..


على خلفيه ايقاع لاغنيه .. بعد مافات الاوااااان ... احساس بالفخر لذااك الجندى الذى حمل الصبيه بحثا عن مخرج







*****

دى اضاءه ساااااى


نشوف موضوعنا

اقتباس:

---

المشاركة الأصلية كتبت بواسطة عبدالرحمن مدثر

نشوف موضوعنا

---

تجبرني على المتابعة

يستند الأساس الأيديولوجي النظري لسيرورات الفوضى الخلاقة تاريخيا إلى الثورة الفرنسية باعتبارها مرجعا قابلا للدرس والمقارنة بشعاراتها المعروفة الحرية والعدالة والمساواة، وعلى الرغم من نبل المنطلقات النظرية للثورة الفرنسية وإيجابياتها إلا أنها ولدت آثارا جانبية ضارة تمثلت بسيطرة الرعاع من العامة التي حولت الأوضاع إلى فوضى عارمة تفتقر إلى التنظيم في ظل غياب مرجعيات فكرية وسياسية ساهمت في تآكل الثورة وكان من نتائجها عودة الملكية إلى فرنسا ونمو النزعة الشوفينية الفرنسية التي أرادت تصدير الفوضى الثورية إلى دول أوروبا دون الالتفات إلى الخصوصيات المكونة لهذه الدول.









نظرية الفوضى الخلاقة واستراتيجيات الهيمنة في العالم العربي

للكاتب حسن ابوهنيه

بالامس .. بالقرب من جامعه الخرطوم .. كليه العلوم الاداريه .. كانت هناااك عربه فااارهه لدرجه انها تلمع فى الظلام ..

وتمنعنا من الاستمتاع بالشاى والزلابيه .. بالرغم من فوضى داخليه .. تؤكد على ان الزلابيه ذاتها اتغيرت .. بقت سوغار ..

ياحليل زمن الزلابيه بتملا الخشم ....

طبعا الاريل بتاع الكيور .. والشمار .. بطلع .. بدون مايشاورك فى مشهد زى دا

- الحديده الشديده بتاعت منو ياعمك

- وجاءنا الجواب من نجوى بتاعت المكتبه المتاخمه لمركز دراسات السلام التى تقف بقربه العربه

- دا احمد هارون ياشباب

- احمد هارون بتاع المحكمه الجنائيه ... ايامو باااسطه لكن

- والعربه فاااضيه .. وحولها اربعه او خمسه من البودى قاردااات

اتخيلو المنظر معااااااى

..

واليوم مع اشراقات صباح جديد .. وجدت تصريحات لهارون تدعم جزئيه ان الفوضى .. لها تاثيرات سلبيه كما ذكرها ودهنيه


تصريحات احمد هارون






أنا «سِنْيَر» لوزير الدفاع في الجنائية وقرار أوكامبو «بندق في بحر»

نواصل مع هنيه ... من خلال تسلسل تاريخى لنظريه الفوضى كجانب سلبى .. عندما يدعمها جانب ايجابى من خلال (خلاااااقه )




( حاولت الولايات المتحدة الأميركية استثمار حالة الفوضى تاريخيا في عدة أماكن من العالم كما فعلت في إيران

أيام حكم مصدق وقد نجحت حينها بإعادة الشاه إلى سدة الحكم

الأمر التي فشلت فيه عقب اندلاع الثورة الإسلامية عام 1979. )

وانتهجت استراتيجية فوضى الاحتواء المزدوج في التعامل مع الثورة أثمر عن قيام الحرب العراقية الإيرانية، وعقب انهيار جدار برلين وسقوط الشيوعية وتفكك الاتحاد السوفييتي اعتمدت إستراتيجية الفوضى البناءة في التعامل مع الجمهوريات المستقلة، وتعتبر رومانيا نموذجا مثاليا لتفجير الفوضى في بلدان أخرى، وبالرجوع إلى المظاهرات التي عمت جورجيا وأوكرانيا كان العنصر الحاسم في نجاح المظاهرات هو التهديد بالقوة من قبل الولايات المتحدة وذلك بعد تحول السياسة الخارجية الأميركية من الاحتواء المزدوج أيام الحرب الباردة إلى إستراتيجية أمركة العالم بالقوة والعمل على تغيير الأنظمة والجغرافيا عن طريق الفوضى الخلاقة، ولا مانع من اعتماد الاحتلال المباشر إذا لزم الأمر في ظل غياب استيراجيات الردع، وقد أفرزت المتغيرات البنيوية للواقع الدولي نمو وازدهار العولمة الأميركية بحيث أصبح القيام بواجبات الأمركة من صميم مهمات رؤساء الولايات المتحدة، ويعد الرئيس جورج بوش الابن الذي يعاني من وهم كونه المسيح المخلص الأكثر تطرفا في فرض سياسات الأمركة من خلال إطلاقه الفوضى الخلاقة في مختلف أنحاء العالم، وقد تأثر بوش بعدد من الكتابات التي تؤسس للفكر السياسي المنظم للفوضى الخلاقة واعترف بأن كتاب "قضية الديمقراطية يمثل الخريطة الجينية لرئاسته وهو من تأليف المنشق السوفييتي المهاجر إلى إسرائيل والذي شغل منصبا وزاريا في حكومة شارون ناتان شارانسكي، وتتلخص رؤية شارانسكي باعتبار الإسلام حركة إرهابية لا تهدد إسرائيل فقط وإنما العالم الغربي بأكمله، ويرى أن استئصال الإرهاب لا يتم باستخدام القوة وتجفيف المنابع فقط وإنما بمعالجة الأسباب العميقة للإرهاب التي تنبع من سياسات الأنظمة العربية الاستبدادية والفاسدة وثقافة الكراهية التي تنشرها، ويتفق شارانسكي بهذا الطرح مع الأطروحة الشهيرة لهانتنغتون التي تنص على أن الإسلام عدو حضاري للغرب.

نواصل مع هنيه

وتمثل الأطروحة الرئيسية لنظرية الفوضى الخلاقة على اعتبار الاستقرار في العالم العربي عائقا أساسيا أمام تقدم مصالح الولايات المتحدة في المنطقة، ولذلك لا بد من اعتماد سلسلة من التدابير والإجراءات تضمن تحقيق رؤيتها التي تطمح إلى السيطرة والهيمنة على العالم العربي الذي يمتاز بحسب النظرية بأنه عالم عقائدي وغني بالنفط الأمر الذي يشكل تهديدا مباشرا لمصالح الولايات المتحدة، وينادي أقطاب نظرية الفوضى الخلاقة باستخدام القوة العسكرية لتغيير الأنظمة كما حدث في أفغانستان والعراق، وتبني سياسة التهديد بالقوة التي تساهم في تفجير الأمن الداخلي للعالم العربي وتشجيع وتأجيج المشاعر الطائفية وتوظيفها في خلق الفوضى كما هو الحال في التعامل مع الوضع اللبناني والسوري والعراقي.

من خلال مقال للشيخ الدكتور خالد بن سليمان الدليل

(الفوضى الخلااااقه .. والانضبااط الخلاق ) نقرأ




نشأت فكرة الفوضى الخلاقة عام 2003م انطلاقاً من معهد أمريكا أنتر برايز ، بحيث يرتكز المشروع على منظومة من الإصلاحات السياسية والاقتصادية والاجتماعية الشاملة لكل دول منطقة الشرق الأوسط ، يقوم على أساس الهدم السريع ثم البناء الموجه ، وبعد أحداث الحادي عشر من سبتمبر ، اقتنع الساسة الأمريكيون بهذه النظرية ، وقد صرح البروفيسور توماس بارنيت وهو أحد المحاضرين في وزارة الدفاع الأمريكية بأن العلاقات الدبلوماسية مع دول الشرق الأوسط لم تعد مجدية، وذهبت كونداليزاريس إلى أبعد من ذلك عندما قالت : إن أمريكا سعت إلى تحقيق الاستقرار في الشرق الوسط على حساب الديمقراطية ولم تحقق أياً منهما ، والآن أمريكا تتبنى نهجاً مختلفاً ، إن هناك من يقول إن الديمقراطية تقود إلى الفوضى ، والصراع ، والإرهاب ، والحقيقة أن العكس هو الصحيح ، بمعنى أن الفوضى تمثل الأساس المنهجي لخلق الديمقراطية الأمريكية المنشودة ، وقالت بولين نيفيل جونز وزيرة الأمن البريطاني عن الثورات العربية : إنها تمثل فرصة كبيرة لجهود الغرب في مكافحة الإرهاب ، وصرح نتنياهو رئيس العدو الصهيوني أنه يتمنى ازدهار الحرية والديمقراطية في العالم العربي ، وأضاف لا نريد أن نرى ديكتاتوريات تدوس حقوق الإنسان ، وتكبح الإصلاحات الديمقراطية ، وتشكل تهديداً للسلام
ويقول أوباما : الذي يحصل في الشرق الأوسط يمثل تحدياً وفرصة .
إذاً يتبين لنا أن الفوضى الخلاقة نشأت بعد أحداث الحادي عشر من سبتمبر على أيدي الباحثين والساسة الأمريكيين ، لإيجاد حكومات شابة تحقق لهم ما يريدون حسب زعمهم .

كدى خلونا نتونس مع فوضانا الخلااااقه عندما تكون اجتماعيه ... فى محطه الغالى جنبنا هنا عندنا اسطى (حسنين )

ميكانيكى من الدرجه الفوضيه الجميله .. زول مرتب فى فوضاه .. ويدو تتلف فى حرير .. مرات كتيره بمشى اشرب قهوه

جنب ورشتو .. واستمتع بفوضاه اللذيذه .. اجمل حاجه انو رغم تقدم عمرو الا انه فوضوى كبير .. لايترك الامور لصبيته الصغار

تجده يستمتع بمغازله العربه المنشوده وحده ....

اجمل منظر لما يدخل تحت العربيه عشان يشوف الحاصل شنو .. اول حاجه بعملها .. بفرش ليك عدتو على طريقه فوضى مرتبه

لكن بعيون الزبون ..او الزائر .. او المراقب للمنظر ساتى (زى حالتى انا ) بقول فى سرو دا شنو الزول المبشتن دا

لكن عندما يشرع فى العمل ... تستمتع بطريقته ... وهو يمد يده فى عفويه (برضو مرتبه ) لياخذ المفك من هنا

..والمفتاح من هنا ... الخ

الفوضى بتاعتو جميله ياااخ







خربشه


مازى فوضى دكتور الاسنان .. عندما يفتح خشمك بكماااشه .. ويدخل ليك حلقوم كبير

ويقول لهنايه الجنبو بلغه انجليزيه (بكجنها ) فى لحظه زى دى .. كدى جيبى الهناى داااك ..

لا مادا .. داااااااااااااك ياخ ... (ترجمه غير رسميه دى ) هاها

ملكتنا .. المرتبه الاحساس .. وانيقه الحضور تحياتى

عارفانى من انصار البوستات البدون (بوصله )


- نفسى اعرف لما يدق جنون الكتااابه باب بيتكم .. ويشرف الدواخل ..

بتكونى مستعده لهذا الحضور المتاخر (فى اغلب الاحيان )

- ولا بتلقى نفسك .. ومع نفسك المتقطع من اثر المضااايره .. باعتبار انو الدواخل ماكنت جاهزه ومفروشه

تعرف يا خرباش


جيت قبيل وفي قمة الشوق لي كتاباتك


وخشيت شمال في فوضي عارمة بي مشاركة

وحتي لا تكون الفوضي غير خلاقة آثرت التأني حتي موعد آخر مع فوضاك الجميلة

وفي قمة الفوضي كنت بساسق مابيك وبنات داخلية الملكة في تشتت ممتع جدا

زمااااااان كان عندنا فوضى هدااامه .. لكن برضو جميله ... نجتمع سويا شفع كل الفريق .. ونعمل لينا تيم كوره

ونفرض على كل واحد مننا مبلغ معين مساهمه عشان نشترى الكوره .. وبعد معاناءه لذيذه اقتصاديه .. نتحصل على المبلغ

المطلوب ونشترى الكوره ...

ونبدا التمارين .. اول يوم يعدى تمام التمام .. الكوره جديده .. والميدان مخطط من دقيق طاحونه ناس ودالنمير

وتانى يوم يمر جميلا ..

اها نجى فى اليوم التالت بعد ترتفع اللياقه حبتين .. وتسخن التقسيمه

يقوم هناى يكعبر لييييك هناااى جنب القوووون

وتبدا الفوضى ...

- ضربه جزاء

ماضربه جزاااء ولا حاااااااجه

...............

.................


وعينيك ماتشوف الا التراااااااب والكتاااحه

وتتجلى حكمه الفوضى فى مثل هذه المواقف

يان يعود كل منا الى بيته (بدويريه ) من الكوره

الكوره اتقلبت بتيخه ياحلوين .. وجابو السكين وقسمها

واللذيذه (دويريتك ) ياتكون بيضاء ياسودااااااااء

رماديه دى مااافى نوهائى

هاها

وبي مناسبة الفوضي الحلوة دي






عازمننا عندك ياخ

علونى تعاااال ياخ

انا اول حاجه لقيتك ... شويه كدا قلت ارجع ليك لقيتك (مك فى ) هاها

انت دااافع ... ولا مادااافع .. عشان تلحق دويريتك هاها

سعيد انا بوجودك صديقى

اقتباس:

---

المشاركة الأصلية كتبت بواسطة عبدالرحمن مدثر

ملكتنا .. المرتبه الاحساس .. وانيقه الحضور تحياتى

عارفانى من انصار البوستات البدون (بوصله )


- نفسى اعرف لما يدق جنون الكتااابه باب بيتكم .. ويشرف الدواخل ..

بتكونى مستعده لهذا الحضور المتاخر (فى اغلب الاحيان )

- ولا بتلقى نفسك .. ومع نفسك المتقطع من اثر المضااايره .. باعتبار انو الدواخل ماكنت جاهزه ومفروشه

---

الانا مستغربة ليهو انو ( موسم جنون حرفي ) يصادف موسم جنون حرفك
غالبا مابكون مستعدة وبتلقاني ( بنبهل ) بلا توقف
واي قارئ مرتب الدواخل ممكن يلاحظ فوضى حروفي

هاها

طيب النحكى دى ... عندنا فى الهدى .. فى حى كامل لسه بعتقد اعتقاد جاازم انو الامام الهادى المهدى لسسه حى ..

طبعا الهدى منطقه انصار مقفوله .. لكن الحى دا .. اخطر حى .. الداخل اليه مفقود .. والخارج منه مولود ..اللذيذ

فى الامر انهم لديهم فوضى وجنون مربوط بموسم الشتاء تحديدا .. يخرجون فى الشوارع والطرقات ويزرعونها فوضى وجنون

طبعا الناس اساسا ماقاعد تعتب على حيهم

لكن انو يصل الامر انو هم يتجولوا فى الطرقات فدى المشكله الاكبرى

عندهم واحد اسمو (ودحسن ) دا عندو خرطوش اسود تخييين .. اها فى موسم الفوضى بتاعهم

بطلع للشوارع (وهو معضى اصبعو )

وبسال الصغار .. والصبيان .. سؤال معين ..

- انت حااافظ الوسيله

والوسيله للمعرفه .. هى شكل دعاء كدا .. يبدا من بالدعاء لله سبحانه وتعالى .. ورسوله الكريم صلى الله عليه وسلم ...

ولحدى مايصل فى النهايه للمهدى .. ويتختم بالهادى المهدى .. المهم هى طويله ومقرره عليهم هم لكن مانحن

- والليله يومك لو لما فيك ودحسن

- حاااااافظ الوسيله .............!!!!!!

طبعا عندو ضخاامه جسم .. انسوا بس .. وعندو يد لما تمسكك بتفرتقكك

اها يحلك منو الحله بله ...

انا ماحصل اتواجهنا انا وهو زماااااااااااان .. بس سمعت بيهو سمع

والحكوا لى .... تقريبا لحدى هسه اثااار الصوط على ظهورهم




خربشه

فى فوضى .. بتكون عجيبه .. لما ترتبط بمعتقد معين .. من خلالو .. بضيع الطريق .. وتسود الضبابيه الدواخل والمكااانه

وتحصل بلبله رهيييييييييبه


الله المستعااااان بس

عبد الرحمن مدثر
الله أكبر ولله الحمد

ام سماح تحياتى ..

مرااات كلمه ممكن تصنع فوضى ... لكن القدره على الترتيب صعبه طالما كان المنظور من زاويه واحده حااده

فايجابيه الاختلاف محمده .. عندما اجد ماينقصنى من فكره .. موزعه على من يشاركونا الراى .. والراى الاخر

تابعت بوستك .. واعلم جيدا سماحه مقصدك ..لكن ماكمن فى النفوس من مظلمه تراكمت على مر السنين والايام

كان الدااافع فى الانفجار ...

تاكدى ان فوضانا لها علاقه بالفضاء الذى ندور فيه .. وبالمجتمع الذى يضمنا .. بعيدا عن الشخوص طبعا

فان نشخص الالم سويا بحكمه جميل جدا

وان نتعالى على الجراااح اجمل

وان نتقاسم صناعه كيكه الفكره اروع

تحياتى لك

عبدالرحمن مدثر يا راقي ..

نلتهم مشاركاتك فهي تضيف لنا في كل كلمة ... هكذا هي إستنارة العقول عندما تقدم أقلام مستنيرة لمسات فكرية ناضجة ..

الفوضى مفتاح للضوابط فلولا الفوضى لما كانت التشريعات .. أسفي أننا نملك تشريعات والفوضى عارمة ...

الخرباش يا رائع
ما اجمل فوضاك لما ترنب فينا مواعين الفكروالهمه
تعرف يا خرباش دايما ما يصاحب اعراسنا نظام دقيق وترتيب خلاق
كل طاوله موضوعه في مكانها وحولها تتراص الكراسي في نظام بديع
وما ان يقف الفنان على المسرح حتى تعم الفوضي المكان
الكل يتداخل في الكل
ويتعالى الغبار حتى انك لا تستطيع تحديد اين تقف
وفي غمرة هذه الفوضي ينتزع المايك ( واحد يعشق حب الظهور ) وفي لحظة انتشاء بفعل مؤثرات خارجيه وهو يردد
لا زال الليل طفلا يحبو ... امعانا في ترتيب هذه الفوضى
لتجد مزيدا من التحفيز وسط الساحه حتى لحظة انتقال المغني من اغنية الى اخرى
الفوضى المجتمعيه يا ابو مزن قد تكون خلاقه احيانا كثيره اذا ما تم توجيهها كصاحبنا الذي ( يخطف ) المايك وسط( الخلائق ) وهو يصيح ( لا زال الليل طفلا يحبووووووو

الخرباش تحيات طيبات زاكيات
ليس مجاملة بقدر ما تتطلب ظروفي كباية شاي ومهلة في إستداك هذه الفوضى الخلاقة
اولا لعلمي المسبق بأن الخربشة والفوضى تعادل إنضباطا بناءا بريشة أديب حاذق
أطلق على نفسه خرباشا صدق وصدق بعضنا انه كذلك ...الفوضى الخلاقة في السياسة الامريكية اضف اليها يمكن ان تكون مناسبة في طريقة لعب المنتخب السوداني
ولطالما لم اطلع على البوست فاحتفظ بحق عودتي عما قريب حالما يتهيأ الظرف المناسب لفهم الخرباش

مستشارنا الانيق .. عصام حسين

سعيد بوجودك بيننا .. تاكيدا على ان الفوضى هى مفتاح للضوابط من خلال تعريف مبسط (للفوضى الخلاقه )

من انها .. (حالة سياسية أو إنسانية يتوقع أن تكون مريحة بعد مرحلة فوضى متعمدة الأحداث)

كنت فى القاهره ذات فوضى ما .. احزنتنى كثيرا .. وتابعت بعض تفاصيلها المؤلمه .. وسائق التاكسى

يصرخ : داحنا اتسرقنا ياجدعااااااااان ...!!

وبلد الباله المافيهاش رقاله .. تتصدر مانشيت الالم والدموع ..

وهنا فى وسط البلد .. جمهور الزمالك والاسماعيلى كان فى فوضى اخرى اكثر حزنا ..

يطالبون فقط بحقهم فى ا ن تستمر المباره ..!!

انهم حتى الان ياصديقى يبحثون عن مايسمى ضمنا (باللهو الخفى )

من اجل التحكم فى المرحله القادمه .. والوصول الى المنطقه المريحه

ودالجزولى ياحبوب .. رجعتنى لفوضى جميله .. انت عارف فى مناسبات الاعراس فى فوضى

بتتنوع .. من خلا تنوع المكان طبعا .. خلينى اشيل الترابيز والطاولات هاها .. واحكى ليك

عن فوضى السيره .. ومايصاحبها من مواقف دراميه وكوميديه ...

- الفوضى تبدا من (جعيييير) الشفع واصرارهم وذويهم على الركوب فى بص السيره .. وتبدا الدراما

- ياود مابتركب

- يابت انتى مااااشه وين ....

وكلما كثر الجعييييييير .. يحن القلب ..

ويتدخل الاهل ..

- لا والله الا تركب بتى معاااااااااى

- على الطلااااااااااق مابتركب

وياتى طلاااق اخر سريع

- يازول على الطلاق تركب

وفوضى الطلاقااااااات دى صعبه خلاس .. بتخرب بيوت

اها يجتمع حكماء القوم والسيره .. ويصلو لصياغه فكره معينه تجنب الناس كنااار الطلاق الغريق


خربشه

ماعارف لكن فى حركه لذيذه عند الناس البعملوها .. وهى بعد رجوع السيره من حله معينه من الحلال

بكون فى ناس قاعدين بالمرصاد للسيره فى طريق الرجعه ... ويكونو شايلين (بيض ) .. (بعر بقرات )

وتبدا فوضى الوداااع

هاها


خربشه تاااااانى

احتراما لمقص الرقيب .. كنت داير اندفق ليك فى ذكريات وتداعيات (الفرطيقى ) الزول دا ابقرجه بعرفوا هاها

دا اكبر مصدر فوضى فى (الهدى ) .. عندو تنظيم عديل كدا .. وجيش جرار .. من الفوضويه .. واساليبهم

وتعبيرهم عن الفوضى .. متنوع .. على حسب المناسبه .. شكل الحفله ... والحى البتكون فيه

حبيبنا ابويوسف .. صاحب العمامه الاكثر اناقه من ترباس .. وداعم خط توجهى الجديد .. من خلال فكره

لم تجد القبول هنا .. من خلال فكره اكثر انتعاشا تعزز من عبق الزهور والمناسبات .. بدلا من علبه الحلاوه والشيكولاته

التى قد لاتجد لها اسنان .. وبدل من كيس البرتكاااااااااان ... اها انا وقتها اتنازلت من الفكره .. وقعدت فى ركن قصى

متهما بالسندكاليه .. وباستيراد الغريب من الثقافات ... هاها



كدى نقرا سويا الكلام دا ونجى رااجعين

من جريده الوسط تحت عنوان :

خبير إستراتيجي: خطة أمريكية إسرائيلية تستهدف تطبيق " الفوضى الخلاقة " في السودان


أكد خبير إستراتيجي سوداني أن هناك مخططات غربية تستهدف زعزعة استقرار السودان بعد انفصال الجنوب لتفكيكه إلى دويلات ، وحذر من مساعي الجهات التي تهدف لتطبيق سيناريو "الفوضى الخلاقة" بالسودان ، معتبرا أن المدخل إلى ذلك هو الحديث عن فقدان دولة الشمال لعائدات النفط بعد انفصال الجنوب وارتفاع أسعار السلع الاستهلاكية .

ويشمل المخطط - حسب خوجلي - جبال النوبة والبجا في شرق السودان ، مشيرا في ذلك إلى ما قالته المتحدثة باسم المجمع الكنسي في تظاهرة أمام البيت الأبيض تم فيها رفع علم الولايات المتحدة وعلم دول الجنوب جنبا إلى جنب وذلك قبل الاستفتاء على مصير الجنوب ، حيث قالت المتحدثة باسم المجمع خلال مقطع مصور تم عرضه خلال الندوة

(يجب ألا نستسلم للإسلاميين العنصريين الذين يحكمون الخرطوم والعمل على فصل الأطراف وعدم ترك إلا 10 \% لهم من المناطق حول الخرطوم) في إشارة إلى أن أغلب المناطق والهوامش كما تسمى في وسائل الإعلام يجب تمكينها من الانفصال عن المركز بالخرطوم .

وتطرق خوجلي إلى عودة الأمريكيين للحديث عن وجود رق بالسودان تمهيداً لخدمة مخططهم وهو ما تصدى له لويس فرقان زعيم المسلمين بالولايات المتحدة.

والله ياابومزن
انا ماقريت البوست
لكن عبجني اسمه
(الفوضى الخلاااااقة)
ياخ دي فوضي مبالغة

-----
برجع تاني للبوست باذن الله

-------
شكرا عبدالرحمن

الفوضجي .. عبد الرحمن ..
كثيراً ما تكون الفوضي هي بداية الانطلاق
منها نستشف معالم الطريق وعثرات الايام وهنات الالم.
-------------------
ساكون هنا متابعاً .. شئت .. ام ابيت.

كتير بنحتاج للفوضى ومع انها فوضى بس بتكون حلوة زي فوضتك الاحنا فيها اسي

فوضى بتنقلنا من الواقع للخيال ... ومن الخيال اكييييييييييييييييييد ح نصل للهدف
بس الهدف ده اكيييييييد عندو شروطو اولا لازم تصلو ولازم تحافظ عليهو

زي لما كنا صغاااار وبنلعب بلي وحجله ...

كلام فوضوي صاح :o مرات بيكون الكلام فوضوي لكن بيكون لابد يتقال ...

سعيده جدن بقرأتي لنصك الرائع ...ومتابعه

اقتباس:

---

المشاركة الأصلية كتبت بواسطة عبدالرحمن مدثر

ام سماح تحياتى ..

مرااات كلمه ممكن تصنع فوضى ... لكن القدره على الترتيب صعبه طالما كان المنظور من زاويه واحده حااده

فايجابيه الاختلاف محمده .. عندما اجد ماينقصنى من فكره .. موزعه على من يشاركونا الراى .. والراى الاخر

تابعت بوستك .. واعلم جيدا سماحه مقصدك ..لكن ماكمن فى النفوس من مظلمه تراكمت على مر السنين والايام

كان الدااافع فى الانفجار ...

تاكدى ان فوضانا لها علاقه بالفضاء الذى ندور فيه .. وبالمجتمع الذى يضمنا .. بعيدا عن الشخوص طبعا

فان نشخص الالم سويا بحكمه جميل جدا

وان نتعالى على الجراااح اجمل

وان نتقاسم صناعه كيكه الفكره اروع

تحياتى لك

---

عبد الرحمن مدثر التحية والتقدير لك
ويا ليت الكل يفهم كفهمك .. ووفقنا الله جميعا

ام جمال تحياتى

وجميل جدا انو وسط فوضى العمل المتراكم .. نجد لنا مساحه نشارك الاخرين الفكره والاحساس

فى انتظارك اكيد ... فحضورك يضيف للفكره القها

وقديما قيل :

ان بعض الفوضى نظااااااااام

سواح .. صديق الامسيات الخضر

معك تصبح الفوضى (خلابه )

جميل انو نملا ماعون الفكره ببعض الرحيق .. لتنتفى

مقوله .. انى اسمع جعجعه ولا ارى طحين

والاناء الفارغ قد يصنع (جلبه ) اكثر

لدى عشق خاص لفتى ابنوسى جميل يدعى يحيى .. الجميع كتب له شهاده (الجنون )

الا انا ... لانى مقتنع بتخمه احساسه الوريف

من بين بين الجنازير المكبل بها .. آتيه بكل الشوق لاجد عنه المفيد

يحدثنى عن التاريخ حديث العالم

ويهوم بى فى عوالم الادب الانجليزى فافرح كثيرا .. وامرح بعيدا معه ومع خياله الخصيب

وارجع بتاكيد تااااااام لمقوله

خذ الحكمه من افواه المجانين

take the wisdom from the mouth of the mad men

اقتباس:

---

المشاركة الأصلية كتبت بواسطة عبدالرحمن مدثر

وقديما قيل :

ان بعض الفوضى نظااااااااام

---

سهولة فى الطرح جمال وروعة فى الحرف وحقيقة بوست سهل الهضم
شكراً حقيقة أخى أبومزن على مانثرت هنا أعجبتنى جداً فوضويتك المنظمة

بعد مكوثه عدة سنوات في سجن الغابة الانفرادي ، خرج الذئب وفي نظراته خوف ورعب ، وعلى ملامحه ذل وانكسار ، وفي خطواته تعثر وارتعاش ، يسحب جسده بجهد واضح ، وأفكاره لا تستقر على حال ، وعند اجتيازه الطريق المؤدي إلى أشجار الصنوبر، التقاه صديقه الدب الذي لاحظ علامات الانهيار عليه ، فصاح به مستغربا :
ما الذي دهاك ياصديقي الذئب الشجاع ؟ وأنت صاحب الرأس العنيد والرأي السديد ، وأين ذهب كل ذاك العناد المليء به رأسك ؟
نظر الذئب إليه برعب ، واقترب منه أكثر حتى لاصق فمه أذن صاحبه ، وهمس مرتبكا :
إنهم لم يضربوا رأسي ، لكنهم ضربوا معدتي ، فسقط رأسي دون جهد .

فالضرب فى الميت حرام

مياده منوره بعد طول غياب

داير اقوم اربط ليك الواقع بالخيال ونطعموا بشويه فوضى

مااظنك شاهدتى شقاوه طفوله عرباويه جميله لما تلم ليك كميه من علب الصلصله

وبعض (العلاااااب ) الاخرى ان جاز الجمع .. وتلقى قدامك حمار ناس جاد الله المكادى

وبخيط تلم الجوطه (العلبيه ) المذكوره .. وتربطها فى (ضنب ) الحمار ..وتبدا (العنفضه ) والجوووطه

طبعا فى بعض الكلمات بتكون غائبه عنك ممكن تستعينى (ببت مارنجان )

قمه الخيال الجامح .. بتكون فى المرحله الثانويه .. بدايه تكوين الوعى مع زياده كتيره فى الخيال والرومانسيه المفرطه

بتذكر (قلب الشارع ) الصحيفه ... وعندما تسهر الليالى وتكتب بلسان صديق .. بنجره احساس زائد .. او (تدين ) ليك

احساس زول مدشدش .. وتعيش القصه ...

بدايه كتابات الخيال عندى كانت (صدمه )

يوم كدا فى لحظه تجلى .. اتجدعت فى قعده (فوضى ) مع خيالى وكتبت باحساس جميل وصادق

لحدى هنا تمام .. وتميت الرصه .. واصبحت حلوه القصه .. او التداعيات

قمت من دغيشا بدرى شلت اندياحتى وغلفتها .. فى مظروف جميل .. ورسلتها مكاتب الجريده اياها

جميله ياخ حته ترسل ... وتمشى المكتبه وتلقى اسمك مكتوب تحت كتاباتك .. وتنطط فرحا وتكلم كل الحله

(وبت الجيرااان ) هاها

اها نخليكم مع فوضى الانتظار ............

- كل صباح تمشى المكتبه تشترى الجريده (وحوار داخلى )

- الليله ماجابونى

- وبكره برضو

وهكذا

لحدى ماجيت يوم ... وتفاجات بالفوضى الجاااااااااااااايه دى


!


!


!


!


شفتوا كلامى ذاتو (المابغبااانى ) وجدته يزين الصفحه الاخيره .. وفى عمود رئيس تحرير الجريده اياها

(هييييييييييييييييع .. فى عزه اكتر من كدا )





والمؤسف حقا .. انه مامنسوب لصاحبو (اللهو العبدلله )

وجدت مقدمه انيقه من رئيس التحرير يتحدث فيه عن صبيه انيقه مابتذكر اسمها اللحظه ( لكن اسمها موسيقى جدا )

عبق ... جلنار .. شهرياااار .. رينااد ... زنااااااااد

هيااا جماعه دحين البنوته الدخلها هنا شنو

دا كلامى (يعلم الله ) ... وتعبااان فيه وشقياااان .. ساهرت .. وعديت النجوووم .. وعشت احاسيس ملخبته

احساسى المكتوم .. واحساس ايهاب ودحاجه نفيسه الجاب لامو ضغط بسبب فاتور التلفون الحصلت مليووون

تغريدا .. حبابك ست الاحساس (المطر )

يوم الخميس الفات دا تابعت حلقه نجوم الغد .. واتوقفت كتير عند محطه (شذى ) بت القضارف .. واحمد ودالامين ودالابيض

الابداع شكلو سيمطر خارج العاصمه .. التى زادتها وجبات (الاندومى ) ملل داخلى مالذيذ

البت الاسمها شذى دى صوتها طروب .. واحساسها زى سممسم القضارف زمن الخريف

وهى تحلق فى سموات الابداع مع رائعه صلاح احمد ابراهيم

وهذا الاسم لجيل اليوم .. لايعرفونه... لان البلى استيشن اخذ كل المساحات .. ويمكن قولو ليك صلاح

دا بلعب فى (الرابطه كوستى ) ولا شنو بوصفها الصاعد حديثا



وكاااااااااان تعب منك جناااااااح فى السرعه زيد


الله على البنيه البتفرتق الاحساس بصوتها الجميل ... تحت المطر .. وسط الريااااااح







http://youtu.be/9PyAYRjAFUw

عمنا محجوب .. تحياتى

مع قعده القهوه الصباحيه الليله .. مع القهوه تحلو الونسه والشماراااات برضو

واحد صاحبى بحكى لى

- شفت القصه العجيبه دى عليك الله

- لييييه الحصل شنو

- جماعه قالوا هم جوه السجن وخابتين ليهم 2 مليار

- كيف يعنى شغالين من (مساجنهم )

- اى والله جووووه السجن بتاع .. (لحين السداد ) البقولو عليهو برضو (لحين الممات )

- قصه غريبه .. باقى لى الجماعه ديل لاقين تسهيلاااات

- دا كلامك مالكيكه بتتقسم على كم قطعه ... عشان كدا مشروع التقسيم .. اقصد الكيكااات دا لازم يستمر




خربشه (بره النص )


ياخ عاجبانى ليك دعايه بسكويت (اوريو ) ديييك .. بتاعت افكها .. اتذوقها (الحسها ) .. وبعد داااك اذوبها

والثنائيه المدهشه بين شااافع صعنبوتى (غض )

وبين عمك كبييييير (سنينااااات ماعندو )

لكن البياااض هو الجامع اكيد (كبايه اللبن ) بتزيل منو حرج عدم الاسنان فى ظل تساااابق عشان من ياكل البسكويت اولا

***

تحياتى استاذنا

يا أبو مزن ،،، حين تحين دقائق السقيا ،،، نأتيك ،،، وحين تقرع أجراس وطبول الجوع
نلهث نحوك ،،، نشرب حتى نشبع ،،، ونأكل حتى نرتوي ،، وفوضى الحروف تزيدها ألقا
وأعمق معنى ،، وجمال هضم ،،، وروية مستمتع بها ،،،

دفقات الحبر ،، أحيانا تعطينا الهام وتمنحنا السكينة الممزوجة بالنغم الكلامي الموزون ،،

ودميعاتاً غزااااار في خدا ندي بالطفوله ،،، يجرنا نحو القوى الألهيه الغير متوقفه في صنع
الأنسان ،،، وتجاربه التي لا نهاية لها الا الموت الذي أجرى تلك الدميعات ،،،

عٌبد ،،، متعك الله بالصحة والعافية يا .....( هل من حرف يوصفك ؟ ) ،،،