اسماعين حسن رحيمو الله قال في جمال ختوة محبوبتو:
تلاقي قليبي يرمح جاي
لما يتاتو
زي قدلة جنا الوزين
شفتو جنس النضمي دا؟؟؟ . . يا أخوانا دي ختوة خترية خلاس الخلت قليب اسماعيل حسن يزازي و ينخجّا و يرمح . . الحقيقة أنا من المعجبين جدا جدا بي اسماعين حسن . . و بكن ليهو شديد الاعجاب . . و من يوم سمعت الغنية دي . . قلبي انخجّا و انماص كلو كلو متل قليب اسماعين حسن . . و نويت تاني ما أحب لي جنس مرأة عيلا مرأة تقدل و تتاتي متل الوزينة . . و يكون ايقاع خطوتها كنقرشة اصابع البيانو . . و بقيت أشنف المرأة الما بتعرف تقدل أو تعزف على البيانو . . المرأة الما بتعرف تختار البرطوش البتلبسو . . يا أخوانا جمال المرأة يبدأ ببرطوشها و طريقة مشيها . . حريقة تحرق أي مرأة حلوة تجيك داخلة كوش كوش كوش و علالاتها سابقاها من على بعد ميل . . و الا مرأة تجيك تبرطع و تنطط و يكون عافصة ليها سلك شايك و الا مسمار بي برطوشها . . و فنجرة مني أنا نويت تاني أصلو ما أعاين لي جنس مرأة في وشها و الا جسمها . . بس بعاين للبرطوش . . كان عجبني برطوشها . . بأحترمها اشد الاحترام . . و أقول ليها . . لاكين ختوتك ما وزينة عديل كدا!!! . . و كان ما عجبني برطوشها و الا طريقة مشيها . . أقوم أعاين لي كرعيها و أكرفس ليها وشي و أقول ليها . . إن شاء الله السقط يشققن ليك و يريحك منهن . . شايلة كرعيك المتل كرعين الحرامي ديل.
مشهد أول :
عبد الحفيظ قاعد مهموم قدام خشم باب بيتو . . و ممحن . . الحقيقة شكلو خوفني . . و قلت قطع شك عبد الحفيظ دا واقعلو في ورطة . . جيتو جاري . . ناغمتو و طايبتو . . عبد الحفيظ كيفنك . . لعلك طيب يا عبد الحفيظ . . ما رد علي . . خلعتي زادت . . يا عبد الحفيظ مالك مهموم كدي . . أنضم معاي يا عبد الحفيظ . . قول شيء يا عبد الحفيظ . . عبد الحفيظ يا الله و يامين نضم معاي . . قال لي يا فيفيد . . المرأة . . أنا وكتين سمعت المرأة . . قعدت و اتفنت قدام عبد الحفيظ . . قلت ليهو مالها فردوس مرتك يا عبد الحفيظ . . قال لي . . اكتشفت انها ما بتعرف تمشي في الواطة يا فيفيد . . البارح مشينا لي السماني . . سمعنا انو مرتو دافقت . . قلت ليها . . يا الفردوس . . مرأة السماني دافقت . . ألبسي توبك نمشي نتحمدل ليها السلامة . . يا فيفيد فردوس ماشة جمبي . . بردلب بردلب بردلب . . كأنها بقرة ماشة ليها في قصب سكر . . أقول ليها يا فردوس الطين قدامك . . ما تسمع كلامي و تدخل في الطين . . يا فردوس القزازة قدامك بتطعنك . . و فردوس تخفج القزازة . . و القزازة تنكسر و كرعين فردوس ما يجيهن شيء . . يا فردوس . . الحديدة قدامك ما تضربك . . يا فردوس بتعمل ليك تتنوس . . و فردوس تشوت الحديدة لي غادي . . الحديدة تنطفق و كرعين فردوس مرتي ما جاتن الحبة . . يا فيفيد ما طالبني حليفة . . . . الحجر شاتتو . . القزازة عفصتها . . يعلم الله يا فيفيد . . كرعينها ديل ملولوات . . في مشيها داك يا فيفيد . . ألقى كراعها جبتا لي تحت كرعيني . . و كراعها التانية تهرس بيها في حجار الشارع . . أقول ليها . . يا فردوس كرعينك ديل دايرات يدرشني علي وشي . . يا فردوس امشي متل النسوان . . يا فردوس لملمي كرعينك . . و بالليل يا فيفيد . . نكون نايمين . . ألقى كراعها في خشمي . . أشيلها من خشمي . . ألقاها في سدري . . أشيها من سدري ألقاها في بطني . . وكيلك الله يا فيفيد . . البارح قلت أجيب حبل البقرة و أقوم أحواها بيهو . . أها يا فيفيد . . أنا نويت اشوف لي مرأة غيرها . . فردوس دي كرعينها ديل بجيبن أجلي.
مشهد تاني :
يا فيفيد هيييي . . هيييي يا فيفيد . . شايل السوق؟؟؟ . . كان شايل السوق . . تعل خيّت لي جزمتي دي معاك . . جريت لي حنان بت جيرانا . . فرحانٌ طربانٌ نشوانٌ . . و سدري مشروووح . . وينا جزمتك يا حنان . . قالت لي . . يا فيفيد . . تلقاها في ضهر الباب . . اتلفت بي ضهر الباب . . ما لقيت الجزمة . . لكن لقيت مركوب جدها . . كوركت ليها بي طول حسي . . يا حناااان . . جزمتك بي ضهر الباب مافيشا لاكين في مركوب جدك سعد الله . . قامت حنان جاتني زعلانة . . وشها يلعن قفاها . . قالت لي . . دا ما مركوب جدي سعد الله . . دي جزمتي أنا . . وكت سمعت النضمي دا . . عضيت جلابتي بي سنوني . . و فللي.
مشهد تالت :
يا فيفيد هيييي . . هيييي يا فيفيد . . شايل السوق؟؟؟ . . كان شايل السوق . . تعل خيّت لي جزمتي دي معاك . . جريت لي حفيظة جارت حنان ست المركوب . . فرحانٌ طربانٌ نشوانٌ . . و سدري مشروووح . . قلت ليها وينا الجزمة يا حفيظة . . ما تقولي لي بي ضهر الباب . . قالت لي . . لالالا يا فيفيد . . ما بي ضهر الباب . . بتلقاها بي ضهر الكرسي . . الليلة ماشة احضر ختوبة حنان . . قلت ليها . . حنان أم مركوب؟؟؟ . . الداير يعرسها منو يا حفيظة . . حفيظة قالت لي . . داير يعرسها عبدالحفيظ صاحبك . . وكت سمعت النضمي دا . . عضيت جلابتي بي سنوني . . و قمت صوووف . . أمانة ما ورطت يا عبد الحفيظ
رد مع اقتباس
المشاركة الأصلية كتبت بواسطة بت أم درمان
المفضلات