اغاني واغاني من نوع تاني

[آلاء عبد الرحمن]

هووسيه"طبيبة امتياز" نجاضه:-



*دلفت الي الحوادث بكامل اناقتها وخلبت لب المرافقين قبل الاطباء حتي من كانو في غيبوبه تامه استيقظوا علي صوتها الرخيم وهي تشدو حامله ورقه استلام العمل:-

باسم الطب ,,, بقدم ليك خدماتي
عليك ياريليز"ورقة استلام العمل ووبتتملي ويسلموك ليها بعد تخلص الشفت" تحياتي
عليك اوقفت غاياتي
لرليزي اضحي بحياتي
حياه الطب اسميها,,, كتاس"زحمة الشغل" بي كل معانيها
*********
اكتس وانسي فيك زاتي
وانسي كل غاياتي
واهجر كل ملاياتي
أخاصم كل مخداتي
وانسي كل مسراتي

[آلاء عبد الرحمن]

*حينها يختطف منها الرجسترار"نائب الاخصائي" استلام العمل ويمهره بتوقيعه منشدا بلهجه لاتخلو من التهديد لابعاد الهوواوويس عنها:-



اظنك عرفتي

رليزك في يدي

لو هووسي ساقك,,,, يسوقك يودي

رليزك يعدي,,,, والبوص مابيدي

الوزاره توزع,,, وانا ده البربي

[آلاء عبد الرحمن]

*وهنا يتدخل الرجسترار الاخر الذي يعمل في الكو يونت (التي تحفل بالميلز وتخلو تماما من الفيميلز) محاولا استمالتها ليونته وهو يقول:-



يونتنا ليه قسمين

مالبوص بتاعنا واحد,,, كيفن نكون قسمين

شي عجيب في توزيعاتك,,, يامدير ياشين

انا بس يوزعو لي الميل وراء الميلين

ماجابو لي فيميله,,, الا تبور سنيتن

شي عجيب في توزيعاتك,,,, يامدير ياشين

انا يامدير ياطبي,,,, زهجت من شفتين

مليتني بالميلات,,,, يملاك قمل ياشين

[آلاء عبد الرحمن]

وبعد ان يتنازع الرجستراران في احقيتهما بالهووسيه ويذهبان للمدير الطبي يتركون الفرصه للهوواوويس لاستعراض عضلاتهم الغزليه فينشد اوجههم واوسمهم في محاوله للايقاع بها:-



لو حتبسمي لي,,,, انا بسد ليك

فايلين لي,,,, وفايل ليك

******

لو حتضربي لي,,, انا بتندس ليك

حافز لي,,,, وحافزين ليك

*****

ماليك امان ياالهاوس مان

ياليالي زمان ,,, ياليالي زمان

[آلاء عبد الرحمن]

*وعندما لاتؤثر فيها المحاوله الفاشله يحاول احد الهوواوويس من الذين يمتلكون بطاقه عضويه دائمه في اتحاد الصلع والجلحات الصغيره وبطاقه عضويه شرفيه في نادي اكل زبادي وتعال بي غادي للتخسيس وتفتخر بعض شعيراته الباقيه بتميزها باللون الابيض قائلا:-



ياجمال النيل ,,,, والكتاس بالليل

ياهوسيه بين يونتين ,,, بحسنك الفتان

ياقبله العيانين ,,,, يادره اليونتان

ماتعايني لي كرشي,,, والصلعه والالوان

بس عايني لي جيبي ,,, دايما كمان مليان

[آلاء عبد الرحمن]

*وتستفز محاوله الضغط المادي هووسي مفلس ليجرب حظه في الحنك مترنما:-



ماقلنا ليك خليها

حنكك جبان خليها

العنظزه تخليها

قروشك اشبع بيها

*******

عارفنو حنكك ميت

اصلك قبيح ومزيت

******

العب بعيد جليها

المزه دي خليها

انا بس بعرف ليها

[آلاء عبد الرحمن]

*وهنا يكثر الضغط علي الهووسيه القديمه التي احست بخطوره موقفها في اليونت حيث ستتعرض للاهمال التام فتجهش بالبكاء قائله:-



لا رليزك بيفرحني,,, ولا قعادك بيفرحني

وفي الحالتين انا ضايع ,,, ماحالقي البيحبني

اقول انساك,,, افوت لي يونت اخليك براك

افرح اقول انساك,,, تاني البوص يرجعني

اتعب واشقي برضي معاك

وفي الحالتين انا ضايع,,, ماحاالقي البيعبرني

لا قعادك بيريحني

[آلاء عبد الرحمن]

*وتقطع جهيزه قول كل خطيب حين تتعمد ان نريهم دبلتها علي اليمين مترنمه:-



ارحل

اسوق خطواتي من يونتا بقت زحمه

اشوكش ديل

واشاكل ديل

اتووووه من غمزه لي همسه

*******

رحلت مشيت

ابارك العيد

واظبط حله اللحمه







*واخير

ينطق هووسي كان ينتبذ ركنا قصيا:-



الداقسين ديل,,, عاملين مفتحين

من زمان كشفت,,, ليدها اليمن

*******

في اليد اليمن ,,, شفت دهبا لمع

المفتح خطبا,,,, من زمان ارتفع

قوموا يااحبه,,, نلوك الوجع

والعرس ياشباب,,,, نسمعبو سمع

*******

الكتاس يجيكم,,, في الليل الهجيع

من الزحمه تنسو,,, وتجافو الضجيع

وفي الحاله دي,,,, كوراكم يذيع

واحسره شبابي ,,,, في الطب يضيع

*******

الداقسين ديل,,, عاملين مفتحين

من زمان عاينت,,, ليديها اليمين

[آلاء عبد الرحمن]

مقطع اخير:-

أميرة الشباب يا السمحة أنا جايك عريس

بي كتب الكتاب يا الملكة مهرك مو رخيص

عارفك جميله وزايده في البنوت حلا

المال عليك يا غالية أبداً ما غِلا

لكن ظروفنا القاسية كيف بنبدلا

فاضل وحاتك بس نفوس مدللا

من نص الشهر الهووسي قاعد في الخلا









الي ان نلتقيكم في حلقه اخري من اغاني واغاني لكم تحيات السر قدور واسره البرنامج

كان معكم في الاخراج:-

المكتس الهووسابي

في الانتاج:-

المعفوص الامتيازابي

اغاني واغاني والهاوس اوفيسر يعاني - ل-احمد عبدالرحمن محمد حمد

[ahmed algam]

هههههههه ههههههه ههههههه


مبالغة يادكتورة

[آلاء عبد الرحمن]

هههههههه ههههههه ههههههه


مبالغة يادكتورة

[ahmed algam]

في انتظار الحلقات التالية

من اغاني واغاني

من نوع تاني

[آلاء عبد الرحمن]

في انتظار الحلقات التالية

من اغاني واغاني

من نوع تاني

بث كده


حاااضر

[آلاء عبد الرحمن]

(حنك الهواوويس)


-قالت له عبر الهاتف:-
*حبيبي تعال تعال نتلم
مادام الديوتي"نبطشية" اختلط بالهم
انا ذنبي ايه امشي بنك الدم


-قال لها ونبراته تقطر حسره:-
*اجيك من وين, وانا اللاحاسي لاشايف
اجيك بيشن؟ اجيك زاحف
بقيت خايف
بقيت خايف
وانتي مشيتي في المستشفي البعيده براك
اجي امسك ليك العنبر, ولا في الحوادث معاك


-قالت وهي تزيد نبره الدلال في صوتها:-
*بستناك انا في البنبر
بستناك انا جنب السستر
انا ذنبي ايه يمسكوني العنبر
ياحبيبي
بستناك انا في رجاك
بستناك انا لي لقاك
انا ذنبي ايه امشي لي استاك
ياحبيبي

-حينها يتدخل رجسترار اليونت حينما يجدها اطالت المكاله الهاتفيه قائلا:-
*لو قايلا عنبرنا
فيهو ناس مهند ونور
تبقي عيانه ودايره ليك دكتور
قرايه الطب طويله, عايزه ليها دهور
وانتي ماناقشه, لاجمال لا حضور
يعني عايزه تزوغي, بالتلفون والزور
الاكان اهبل, ناقص الطرطور
قدامي لليبر, ماتقولي عايزه فطور
الليله تشتغلي, ولا تقعي الخور


-فتقول الهاوسيه بآخر انفاسها للرجسترار وهي تشك ان هناك مؤامره من هوسيات اليونت باابلاغ الرجسترار عن هبلستها:-
*لو مصدق الحدثك, تسمع كلام الناس
احبسني في عنبرك, املاني انا كتاااااااااااس
انا جايبه ليك زول, يسد لي بدلي
عليك الله بس وافق, تم لي املي


-وحينما يشير الرجسترار برأسه علامه الموافقه تسكب كل دلالها عبر الاثير لتخاطب ذلك المسكين المنتظر عبر الهاتف:-
*ياقسيم الريد تعال,
تعال لي وتعااااااااااال
فبرد سريعا:-
جاييك سايقني الحنين, اتمني اسد بدلك
فردت لابكوتي شراع, واشواقي ليك ماليها حد


-وبعد ان تضمن حضور المسكين تتجه مباشره صوب البوابه للخروج , الا ان رجيسترار من يونت اخري يلتقيها متبسما وهو يقول:-
*صدفه
صدفه واجمل صدفه انا يوم لاقيتا
اسعد يوم, في باب المستشفي وافيتا
نور عيني, في الكافتريا ياما حبيتا

-فتجيب سرا هي دون تردد (اصلا غازا عينا عليهو):-
*ههوسياتو مادارينو لي, مسترو ماراضي بيا
اتحدا أي هووسيه واجيب قسيمه شرعيه
تم ترفع صوتها:-
وحنانه
هديك الكافتريا ورانا
وهييي حنانه
الحاباك معاي تعبانه

-وبينما هي منداحه مع الرجسترار الجديد اذا يرن هاتفها ليصدح الهووسي المسكين (الكركرتو من بيتم يسد ليها) قائلا:-
*في الليله ديك...... لا هان علي اسد بدالك
ولا هان علي اقول ابيت
شلت الميزان....والسماعه....وقعدت راجيك لي ساعه
جيت اسد ليك واصالحك......جيت اقول ليك امشي البيت

-وبعد ان تامره بالذهاب للعنبر للاستلام بدلا عنها من الرجسترار بحجه انها ذهبت للمنزل يتآمر عليها القدر مع الصدفه ويجد الهووسي ان الرجسترار سنيره بالجامعه ليذهبا معا لنفس الكافتريا التي تخلط بها ويتفاجئان بمنظرها منداحه فيصدح الهووسي قائلا:-
*باب الريده......وانسده
وقصر الشوق وانهده
تمر ديوتهات........وتتعدي
بكرهك من هنا......لام بده
محال ارجع اسد ليك
محال لي ريدتك ارتد
لو في يوم بس حنيت ليك
بقعد اغسل العده


-ولا يفوت الرجسترار مشاركه برلومه الاحزان قائلا:-
*البتحبها دي كشا مشا
بس بتحبك دايره عشا
بندما ليك يابرلوم
بحميها ليك حتي النوم
مابسألا نهائي, بس بوزعا الليبر روم


-وهنا يتدخل الرجسترار (الغازه عينا عليهو):-
*تحبي معاي هووسي؟
ناسيه كل قروشي؟
انشالله تجيكم مناسبه, وفي الصاج تقعدي تعوسي


-وبعد ان تطمئن الهووسيه الي ان ليتها مظلمه ظلام دامس تهمس مخاطبه نفسها:-
*الدقو منو ياناس؟
القبضو منو ياناس؟
قبض نفسو برا ياناس
قبضوهو في كافتريا, جنب الصيدليه, 3 ياناس ماكفا؟
قبضوهو بس خالط, والحنك ماشي ظابط, ده شنو الحقد ده؟


*نغمه اخيره:-
لو تبقي خلاطه
تحبي اتنين تلاته
والرابع زياده
ماتنسي يوم جاييك, يوم اسمو الشماته


الي ان نلتقيكم في حلقه اخري من اغاني واغاني لكم تحيات السر قدور واسره البرنامج
كان معكم في الاخراج:-
المكتس الهووسابي
في الانتاج:-
المعفوص الامتيازابي

[خالد علونى]

شكيت محنك
خلاص كفاك الشربتيهو دا
وباقي الشاربوت اكشحي

[آلاء عبد الرحمن]

شكيت محنك
خلاص كفاك الشربتيهو دا
وباقي الشاربوت اكشحي

هههههه

انا ماتبع الجماعة ياخ

[mahagoub]

يبقى اكيد شاربه حاجه تانى
انت بحيرى مر عليكم
لكن روعه خلط الاغانى بالحلمنتيش

[ود المطامير]

يبقى اكيد شاربه حاجه تانى
انت بحيرى مر عليكم
لكن روعه خلط الاغانى بالحلمنتيش

يا عمك

عليك الله ترجم لى

[ود المطامير]

يا دكتوره ياخ عاوزين شريط ترجمه متحرك لناس عبدالمنعم خدره

[مايسة]

ألوية نصيحة أمشي ليك
لـ الرجسترار

تسلمي - ضحكتينا والله

[mahagoub]

يا عمك

عليك الله ترجم لى

كبر النضاره
الترجمه على الشريط

[أحمد عمر ( MOODY )]

شكيت محنك
خلاص كفاك الشربتيهو دا
وباقي الشاربوت اكشحي

شربوت شنو يا علوني .. البشربوا الشربوت ما بنعرفهم
غايتو يا دكتورة .. جبتيها كبيييييييييييييييييييييرة

[أحمد عمر ( MOODY )]

يا عمك

عليك الله ترجم لى

كنت عاااااارفك ح تقعد تتلفت
أطبع البوست ده .. و أمشي الصيدلية
خليهم يدّوك ليهو كبسولات

[أحمد عمر ( MOODY )]

قدُر ما كلّمتك .. قلت ليك و وعّيتك
شربوت ناس هناية ده .. قام بعم محجوب
أبيتي تسمعي الكلام .. هسه كده كويس

[آلاء عبد الرحمن]

والله حاولته اترجم ياخ لكن ماعارفة الحصل شنو



اها انا مابشرب شربوت شوف ليكم حاجة تانية