ونسة في بيت العزاء عن البقر المسروق
كانت لحظة مؤلمة ....... الجميع يتقاطرون لتعزية ابن المرحومة في وفاة أمه... وتمر الساعات والناس اتعشوا تب وشوية شوية تبدا الحركة تخف ....والناس في لمتهم ديك يبدأوا في الونسة العادية تكسيرا للوقت في انتظار أي قادم قد ياتي .... وتبدا الونسة ...لا قيود ولا تحفظات ....فالقصد الترحم على الميت وقد حصل ....بقي التساؤل بين الحاضرين .... وكا ن ود الشيخ جائي من السودان بعد تمضيته اجازته بين الاهل بالسودان..... فالي أضابير الونسة:
- آ أزول الحمد لله على السلامة....قالوا لي جيت يوم الثلاثاء بالليل ونزلت العمل طوالي في الصباح عشان ماتضيع منك الجمعة....
- آآي والله....اخوكم جاء مديون شديد....
- أكيد البنيان أتعبك ....
- لا حرَّم لا بنيت ولا حاجة..... وكمان ادينت 20 مليون.....
- أصولو عملت شنو !!! عرست التالتة؟؟؟
- والله ولا حاجة
- طيب مديون ليه؟ أكيد اشتريت ليك بقر!!
- بقر شنو ؟؟؟ بقري المعاي زاتو طلق ولا بقرة مافضلت فيهو ....(40 ) بقرة . كلهن سرقوهن....
- سرقوهن!!! دا كلام شنو .... عسه عليك الله البيدخل منطقتكم دي منو عشان يسرق؟؟؟؟ وكمان بقر!!!
- والله السرقن واحد ربيناهو عندنا وزوجناه وقعد معانا 30 سنة.... واصلوا التهمة ما جات فوقو......لكن طلع هو الحرامي
- اها ان شاء الله تكونوا لقيتوا البقر؟؟؟؟
- لقيناهو شنو....أنا على الطلاق بهايمي الباقيات...الصغيرا صغيرا من عتود الى نعجة وقعنا ليك فيهن ضبح ...يوماتي .... لناس كفارة كفارة ... وغير حق البنزين لناس الفزعة.....وبعد ما لقينا الناس الضبحوا بقرتين ثلاثة من البقر المسروق.... القاضي ختاهم ليك في الحبس واعترفوا بذبح شوية منهن....قالوا جابهن ليهم فلان.....القاضي اصر عليهم انو البقر كلو عليهم....فرحنا شوية.....وبقوا قاعدين ليك في الحراسة ....وتعال شوف اللجاويد كل يوم من حتة ... كيمان كيمان يجو للوالد ...عشان نتنازل و نفك الناس ديل من الحراسة....وهاك يا ذبائح ....ابوي الشيخ راجل كريم ما ممكن ضيوفوا امشوا بلا ذبيحة .... وناس حمد لله على السلامة من كل الحلااااال....فبعد ""كفارة كفارة" جانا كمان دور" بركة اللقيتوهن"....ضبايح ....ومرات مبيت كمان.....وعلي الطلاق السخيلات كملن قرضوهن ليك تب....ففي الاخر قلت لابوي .....
هوي ....أنا بقري دا عفيتو لله تعالى....ما عاوزو..تب.......أتعوضو في جناي....
ومشيت عملت التنازل وفكيت الناس من الحراسة ... بس ساكت عشان ارتاح مع عيالي في اجازتي ....
آها قالو بيشتروا لي عجيلات... اتعوض بيهن البقيرات....قلت ليهم لا ...لا حرّم ....بقر هنا تب ما يخش زريبتي تاني.....
- آها سويت شنو ؟؟؟....
- والله دخلت في حاجة تانية ....أخواني....
أخواني حالفين يقتلوا الحرامي لو لمو فيهو.....
والله بقيت في حوسة وهَمْ شديد .....فكل يوم أخواني فارين بالحلاااال يفتشوا عليهو..... وانا خاتي ايديني في قلبي ....والله حق المحامي يدافع عنهم ما عندي لوكتلوهو........ربك صاحب حكمة ...اتاريهو الحرامي كان عيان راقد في المستشفى .... وأهلوا ذاتو ما عارفين .....بس يجينا ليك خبرو...
مات....الحمد لله .....موت الله ساكت....
والله ارتحت راحة كاني لقيت بقري ... أخواني.....كان ممكن يروحو فيها لو لقوا الحرامي دا.....والله انبسطت تب .... هَمْ وانتهى ....ونسيت ليك البقر والسخيلات ....لكن الدين عليا عليا وتب ما في عوجة....والبقر ...الله يقطع البقر ويقطع تربيتو.
- أحد الحاضرين يعمل مداخلة:
والله كان تسوي زي ما عمل ود عمك الشويطين داك..... صبح الصباح لقا حمارتو ما في ....قص الدرب هنا وهنا عرف أنو الحمارة دي انسرقت.....كتلا في نفسو....ما كلم ليهو زول .....قال يا أخوي انا ما بقدر على كفارة كفارة وحق السكر ما عندي ....طلَّق ثمن حمارتين ما يكفيهن ... واعي .....كان بقيراتك ديل تكتلن في حشاك وتسكت....
- 40 بقرة كبفن اكتلن في حشاي......حاراا شديد..... لكين لو خيروني هسه ....بكتلن تب في حشاي وعلي الطلاق إمكن كمان أدفع للحرامي الفرق ....بس ما اكون مديون.
يتداخل احد الحاضرين:
- انتو والله قصتكم دي زي قصة محطة التلفزيون الأهلية ...جات زمان في التلفزيون....
- ودي كيف دي كمان ؟؟؟؟
- القصة أنو قالوا كان في زول ...مسكين جد ...كل يوم يخرج من البيت يفتش عن شغل....ما يلقى ويجي راجع تاني .....والصباح تاني امشي يفتش.....وما عندو في بيتو أي حاجة كان بس قميصو وبنطلونو اللابسن....وبقن قديمات ومشرطات ...وفي يوم من الايام لقى ليهو بنطلون وقميص ... من احد أصحابو .....غايتو أحسن من حقاتو....قام غيَّر وملَّص المشرطات ....لمَّاهن وخلا المشرطات في البيت وطلع يفتش عن شغل....آها .... اثناء غيابو داك دخل ليك حرامي في البيت ....وفتش ليك كل البيت ما لقى أي حاجة الا القميص والبنطلون القديمات الزمان ديلك ....شالن وطلع....في طلوعو داك شافتو ليك زوجة المسكين...وضربت الكوراك ...حرامي حرامي ....وجااا ليك الناس...كورجة....ورا الحرامي أشي شلوت وشي بنية وشي تفة وتفوا ليك الحرامي دا تفة شديدة وفي الآخر سلموهو الشرطة عشان البنطلون والقميص .... بعد داك دا يكلم التاني والناس بدت تجي لبيت المسكين دا ... تحمدل السلامة ....وسكر وشاي من الدكان.....أشي شاي وشي عصير (شربات) وبلح وحلاوة....بعد شوية زولك جاااا....دخل البيت ......لقى ليك اللمة
- في شنو؟؟؟؟ في شنو يا جماعة؟؟؟
- ها زول الحمد لله على السلامة .....الحرامي دخل بيتك و قبضوهو وما شال أي شي غير بنطلون وقميص رجعوهن منه.....فحمد لله على السلامة....
- حرامي مين وقميص مين وبنطلون مين !!!! نحنا ما عندنا حاجة زاتو يسرقا حرامي ......
اتلفت جاي وجاي شاف ليك الناس ....دا ماسك ليك كباية شاي يشرب ودي موية.....وشفع شايلين ورق الحلاوة ...شال ليك عكازو ووقع ليك في زوجتو ضرب ...لَبْ لب...القال ليك كوركي منو !!!! حرامي ! ياريت لو شالك انت زاتك وريحنا منك خشمك الهش دا.... ما يشيلو القميص والبنطلون...الله يشيلك من الدنيا دي كلها....الله لا كسَّبك ....المكشرة ....الغبشا ما ملسا...
بعد شوية زولك هِداا شوية كدا وقام مشاا الى الدكان ....سيد الدكان مما شافو ...ها زول حمد لله على السلامة ...الحرامي دخل بيتك وجلدوهو ليك جلدة تمام .....بس يستاهل....لاكين حسابك الليلة طار فوق ....ناس بيتك شالو سكر وشاي وعصير و....و..و....و .... فحسبها ليك المسكين لقاها حاجة كتيرة خلاص... طلع من الدكان ...وبعكازو ..... لب لب في أي واحد من أولاد الحي يلاقيهو في الشارع يديهو بالعكاز لب لب .....الجابك لينا شنو...لب لب ....طالبنا كفارة ....لب لب ....وكمان عصير و شاي.... لب لب لب.
آها يا جماعة ......أنا اتأخرت ولازم أمشي الآن .....الله يرحم المرحومة ويسكنها فسيح جناته وانتا يا ود الشيخ الله يعوضك في بقيراتك. ويسدد ليك ديونك.....مع السلامة 00000
النور
