في المنتدى الثقافي بوستين جميلين جداً للأخ الأستاذ صلاح سر الختم عبارة عن دراسة من فصلين تناول فيها (قضايا المرأة في القصة السودانية) وتابع أستاذنا صلاح عبر التمحيص وضع المرأة في المجتمع السوداني عبر حقبة مرت على هذا البلد، ولست هنا بصدد الحديث عن هذين الموضوعين بقدر ما شدني أن الموضوع برغم حيويته وأهميته للمرأة السودانية لم أجد الا مشاركة واحدة فقط للأخوات، وسأختلق أعذار للأخوات هنا في ذلك وهذه الأعذار من شاكلة (ما شافن الموضوع من اصلو عشان كده ما شاركن فيهو) أو (اعتبرن انو الكلام القالو استاذ صلاح كلو صحيح ومافي داعي يشاركو) أو أو .. المهم أن المشاركة لم تزد على الواحدة.
إطلعت على بوست لأخت أظنها (عضو جديد) في المنتدى اسمها (hind almahdi) البوست اشتمل على طرحها للبرنامج الانتخابي للسيدة فاطمة عبدالمحمود المرشحة لرئاسة الجمهورية، هذا موضوع يخص المرأة أليس كذلك؟ نعم هو كذلك.. حسناً تعالوا لنشاهد تفاصيل ماحدث:
- تصدى الأخ (سيد البلد) للرد أولاً ووضع صخرة يصعب نطحها لأي (أنثى) في هذا المنتدى لإيراده لحديث شريف كثرت تفاسيره (لن يفلح قوم ولوا أمرهم إمرأة) فالرجل قرر أن يذكر أي من الأخوات اللائي سيفكرن في المشاركة في هذا الموضوع بقلة العقل، والضعف، والعاطفية المفرطة، والضلع الأعوج، وزاد على ذلك بتقديم طلب للإدارة بحذف البوست مستنداً على نص باللائحة أعتقد أن الأخ سيد البلد لو منح نفسه مزيداً من الوقت في مطالعته لعرف أن هذا النص لن يوفر قانونية كافية لحذف البوست المقصود.
- فجأة تقفز الأخت (أم نوران) لتؤمن على حديثه ثم يبدآن في (البطش) بكل من تفكر مجرد تفكير في الدخول في هذه المساحة،لينضم مؤاذرين جدد لتأكيد صحة الحديث والثقاة الذين رووه لتحسم أم نوران الموضوع بهذه الضربة القاضية:
(جزاك الله خيرا اخي اومازن
ونعم براي العلامه بن باز
وفعلا المراه تتحكم بها عاطفتها لذا اثبت في الشهاده بامراتين مقابل رجل,,,ان الدعوة لاخراج المراه من وظيفتها الاساسيه والياسها ثوب الرجال,,بادخالها في سلك القضاء والرئاسه والسفاره والوزاره وماشابه هي دعاوي غربيه اريد بها انهاك قوي المراه المسلمه وغلها بما لايتناسب معها وبما هوليس له فصارت المراه بهذا مسخا لاترقي لكونها امراه وربه بيت ولاهي كفؤلما استعملوها فيه,,,فمااجمل المراه التي تقر ببيتها طاعه لله (وقرن في بيوتكن ولاتبرجن تبرج الجاهليه الاولي) مااجملها وهي ورده يانعه تنتظر قاطفه(وزوجها )الذي ياتي متعبا من عمله ليجد حضنا دافئا وواحه ظليله يستظل بها وورده يانعه وطله بهيه وكانها علي خروج ,,,ويجد بيتا نظيفا ووووو,,,فهل تفعل هذا المراه العامله عموما والرئيسه خصوصا)
ولا أنسى أن الأخت (أم نوران) وإمعاناً في سياسة (التطفيش) أدعت إدعاءاً خطيراً بأن السيدة (فاطمة عبدالمحمود) يهودية (راسها عديل) .. ياخي اتقوا الله في أنفسكم .. ياخي جبتي الكلام ده من وين ولا قريتيهو وين ولو قريتيهو ما ياهو ده انتي شابكانا الله قال والرسول قال .. طيب مامرت عليك الآية الكريمة (إن بعض الظن إثم)؟ اتحريتي من أنو فاطمة يهودية؟ اتحريتي من الكاتب القريتيهو ليهو ده انو (فاسق) ولا ما فاسق؟ ياهو ده كلامك:
اصبت الراي اخي سيد البلد (لم يفلح قوم ولوا امرهم امراه
تحياتي
تخريمه( طبعا الزوله دي قرات انها يهوديه من اليهود العاشوا بالسودان).[/size[/COLOR]]
ثم تزيد السيدة أم نوران بأنو ( بتعتقد) أنو فاطمة كانت شيوعية .. لا بالله
توقيع السيدة ام نوران (كن ممن يحملون هم الدعوة)، ياتو دعوة دي البتخليك تتهمي الناس بأنهم يهود؟ طيب ياخي ماياهو دي انتي كويسة وعندك دور في الحياة بأنك تكوني (داعية) مالك عايزة تحشري النسوان في بيوتهن بنصوص ما حرمت خروجهن للحياة؟ عارفة ده بذكرني شنو؟ بذكرني بيت الشاعر:
أحرام ٌ على بلابله الدوح ُ وحلال على الطير من كل جنسِ
وبالطبع فإن السيدة أم نوران في مداخلتها الأخيرة قررت إنكن كلكن تبطلن الكلام الفارغ بتاع الشغل والقراية وغيرو عشان يجي الراجل (يقطفكن) كوردة يانعة، وردة شنو؟ ويانعة شنو ياخي؟
اذا كانت الأخوات في هذا الموقع لم يطالعن هذا الموضوع (البروفسير: د: فاطمة عبدالمحمود) فهذه مصيبة وان كن قد طالعنه وصمتن هذا الصمت فهذه كارثة. فخلال مطالعتي للمواضيع المطروحة بالمنتدى أجد مشاركة (فاعلة جداً) للأخوات والمدهش أن معظمها مواضيع إما عامة أو (ذكورية جداً).
أها رايكن شنو؟
لي عودة مع وافر مودتي
رد مع اقتباس
المشاركة الأصلية كتبت بواسطة بت مارنجان
المفضلات