جاني مهموووووم . . و يتكلم برة من راسو . . كوكوكو دق لي الباب . . فتحتو ليهو . . الحقيقة حالتو كانت تحنن . . قلتلو . . مالك يا حسب الرسول . . نعل مافي عوجة . . قالي بعد ما فنقل لي عويناتو . . يا فيفيد . . خسمتك بي وليداتك النضمي البتسمعو مني هسع دا . . ما تكلمبو و لا تجيب شوطو لي زول طب . . البلد دي غير النقة و كشف الحال ما بطرو شيء . . البارح يا فيفيد . . الجبنة كانت رامياني . . و متقريف و روحي مشحتفة . . محل ما أقبل ابزق و اتنخم . . طلعت من سوق الخدار دا يالله و يامين . . عميان و مغبي . . كركرت كرعيني و شلتهن مشيت بيهن البيت . . و انا أشحد في الله . . يا مالك روحي توصلني اللحاف . . وصلت البيت يا فيفيد . . رقدت و اتمددت في اللحاف . . و نمت نوم الديك في الحبل . . كان يجيني ليك في النوم راجل ماااااكن و غلييييد و ليهو فقرة . . شعرو ملبّك متل حراب إبليس . . و كرعينو حفيانات . . و شايلو خرتاية فوق كتفو . . قالي بي صوت جهور . . يا حسب الرسول الشين . . يا حسب الرسول الشين . . ناغمتو قلت ليهو نعم . . قالي بتدور نخرتك الشينة دي تبقى زي نخرة نوال الزغبي ؟؟؟ . . قالي التنضمي دا و صفق بي اصابعينو . . و يطلعن من خرتايتو مرتين . . واحدة فيهن نخرتا نخرة التاباني . . متل كوز الكنافة . . حسبتها في اللوال مولودة في جبال النوبة . . قالي يا حسب الرسول . . دي نوال الزغبي قبل . . و المراة التانية شلوفتا حلاتا . . الطعامة و الظرافة باينة فيها . . قال لي يا حسب الرسول . . دي نوال الزغبي بعد . . اها بدور نخرتك تكون زي نوال الزغبي؟؟؟ . . قمت انا العوير قلت ليهو آآآآآآي . . قام دخل يدو في خرتايتو . . و مرق منها فتيل . . قدر فتيل المحلبية . . قالي . . يا حسب الرسول دا اكسير الجمال. . شيل ليك منو بقة يا حسب الرسول شيل ليك بقة . . قمت انا العوير . . اتناولت منو الفتيل و شلت منو بقة . . قام تاني الراجل ناغمني . . يا حسب الرسول الشين . . يا حسب الرسول الشين . . ناغمتو قلت ليهو نعم . . قالي بتدور شلوفتك المفندرة دي تبقى منفوخة متل حقت نانسي عجرم؟؟؟. . العوارة كتلتني يا فيفيد . . قلتلو أها تك هذا ما انشده . . قال لي فاااالح يا حسب الرسول . . و صفق بي اصابعينو . . كان تطلع من مخلايتو مرتين . . واحدة فيهن شلوفتا زي الكلوة و مدلدلة لي سدرها . . كان ختوها في طوة تملاها لط . . قال لي دي نانسي عجرم قبل . . و التانية شدة ما حلوة لحافي داك قطعتو كلو بالرفسي . . قال لي المراة الملّالة دي هي ناسي عجرم بعد . . و قام ناولني فتيل المحلبية . . و شلت لي منو بدل الجقمة جغمتين . . ما انت عارف نانسي عجرم يا فيفيد . . قام الراجل بعد داك سعلني . . يا حسب الرسول الشين. . ماذت تعرف عن سدر أليسا؟؟؟ . . وحااات الله يا فيفيد خجلت منو و كان لي مراد الواطة دي تنشقا نصين و تبلعني جب . . الراجل في حيرتي ديك صفق بي اصابعينو . . و مرتين غلالالاد يطلعن من مخلاتو . . واحد فيهن شناتها ما بتتقابل . . و التانية وكتين شفتها . . انتزعت من الراجل فتيل المحلبية و شربتو جت . . الراجل لامن انبسط مني . . و مسح لي راسي بي يدو . . بعد شوية يا فيفيد . . الراجل دا قعد يتمتم و يقطع في كلامو و نضميهو . . قلتلو مالك يا زول . . قال لي . . يا حسب الرسول الشين . . جسمك شييييين زي وشك . . أتحب أن يكون لك ما أوتيّ لهيفاء وهبي . . قبل ما أقول ليهو آآآآي . . الخرتاية انفتحت . . و طلعت في اللوال واحد هايفة كدا . . و مسلوعة . . وشها ينعل قفاها . . قال لي دي هيفاء قبل . . و تطلع واحدة تاني من خرتاية الجن دي . . شدة مو ماكنة . . انا احترت البت دي دخلت في الخرتاية دي كيف . . ماسكة ليها مكرفون و تنطط . . رجب حوش صاحبك عني . . رجب صاحبك جنني . . و تعاين لي يا فيفيد . . و تغمز لي في حناني . . اتلفت لي الراجل اب خرتاية كان يديني فتيل محلبية تاني اشربو . . لكن لقيتو اختفا . . السما سعل منو الواطة . . اها يا فيفيد . . صحيت من النوم . . و هسي شلاليفي ديل ينتّشن فيني . . و سدري فاير التقول فيهو جريوات يلعبن جوة . . و حاسي لي بي دهمة مكومة فوق راس نخرتي . . و خايف الرجل أب خرتاية دا يكون سقاني شيتاً مو ياهو يا فيفيد . . الرسول فوقك يا فيفيد نضميني دا ما تكلم بيهو جنس زول . . لحدي ما سيد الوداعة يشيل وداعتو .
اليوم التاني فاتح التلفزيون . . و هيفاء وهبي الما بتغباني . . تنطط و تسرّخ . . رجب حوش صاحبك عني . . رجب صاحبك جنني . . قعدت أضحك بي طول حسي . . و اتزكرت صاحبي حسب الرسول الشين . . و اتزكرت الخرتاية . . و فتيل المحلبية . . و الراجل اب فقر . . و شحد في الله انو انو زي الراجل أب فقرة دا ما أقع في يدو . . و يسقيني مما شرب منه حسب الرسول الشين.
رد مع اقتباس
المفضلات