قالو زمان النوم سلطان .......

وناموا زمان رغم اللى كان
استعمار وذل والكل فى الاخر ينام
يصحوا بناقوس الكنيسة يصحى بصوت الاذان
يصحوا يبصوا حواليهم ما يلاقوا غير انسان
طغى عليه الفقر والجهل والمرض
وسموه يا عينى غلبان
يصحى ولاده .. قوموا سبحوا المنان
يصحى اخواته .. قوموا نسعى للغيطان
وينزلوا الوسية حرث وفحت طول النهار
ويجى العصر يتغدوا جبنة ولو باشا يزود فلفل كمان
حباية طماطم وعودين خس من طين الغيطان
وراهم كوباية شاى على فحم البوص والعيدان
ويحمدوا ربهم ويقولوا نعمة وفضل كمان
يجى المسا عليهم يروح الراجل يا عينى شقيان
وياخد العشا عالحصيرة مع فتياته والفتيان
ويناموا مسلمين الامر للملك ويحمدوا المنان
المهم انه فى الاخر يقدر ينام
لا ظلم ولا سرق ولا اعترض على قسمة الرحمن
وقال
ليك الحمد كله والشكر كله على الفضل والأنعام
ويقولوا قال انه غلبان
دا النوم مملكة وفيها هو السلطان
يا ريتنا فى يوم نكون فى المملكة ولو خدام
النوم هرب مننا من ظلم او طغيان
باتت عيونا مفتحة خايفة غدر الخلان
وسط أهلك بس غريب والاسم بيهم ونسان
خايف لتغفل وتصحى ما تلاقى بيتك ليه بيبان
وادينا عايشين من نايمين لصاحيين وقلوبنا ما بتنام

من ما قرأت واعجبني
مع خالص احترامي
دمتم