عزيزى كل عام وأنت بخير وها أنا ذا اليوم فى موعد جديد مع هترشاتى التى لا املك غيرها وعندما اهترش لابد من وجود سبب لتلك الهترشه إما عن اخطأ ارتكبتها فى الماضى وتسمى الآن بالخبرة أو بتذكر الماضى وبعض المواقف اى كانت حزينة او مضحكة واتذكر اليوم وانا اواصل فى هترشات الجن باداوا قصة قراءتها قبل اربعة وعشرين عاما ( فى الثمانينات) فى كتاب سلامات للكاتب الكبير الدكتور محمد عبد الله الريح الذى جمع فيه مقالات فكاهية (ومازلت ابحث عن ذاك الكتاب) فكانت القصة فى مقال بعنوان عندك أعصاب يحكى فيه انه زار احد أصدقائه الأطباء بمستشفى التجانى الماحى وعند دخوله الى المستشفى تبادر الى ذهنه أن كل من يراه يعتقد انه مجنون ولسوء حظه لم يجد صديقه الطبيب فجلس ينتظره فرأى بعض الناس ينظرون إليه فقال لابد أنهم قالوا أنى مجنون فوقف الى الحائط ومازالت النظرات تتابعه فجلس مرة أخرى وتدارى وراء جريدته فجلست بقربة امرأة تنتظر الطبيب فقالت له : يا ابن العم أنا أقوم من الصباح أسوك واغسل العدة وأسوى الشاي واشطف الأولاد وأوديهم الروضة واكنس الحيشان وناس الدنيا ديل وهمونى قالوا لى مجنونه هسه عليك الله زول يقوم من الصباح يسوك ويغسل العدة ويسوى الشاي ويشطف الأولاد ويوديهم الروضة ويكنس الحيشان دا مجنون ولا ناس الدينا ديل وهمنو وأنت مالك هنا يكون وهموك ناس الدينا وقالوا ليك مجنون زى ، لكن أنت عامل عيونك المنططات ديل ما مجنون بس بيكون عندك أعصاب (مع الاعتذار للكاتب فانا اذكر مضمونها ولا اذكر طريقة سردها ) هسه اى زول عيون منططات عندو أعصاب .
إحساس غريب يكون حاسى بيه الإنسان ولا يجد له تفسير فيقول ليك الزول دا جن ولا جننيتر ولا فاطى سطر ولا مسحلب حتى عند استشارة أهل الاختصاص ما يدوك تفسير مقنع يدوك كلام زى هترشاتى دا ما تفهم منو حاجة وكان فهمت يكون ما مقنع ، قبل كم يوم جانى جنو وقال لى لازم تمشى معاى لدكتور نفسانى عشان أنا عندى نفوس "ونفوس لناس المابعرفوها يعنى نفيسة وبالعربى كدا يعنى صاحب مزاج متغلب " قلت ليو كدا قل بسم الله أنت اكتر زول عاقل أنا بعرفه قال لى أنت ما عارف حاجة ، كيف يعنى ، أنا الأيام دى عندى إحساس غريب ، حاسى بشنو يا جنو ، والله يامهترش أنا حاسى بنفسى كلب ، ومن متين الاحساس دا جاك ، من زمن انا جريو ، وطبعا أنا مافهمت منو حاجه لكن اقتنعت لازم نمشى لدكتور ، والله يا جنو فعلا زى حالتك ما بسكتو عليها لازم نحن نمشى بيها الدكتور لكن المشكلة العزومه بتاعت ود المطامير الليلة وما فى طريقة نفوت شبعة بالطريق الصاح قال لى ما مشكلة نمشى نسوق عربية عمك محجوب ، مشينا ليه قالوا مشى بيت بكى وقال بجى غاشيكم يوريكم الحصل ، اه يا جنو نسوى شنو قال نمشى لى أبو الأمجاد ، ياخ دا يكون لسه جارى ، طيب أبو النور ، مشى مع عمك محجوب، نسو شنو مافى حل ، اسمع يا مهترش مصيرنا وقدرنا كدا ما عندنا حل غير الكركعوبة بتاع ود البلال ، أرح ربنا يسهل ، يا ود البلال كيف ، اسمع نحن ماشين الدكتور وعاوزين عربيتك المرسيدس دى نمشى بيها لو ما طالع ،ما مشكل بس اعملوا حسابكم ما تخشو بيها فى الطين والعربية دى بنزين ما تكبو ليها جاز والفرمله بجلى لازم تدبلو ليها واذكروا اربطو الستك دا عشان الصواميل ديل ما مربوطه كويس واذكرو سوقو ليكم زول تالت عشان يساعدكم فى اللزة وما تتأخروا عشان نحصل العزومة بتاعت ود المطامير ، وطلعنا مستعجلين نسينا نربط اللستك لامن كان عاوز اكتلنا هسة كانت حنان سكاليب تسترزق مننا ونزلنا حمدلله على السلامة حمدلله على السلامة لقين الستك طار على بعد خمسين متر والصواميل اختفوا قايتو جنو مشى يجيب اللستك جاب عجل الحديد قلت ليو دا شنو يا جنو وينو الستك قال لى والله دا تانى تموت تخلى ما ينفع " وتموت تخلى لناس الماعارفنو شبشب زى السفنجة يصنع من استك العربية"، وقعدنا محتارين نسوى شنو هسة وأنا زعلان على العزومة الديرة تطير وواحد زميل يعاين لينا ويضحك نحن ناقصين كمان يضحكوا فينا يا جنو أمشى شوف الزول دا بضحك فينا لى ، اسمع يا مهترش الزول دا مجنون أقوم أمشى ليه يقوم يعوقنى أنا ما ماش كان داير تعرف أمشى أنت ، وأنا على الغضب من العزومة الدايرة تطير مشيت ليه اسمع يا أخينا أنت بتضحك فينا مالك ، والله يا أبو الشباب شايفكم محتارين انتو بس مفروض تفكو صامولة من كل إستك وتربطو بيها الاسبير لمن تصلو تشتروا باقى الصواميل ، وأنا من الفرح ما خليته كمل كلام وسريع سريع مشيت طلعت الاسبير وعملت كلامو ومستعجلين عاوزين نحصل العزومة ،جنو قال لى يا مهترش ما من الزوق نفوت ساى لازم نشكر المجنون دا هسة لو ماهو كانت العزومة تطير مننا ، ونزلنا ما شين عليه والله يا أبو الشباب لو ما أنت ما كنا عارفين نعمل شنو هسه لو ماشى على كدا نسوق معانا لانو الحت القاعد فيها دى ما بقعد فيها زول عاقل البقعد هنا الا زول مجنون ، هاهاها هاهاها اسمعوا يا شباب أنا مجنون ما بليد .
ونواصل فى الهترشة الجاية
رد مع اقتباس
المشاركة الأصلية كتبت بواسطة mahagoub
المفضلات