عليكم الله شوفو

[مجاهد]

** الليلة كنت بشاهد في التلفزيون ( والقناة الهندية كمان ) لأني كنت في بيت ((((عزابة )))) هنود ، وكان في برنامج بجيب حاجات غريبة في الهند ، المهم من ضمن الحاجات - ما حأذكرن كلهن - جابو واحد بعالج علاج بلدي ( أريتو كان بلدي ) دا علاج شيطاني ، بجيب المريض وينومو على ظهرو واجيب عصاية كانت في النار ، ويضرب الواحد لمن الله يغفر ليهو . ويقول لي الزول المعاهو تعال قرب من الزول وحك محل الضرب بي أظفارك - طبعا الترجمة من الجماعة القاعد معاهم - واخونا داك يحك ويحك لحدي ما تجيب الدم ( كدا زاد الطين بلة ) .. واغرب ما في الموضوع أن المريض كان طفل عمره لا يتجاوز شهرين وبضربو فيهو زي ضرب استاذ الدين لمن تجي ماحافظ .. والمرافق كانت امو !!!! طبعا الشرطة الهندية أخذت الزول دا - وانا لو ملهم أول حادجة بحرق الزول دا - والباقي ما مهم !!!
معليش الموضوع طويل عشان كدا حأقسمو ليكم ..........
الحاجة الغريبة التانية حتشوفوها في الموضوع رقم 2 .. ترقبوا ..

[نزار حسن محمد]

الاخ مجاهد ..
فى بلاد الهند كل شى جايز...لو كان ا لفقر رجلا لقتلته..مشكور ايها المجاهد ..

[abomazeen]

وفي الانتظــار نترقب

أبو مازن ..

[محمد عبد الله عبدالقادر]

عليك الله يا مجاهد انت البوديك بيوت العزابة شنو وكمان هنود والله دي بالغته فيها؟؟؟

[مجاهد]

عزيزي محمد عبد القادر ..
مشكور على مرورك .. بس الودتني ظروف الشغل .. ومشكورين يابقية العقد الفريد ..

[Madanawi]

الجهل مصيبة كبيرة

والهرولة خلف العادات دون تمحيص وفهم مقاصدها ونتائج افعالها

هو خواء في العقل .. ونقص في النضج .. وظلم لهؤلاء الأطفال

نسأل الله السلامة

في انتظار العدد 2

[mahagoub]

العجايب والغرائب عند من لا دين له كثيره والفقر والجهل يساعد على انتشارها

[مجاهد]

أها جيتكم تاني حبايبي :
الحاجة الغريبة التانية ,, ( والله لو ما شفتة بي عيني ما بصدق ) ,, واحدة شالت أولادا من البيت وطشت !! عارفين ليه ؟ ؟؟
أبوهم عندو حاجة غريبة جدا .. اتخيلو معاي .. واحد بياكل الحجاااااااااااااار بعد كل وجبة ( كما نأكل نحنا الحلاوة ) .. بياكل في اليوم ما يقارب الكيلو حجار .. ( الطاحونة ما بتتحمل الكلام دا ) .. كان شفتو الزول دا وهو بيهرس في الحجار دي مش كان طشيتو زي مرتو ؟ . كلام غريب والله ...
والحلقة الجاية أغرب ... استنو وشوفو .,.وطبعا الحلقة طويلة لكن انا مقطعة كدا عشان تستهلكو كمية شوق للجاي .... وفتكم بي عافية ...

[مدنيّة]

الهنود ديل عندهم حاجات ما انزل الله بها من سلطان

[منتهى]

يامجاهد حرام عليك انا ولدى الليله اول يوم ليه فى مدارس الفضل العالميه الهنديه مالك عايزنى اخاف عليهو لو دى عاداتهم بجد تبقى مصيبه

[عبدالرحيم سعيد]

حينما كنا طلبة بحنتوب يامجاهد كنا نركب الرفاس ونتحمل العشرة جلدات عشان نشوف الفلم الهندي وحينما جينا الخليج وشفنا الهنود وجع المصارين حصل

[بابكر]

الهند يامجاهد من الدول متعددة الاعراق تصور عندنا اتنين هنود فى العماره السكن فيها مابيعرفو لغة بعض !!بيتكلموا بالعربى المكسر ولا واحد فاهم التانى !! عجايب الهند كثيره

[مجاهد]

والله كل واحد منكم يا اعزائي عاوز ليهو بوست كامل عشان ارد ليهو ... لكن من خلال مروركم فهمت ان الاخوة الهنود ديل عالم بأكمله ... انتو لسة ما شفتو الحاجة الجاية ... خليكم قاعدين ..

[امنية بكري]

قصه حلوة لكن حرقت روحي بيقطيعك دا

المهم المعروف انو الهند اي شئ بيحصل فيها

الفلم الهندي ده الممثل يكون في السجن ويغني في البحر


لكن سبحان الله

والف شكر

[moh_alnour]

بالمناسبة يا مجاهد الهنود من أكثر شعوب العالم ذكاءاً ، وهم أشهر مستخدمين الكمبيوتر في العالم وهم أشطر ناس في البرمجة وهل تصدق أن شركة ميكروسوفت جنست الكتير من الهنود للعمل بها ، ويقال أن أكثرية المستخدمين للشبكة العالمية هم الهنود ، ويقال أيضا بأن أبونا أدم هبط في الهند وحمل معه شجيرة من الجنة ولذلك فالهند مشهورة بالعطور والروائح وكذلك البهارات .
ولكن يا مجاهد الهنود البتشوفم في الخليج ديل هم الهنود المساكين وللأسف غالبيتهم من المسلمين ( كيرلا وحيدر اباد وكلكتا ) ، ويكفي الهند فخراً أنها تضم واحدة من عجائب الدنيا السبعة وهو تاج محل والذي بناه الشاه جاهان لزوجته ممتاز محل ، كما أن الهند تعتبر شبه قارة وهي كانت تضم باكستان وبنغلاديش ، وفعلا الهنود أهل الدهشة والروعة والجمال .