على كيفك !!!

نص
فراشة


طالعة النيل
على كيفك
شقة شعرك
على كيفك
زيت السمسم ماديك لمعة
يا ست الناس
مستورة عليك الدنيا
الدنيا النايمة الصاحية علي الواطة
..امسحي زين
اللون الرايق واللون الاغبش ما وش واحد
الشفع .. حق المدرسة . طردونا ..
دي حكومة !!!
صباح الخير
امسحي زين
وياريت كان الواطة بتنضف
وكان الزول الرايق بمشي عليها بشيش
قراية عليك
ورنيش ورنيش
وين المدرسة
شوف اللقمة بتوجع ..كيف
ولدك يا ست الناس .. شوفيهو مبهدل كيف
الله كريم
راجعة المغرب
صاحب الدكان .. ادينا لبن بالدين
مزاج في شاي المغرب
...اللبن اتقطع ....
.. كيف الكيف

اقتباس:

---

المشاركة الأصلية كتبت بواسطة يسري الياس

راجعة المغرب
صاحب الدكان .. ادينا لبن بالدين
مزاج في شاي المغرب
...اللبن اتقطع ....
.. كيف الكيف

---

يا يسرى الياس

يا زول من عهدا ابيض وزين

يا حرف رزين

مليان فرحة

رغم اساك يا حروف

الا انك مدهشة

الا انك زائدة حنية ومقالدة لى الاهل

يسرى يا يسرى

جاى ليك تانى

دى غشوة ساى

الجميل .. يسري الياس ..

أزيك يا يسري ياخ واريتك بالعافية وبيوتا .. ووين ما تقبل تقالدك الأيام السمحة

وتعدل كيفك ..

وأزيك يا عاقب مصباح يا زول كتاب مليان سماحة نضم تحير اللغة في صنقورة ..

قال العاقب أنك يا يسري من "عهدا ابيض وزين" وأقول لك أنا بعد أن تمطقت

هذا النص وأعجبني نفسه المعتق .. أنك وكما قال صديقنا الشاعر بشرى إبراهيم ..

أنت من زمن خدو مشلخ ..

أهو يا يسري زي كلامك ده كلام بسيط ومستف سماحة وينمل في الخاطر ويعدل

الكيف .. أحس بأني ذهبت نواحي بادية لرفاق أجد فيما نثرته ملامح بعض رقعتهم ..

ورجال ونساء ونضم يصلح كيفك وينسف ما مضى من ملل ليالي في لحظة

حضور جمال يوازي حضور هذا المشهد الذي صنعته يداك ..

مؤكد تحياتي يا صاحب وكن متعافي وبخير،،،

الله اخى يسرى على الكلام البسيط لما يكون قصة كبرى ..
الله على كبسولة كلام بتغنى عن مقالات وهتافات وتجمهرات كبرى..
يديك كل العوافى يا زين يا العايز الزين..

اقتباس:

---

المشاركة الأصلية كتبت بواسطة يسري الياس

نص
فراشة
طالعة النيل
على كيفك
شقة شعرك
على كيفك
زيت السمسم ماديك لمعة
يا ست الناس
مستورة عليك الدنيا
الدنيا النايمة الصاحية علي الواطة
..امسحي زين
اللون الرايق واللون الاغبش ما وش واحد
الشفع .. حق المدرسة . طردونا ..
دي حكومة !!!
صباح الخير
امسحي زين
وياريت كان الواطة بتنضف
وكان الزول الرايق بمشي عليها بشيش
قراية عليك
ورنيش ورنيش
وين المدرسة
شوف اللقمة بتوجع ..كيف
ولدك يا ست الناس .. شوفيهو مبهدل كيف
الله كريم
راجعة المغرب
صاحب الدكان .. ادينا لبن بالدين
مزاج في شاي المغرب
...اللبن اتقطع ....
.. كيف الكيف

---

ساندويتش إبداع
نأكله على الريق
نفك الريق بى كلماتك
بى دوزنة حرفك
وانت جاى بشيش بشيش
وماشى بى خطوات تقول تحتك مطر
ودخلت ما خبيت سلام
ولا اتوقفت شان طعنة لبن وحيرقان اللبن المقطع حتت
عليك الرك يا يسرى
وعليك كل امنياتنا مرمية كيمان كيمان
تهبشك محل ما تكون
وتاخد منك زاد يوم بكرة
و لى الدرويش تديهو السبحة وابريق طين
وتلبس جبتك مرقوعة او مصنوعة بى دبلان وبى كتان
تكون زاهى
وزى ما عودتنا انك فوق للغيمة بتحرس قوس قزح
ترجاهو شان يدينا لون واضح
كرهنا رمادة الحياة وسجمها
وبقينا فيك راجين

سوباوى
ليك شوق فى كل محطة دهشة ترسم فيها
ترسم فينا يوم باكر
وحلم قابل للتحقيق
كن بأكثر من الخير استاذى

العاقب المصباح
يازول يا ناصع
سعيد انا بحروفك المرتبه معي ..وهكذا انت رجل كريم حرف .. ندي عبارة ..
حق ان قلت انك لا تدع وراءك صفحات لنكتب عليها ..
على كيفك
يا زول يا رايق
اديتنا رزازك
وغشيتنا المطرة ..

سوباوي
الرجل الذي يدع الحروف تأنس بعضها
تحيات يا زول كتاب ..
راجنو يبلل شوق النجمة ...
يمسك ضفر القلم الناشذ ...
يلون لينا الفرح الطاشي ..

تشكرات ايها النبيل .. وانت تجمل اشياؤنا .. لا يوجد سر ان قلت انني من من يستبشرون بوجودك خيرا ... ويستبشرون بكلماتك خريفا على الابواب .. وانا من يعشق المطر كثيرا ...

اشرف صلاح السعيد
وسعيد انا بك جدا هنا .. وممتن لوجودك معي كثيرا
يا زول يا زين
يا طالع من وشين
وش القمرة
ووش الالفة
وعلى كيفك .. حلاوة الطلة