انتظروني 00 قريبا جدا 00

[ابوموفق]

اخواني الاعزاء 00 قريبا جدا سوف احكي لكم قصة حدثت لي في السودان انا وعائلتي 00عندما كنا في الاجازة 00مع بعض النصابين 00جاري تحضير القصة انتظروني 00

[صلاح ودالطاهر]

اخواني الاعزاء 00 قريبا جدا سوف احكي لكم قصة حدثت لي في السودان انا وعائلتي 00عندما كنا في الاجازة 00مع بعض النصابين 00جاري تحضير القصة انتظروني 00

ابو الموفق ربنا يوفقك اكثر فاكثر نحن في الانتظار

[معتز الريح]

الحبيب أبوموفق ..
دي ما حكيتها لي .. كدي قولها .. منتظرنك ..

[نزار حسن محمد]

جيتك ..وفى انتظار عينك ..كملت الصبر كله ...

[مختار بازى]

فضلنا وحاتك منتظرييييييييييييييين

[هشام السماني إبراهيم]

اها منتظرييييييييييييييييييييييييييييييييين

[مختار بازى]

ولســــــــــــــــــــــــــــة,,

[هشام السماني إبراهيم]

الحر ماتشرنا

[مختار بازى]

الحر ماتشرنا

شفتا ناس الشماراااااااااااااااات ديل يا ابو موفق

[ابوموفق]

استاذنا الفاضل ودالطاهر / معتز / نزار حسن / مختار بازي / دوم99 شكرا لانتظاركم الطويل في الحر وانشاء الله مايكون في زول فيكم تعب 00 والجو اصلو اليومين ديل بيني وبينكم مرطب شديد ( رطوبة حر ) وانا كان سبب تأخيري هو محاولة كتابة القصة كما حدثت00 وكنت اخشي ان انسي 00 وكنت استنجد بعض الاحيان بام الاولاد 00 فتعمدت الي التأني وهي عبارة عن كمين من بعض المحتالين والنصابين 00 و حتي لايقع احدكم مع هؤلاء النصابين هذه هي القصة كاملة و حقيقية وهي التي حدثت معي 00

عندما كنت في السودان العام الماضي في الإجازة السنوية انا وأسرتي بتاريخ 20/8/2006م 00وفي الأسبوع الأخير من الإجازة 00قررنا أن نقوم بزيارة إلي مركز عفراء التجاري 00 وهو يعتبر من المعالم البارزة في الخرطوم 00وكان أبنائي فرحين بهذه الزيارة00 وعندما وصلنا إلي المركز ودخلنا لنتجول إذ بصوت ينادي 00 يا أخ 00 يا أخ 00 التفت نحو مصدر الصوت فإذا بفتاة في مقتبل العمرة00 ذات ابتسامه عريضة ترحب بنا00 حيث قالت لو سمحت يا أخ ممكن تتفضل شوية00 عاوزين نسألك شوية أسئلة ؟؟ لو جاوبتها ممكن تفوزوا بجائزة أنت وأفراد العائلة 00 نظرت نحو زوجتي لأري هل هي موافقة 00 فوجئت بان زوجتي تقول خليها التسأل 00أمكن نفوز بالجائزة !! وفرح الأولاد وبدأت عليهم علامات الابتهاج والسرور00 حينما علموا بأن هناك جائزة 00 المهم قالت أنت مغترب وألا عايش هنا في السودان ؟؟ قلت ليها عايش بره السودان00 ثم بدأت بالأسئلة 00وكان السؤال الأول كالتالي : هل أنت تحب السياحة ؟ قلت لها نعم00 قالت صاح 00 السؤال الثاني هل سبق أن سافرت إلي أي دولة خارج السودان وأي الدول من التي قمت بزيارتها اذكر اثنين ؟؟ قلت لها نعم سافرت إلي تونس وأثيوبيا 00 قالت صاح 00حينها بدا أولادي بالصفير والتصفيق 00وتخيل لهم كأننا استلمنا الجائزة 00ولكن تبقي السؤال الأخير فكان السؤال الثالث كالتالي : إذا عرض عليك قضاء أمسية جميلة مع أفراد أسرتك والمشاركة في برنامج مجاني مع تقديم وجبة عشاء وتناول بعض العصريات هل تمانع من ذلك ؟؟ قلت لا بالطبع لا أمانع قالت صاح ألف مبروك اذن لقد فزت بالجائزة 00 00تعال معي هنا عند الاخ00000 وهو سوف يشرح لك تفاصيل البرنامج وطريقة تسليم الجائزة00 وشكرا 00وسلمتني إلي الأخ 000 وهو شاب أنيق يرتدي ملابس جميلة ويلبس كرافتة ويجلس علي كرسي وأمامه طاولة بها بعض المطبوعات 00 جلست أمامه وطبعا الأولاد من خلفي واقفين كلهم وأمهم بسلامتهم منتظرين الحايحصل شنو !! رحب فينا الشاب ترحيب ممتاز وطلب لنا عصيرات طازجة أنا وأفراد أسرتي00 وقال لي ألف مبروك الجائزة 00 قلت ليهو الله يبارك فيك 00ووجهت نظري نحو أولادي وقد بدأت عليم علامات البهجة لقد حان موعد تسليم الجائزة 00 وهم في لهفة وتشوق لمعرفة نوع الجائزة !! هل هي سيارة 00 دراجة 00 لاندري 00 قال الشاب نحن الجائزة ماح نسلمك ليها هنا 00حاتستلمها في مكتبنا بالخرطوم العمارات شارع 15 عمارة كذا00 شقة رقم كذا00 وعشان نضمن حضورك لابد أن تدفع الآن مبلغ خمسون ألف جنية أمانه بطرفنا بسند استلام لحين حضورك في موقع الحفل لاستلام الجائزة 00وسنقوم برد المبلغ اليك حين حضورك مساء اليوم في الساعة السابعة أنت وأفراد أسرتك00ويكون من الأفضل أن تحضر معك دفتر شيكات أو مبلغ نقدي لايقل عن اثنين مليون جنيه سوداني 00يمكن يعجبك البرنامج وتشترك!! أنا صراحة قلت ياربي دييييييل نصابين وألا شنو !!! ونظرت إلي زوجتي فإذا بها تقول ادفع ليهو 00والأولاد يؤيدوها00 قلت في نفسي خمسين ألف بسيطة جات جات ماجات الله يعوضنا 00 توكلت علي الله وطلعت الخمسين ألف وأنا قنعان منها ما حاترجع تاني 00 المهم دفعنا الخمسين واستلمت الايصال 00 وودعنا الأخ الشاب علي أمل اللقاء مساء اليوم في الموقع 00 تجولنا في عفراء وتسوقنا 00 وخرجنا 00وفي المساء حملت معي دفتر الشيكات و ذهبنا إلي موقع الحفل حيث سيتم تسليمنا الجائزة00 وصلنا شارع 15 ووجدنا العمارة 00طلعنا في المصعد الدور الخامس 00حيث وجدنا هناك قاعة كبيرة أمامها استقبال جميل تجلس عليه احدي الفتيات الجميلات ذات ابتسامة مرموقة حيث بادرتنا بالتحية وطلبت مننا الجلوس في الكراسي 00ثم قالت الأخ ابوموفق 00 قلت نعم00 قالت لو سمحت أتفضل عشان تستلم الخمسين ألف جنيه حلقتك ووقع هنا بالاستلام هنا 00 استلمت المبلغ وانا بين مصدق ومكضب00 حينها انتابني شعور بأن هؤلاء الناس طيبين00وكان ظني فيهم خطأ 00 حينما قلت انو قروشي ماحترجع لي تاني 00قالت أتفضل اجلس دقائق حتي يتم استدعاءك من قبل الموظفين لمتابعة البرنامج بالداخل و شكرا 00 جلسنا00وكان بجوارنا عدد كبير من الأسر السودانية في انتظار دورهم بالدخول في القاعة00 حضر شاب وسيم أنيق ونظر ناحيتي وكأنه يعرفني وقال انت ابوموفق00 قلت نعم 00 مرحب بيك 00 قال أهلا وسهلا تفضل 00 دخلنا القاعة الكبيرة ذات الإضاءة البسيطة 00 وأصوات موسيقي صاخبة تزلزل الأرض تبعث من مكبرات الصوت العالية وتكاد ان لاتسمع شيئا ونظرت داخل القاعة ونحن في دهشة شديدة 00 وأولادي فرحين بهذه الأصوات والاضاءات الملونة الكثيرة 00 هناك مجموعات كثيرة و هائلة من الاسر السودانية يجلسون في طاولات متعددة 00 متفرقة 00وحلول كل واحد منهم شباب يجلس في كرسي مقابل لكل منهم 00وحاولت الاقتراب من احد الطاولات لاتحسس نوع الحديث 00ولكني فشلت في الاستماع إلي أي كلمة لان اصوات الموسيقي عالية ومتقطعة لاتسمح لك اطلاقا بسماع أي كلمة00 المهم جلسنا في الطاولة المخصصة لنا وجلس الشاب في الكرسي المقابل لنا وطلب لنا عصيرات علي ما أظن انه ( تانك برتقال ) وبدا بالتحدث إلي أولادي ويسألهم عن أسماءهم والضحك معهم ومداعبتهم 00 سألت الأخ 00ماهذه الموسيقي الصاخبة ؟؟ أكاد ان لا أسمع شئيا 00 قال هذه الاصوات تم وضعها خصيصا حتي لاتتم مداخلة الأصوات في بعضها 00 لم افهم شيئا !! المهم قلت ليهو طيب ممكن تخفضوا الصوت شوية00 قال لايستطيع احد ان يفعل فالإدارة تمنع ذلك 00قلت ليهو طيب انا اسمعك كيف ؟؟ قال بس انت ركز معاي وخلي بالك معاي 00 قال يلا ندخل في الموضوع 00وقال سوف يستمر هذا البرنامج حوالي ساعتين إلي ثلاثة ساعات هل عندك مانع 00 نظرت إلي زوجتي وأولادي فعرفت أنهم موافقين قلت له لامانع 00 قال طبعا انت لما سألتك الأخت في عفراء قلت انك بتحب السياحة حلو قلت نعم 00 قال اذا طلب منك أن تسافر إلي أكثر من سبعين دولة 00ويكون لك في كل دولة شقة مملوكة باسمك مدي الحياة بها غرفتين لمدة أسبوعين في كل سنة 00 بدلا من أن تحجز في فندق وتدفع مبالغ طائلة هل توافق ؟؟ قلت نعم 00 قال ممكن تدفع كم لو حجزت في فندق ؟؟ ضربتها في راسي يعني ممكن تكون الشقة بـ100دولار في اليوم × أسبوعين بـ1400دولار !! 00 قال لي طبعا أنت إذا أجرت في فندق سوف تدع 1400 دولار في الأسبوعين صاح 00 قلت نعم 00قال نعتبر انك بتسافر كل سنة لمدة 30 سنة 00 يعني 1400×30 = 42000 ألف دولار يعني بالسوداني حوالي 86 مليون جنيه00 تمام قلت تمام00 قال لي00 كم تتوقع حا نأخذ منك إذا اشتركت في البرنامج ؟؟ فكرت ونظرت خلفي إلي أولادي وزوجتي 00 إذا هم كأن علي رؤوسهم الطير 00 نام بعضهم والبعض الآخر بنظر بعيدا في الأضواء ويستمع إلي الموسيقي 00ووجدت زوجتي في ذهول واضح وهي تفكر في تلك الدولارات والأرقام الكبيرة 00 طبعا هذا الحديث استغرق حوالي ساعتين 00 المهم قلت له ممكن يكون نص المبلغ 00 قال قربت حاول تاني 00 ربع المبلغ 00قال يعني 00سنأخذ منك فقط سبعة مليون جنيه رائك شنو ؟؟ يعني سوف تدفع مبلغ 4000 دولار فقط الآن ونكتب لك العقد 00ويمكنك ان تدفع بالتقسيط المريح حيث تدفع الآن نصف المبلغ والباقي عن طريق التحويل البنكي في حاسبنا بعد سفرك 00 موافق ؟؟ قلت دعني أتشاور مع زوجتي وارجع إليك 00 قال مافي مانع بس يكون التشاور أمامي هنا 00 عرفت إن الموضوع عبارة عن نصب واحتيال وفكرت في المخرج !! قلت له وإذا قلت لك ماعندي رغبة في البرنامج ده وماعندي قروش ألان وسوف احضر لكم بكرة00 قال اذا خرجت من هنا سيكون البرنامج لاغي ولن تكون لديك أي خصومات ستدفع كامل المبلغ 42000 دولار قلت في (( نفسي الحمد لله كدي بس النمرق من هنا 00)) وقلت له طيب وين والجائزة 00 قال برضو حاتستلمها 00 قلت طيب سلمني الجائزة وبعدين أفكر 00 قال حاضر 00 احضر لي كبون به تذكرة سفر الخرطوم ــ بيروت ذهاب فقط تشمل السكن بفندق في بيروت لمدة ثلاثة أيام شخص واحد فقط بدون وجبات ؟؟ هل تعتقدون فرحت بهذه التذكرة أكيد 00 لا 00 لأنه في هذا التاريخ كما تعلمون كانت الحرب الضروس الطاحنة بين إسرائيل وحزب الله في لبنان 00 قلت له شكرا علي قضاء هذه السهرة الممتعة وكتر خيركم يانصابين يا حرامية 00 وانتوقايلين يعني بتضحكوا علي هذا الشعب البسيط السوداني 00سنقوم بتطعيم جميع السودانيين ضدكم وضد سمومكم 00 ونزلت انا وزوجتي ونحن نحمل أولادنا وتوجهنا إلي منزلنا 00 وكان الليل قد انتصف و أسدل ستاره 00

[بورتبيل]

D:
قصة جميلة جداً يا ابو موفق .. وربنا يخلي ليك زوجتك واولادك الشاركوك البطولة حقت القصة دي

وطبعاً هي ليس من نسج الخيال كما يتوهم البعض بل حقيقية واذ كثرة في الخرطوم مثل هذه الافعال وفي امكان لا تتوقع ان يكون فيها النصب والاحتيال .. وبواسطة اشخاص غاية في الاناقة والوسامة ولكن للاسف تقع في فخ قد اعد لك بعناية فائقة وبخطوط متشابكة حتى يدعوك تصدق اكاذيبهم وخداعهم

نسال الله ان يبعد عن الشعب السوداني النصابين والمحتالين واللصوص

[بدر الدين محمد]

ألف حمدالله على السلامة ابو موقف

[عثمان جلالة]

أبو موفق .. شكرا على القصة الواقعية .. في شركة اسمها كويست .. انتشرت في السودان .. وهي خاصة بالتسويق الشبكي ... وانت بتسرد في القصة انا افتكرت انها كويست .. برضو نفس البرنامج .. لكن بتصرف فوائد اسبوعية بعد الاشتراك بشراء أحد المنتجات .. وبرضو .. بدخلوك في أرقام خرافيه .. ده طبعا بعد ما تجيب عملا .. لأنك من تسجيلك بتكون عضو في النت وعندك رقم دخول ورقم سري ومبيعات وده اسمو التسويق عن طريق الكلام ... ما في شي قدامك

[عماد عبدالشكور]

حبيبنا ابو موفق
انا حصل لي الموقف دا في عفراء برضو