وعد الغمامات

أمسياتي الحالمة جنّـك
دغدَغِن شوق التلاقي
ومن ضلامن كحّلنك
والنجيمات ما بفوتن
لو ما بي شوقن غِشنك
والقصايد ليك بقولن
ويكتبن بالريدة عنك
* * *
ما أظنك...
تنسي ما بين أمنياتك
إني لا زال ليك ومنك
وإني مستني الخواطر
في الغمامات يوعدنك
المواني تدور فنارك
والفنارات يشتهنك
والخيول في عز صهيلن
والعصافير في رحيلن
يحلمن لو يوصلنك
شوفي ليلات السهاد
كيف شلهتني وشهّلنك
عذبني وشيّلنك
ضيّعني وسيّرنك
سهّرني وهدهدنك
خوفي من سكك الضياع واللوعة
زي ما جرّحني يجرِّحنك
خوفي من لحظات تعيسة
يوجِّعني ويفجعنك
خوفي تبعد بيك ظنونك
وتاني ليْ ما يرجِّعنك
19/4/2000

الرائع الاســـتاذ / ايهاب الامين (( ما بين ود المنسى ,, ومدني مشاويــر من الالق والتحليق في دنيوات الكلمة الجميلة)) حقيقة انا اكثر سعادة عندما تتواجد هنا في هذا المنتديات التى انارتها كلماتكم وكتاباتكم ,, فمنكم واليكم كل هذا العشق وكل هذا الجمال , واليك نشيل الصمت ونرحل فــي مسارب كلماتكم ودوزنة قلمكم الرصين.

كل عام وانت بخيـــــــــــر والف مرحب بك وبكل الكتابات الجميلة ,, فابقى ايــهاب الاميــــن نورســاً في هذا المنتدى

كل هذا الجمال

اغمق وبهت كل جميل غيره

فابدعنا دائما وابدا

والف شكر