إلى معتصم الأمين في منفاه الإختياري بأمريكا
مع إنو إتأخرتَ ... بس
صدقني جيت في موعدك
إمكن رجوعك
لينا يغفر كل ذنوبك وذلَّتك
ياداب بيوتنا إتنفست
ياداب عرف
شافع السعاده يجينا من غير نندهو
يادابنا فتَّحنا الشبابيك
للشمس
ياداب نسينا هموم أمس
ياداب عرفنا الإندهاش ...
فايتنا وين !!!
وين إنت ماش !!!
حيشانا مما فُتَّ
ما أدتنا ضل
لا لينا كانت
من سموم الصيف ضرا
لا جانا من بعدك مطر
ولا بالغلط
غشانا بي جيتو الدعاش
ضاقت علينا جلودنا
يازول بي وراك
ضاعت معالم الفرحه
وإنصلبت خطانا علي الطريق
بُعدك قفل
في وش سعادتنا الدروب
فرَّغ نهار الفرحه
من جسد البريق
إتلخبطت فوق راحة إيدنا
أصابعا وعشعش
جوانا الإنكسار
إتنكرت كل المراسي علي سُفنا
وخانت القيفه الرمال
ساسقنا ليك
في كل محطات الرجوع
مرَّت قطاراتك سريع
ملّت قوانا الإنتظار
ما كنا قايلين بي وراك
ممكن تزورنا القمره يوم
ما كنا حتي مأملين
الدنيا تبعت لينا
من بعد الضلام
الطال سنين
بعدك نهار
ما كنا قايلين
إنو ممكن
نطرد الهم اللِّبسنا بعد مشيت
ما كنا حتي مُأملين
إنك تجي
غربة شنو الممكن تعوِّضك الأهل
وده سفر شنو
الراجيهو يصبح ليكَ بيت !!
ما جيت وقام
طردك من احلامو الوطن
لكن قسيت و
براك أبيت
لمتين تساكك غُرْبَتك
ووطنك جواك واسع فسيح
خلِّي الدموع التنفعك
والغربه كان تبقالك أُم
شفقت عليك
ياحليلا لمَّن ودَّعت
شايلاكا لي آخر نفس
كان راجيه منك
نظره بس
محتاجه تمسح .. دمعتك
دارت تقاسمك .. غربتك
حزنك
أساك
همك وانينك ولوعتك
كان داسه ليك
في جوفا مليون ألفِ قول
فاتت ولا قتليكَ شى
ماتت قبل تحضُن إيديك
فاتت ولا قُتليها شى
ماتت قبل تتكرَّفك
لا ضمَّتك ... لا قالدت فيك السفر
لا جمَّتك ... لا لزَّمت قلبك صبُر
لا أدَّتك ...
لا اديتا من عندك عذر
لا شافتك ...
لا شفتَّ كيفن
دقَّ باب بيتا الكُبر ..
كانت قدُر تغَمد
تشوفك في الحلم
كانت قدُر تصمُت
تكورك معتصم
كان راجيه جيْتك فوق جمُر
كانت قدُر تهرج ظنونا تسكِّتا
وكانت قدُر
ما يشيلا شك
تلقي ليك ديمه العُذر
وعُذراً ....
إذا طريتك الوجع القديم
عُذراً ...
إذا جاتك
سهام كلماتي في جوَّه الصميم ،
لكن متين
ياغالي جيتنا عشان تقولَّنا
دار تمش !!
لسَّع
ولا شبعت عيونا من الوِلاد
لا شبعنا منك
لا أكتفت
عينينا من سهر السواد
لسَّع ولا كفيتا من شوفتك سهام
لسَّع ولا يقَّنت بي جيتك وداد
كل الحنان الفينا عاد
نمشيبو وين ؟؟
ما كلو كان داخرنو ليك
وقَّفنا ليك
كل الطيور في الحله صف
وصينا ليك النيل عشان
وكتين يشوفك ينتشي
ويدِّي المزارعين الطمي
فايتنا وين ؟؟
وين إنت ماش !!؟
هسَّع نودِّي الشوق ده وين !!
وعاد نقول لي النيل شنو !؟
والحاجه كان سألت عليك ،
عاد بي وراكَ نقول شنو !؟؟؟؟
إت غايتو فوت
وستِّف جراحاتنا وامِش
لكن ولا عافنُّو ليك
شوقنا الكتلتو بلا سبب
وحدْ ما مشيت
حدْ ما تفوت
لا بتلقي غيرنا البسعدَك
لا بتلقي غير أحضانا بيت
إت غايتو فوت
وإتغابي شوقنا وحزننا
إتغابي كل الفينا ليك
لكن ولا عافنُّو ليك
كل ثواني الإنتظار
لا بنعفي ليكا هموم أمس
وأت غايتو فوت
وإت غايتو امِش ....
29\3\2007م
رد مع اقتباس
المشاركة الأصلية كتبت بواسطة معز عوض الحفيان
المفضلات