الامريكان جايين خلاس

[امير عبدالباقي]

ماسمعتوا الخبر يا ناس قالوا الامريكان جايين خلاس

الناس ديل بحبو الموت و نحن الموت ندوسوا دواس

بخافنا نجيهو بى رجلينا يدخل هو القبر و يسدو بالترباس

الموت ما هو المجربنا و عارف كيف أنحنا مراس

لكن هم ما عارفين و قايلين إنو في السودان بحوسوا حواس

أمانة ما إتمقلبتوا كان جيتوا و سمعتوا وساوس الخناس

و أخير ليكم تشربوا السم مع البيرقر و إنتوا هناك في تكساس

بدل لا تلموا في ميته ولا عيشة و لا تتعدوا في الأجناس

انحنا أصلنا ما بنختا و لابنغدر وليد العم زي ما عمل جساس

مشاكلنا بنعرف ليها و بنحلها برانا ما بندور جنود حُراس

بنعرف نحنا للهمباتة جنود الخيل ونعرف الخاين الخساس

ونعرف كيف نحقن الدم وكت يلدغنا العقرب الدساس

ضيفنا يجينا نفرح بيهو و قبل البيت نوسع ليهو فوق الراس

اما أهلنا أسياد بيت عزاز وكرام بدونم نحنا من غير ساس

أسئلوا الجار عن السودان و أولادو و أسئلوا شيوخكم الفراس

شكلكم إنتوا ما سامعين عن اوهاج وعن ناس جون وعن عباس

تماسيحا ترافس النيل تفيض بيهو و تحرت في مياهو حَراس

أسودا تحمي للغابة تخلي الطيرة فوق الجوعلي أطفالا ما تحتاس

نحنا الشافع الفينا غداه جمر وكان إتعشى قرض ليو حديد ونحاس

اهو اليوم داك كلام المك مع إسمعيل مدون عندكم كراس

وراس غردون لحدي الليلة يتكلم و يحكي حكاية الأحداس

أعملوا شخيت و أقيفوا ورا لأنو أرضنا بي بوتكم ده ما بتنداس

وكان جيتوا قبوركم جاهزة محفورة بتحضنكم يوم تموتوا فطاس

[aborawan]

يديييييييييييييييييييك العافية يا كابتن

[مزوني]

راااااااااااااااااااااااااااااااااااائع على الاخر
على ما اظن لو الامريكان شافوا الكلام دا
حيزوغو من البلد

[أبوريلان]

هع هع هع هع أبشر بالخير دايرالا عرضه يا أمير .