عاطف معلم اول ما جاء من السودان اشتغل بي الدروس الخصوصيه في المنازل احد اصدقائه طلب منه خدمه مع ازدحام جدوله بالزبائن لتدريس ابناء كفيله مع مراعاة سعر الحصه لمدة ثلاثة اشهر بعد انتاء العام الدراسي سوف يتم تسليمه المبلغ كامل وافق عاطف وبعد انتهاء العام تحصل الطلاب علي نتائج ممتازه وكان في انتظار استلام مستحقاته وهنا بيت القصيد... عاطف كل يوم امشي ادق الجرس للراجل تجي الشغاله تقول مافي بعد تكرار الزيارات الجماعه بعاينوا ليهوا بالعين السحريه للباب مافي واحد بفتح ليهوا ولابرد ليهوا اتصل بالجوال لا رد ايضا... اخيرا لتحصيل المبلغ رجع لي صاحبو عشان احل ليهو المشكله ..... يوم خميس توجهوا الي خارج الرياض علي بعد خمسين كيلوا حسب الوصف اذ يتواجد الراجل مع اصدقائه لتعاطي الشيشه بخيمه في نهاية الاسبوع بعد ان تأكدوا ان الراجل موجود بالخيمه ولكي يخرج صديقه من دائرةالحرج قال ليهوا امشي شوف الراجل انا بنتظرك هنا...... عاطف لقي الجماعه قاعدين اشربو في الشيشه بعد السلام وبطريقه مهذبه طالب بالمبلغ... الكفيل قال ليهوا امشي انا بتصل بيك.... عاطف قام من الواطه قال اعوضنا الله الراجل حرامي وكعادة بعض السودانيين عند ما يكونوا جلوسا علي الارض وانتهاء السمر اقوم علي حيلوا بشيل في يدوا تراب امشي مسافه ادفقوا يعني حاله نفسيه للاستياء ... عاطف ملي يدوا رمله مشي من الجماعه.... بعد كم يوم التلفونات بقت تتخابت الكفيل افتش لي عاطف عشان ادي قروشوا الراجل بقي في اليوم اجي بيت العزابه عشره مرات لي عاطف .... اها وقتين لقوا عاطف الراجل مطاعا مختارا طلع من جيبوا المحفظه قدام كل العزابه قال ليهم اشهدوا يا جماعه دي قروش عاطف العايزه مني كمان معاها اكراميه تعب مع الاولاد الحمد لله النتائج كويسه شديد بس انا عندي شرط.... الجماعه اصحاب الوساطه مافي مشكله جاهزين للشرط قول... الكفيل زولكم ده رملتي الشاله من الخيمه بتاعتنا ارجعا لي..........
دي ذكرتني ايام شغلنا في البنك انا عندي مشكله هي التاخير عن مواعيد الدوام الرسمي دايما متعود بجي متاخر المشكله دي ما اتحلت الا بعد الزواج الحمد لله كمان جابت ليها قومت مدارس بدري مع الولد فيها تلبيس هدوم الله استر بعد سنتين ما نسرح لي البت.... عندنا مدير شئون العاملين راجل دموا ثقيل بصوره عجيبه بس متقصدني انا خاتي نقروا مني ملي لي الفايل بتاعي بي لفت النظر والعقوبات كان معاي زميله في المكتب نفس طبعي بس هي بتختلف الشغل بتاع البنوك عندها برستيج يعني قشره زوله من اسره مرتاحه هي انيقه وكريمه وظريفه صداقتي بها كانت قويه انا مريحا في الشغل شايل الثقيله تجيب لي معاها سندوتش احيانا شوية هدايا عطور وخلافه زوله أهلها ملانيين قروش .. الحمد لله الواحد ما اتزوج ليهوا مرا فقرانه الزينا ده كان شال حالا... المهم زميلتنا دي برضوا الراجل بتاع شئون العاملين متقصدا كانت بتقول لي يا الشريف ما تشيل لينا الفاتحه لي الراجل الفقر ده الله افكنا منوا.... قلته ليها اسمعي الراجل ده نجس ما بتنفع معاهوا الفاتحه انا بكتبوا عديل كده كتابة فلاته..... قالت لي اجي يا الشريف قلبته ولا شنو.. البت تعاين جبته لي سبيب حصان كسرت معاهو زجاج دخلتهم في عضم قديم بتاع خروف... شرطه لي ورق مثلثات كتبته فيهوا لغه لا انزل الله بها والله انا ذاتي ما عارف معناها شنو الحاجات دي كلها لفيتا في دلقان قديم ختيتا للراجل في درج المكتب..... بكلم فيني المراسه بتاعوا قال لي زولك والله الليلة فتح المكتب لقا ليهوا حاجه نطه لي وراء لما وقع من الكرسي الراجل عندوا سكري كان راح فيها.... اها يا اخوي الحاصل بعد داك شنو انا عامل فيها رايح... لقينا ليك لفه كده قعد اوصف في الحاجات الفيها تعرف الزول ده اكون كتبوا ليك ناس فرع سنار في مايرنوا من مشاكلوا الكثيره والله انا قبل كده قلت ليهوا اعمل حسابك ما تداقر الناس في معايشم لاكن هو ما بسمع الكلام انا شلته منوا اللفه جدعتها في الكوشه... الله ستر كوشت السودان ما زي هنا كان زي هنا كان اخونا شرب ما روي هنا تاني يوم بشيلوها البلديه اما بتاعت السودان ربنا بس ارحما بي واحد احرقا بي كبريته... بقينا في متابعة الراجل مع المراسله كل يوم اجيب لينا خبر يوم قال إشعر عضاموا مكسره فتران طوالي طبعا ده العضم الفي اللفه اما سبيبة الحصان تخلي اشعر كرعينوا مربططات الزجاج المكسر اشعر في جفون عيونوا حصحاص.... الله حي يا اخوانا مدير شئون العاملين بقي ذاتوا بجي متاخر بعدنا والله حكايه قالوا الراجل بقي ما بنوم في الليل من الفكي النومه بجي مع الصباح .... يوم لقيت ليك المراسله افتش في الكوشه عرقان سألتوا يا راجل ده شنو البتعمل فيهوا ده جنيت قال لي مشيت لي فكي امس عشان نفك العمل لي مديري الفكي قال لازم تجيبوا اللفه الجدعتوها...... طبعا البنات شمشارات انا قلته لي زميلتي الكلام ده سر بيني وبينك ما تكلمي زول رغم انها اتعهدت لاكن زي ما بقولوا ما تدي سر لي بت راحت كلمت واحده في المكتب شينه بتكرهني كره شديد... حكمت الله انا اصلوا البنات الشينات ديل لابحبهم لا بحبوني بعد ما فتت ليها السر البت الشينه قالت ليها........ سجمي .. سجمي وب علي يا بنات امي .. يا بت هي امي امشي الحقي روحك الولد ده متلصقه فيهوا كده بكون عمل ليك حاجه انتي ذاتك واطفش منك خطيبك.
المفضلات