أشربوا موية المطرة

[بدرالدين أحمد موسى]

بيتنا واقع فى آخر البلوك و الشارع مدحرج لزوم التصريف و ينتهى بنهاية ناصية البيت .. فى الخريف كل زول بيحفر ليهو ( جراى) يعني مجرى أو مصرف يا ناس الشهادة العربية .. عشان الموية تطلع من البيت للشارع .. و ده وضع طبيعى و مشاهد ..

يوم جات بت من البلدية و لا المحلية ما عارف ليك .. دقت الباب و سلمت بت أخوى انذار بدفن الجراى لمخالفته للأنظمة .. بعد 3 يوم جانا عسكرى بى كامل هيئته و سلمنا محضر للمثول أمام القاضى فى قضية الجراى .. أمى طلعت ليهو قالت ليهو فى ذمتك هسه الجراى ده فيهو مويه .. قال ليها أبدا ياحاجة .. سمح يا ولدى الجراى ده حفرناهوا عشان تصريف موية المطرة .. يعنى ندفنوا و نشرب موية المطرة ولا كيفن ..

قال ليها يا حاجة و الله أنا ما أقدر افتى ليك .. الكلام ده قولوهوا للقاضى .. يوم الجلسة القاضى حكم بغرامة 100 ألف جنيه بالقديم .. بالله عليكم سمعتوا بى جنس ده !!

تحياتى

[بت أم درمان]

حسي هم من خيران البلد كووولها
ما شافو غير الجراي العملتوهو لموية المطر

[خالد أحمد الصول]

طبعا أتو اسرة لا تراعي النواحي الصحية ... أسع الجراي دة مش ممكن يجيب ليكم الفيران من الشارع ... أسع مش ممكن يدخلن بيهو الدوابي يقومن يعملن ليكم مشاكل ... يا جماعة الصاح صاح ... يا تدفنوا الجراي ... يا اشيل العدة

[تغريدا]

أخوى بدرالدين نهارك طيب هى جات على شراب موية المطرة بس دا شراب موية مطره ومعاه أكل حاجات كده وتحليه كمان نقول بس الله يشوف حالنا ويتلطف بينا ويصبرنا

[mahagoub]

خت ليك فيه كسار طوب
عشان لمان تحى المطره تشيله سريع

[بدرالدين أحمد موسى]

حسي هم من خيران البلد كووولها
ما شافو غير الجراي العملتوهو لموية المطر

تخيلى يا بت أم درمان .. قال ايه جرايكم واقع فى نهاية الشارع و موية الجيرات بتصب فيه.. طيب رحلوا بيتنا نص الشارع !!

تحياتى

[بدرالدين أحمد موسى]

طبعا أتو اسرة لا تراعي النواحي الصحية ... أسع الجراي دة مش ممكن يجيب ليكم الفيران من الشارع ... أسع مش ممكن يدخلن بيهو الدوابي يقومن يعملن ليكم مشاكل ... يا جماعة الصاح صاح ... يا تدفنوا الجراي ... يا اشيل العدة

و الله يا ود الصول عجبتنى قصة النواحى الصحية دى .. يا زول أن بقول ليك فى مدنى .. تقول لى نواحى صحية .. تجى من وين اذا ناس النفايات بيطلبوا من الناس يدسوا النفايات جوه البيت لحد يوم جمع النفايات .. و اذا طلعتها كل يوم بره البيت يجوك جماعة ما بتعرف من وين يدفقوا ليك الزبالة و يسرقوا الكيس عشان يبيعوهو ليك تانى .. عشان يجوك ناس النفايات و يسوا ليك مخالفة رمى الأنقاض خارج البيت .. تقول لى توم اند جيرى !

تحياتى

[بدرالدين أحمد موسى]

أخوى بدرالدين نهارك طيب هى جات على شراب موية المطرة بس دا شراب موية مطره ومعاه أكل حاجات كده وتحليه كمان نقول بس الله يشوف حالنا ويتلطف بينا ويصبرنا

مسائك نور يا تغريد .. و الله يكضب الشينة .. قولى آمين

تحياتى

[بدرالدين أحمد موسى]

خت ليك فيه كسار طوب
عشان لمان تحى المطره تشيله سريع

شكلك خبير جرايات ياشيخ محجوب .. الخريف الجاى بنعملها ان شاء الله .. حتى كان تقع فيها بت النفايات تكسر كراعها .. يودوها المستشفى بالأسعاف يجى بص سفرى ماركة نيسان ماشى بى شارع المحطة و عاكس الشارع يصدم الأسعاف يدشدشه حتت .. يجيبوا عربية اسعاف تانى تنقل البت براها فى اسعاف عشان عندها كسور مضاعفة .. يدخلوها مستشفى مدنى .. ما يلقوا بنج يعملوا ليها 15 عملية بدون بنج .. يودوها عنبر الدرجة الأولى و يرفعوها فى نهاية السلم تقع من فوق تكسر رقبتها و ما تموت .. تصاب بشلل دائم و تفقد السمع و البصر و ما تقدر تتكلم عشان لسانها يكونو قطعوه .


تحياتى

[ود المطامير]

الحبيب

كنت داير أقول ليك أعرش الحوش
لكن خفت يجو ويدفعوك بد جراى حق كم جراى طاير

[بدرالدين أحمد موسى]

الحبيب

كنت داير أقول ليك أعرش الحوش
لكن خفت يجو ويدفعوك بد جراى حق كم جراى طاير

عرشنا الحوش يا ود المطامير و ركبنا سلوقات حديد توتيا لا تصدأ .. نزلت المطرة و الموية بقت من كل الأتجاهات .. جابوا لينا لى كل سبلوقة مخالفة .. نمشى وين .. أخير الجراى !!

تحياتى

[مدنيّة]

شفت عنوان البوست
قلت ياربي
تكون موية المطرة صحية ولا الفهم شنووو!

[بدرالدين أحمد موسى]

شفت عنوان البوست
قلت ياربي
تكون موية المطرة صحية ولا الفهم شنووو!

تعرفى يا مدنية . أنت فعلا ممن يرى الجزء الممتلئ من الكوب !!

تحياتى

[مدنيّة]

تعرفى يا مدنية . أنت فعلا ممن يرى الجزء الممتلئ من الكوب !!

تحياتى

عليك الله يااستاذنا
كلم الجندي دا



---------
احتراااامي الذي تعرف

[بدرالدين أحمد موسى]

عليك الله يااستاذنا
كلم الجندي دا



---------
احتراااامي الذي تعرف

حلفتينى بى الله !!

هوى ياالجندى المامجهول ... انظر الى الجزء الممتلئ من الكوب عشان تبقى زى مدنية .. يعنى تفاءلوا بالخير تجدوه !!

تحياتى