مابين ريدك وتمباك نوري
احسن لي ياخي التمباك
مالتمباك لي راسي ضروري
ولمن اسف يادوب بطراك
والا يكون تمباك دارفوري
...معاهو ضمان الاستهلاك
وسفة تكون هي دقار لي لوري
عشان بالجد بالجد اهواك
شايفك دايره تلفي تدوري
وقلتي السفه دي ماعاجباك
ماتتكلمي فرتقي طيري
واوعي تقول انا بترجاك
شوفي هديل بكري وعموري
ديل البنفعوا ياخي معاك
تلقي الود لامع حموري
ولمن تزعلي بيجري وراك
ومن عربيتو يدق البوري
ويقعد بره ويستناك
وتطلعو تمشوا النادي السوري
وتمشو ان شاءالله الواق الواق
بس اختيني واختي نفوري
لمن ازعل مابنطاق
أدردم سفه وادق طمبوري
واملا الدنيا دي بالكوراك
وكان غنيت بطلع من طوري
وتلقي الشينة هي سابقه غناك
اعمل ليك فيها الفيتوري
وكاتب ديوان فيكي براك
شكلك مابِّتعرفي تُدوري
لانو الشفتي اكيد غشاك
رغم السفة ورغم فجوري
وبي تمباكي ده برضو ملاك
وياما ناس سفت باللوري
وسوت بالسفتّو املاك
وسوه عمارة ركب باجوري
ولسه بسف بس ماتمباك
التمباك انا لي دستوري
وغصبا عنك وبتحداك
وكان اصدرتي قرار جمهوري
قيمة الحُّقة دي مافايتاك
ومهما تبكي ومهما تجوري
ومهما الناس يتمنو رضاك
لا في وسعي ولا مقدوري
اني اتخلى عن التمباك
يلا اتخارجي فرتقي غوري
بشَّنق سفه وبنسى هواك
رد مع اقتباس
المشاركة الأصلية كتبت بواسطة نزار احمد محمد
- لو كنت بتعمل كدا كان القصيدة بقت معلقة 
المفضلات