يابشر ارفعو البنطلووووون؟؟؟؟؟

[لااااااوحبك]

مساء الخير اخواني...

ظاهرة بدأت او صارت تتأجج في مجتمعنا العربي ... ظاهرة قد لا توازي الظواهر الدخيلة
المنحطة " اسمحولي "

عندما ادخل مكان عااام في الاماكن الترفيهية او حتى مركز من المراكز الموجودة
وولما نشوف هزه الاشكال من الشباب وشكل لبسهم للبنطلون؟؟؟

والله العظيم عيب انا احس احيانا اني عايزةامسك البنطلون ما يقع ويفضح نفسه بس لو
ما هذا الحزام المختنق...

لمازا هزه التفاهه ولية الاسواق تقوم بالترويج مثل هذي الموضة الهابطة..؟؟



سؤالي : ايه رايكم في مثل هذي الموضة؟؟؟ وهل انت من من يلبس هذي البناطلين؟


وتعالوا نسينا البناااااات الحلواااات

البنات قامن يتنافسن في اللبس مع الاولاد والصراحة قامن يطلعن لنا بالتلفزيون وبكل مكان
حتى والله اني كل ما افتح غناةالقى بنات منزلات البناطلين لحدى تحت واللة انا بخحل اشوفهم ولا يشوفوهم بناتى او امى

عجبي هنا لما يلحق هؤلاء الشباب الرذيلة من الموضة.. ؟؟؟
حراااااااااام والله البنات والله بعرضن اجسامهن كدة على الملاء واللي يستاهل واللي مايستاهل
يعاين...وعيال الحرام كثااااااااااااار


انا خوفي على الاجيال القادمة...ااية حيحصل فيها؟؟؟

**سؤالي الآن إلى متى هذا الحال..؟
**إلى متى شبابنا وفتياتنا امعه..؟
**يلاحقون الغرب ويقلدونهم بكل شي..؟
**وهل هذه الموضة رائعة لدرجه إننا لا نستطيع الاستغناء عنها؟
**وسؤال آخر هل يظنون أن تقليد الصرعات
بشكل اعمى جميل ومحاكاة للموضة!!!

[MASS77]

لا وحبك اغرب حاجه نفس البتتكلم عنو خاتيو توقيع ليك (صورة البت الفي التوقيع بتاعك)
عار عليك ان تنهي عن خلق وتاتي بمثله عار عليكــــــــــــــــــ............................ .....
عموما الكلام ده بقي واقع مرير وبقي عادي امشي السوق القريب ده تلقي ابو سايق بتو وهي لابسه ضيق واضيق من كده
امشي الحفلات تلقي لبس لا شفتو لا سمعت بيهو وما في زول بهدي
امكن انا اطرقت للموضوع ده في ردود كتيره بي انو نحن محتاجين الشارع يربي قبل البيت
محتاجين الزول البقبل النصيحه محتاجين كتييييييييييييييييييييييييييييير
واي واحد من البلبسو كده عندو مبرر انا شايفو غريب
بقينا مش ببغاء وبس نحن بقينا ما دايرين البقلدنا الاولاد بقو بنات في لبسم والبنات حدث ولا حرج
يا اخوانا انا والله ما انصار سنه ولا اسلامي متشدد وشاب عمري 30 سنه وانسسسسسسان عادي جدا بس عشان ما تفتكروا انو انا متشدد ولاني امكن مركز علي الحاجات البتمسنا وبتقلل من سمعتنا وما بشبهنا الكلام ده البشوفو ما من تراثنا ولا من اخلاقنا
مالو لو الولد لبس غير الضيق وما برم شعرو ولا عمل منكير في ضفرو الشمال وغيرا من الحاجات الما حلوه
ومالو البت لو بقت ملتزمه بالمعقول ولبست مهذب وما ضيق ولا عملت البنشوفو في وشها وفي اي حته منها مع العلم لو في زول عاوز يعمل ليو علاقه مستقبليه مع بت ولقاها بالمنظر البشع ده
بشرد وبتكون نظرتو للبت مجرد طمع ما احترام وبرضو نفس الشي للولد حقو نحترم نفسنا ونحترم لبسنا عشان الناس تحترمنا وما اي حاجه نشوفا في روتانا ولا غيرا نجي نطبقا
ولك الشكر

[الفارس البنفسجي]

دي واحدة من ألف
من نتائج الصراع
الجديد.
صراع الفضائيات
والإنترنت وتكنولوجيا الإتصال وأعتقد
مظهر زي دا ، نعتبروا
رد فعل طبيعي.

إلا


إذا كانت دروعنا الإجتماعية
من خلال قيم التربية قوية
ومتأصلة فحتماً ستقود
أبناءنا إلى بر الأمان

والإ

فهذا مصيرهم

[بورتبيل]

كيف لا اعشق جمالك
لاااااااااااوحبك
لك التحية
ولله المسالة دي .. مخجلة جداً في الايام دي .. انا واحد من الناس لا اتمنى ان اراها ..
وعيب ولله عيب

[Madanawi]

المثل بيقول ، اذا لم تستحي فافعل ما تشاء ،

الموضوع وما فيهو يا اخي العزيز ان ارباب الاسر اشتغلوا بالحياة وهمومها ونسوا ان اغلى ما يملكون هم ابناءهم وبناتهم ، اسال الله ان يمكننا من اعادة الامور الى نصابها قبل فوات الوان,,,

[ود المطامير]

لا وحبك اغرب حاجه نفس البتتكلم عنو خاتيو توقيع ليك (صورة البت الفي التوقيع بتاعك)

ر

برافو عليك والله
والله صورة توقيع توقع القلب
وأخير البنطلون الداير يقع

[meshanshow]

ياخي اتق الله بتتكلم عن العري و خاتي ليك صورة بنت مامحتشمه انته اول ابدا بي نفسك و بعدين اهدي الناس دي

[لااااااوحبك]

السلاااام عليكم



اولا اخوانى الاعزاء


ليه الهجوم على كدة ياااااااااااا اخوانى الاعزاء
انا انثى والانثى هكذا صورتها



العيب على الرجل الزى يغير شكله الرجولى بلبس بنطلون ساقط ويعمل جيل ويشيل حواجبو كمااااااااااان ولا انا غلطانة


صورتى تدل على الانثى التى هى اصلا هكذا منذ الازل لم تتغير

وكلامى عن عادات غريبة ابتدعها الرجال فى لبس البنطلون

ما دخل صورتى بانتقادى للصورة المشوهة للرجل الشرقى فى بنطاااله الساقط

ارجو التمييز بين المواضيع وفهمها

والفستان معروف من زمن حبوباتنا والفركة والقرمصيص
ولا انا بقول كلام ما حاصل


المهم عيب على البقول عار عليك ازا فعلت قبيح



لان العاااااااار انو يكون فى راجل بنصف انثى



والله المعين

[MASS77]

لا وحبك
ليس هجوما ولكن النصح
الانثي السودانيه ظلت لاجيال الانثي المحتشمه
الانثي التي تراعي ربها ودينها وواقعها وعاداتها واخلاقها
وسلوكيات مجتمعها
الانثي السودانيه باحتشامها اعطتنا المفخره بانثي ناضجه
وليست سلعة تعرض في الشوارع مفاتنها علي الناس
الانثي السودانيه تختلف عن نظيراتها من العرب بزيها المهذب
بقناعتها بان الاحتشام فضيله وليس اجبارا الاحتشام يجعل الرجال يحترمون من تزين نفسها به
ليس هجوما سميه خوفا عليها او اشفاقا بها او تزكيرا لها
بانها ذاهبه نحو السقط نحو سكة الا احترام نحو سكة نهاية الحياء
الانثي السودانيه ليست كما عرفناعنها بالزي المميز الذي يعكس تمسكنا باخلاقنا
لما تصر حواء السودان علي ارتداء ما يجعل الطامعين ينظرون اليها بانها مجرد
سلعه يتكالبون عليها
لما ترتدي الضيق والقصير والخطوه وغيرها وحدث ولاحرج من الزي الغيرمحتشم
الا يوقفنا ويقلقنا ذلك الا يجعلنا ان نذكر حواء ابنتنا اليوم واختنا وام المستقبل
ونموزج التربية الاتي هل نجعلها تدلف وتربي وهي تحتاج الي الرشد والرجوع الي
مكانتها العزيزه بيننا
صدقني
اللبس المحترم ليس تخلفا كما يدعي المجترون خلف الموضه والعولمه وليست مخجله
كما يرون ضعاف النفوس وانما زينه تتوجها وتجعل الكل يحترمها ويهابها ويجعل لها الف حساب
انظر الي المحتشمه في الشارع لن تلاحقها الاعين ولن تجرحها النظرات القاتله
تجد الكل يخفض بصره احتراما واجلالا لها بعكس العري فالنظرات تغوص بها اينما ذهبت وتقتلها
وتجري خلفها الالسن بعبارات زاهيه حتي تقع فريسه في مخالب المتربصين وبعدها تنعت بكل قبح
خوفنا علي الانثي ما يجعلنا نزرف الحروف علها تعود
اما المتشبهين بالاناث برغم اني شاب الا اني لا استطيع مخاطبتهم لا نهم تجردوا من رجولتهم
وتخلوا عن مبادئهم ومن تخلي عن مبدائه فلا نقاش يجدي غير ان ننظر اليهم باحتقار

[شبرقية]

الفستان معروف من الازل صح
بس كمان التوب امكن يكون معروف قبلو للسودانيات
الفرق شنو بين الولد المنزل بنطلونو
والكاسية العاريه ?
انتي بتتكلمي عن الولد
الي هو ولد والمعروف انة المجتمع مابحاسبو في كل شي صح او لا?
طب مابالك لو البنت ظهرت بالشكل دا
في مجتمعنا السوداني?
هل اصبح هذا شكل المراة الشرقية المسلمة

علي الدنيا السلام

[شبرقية]

نعيب زمننا والعيب فينا
ومالزمننا عيب سوانا

???????????????????????
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!

[samah]

ما دخل صورتى بانتقادى للصورة المشوهة للرجل الشرقى فى بنطاااله الساقط

ارجو التمييز بين المواضيع وفهمها عزيزتي كنت واثقه انك انثي وانثي اجمل من التي في الصوره لم اكن احب ان يكون رد فعلك هكذا ابدا المهم انا معك لايجب خلط الامور كان علي الذي لديه تعليق ارساله في رساله خاصه هكذا اكرم حبيبتي الصوره غير مرغوبه مع مشاركاتك فهي حقا جميله ونحن لنا بما تكتبينه والصوره او التوقيع يعبر عن صاحبه ودمتي

[عبدالرحيم سعيد]

ليس الهجوم علي الانثي الفيسلوجية تكوينا كانت فهي خلقت من اجل سكن الرجل الاخشن 0 ولكن ارتقاء( القرباب)الي مرحلة السديري للبنت هو عين الهجوم يااخوانا انا في دولة خليجية اقول ليكم في بعض بناتنا لو ماتحدثت مابتعرف هي خواجية ولا سودانية واذا تجرأت علي النصح انت اصولي او متخلف مهما تحمل من مأهل لازم تكون مدرن (ليت شعري سمعن بعين تدنقر من واليهن)السترة في العرض والثياب سمحة يااخوتي هيا ندعو لها0 توا0 وايد علي ايد تجدع بعيد0

[magdi]

لااااااااوحبك :::

معليش يا أختي ... إختلاف الأراء لا يفسد للود قضيه .. وإذا كان وصلك تجريح في البوست السابق من بعض الأخوة فإنني أعتذر بالنيابة عنهم ... وحقك علينا ... التوقيع وتعريف العضو هذه أمور شخصية يا أختي ...
أنا أؤيد كلامك تماماً فيما يحدث من بعض الشباب في موضوع اللبس بالذات وهذا هو الحاصل فعلاً .. أما موضوع شيل الحواجبين فهي المصيبة الكبري ... يعني أخواتنا البنات نسيو موضوع اللعنه في شيل الحواجب ومسكوا فيها الأولاد والله المستعان ...
يا اختي الكريمة .. الحلاق عندنا أنا بتكلم عن الرياض ... تدخلي فيهيو وكأنك أمام كوفير وليس حلاق للرجال .. توجد فيه كل انواع الكريمات لتنظيف الوجه والبشرة وايضاً توضيب الحواجب ...
أدعو الله أن يهدي الجميع ...
وبعدين ياشباب الموضوع كان واضح جداً ... عن سقوط البنطلون وشيل الحواجب ..
ومافي داعي لتجريح البت كده ؟؟؟

[Madanawi]

ليس الجمال باثواب تزيننا ************* ان الجمال جمال النفس والخلق

انا اشكر الشباب لما تداولوه من اراء تصب جميعها في قالب واحد الا وهو احترام الراي العام والاهتمام بالمظهر اللائق ، فمظهر الفتاة وهي تلبس من الملابس ما لا يليق واخلاقنا وقيمنا كمسلمين وسودانيين فهو امر بلا شك ترفضه الطبيعة والمنطق ناهيك عن الدين والاخلاق الحميدة ، اما الحديث عن البنطلون وطريقة لبسه من قبل بعض الشباب فانا اقو ان هذه ظاهرة سالبة والحديث عنها ولفت انتباه المجتمع باكمله لها واجب على الجميع ولكن ارجوا من بعض الاعضاء ان لا يتهجم على اعضاء اخرين وارجو من الكل ان ينتقوا عنوان يعكس ما يحويه الموضوع داخل البوست ،،،

[بت الشبارقه]

الي الزميله العزيزه لاااااااااااااااوحبك ... ما حسبت انت كاتبه كم الف؟. ها ها هاااااااا.
والله الموضوع عن الصوره في التوقيع ده شكلو ما موضوع وبعدين مع احترامي لكل السودانيات المحتشمات الاحتشام ابدا ما كان باللبس ... انتو عارفين لبس العبايات والخمارات ساد في وطنا متين؟ بعد سنة 89يعني بعد الجماعه ما جو البلد ودي الحسنه الوحيده الطلعنا بيها منهم ولو في زول بيذكر او كان مولود الزمن داك كان ناس الحكومة بيحلقوا للنسوان راسن في العربات لو الواحده ما لابسه خمار (زي ناس الكشه بتاعة التجنيد الان.... ) انا مابيهمني كتير ناس الخليج وبيلبسوا شنو لانهم عمرهم ما اهتموا بنلبس شنو ولي شنو.. السبب في دخولي الهجوم الشنوه عن اللبس, والكلام في الحشمه ما بيعني نسيبه واخواتها اللاتي تعرين داخل العبايات و لا بيعني المجبصات كمان لكن الحشمه جوانا العفه مرضوعه مع اللبن منذ الولاده .. بعدين برضو عندي حته انبه عليها السودانيين والسودانيات فئه اقل من القليله هي التي تمارس تلك التقاليد المنقوله لو من الفضائيات او من الغرب ومستحيل داخل السودان ولد يلبس بنطلون واقع لو ما عشان الناس عشان نفسو.. حا يقاطعوه الشباب لانو ماممكن يماشوا انثى ... زمااااااااان امكن قبل ما نتولد حتى ,ظهرت موضة الشارلستون واسع تحت وضيق فوق وكان الرجال بيتنافسوا في عرض البنطلون تحت الاوسع منو... (شوفي صورة عمنا ابو شوارب في المنتديات) المهم نفس المواضيع دي اثيرت حينها من اهل الدين والملتزمين لكن ما قدروا يعملوا حاجه الموضه اخدت وقتها وراحت وبقت من الذكريات الجميله لاهلنا برضو البنطلون بجي يوم وبيرفعوه وتبقى ذكرى ليهم
يا اخوانا نحن نربي الشارع يربي الكل يربي واللا يتربى ما هي المشكله المشكله ابعد من ما ممكن نتصور....
البنت الفي الصوره حقيقه جميله وانتي اجمل زكرتني صور ناس زمان الشقه والفستان العاري وقصير وخليهم يرجعوا لي صور اماتهم كل من تزوجت في السبعينات ...
لك الاحترام

[بت الشبارقه]

الافضل ان تتحشم الكلمات قبل الجسد فالجسد فاني والكلمه باقيه
في مثل بيقول :- الحدسه اطول من العمر .. راعوا ثم راعوا وراعوا .... مشاعر الاخرين حتى وان كانوا على خطأ

[Rudwan Elhaj]

المحور الأول :
( إِنَّ الَّذِينَ يُحِبُّونَ أَن تَشِيعَ الفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالآخِرَةِ )
( التهاون الاسري والتقليد الأعمى والإنصياع للرغبات إتباع الموضة ثقافة القنوات الفضائية وترك ما يعنينا منها وأخذ ما لا يعنينا .
المحور الثاني :
وللبيئة تأثير كبير في العادات والقيم والطبائع وحتى الأحاسيس والمشاعر فساكن السهل سهل ومنبسط و مرهف الحس وطيب المعشر كما الحال في الجزيرة ومدني وساكن الجبل وعر وساكن الصحراء ميال إلى الجفا أحيانا أكثر من غيره وهكذا الحال حِلاً وترحالا .. ولكن أن يصل الحال الى مثل هذا التدني والإنقياد والسفور وكأن الناس لا ترى غير ( هذا البنطلون والذي يكاد أن يقع ) هذا تلكم هي المصيبة والمصيبة الأخرى إنتقال هذه العدوى وإنشارها في مجتمعاتنا ، فلا نقول إلا ما يرضي الله ( أتقوا الله تعالي في دينكم وأتقوا الله تعالي في أنفسكم وأولادكم ) ولا نكون رمزا للفتنه والبذاءة وقلة الأدب ..
المحور الثالث :
أصون عرضي بمالي لا أدنسه .. لا بارك الله بعد العرض بالمالِ .
وأختم بقصة قصيرة اتمنى ان يكون فيها عبره لنا جميعاً ..
كان قديماً في المدينة قاضي ينظر في قضايا الناس ودعاويهم .. وفي ذات يومٍ دخل عليه رجل وامرأة ، وادَّعت المرأة على الرجل وهو زوجها أن لها عليه خمسمائة دينار مهراً ... فأنكر الزوج أن يكون قد بقي لها في ذمته أيُّ مبلغٍ مالي .. فقال القاضي للزوج بعد أن سمع دعوى الطرفين : هات شهودك ليشيرون إليها في لشهادة ..
فأحضرهم الزوج ، فاستدعى القاضي أحدهم وقال له : انظر إلى الزوجة لتشير إليها في شهادتك .. فقام الشاهد لينظر .. وقال القاضي للزوجة : قومي واكشفي عن وجهك ليتعرف عليكِ الشاهد ....
فقال الزوج : وماذا تريدون منها؟!
فقيل له : لا بد أن ينظر الشاهد إلى امرأتك وهي مسفرة كاشفة عن وجهها ، لتصبح معرفته بها ...
فكره الزوج ان تضطر زوجته إلى الكشف عن وجهها أمام الناس ، فصاح قائلاً : إني أُشهد القاضي على أن لزوجتي في ذمتي المهر الذي تدَّعيه ، ولا تكشف وجهها أمام الرجال الأجانب !!!!!!!!!!!!!!!!!
ما رأيكم إذا كانت هذه القضية مطروحة أمام القضاء في وقتنا هذا ؟ ترى هل تكشف عن وجهها !!!!
وما رأيكم إذا كانت تلك القضية مطروحة في الزمن القادم ، يا ساتر .. أمكن القاضي نفسه يكون منزل البنطلون ( لحدى تحت ) .
( اللهم أجعل الحياة زيادة لنا في كل خير وأجعل الموت راحة لنا من كل شر ) ..
تحياتي وإحترامي للجميع ...

[ود المطامير]

أختى العزيزه
أنا غايتو شلاقتى خلتنى أهاجم الصوره
وهى والله المفروض أعمل ليها برواز عشان
أنا من أدخل المنتدى وجرى عليها أتأملها
تمام وبعد داك أحوم فى المنتدى رغم إنى
شفتها قبل كدا فى منتدى ( سودانا ) فى
توقيع مشرفة المسابقات ( سروويه )
غايتو ربنا يكتر لينا الصور السمحه دى .