يا ريت والله ترجعونا للزمن الجميل ... زمن حبيب القلوب ( ود الماحى )
وحاة الله الضحكه يطلعها من قلبك حتى ولو كان ميت ليك زول هسى دى .
من تلك البيئه جيت راكب حمارتى البتمش مترين وتحرن ساعه وسكينى فى ضراعى ومخلايتى فى كتفى ومشنق طاقيتى وحلاااة ريحة الجروف الماسكه فى العراقى ويا الملجه جاك زول وما بقول مسكت راية ( ود الماحى ) أنا وين ( وود الماحى ) وين ؟ فرق السماء للواطه , لكن برضو عشنا زمن جميل ... عشان النفوس كانت حلوه وطيبه , قوّمناها حرب مع ناس الحكومه نص النهار وحاة الله كانت سماحة حرب أريتها بينى وبين ( بت المطامير حقتى )
عشان النفوس كانت حلوه وطيبه ناكل فى صحن واحد ونقوم تانى على العكاكيز والغنائم كانت الضحكه والبسمه والإلفه والريده لى الله ساااى .
أها .. البقى علينا شنو ما بعرفو ؟ سحرونا ؟ أدونا عين ؟ عملوا لينا عمل ؟
أها قولوا لى البقى علينا شنو ؟ مالنا جنينا ؟ فطينا سطر ؟ دا ما سطر والله دا كتاب عديل كدا
ود المطامير .. بقى ما ود المطامير .. حرّم كلام ( مدناوى ) حبيبى فوقو صاح تب .. مره قال ليهو .. يا ود المطامير .. من نزلت من حمارتك فكيت الدرب .. أها الكلام دا حقيقه والله وعمل لى ضبانه من يوم سمعتو من حبيب قلبى ( مدناوى ) أها .. ود المطامير .. تكون العولمه لحست مخو وفك درب أجداده ؟ ماهو ليهو كم شهر فرد يوم ما قال ( أبوى العمده )
نساهو تب .. أها دى عين ولأ عمل ولأ سحر ؟؟؟ لاا لاا دى العولمه الحاصله اليومين دول فى المنتدى ... وين ما تقبل تلقى الزعل ما بديك الدرب ... دا زعلان ودا حردان ودا مخاصم أخوهو الكان حبيبو ولو شاف ليهو موضوع بقبل منو كدى ولاسلام ولا كلام ودا زعلان من أخوهو لأنو ما رد على ردو وأخوهو فعلا يكون قصد يطنشو أما حكاية حزف المواضيع دا خلى المنتدى ملاله والناس بقت تنظر ( للمشرفين ) كأنهم بيتعمدوا جرح كبريائهم وكرامتهم
وود المطامير .. نزل من حمارتو وركب الموجه ... وين ما يشوف غبار معافره وشكله يشيل عكازو وكمان آخر الزمن إتعلم ( المديده حرقتنى ) ( ومرات يغرد خارج السرب )
يا ريت ترجعونا للزمن الجميل ... زمن ما كنت والله بكون مع وليداتى وبشتاق ليوم الأحد عشان أرجع الجزيره وأشوفكم وأحسكم وأتنفسكم .... ومن قيفت البحر أسمع الضحك النابع من القلب ... علا .. يا سلام والله ( عِلا ) دى لى منها زمن طويل .. عِلا هسى من قيفة البحر ويدينى على راسى بخاف يلطشنى حجر ولأ عكاز مجلّى من هامة زول .
آناس الدنيا زايله والكلمه الطيبه باقيه وأفشوا الحب بيناتكم ولا تتنافروا ولا تتناحروا وإن أبعدتكم سبل الحياه فى شتى بقاع العالم هدا ( عمدتنا .. أبو بكر ) جمعنا كلنا تحت ظلال مدنى الوارفه فالنرد الجميل للرجل الجميل بحبنا لبعضنا البعض فى حبنا ليهو .
أحبتى .. تعلمت قبل ما أشارك فى أى رد على أى عضو أن أسأل نفسى من هو هذا العملاق خلف الإسم الحركى أو الحقيقى ؟؟ عمره كم ؟ مكانته الإجتماعه ؟ مش يمكن يكون قدر أبوى ؟ مش يمكن تكون مكانته الإجتماعيه يشار لها بالبنان إبقى يجى ود المطامير وبالشلاقه يطبزها !! يا عالم خلف الأسماء قامات تنحنى لها قمم الجبال مهابةً ؟
من الليله بدور أبقى سفير للمطامير فى ( ود مدنى ) أعكس ليكم تراثنا ريحة الدعاش والناس السمحين وخضرة الجروف وزرائب البقر والكمائن والجناين وغنا
بنات الفريق وهن واردات من البحر وريقان الرهو وزقزقة العصافير .
يا ود الشليقان رجع لى حمارتى ومخلايتى وسكينى .. هع .. أنا ولدك آبوى العمده ..
رد مع اقتباس
المشاركة الأصلية كتبت بواسطة ود المطامير
المفضلات