يا غربة يا بكاية يا غشاشة يا مستهبلة

[شبارقاوية]

وهم الغربة

ياغربة يا بكاية يا غشاشة يا مستهبلة
تغرينا بدرهم قروش ووراهو قنطار بهدلة
جيناك لسنتين وبس او قول تلاتة نكملها
نلقى المراد ونودعك نرجع حياتنا نبدلها
نبنى البيوت فى العاصمة وبكوم اثاث بنجملها
وكرونا حارة بنحضرها اصلو التنقل مشكلة
ونكمل الدين بمهل والسمحة جاهزة نحصلها
غير القروش اللى الاهل عبر الشهور حنرسلها
والباقى يدخل فى البنوك نشوف زيادة نشغلها
ناس فكرت تجنى العلم تبدا الدراسة تواصلها
احلام كتيرة وشيقة وامال كبيرة ناملها
لكن حساباتنا الغلط فى كل عام بنرحلها
مرت سنين من العمر بنعزها وبنفضلها
والحسبة وصلت طاشرات يمكن نعيش وندبلها
وتعال نحاسبك يا وهم من غير رقم او امثلة
كان للقروش نجرى ونحوش لكن تقول بنشاكلها
ما راضية تقعد فى الجيوب وتقول حرامى بينشلها
لكن بترقد فى الضهور بديون تقيلة مطولة
ممحوقة ما تقضى الغرض واقل حاجة تكملها
كملانة بطحاء وحق وزن ومجاملات مستقبلة
وضرائب ابعاج ندفعها والزامى حمدى نحولها
واحلامنا صبحت زى سراب نمشى ونجر ما نحصلها
يا ريت يكون هم القرش يا غربة فيك دى المعضلة
لكن تعال شوف الهموم الما افتكرنا نقابلها
ذلة ومهانة واحتقار خلو النفوس متململة
سجنا كبير فيهو الكفيل سجان قيوده مكبلة
شغلانة شاقة ومؤلمة ودايما تكون مستعجلة
ما عاد يكفيها النهار تحتاج ليالى مليلة
امراض كتيرة بدت معاك قبل الالم تستقبلها
ناس الضغط والسكرى وفوق القلب وجع الكلى
مصران وقرحة واكتئاب ونفوسنا ما متحملة
وبقينا فيك كيمان لحم تحت الهدوم متدندلة
واكيد يكون اكل العلب واكل المجمد عاملها
عدم الرياضة مع المشى لابد يكون ليهم صلة
وكمان تعال لمعادلة ما قدرنا اصلو نعادلها
سجن العيال جوه الشقق ولا الفراق للعائلة
فى كل طرق تلقى القرف نلقى الخيوط متداخلة
جيب العيال بجيبنا مال وجيوبنا غيره مميلة
وصغارنا صبحت بالزهج متوحشة ومتجفلة
لا قادرة تلعب فى خلا لا ضل شديرة يضللها
ولا قادرة تدرس بنفس من الدروس المذهلة
تلقى الولد غالبه الكلام والبت كبيرة مريلة
كل الضغوط جاتهم سوا وما قدرنا حتى نقللها
اما الفراق اصل الوجع ومشاكله باينة مقيلة
كل زول مفارق عارفها وما اظن فى داعى اوصلها
يا غربة اديناك كتير ادينا خاطرك يسهلها
خلينا نرجع بالفضل نرجع حياتنا نعدلها
امالنا فيك بدرى انتهت الا الرجول متوحلة
وبقينا زى اهل القبور لا البره عارف الداخلها
لا الجوه يرجع لوراء ويحكى الحقيقة يوصلها
لكن خلاص هان الخلاص غيرك نزل مهما علا
وان شاء الله نحيا نودعك وتكونى اخر مرحلة
يا غربة يا بكاية يا غشاشة يا مستهبلة

[/center] تاليف معتصم الامام الرياض 1995

[المسافر]

لكِ التحية والتقدير شبارقاوية

كلنا عارفين حكاية الغربة الغشاشة
دي وحافظين مواقفها وعايشنها في
كل لحظة وبرغم كده قاعديييين فيها
والأغلبية ما عندها حتى ( همّ الرجوع ) . . .

وأهبك كل الوداد

[ابوشوتال]

الدنيا ليل غربة ومطر

مشياناها خطا كتبت علينا
ومن كتبت علية خطا مشاها

لك التحية شبارقاوية الموضع هام وداير قعدة

[شبارقة]

والله يا بت أهلي عارفين !!

لكن مجبورة خادم الفكي على الصلاة ...


لك كل الود

[عبدالرحيم سعيد]

التحية لك العزيزة شبارقوية والتحية لمعتصر الكلم النحرير معتصم الذي اعتصر الحرف حتي اصدقه ونبض بلسان حال الغرباء وكتب حالهم فوعظ من يرنو الي حالهم0والسؤال هو طيب قاعدين ليه؟ والاجابة,كمن القاه في اليم مكتوفا ثم قال له اياك اياك ان تبتل بالماء0مقدور في الصحائف ما برح يلازم سوق ميقاتنا0والتلاحظ ان المعاناه تخرج جمالا في عين حزين0وتزينه سحرا من البيان 0فما كان في وسعنا ان نعرف جمال ماكنا فيه الا بعد ان افتقدناه0

[الفارس البنفسجي]

وفوق دا كللللللو
الغربة دي اكبر ورطة
في حياة المغتربين.

مالك يا شبارقاوية بتهيجي
علينا الشجون ... نحن كدا
كدا عارفين روحنا عايشين
في وهم.
بس والله العظيم اتورطنا.
واحلنا الحلا بلة !!!!!!!!!

[شبارقاوية]

الاخوان المسافر وابوشوتال وشبارقة وعبدالرحيم والبنفسجى :
اشكركم على المرور
ودمتم