كميات من البطاطين والحقائب الضخمة ما تزن فوق 60 ك وما عجز السير عن حملها

[زاهر النويري]

بسم الله الرحمن الرحيم

السلام عليكم ورحمة الله

أخواني وأخواتي أصحاب الأقلام المتفردة التي لطالما ناضلت من اجل الحوار الشيق الجاد المقوم على الحق والرأي
السديد عشمي أن أجد ردود ومبررات ورأي سليم يستفيد منه الجميع.
ولا أريد أن أطيل في الحديث
نخش في الموضوع ،،،،،،،،،،
في الأسبوع الماضي كنت في مطار الملك خالد بالرياض وكنت مع الوالدة متجهة إلى السودان كانت معي بقرض الزيارة
وما جذبني وأثار غضبي في ما يحمله أهلي السودانيون من الوزن الزائـــــــــــــــــــــــــــــــــــــــــــــ ــــــــــــد،،،
كميات من البطاطين والحقائب الضخمة ما تزن فوق الـــ 60 ك وما عجز السير عن حملها
والكثير من الإغراض الخ،،،،،،،،،،،،،،،،

والله بكل صراحة انا منهم لانو وزني كان زايد وكلف 1890 ريال بس كنت بعارض انو ما في
داعي ليها لأنها ملايات وتياب وكلها متوفرة في السودان ومتأكد انو ما يحصلوا سعر الشحن .
يعني الواحد يحسب صاح سعر الشراء + الشحن بشتري 2 من نفس الصنف.
والله ماببخل بس المغترب لازم يشيل والجاي زيارة والجاي عمرة والفي دبي وقطر وعمان واليمن وكل الدول
والله موجود في السودان والمافي ما في داعي ليهو دا راي نشوف رايكم ،،،،،،،،،،،،،

،
،
،
،
،

[محمد عبد الله عبدالقادر]

ود النويري سلامات

والله كلامك صاح مليون × الـ100
بجيك صادي تاني

[عوض صقير]

والله دى مشكلة حقيقية أخى زاهر النويرى

وأنا أيضاً من الذين يدفعون فى كل سفرية وزن زائد يتجاوز الألفين ريال


وزى ماقلت كلو كلام فاضى

دلاقين x دلاقين

[الاميره]

جرت العاده في السودان ..اتظار المغترب او القادم من خارج السودان ان يعود وهو محمل بكل خيرات بره..وخاصه النساء لو ما شالوا بالوزن الذايد بحسن بالنقيصه في كل شيء..ونظرة الجيران الضيقة ..والاحراج...كلام لابد من ان نقف عليه ولابد من تغييره ..
مع احترامي وتقديري..

[النويري]

يا أخواني هل تصدقوا أنو في ناس شايلة معاها حلاوة للسودان

[أشرف صلاح السعيد]

سلامات اخى زاهر..
والله كلامك حقيقى والمشكلة معظم الناس فاهماهو ولكن بتعمل عكسو..يعنى زيك مؤكد خشيت من انو الوالدة تفهم عدم تقبلك لحمل ما هو متوفر فى السودان بطريقة غلط او عدم تقدير منك..
ويااخى لو بقت على الدلاقين والبطاطين كويس.. تلاقى واحد شايل معاهو كرتونة تفاح.. قال شنو عشان فى اطفال هناك ما بيعرفو التفاح.. ان شاء الله ما يعرفو ..ما كلنا عرفنا التفاح بعد ما طلعنا برا السودان وحتى قبل ما نعرفو ماكان اساسا فارق معانا لاننا ما بنعرفو وين المشكلة؟؟..
بس تعرف معظم ناس السودان تودى ليهم هدايا يقولو ليك ليه التعب ماالسوق هنا اى شى فيو .. ما تدودى ليهم هدايا يجيك الكلام لافى " هو يا كافى البلا لا بهادى ولا بجامل كدا من يومو".. شى محيّر..
برأيى استهداف بعض المحتاجين من الاسرة وتوجيه قروش الهدايا للمامحتاجين اليهم افضل طريقة لانفاق المال..وكدا كدا الواحد ما بيقدر يرضى الجميع فبيكون اقلاها رفع حوجة البعض المحتاج..
موضوع مهم بس كلنا بنعوم ضدو ليه ؟ لألف سبب حنين ولا منطقى!!!!!!!!