برج العنقريب
22 مارس - 20 إبريل
حظك اليوم : الزول الكاتب ليهو شيك بدون رصيد اليوم بجيب ليك الشرطة ، أمشي شوف ليك مكان تلبد فيهو ، وحاول رجع قروش الناس ( يا حرامي ) .
الحبيب : الحبيب شاميك من تصرفك بتاع الصبيان داك ، مما تشوف ليك بت تقعد تتجنن .
برج المقشاشة
21 إبريل - 21 مايو
حظك اليوم : خلي عندك ضمير وأنجز شغلك كما ينبغي ، وبطل لف ودوران عشان ما تاكل حرام ( تأكل السم ) .
الحبيب : الحبيب اليوم عندو إلتهابات أمشي جيب ليهو حبوب من الصيدلية بطل جلدنة .
برج الكراع
21 مايو - 20 يونيو
حظك اليوم : خلي عندك إحترام للآخرين والرجولة ما سب الناس في الشارع ولمان يبقى كلامك كلو بزئي ( زي وشك ) .
الحبيب : الحبيب حيلفها معاك اليوم عشان بتسف تباك وبتبزق قدام الناس .
برج الزير
22 يونيو - 23 يوليو
حظك اليوم : طالما ما عايز تخاف الله في شغلك ، مديرك اليوم حيعمل ليك خصم 5 أيام .
الحبيب : الحبيب حيسافر لمكان بعيد أحتمال كبير يمشي دافور.
برج التيس
23 يوليو - 22 أغسطس
حظك اليوم : أخواتك بترسلن الدكان وأنت قاعد في الشارع للساعة 12 بالليل بطل خيابة وخلي عندك فائدة .
الحبيب : حينتظرك جنب الموقف أمشي سريع عشان ما يقعد يضرب في الفول السوداني لمان يتسمم .
برج القفة
24 أغسطس - 23 سبتمبر
حظك اليوم : بتاع اللبن ده لما تطلعي ليهو لازم تلبسي كويس هو برضو راجل .
الحبيب : الحبيب اليوم مزاجو عكران قال مفلس ما تطلبي منه حاجة هو أساسا كان عندو ما بديك ( ندالة بس ) .
برج أم سيسي
24 سبتمبر - 23 اكتوبر
حظك اليوم : الناس عارفاك أنك قاعد تسكر ، وقت ربنا إبتلاك أعملها في بيتك ما في داعي للفضائح واللوليح في الشوارع ، راعي لأهلك ياخ .
الحبيب : الحبيب في الحفلة في واحد سكران زيك بعاكس فيها ، أها شفتا تسوي كريت تلقاهو في جلدها .
برج المخلاية
24 أكتوبر - 22 نوفمبر
حظك اليوم : كمان بتأخذ رشوة ، لو ما خايف من الله ما بتخاف تأكل أولادك حرام .
الحبيب : الحبيب خاتيك في الرف ، أعمل حسابك ما يقوم يديك كف .
برج ابو القنفد
23 نوفمبر - 22 ديسمبر
حظك اليوم : طوالي تقعد تعاكس في بنات الناس ، شنو ما عندك أخوات .
الحبيب : مزنوق في قروش حاول أمشي تدربها ليهو .
برج العنبلوك
23 ديسمبر - 20 يناير
حظك اليوم : اليوم كلو نائم ، عايز الشغل يجيك في بيتكم .
الحبيب : الحبيب يمكن يديك شاكوش عشان كده أديهو أنت قبل ما يديك ليهو يعورك .
برج الخور
21 يناير - 19 فبراير
حظك اليوم : طالما ما عندك شغل أحسن تقعد تساعد الناس في الحلة وحاول أعملوا حملة نضافة ، ياهو حاجة تنفع بيها المجتمع يا سجم .
الحبيب : الحبيب محتاج لرعاية وإهتمام ، لو ما عارف أحسن تفكو عكس الهواء .
برج البنبر
20 فبراير - 21 مارس
حظك اليوم : الشغل ما عيب ، عيب تقعد تشيل القروش من أمك عشان تمشي تتصرمح بيها .
الحبيب : الحبيب بحب أكل اللبان في الشارع حاول أمنعه بطريقة كويس عشان ما يسمعك كلام جارح .
تابعونا يومياً
رد مع اقتباس
المشاركة الأصلية كتبت بواسطة المسافر
كذب المنجمون ولو صدقوا) برغم اعتقاد الناس بي الابراج الا انك اتناولتا مشاكل حقيقة في المجتمع مثل الشيكات الطايرة والرشاوي الموجودة حاليا بي كثرة وقصة بتاع اللبن وشرب الخمر واجمل حاجة العطالة والشغل ماعيب. 
المفضلات