اللّيلة دى كانت ليلة الليالى , ولو إنو أعياد اللّة الإثنين عشناهم بالفرحة والحب والتراحم إلا أن الليلة دى كانت وح تبقى فى الذاكرة أبد الدهر , عيد , الليلة يا ( القلب الطيب) ح ( أسوّى سواتك ) ( خرتمية سطر ) , أااااااة , يا شيطان الشعر ( مشيت وين) ؟ ما أحوجنى إليك اليوم ؟ وأنا أعيش ليلة ولا ألف ليلة وليلة , يلا يا ود المطامير أمسك المايك !!!!!
إحم إحم ... على الطلاق قاعد بسوّى فى عشاى , الحلة تجقجق وأنا بقطّع فى الصلطة أكان يقطع ليك قِطّيع الصلطة صوت الموبايل , وبكلم فى نفس براى , دا منو الداير يحرق لى حلتى ؟ أرد عليهو ولأ ما أرد ؟ ها زول خلّو النضمى ملحوق عِلا الحلة أكان حرقت الترابة دى فى خشمك , جزيرة ومقفولة أكل وأملى بطينتك وبعد داك لو فى نضمى إبقى أنضم , ونغمة الموبايل صوت وليدى لما كا ن ببكى , وقلت أسكت الشافع .
_ ألو
و تغير مجرى حياتى , من عدم من لا شئ من الترابة دى فى خشمى وللقمّة طوّالى
آنسوان المطامير ساكتات ليشنو ؟ ما تزقرتن , على الطلاق الشرف اللى جبتو ليكن أبوى العمدة ماجابو , على الطلاق ولدكن إستضافوهو فى قناة مدنى وعلى الهوا مباشرةً , على الطلاق (شليقان الغنيان) إبحت ألف سنة وما يطول , الليلة ( آلقلب الطيب ) ما بسوّى سواتك ( خرتمية سطر)
الحلة إنشا اللة تبقى سكن والعشا (يتير) ويا يمّة ما تخافى علىّ إتعشيت حب .. ريد إلفة محبّة كدا ما شافها عاد زولاً من المطامير , على الطلاق آيمّة إتعشيت مع ناساً ما كنت بحلم بيهم وأوصفهم ليك كيف والقمر لمّا يشوفهم بدّسّ منهم ورا السحاب ؟ ! ويسدّوا عين الشمس تب آيمّة وإقولوا ليها أمشى نحنا بنضوى , آيمّة ذغردى ولدك الناس السمحين دول رفعوهو ليك فووووق حرّم قبل كدا ما لقاها مطموراوى , تربايتك آبا العمدة ما وقعت واطة , مادام ولدك إصطفوهو حبياً ليهم . عِلا ( آلقلب الطيب) ما بسوّى سواتك , خرتمية سطر , ما اليلة دى ليلة العمر .
رد مع اقتباس
المشاركة الأصلية كتبت بواسطة تسنيم خالد
المفضلات