زو زو بي ( الزواوي ) زو زو بي
علي وزن اللوري زو زو بي ولكن المرة دي ياجماعة زوزوة اللوري ارحم ,, المرة دي المزوزو بي زول عديل كده ... والغريب إنوا اسموا ( الزواوي ) ..
مدخل أول
عرَس بابكر اخوي وأنا مغترب وطبعاً لازم احضر العرس .. وكحال كل المغتربين الخرمانين لزغاريد الأهل ولمة الحبان منيت نفسي بان تكون الإجازة رغم قصرها ( أسبوع ) من أجمل الإجازات التي سوف اقضيها ,,
حزمت الحقائب ولميت الريالات واخذ مني اختيار الملابس أكثر من الوقت الذي أخذه أخي في اختيار شيلة مرتوا ,, وأخيرا أنا في الخرطوم وكلها ثلاث ساعات وأكون في مدني والحنة بكرة وإحساس غريب بالنشوة والفرح وأنا اقترب من بيتنا وبتاع التاكسي يضرب في البوري معلنا عودة ولدكم المغترب والجميع يخرج عند الباب ,, أحسست ساعتها بأنني العريس وليس أخي ,, وفعلاً ضربت الزغاريد وصحي العز بالأهل ... ( ماتسرحوا يا مغتربين خليكم في الدوام بتاعكم ده ) ...
مدخل ثاني
لم تكن النزلة بغرض العرس فقط فالعبد لله قرر كمان يكمل نص دينوا وفعلاً شاور نفسوا وقرر انو فلانة بت ناس فلان البسمة الممكن تفتح ليهوا طريق الجنة ,,, وتمسح عنه شقا الأيام ,, وناس البيت موافقين عليها ومتحمسين ومشو عشان يخطبوها من أهلها ,,, وظهرت المشكلة أنها قالت : انا ما بعرف طير الورور بتاعكم ده .. وما ممكن أقول ايوة أو لا ... ولازم لما اختار شريك حياتي نقعد علي طاولة حوار ونتناقش ونطلع بنتيجة وبعديها احدد إذا كان حيكون شريك حياتي أو لا .. وتم تبليغي بالرد وأنا في المملكة ولازم انزل عشان اجلس في القمة العربية واقنع بت الناس بطير الورور .. وطبعاً طاولات الحوار دي الواحد ضليع فيها من أيام الجامعة ... الغريب في الموضوع ياجماعة انو البت بت أهلي ,, تخيلوا أنها ما بتعرف عني غير الاسم وحتي الشـــكل ما متذكراهو كويس .. ( ضرائب الغربة ) ..
ما أوجع رأسكم نزلت عشان العرس وعشان طاولة الحوار دي وعشان اقنع بت الناس ,, وكنت مليان بالتفاؤل والامل والثقة بالنفس .. وفي ظرف أسبوع كان العبد لله نـجَض البت وسافر بعد أن اقتنعتها تمام الاقتناع انو طير الورور حيكون شريك حياتا وبقية الترتيبات تتم في غيابي عن طريق الأهل من خطوبة وخلافه ..
ورجعت المملكة وبديت احلم بالعرس وهاك يا سوا وكل يوم حكاية حب جديدة يعني بالميت كده اتصالات نص الليل والصباح وحب شديد ... معزور طبعاً فاقد علوية ( حنان يعني ) . والله المرق في الاتصالات يعرس لستة لكن اعمل شنو عايز اربط الساوند مظبوط
الو : ايوة
مرحبتين
ازيك يا عسل
مشتاق ليك
عاملة شنو
اشتريت حاجات الخطوبة بس باقي الدبلة ...
لا يا ورور أنا عايزة الدبلة تكون سادة
حاضر يا عيوني الدبلة سادة
واسجل في الكراس واتبشتن واحلم بيها نص الليل . واشتريت الدبلة وهزار شال الشنطة وسافر بيها عشان ناس بيتنا بعد ما تصل الشنطة يمشوا يلبسوا بت الناس ... الناس ادونا خيلان البت وخالاتا وأمها ( أبوها متوفي ) وقالوا أحسن من ورور ما حنلقي عريس .. بس ياجماعة عشان المسالة تكون رسمية حقوا تكلموا عم البت ( عمي زواوي ) لانوا أبوها متوفي ..
وظهر ( زوزو )
الأسد النتر
مشتت الحبان
ومفرق الخلان
ومولد الأحزان
وهادم فرحة الشبان
والله زوزو بي زوزه
خلاني اصحا من النوم واغني
زو زو بي اللوري زو زو بي
اها يا جماعة الزوزوة دي تفتكروا سببا شنو ؟؟
والزواوي عمل شنو ؟؟
اها العندوا زواوي في حياتوا كلو يخش ؟؟
وما تنسوا الزواوي ده عم البت ؟؟
يلا يا حبان الزوزوة وخلان اللولوة ؟؟ افتونا وبعد ما يغلب حماركم انا بوريكم زوزو سوا شنو ؟؟
ختاماً
صدقيني
قد تعودتُ الألمْ
قدْ عشتُ عُمْري
بين آهات وأحزان ودمْ
قدْ تَمَلكَني العناءُ فلمْ اعدْ
أخشىَ منْ الزمن العَدَمْ
زيدي جراحي الآن
جرحاً
كي تريني بين أوجاعي أشم
مثل جبل كلما اشتدت
عليه الريحُ
زادته شموخاً وقدَمْ
أو كنخل عندما يرميه حجر
يرمي للناس الثمر
لن تكوني آخر الأحزان
في زمن البكاء
..... ولن تكوني ....
أخر الطعم الأمر
مهما جفاف الدهر حاصر مقلتي
حتماً سيغشي ساحتي
بعض المطر
رد مع اقتباس
المشاركة الأصلية كتبت بواسطة طير الورور
ويغرقك زيادة
المفضلات