على احد الطرق السفرية السريعه كان (عباس) يقود عربته بسرعة غير عادية ومعه زوجته مما لفت إنتباه عربة الدورية المكلفة بمراقبة الطريق التى قامت باللحاق به ثم إيقافه :
ترجل (الشرطى) من عربة الدورية وعندما وصل إلى حيث يجلس (عباس) فى العربه قام الأخير بإستخدام المقولة التى تقول بأن (الهجوم) خير وسيلة (للدفاع) حيث قام بمبادرة الشرطى :
- فى شنو يا جنابو ؟ فى حاجه غلط ؟
- أيوه فى حاجه غلط .. ماشى بى 180 وكمان بتسأل فى شنو؟ إنت ما عارف
السرعة القصوى ما بتفوت 80 كيلو فى الساعة؟
- لا كان كده معليش الظاهر بس أنا (التمانين) دى فوتها بشوية
(هنا نطت المدام) : والله يا (عباس) بالغت !! أقل حاجه إنت تكون كنت ماشى
بى 200 وكده !!
هنا نظر (عباس) لزوجته نظرة معناها (أصبرى لى بعدين) !!
قام الشرطى بقطع إيصال مخالفة (تخطى سرعة) لعباس ثم أخذ يدور حول العربة من أجل إكتشاف مخالفات أخرى وفجأة خاطب (عباس) قائلاً :
- (الخطر) الوراء ده مكسور .. دى كمان مخالفة !!
- (فى إستغراب مصطنع) : مكسور!!؟؟ والله أنا ما كنت عارف !! إتكسر متين ؟
- (هنا تتدخل زوجته) : أجى يا عباس ؟ الخطر ده ما مكسور ليهو كم يوم .. تتذكر
لمن عاوز تطلع العربية من القراش وقامت (لاوزت) ليك (الكديسة)؟
هنا حدج (عباس) زوجته بتلك النظرة التى معناها (أصبرى لى بعدين) !!
- (أخرج الشرطى دفتر الإيصالات مرة أخرى) : كده عندك مخالفة تانية لأنو
الخطر الخلفى ده مكسور !! وهو يقوم بتحرير المخالفة يتوقف فجأة :
- وكمان عندك مخالفة لأنك ما كنت رابط حزام الأمان
- لا .. لا.. والله أنا مما شفتك جاى وقفت العربية وقمت فكيتو .. أنا حزام الأمان
ده أصلو ما بلعب فيهو !!
- (هنا تتدخل زوجته) : ما بتلعب فيهو شنو ؟ والله ما حصل يوم شفتك رابط
الحزام ده !!
فاض الكيل بعباس إثر تدخل زوجته المستمر ( الما فى صالحو) فقام بإنتهارها قائلاً :
- إنتى ما بتعرفى تلمى خشمك ده عليكى !! ما تسكتى شوية !!
مما جعل الشرطى يقوم بسؤالها : لو سمحتي هو (الزول) ده دايماً قاعد يكورك فيكى كده ؟؟
- لا والله هو (هدى ورضى) بس إلا لمن يشرب ليهو ( كاس كاسين) أخلاقو
بتبقى كعبه !!
- شنو يعنى سائق و(سكران) كمان ؟
- (عباس يتملص ) : لا لا .. ما تصدقا يا (جنابو) والله أنا ما حصل أصلو إشتريت
ليا (قزازة) !!
- والله هو كلامو صاح جنابو .. هو فعلا ما ( إشتراها) لأنو هو بس قاعد يشترى
(البنقو) بس !! لكن (القزازة) دى لقاها فى العربية لمن سرقها
- كمان يعنى العربية (مسروقه) ؟؟
- ما سرقا يا جنابو عشان هو (حرامى عربات) لا سامح الله … لا .. هو سرقا
عشان يوزع بيها (المنشورات) الفى ضهرية العربية دى
- (وهو يتجه لفتح الضهرية) : كمان فيها توزيع (منشورات) !!
- (يخاطب الشرطى) : (منشورات) شنو؟ وعربية مسروقه بتاعت شنو يا (جنابو)
والله دى عربيتى ؟ ثم يلتفت على زوجته :
- ما تكترى كلامك والله هسع أطلقك !!
- (الشرطى يلتفت إليها) : هو الزول ده طوالى قاعد يهددك بالطلاق ولا شنو؟
- هو خليهو اول حاجه اليبقى راجل (يعقد عليا) وبعدين يرمى(الطلاق) وإلا
يرمى العاوز يرميهو
رد مع اقتباس
المشاركة الأصلية كتبت بواسطة abomazeen
المفضلات