أحمد موظف صغير في احدي الدوائر الحوميه يتغاضي راتب يادوب مع المعونات من المغتربين اشقائه اصل لي نهاية الشهر كثير المشاكل مع زوجته عند انتهاء فترة العمل يغالب نفسه في الرجوع للمنزل زي الطفل الصغير الدخل المدرسه جديد وسايقنوا للمدرسه يوم السبت الزوجه تفتعل المشاكل ان كانت غير موجوده ولو موجوده الله قال بي قولوا لي سبب تافه وصغير توقف البيت علي كراع واحده أصبحت حياته غير مطاقه كان ما تربية الاولاد كان شاف ليهوا صرفه مع الوليه دي نقاقه زي الطرفه في الخريف تنبح بس صوتا زي الكلب السعران.
أحمد راجع البيت ادندن بي كلام ما مفهوم إهز في راسو زي المجنون قابل احد اصدقاء الدراسه في الشارع العام راكب ليهوا عجله لابس طاقيه خضراء بتاعت الصوفيه شايل بطيخه في السرج الخلفي للعجله لفت نظره منظر البطيخه في عز الصيف حاجه تعطش بعد رفع راسو لقي صاحبو سلم عليهوا ..... وين انت ياخي لينا زمن ما شفناك اخبارك شنو الظاهر مرتاح من بطيختك دي ... رد صديقه والله تمام يا احمد ود الحاجه اهو شغل من مصلحة المويه للبيت ... أحمد والله مرتاح انت راكب عجلتك شغال في المويه وشايل المويه يعني عائش في الطراوه ما زينا احنا السخانه ضاربانا ومشاكل ام العيال طيرت نافوخنا كل يوم جايه بي مشكله جديده.
طيب انا عندي ليك حل تعيش في امن وسلام؟؟؟؟
والله انتو يا الصوفيه بي طواقيكم الخضر دي دائما عندكم الحلول ما تقول لي وتريحني من العذاب الانا فيهوا ده.
يا اخوي يا احمد المرأ بدقوها بي اختا عرس زي انا للمرة الثانيه.
ياخي انت شورتك فاشله الزوله دي انا معاها ثمانيه سنين عندي منها بنتين وولد اجي اعرس فيها.
ياخوي الشرع قال كده انت اصلك بجيبها بالحرام ما علي سنة الله ورسوله بعدين انا عايز احل ليك مشكلتك والله انا من اتزوجت الثانيه عائش في امان الله جنس دلع امشي لي القديمه من الفسيخ تعمل لي شربات كل طلباتي شبيك لبيك اجي راجع للجديده تعال شوف الدلع علي إصولوا كلام انقط عسل اتوكل علي الله وعرس شوف ليك واحده بت ناس كان ما لقيت تعال لي انا بعرس ليك بت حلوه وصغيره.
الفكره دخلت في راس احمد .
اتزوج الزيجه الثانيه رجعتوا عشرين سنه لي وراء اخونا في شهر العسل انطط زي الحمل كل ما إذكر صاحبو بتاع فكرة الزواج ارفع يدوا لي الله ادعوا ليهوا بالصحه والعافيه علي الفكره الجميله.
بعد شهر العسل بقي راجل مرتين بدأت المشاكل تظهر علي أحمد لا الراتب مكفي ولا المعونات من المغتربين مكفيه كان اشتري للبيت القديم البيت الجديد عايز وكان اشتري للجديد الاولاد الصغار ازعلوا منوا كمان اساسا هم زعلانين من زواجو الجديد تضامنا مع والدتهم... الايجار بقي ايجارين والجمره الخبيثه بقت نار جهنم.... ومن المساسقه بين البيتين بقي اجر في رجليهوا جر تعبان وكحيان أي شيء عندوا بالجوز.... والمشاكل زمان بيت واحد حسي بقت في البيتين المشاكل اضاعفت لدرجة بقي شخصيه غير مرغوب فيها في البيتين اقل نقاش اطور لي الطرد لو قاعد في البيت القديم اقولوا ليهوا خلاس يلا امشي لي مرتك الجديده والعكس صحيح حتي جاء يوم كان عامل شكله معاهم الاثنين بعد نهاية العمل مشي للقديمه ابت تفتح ليهوا الباب قالت ليهوا:
- امشي لي زوجتك الجديدة البلومه الحلوه نوم معاها احسن ليك الباب ده بتقيف فيهوا كده للصباح واحد بفتح ليك مافي الفضائح مافي داعي ليها ناس الفريق اشوفوك واقف كده يلا امشي
مشي لي بيت الزوجة الثانية هي ذاتا زعلانه منوا قالت ليهوا:
- إرجع لي أم الأولاد هاوسنا اولادي اولادي تلد الجريوات انا كان عارفاك كدي بعرسك .
- احمد راسو ضرب امشي انوم وين سمع صوت النوبه ومديح الدراويش جاي من الزاويه في الحي اخد كريعاتوا ومشي علي صوت النوبه من دخل جوه الزاويه لقي صاحبو بتاع البطيخه قاعد في السباته ياكل في الفته:
- هاااااااا زول الجابك هنا شنو؟؟؟؟
- الجابني جابك النسوان ديل طردوني من البيت وقت اطردوني بجي بنوم في الزاويه هنا.
- من متين النسوان ديل بطردوك؟؟؟؟
- والله بعد شهر العسل طوالي عملية الطرد بدأت معاي.
- ياخي حرام عليك انت وقت مجهجه كده وبلطشوا فيك يمين شمال ليه خليتني اعرس تاني
- والله يا اخوي عايز النصيحه انا زهجته من الوحده ونوم الزاويه براي وقت شفتك قلته صاحبي الزمان ده نتلمي تاني انا وهو الحمد لله الله جابك لي نتونس ونوم في السباته دي سواء.
رد مع اقتباس
المفضلات