كدوس ودلوق وعدم طايوق

[الشمشار]

سلامات

نواصل في الشأن الاجتماعي واليكم هذا البوست من ارشيفي


العنوان غريب كالعاده كدوس ودلوق وعدم طايوق ههههههههه عارف الناس بتكون اتجهجهت

الكدوس هو المتبقي من صباع السلسيون علي حسب ما يسميه الشماسه وهو بكون اخر الكيف ما الكدوس الغليون يا خالد علوني وده بكون انو يفتحو الصباع بتاع السلسيون ويدعكو فيه الدلوق

اما الدلوق يامصطفي هاتريك فهو قطعه القماش التي يوضع فيها السلسيون لزوم الكيف وكده (انا عارف الناس ما حتظن فيني خيرهههههههههههه )والطايوق ياشباب هو النخاع البكون في العضم ويالحناكيش الطايوق ده امهاتنا وحبوباتنا بضعوه في الصاج لانو دهني وبخلي الصاج املس ويسهل العواسه

واصطلح الناس بان يطلقو علي الزول المافي وعيه او مجنون بقولو ليه ماعنده طايوق

انا اظني استرسلت في الكلام وما وريتكم انا داير اكتب عن شنو ؟ والقصه شنو ؟

اليوم موضوعنا عن



الشماسه

نواصل بعد الفاصل

[الشمشار]

سلامات

فوش ياملعم ادك جمنون بتلكم رباهو

تلك الجمله سمعتها وانا ماشي جنب مستشفي الخرطوم وكانو في مجموعه من الشماسه بعلقو علي لانو انا كنت بتكلم تلفونيا بالسماعه وترجمه ماقالوه (شوف يامعلم داك مجنون بتكلم براهو )

وهم معذورين لانهم كانو بي جهه اليمين بالنسبه لي والسماعه كانت في الاذن اليسري انتهيت من المكالمه ومشيت عليهم بي امانه حسيت بيهم استغربو في ست شاي قاعده قعدت في واحد من البنابر وطلبت شاي قبلت عليهم كانو ثلاثه قلت ليهم تشربو شاي ولا قهوه هههه اظنهم برضو قايلني مجنون زول فيهم رد علي مافي

شباب شاي ولاقهوه

برضو زول رد علي مافي طوالي اتكلمت معاهم بالراندوق (انا عارف ما حتظنو فيني خير:d )

(ونوش يادرف نا ما بتلكم عماكم ) ومعناها (شنو يافرد انا ما بتكلم معاكم ) رد لي اكبر واحد فيهم (تنا عمانا بتتلكم )( انت معنا بتتكلم ) قلت لي (وياه) (ايوه ) قال لي (لامك ياملعم في نشو ؟) (مالك يامعلم في شنو ) انا قلت ليهم (تبرشو ياش ) ( تشربو شاي ) قالو جدا وقلت لي ست الشاي كبي اربعه شاي وجاء الشاي والونسه حلت نواصل بعد الفاصل

[الشمشار]

نواصل
قلت لي الزول القال علي مجنون (نشو ياملعم تنا لايقني جمنون ولا ونوش )يعني انت قايلني مجنون ولاشنو ضحك قلت لي انا كنت بتكلم في التلفون قال لي خليك من الكلام ده انت اتعلمت الراندوق وين ؟ قلت لي قبل اوريك طلع الدلوق من خشمك ضحك واستغرب اني بعرف مصطلحات الشماسه كلها وقال لي انت اتعلمت الكلام ده كلو من وين ؟
قلت لي (نم القوس اللمحي ) (من السوق المحلي ) وبقيت احكي لي اتعلمت الراندوق كيف
معلومه
الراندوق هو لغه الشماسه وهي لغه تعارفو عليها والفوها ولها كذا طريقه منها التي اتكلمها معهم في هذا الحوار ومنها طرق اخري وسبحان الله اجاد الشماسه في خلق لغه تعبر عنهم رغم ملاحظات العديد من الناس والمثقفين بصفه خاصه علي هذه اللغه الا ان ذلك لايمنع انهم ابتكروها واصبحت تعبر عنهم
نواصل في حوارنا قلت ليهم انتو (طقيتو ) يعني اكلتو قالو لا قلت ليهم ارحكم نفطر هنا هم اتشوشو واتوجسو لكن طمنتهم وخشينا المطعم سيد المطعم كان داير يطردهم لكن انا قلت لي الشباب ديل معاي وحا ادفع انا بعد قعدنا قلت ليهم (تنو معكم ادك قفعتو نمو نشو ) يعني انتو عمكم ده وبقصد بتاع المطعم فقعتو وتعني بلغه الشماسه سرقتو منو شنو ؟
قالو لي ولا حاجه لكن الناس كلها ما بدورونا وخاصه ناس السوليب والسوليب هو البوليس
سالت اصغر واحد فيهم انت العلمك السلسيون منو واتعلمتو متين ؟
قال لي شوف يافرده اكضب عليك لو قلت ليك متذكر اتعلمتو متين لكن العلمني لي كابوكي
واشر لي بي يده علي اسمن واحد فيهم هههه ولو انو ماسمين لكن لو قارنتو بيهم بكون سمين
قلت لي البعمل مزاج اكتر ياتو البنزين ولا السلس (السلس اختصار لكلمه سلسيون )[/color](قال لي اسمع يا معلم شنو فتحت فينا نقه وين الفطور ) قلت لي لحظه بس اجيب ليكم الفطور وبعد فطرنا قلت ليهم قبيل انتو قلتو الناس كلها بتطردكم من اي محل بتمشو لي عارفين ليه ؟
قالو لي ليه ؟؟؟ قلت ليهم لانو في بعض الشماسه بسرقو من الناس عشان كده الناس بتظن انكم كلكم سراقين
طيب ناكل من وين ؟؟؟ نطق بهذه العباره احدهم وواصل شغل مابشغلونا كرته ما بدونا سرقه ما بريحونا نعمل شنو ؟
حاولت اطلع من الموضوع لانو بي امانه ما كان عندي رد قلت لي كابوكي انت اهلك من وين ؟ قال لي انا من الدمازين
اتولدت هناك وابوي مات وامي عرست راجل تاني طلعني من المدرسه وكان بدقني (والله زول حسود خلاص ) نطقها بمراره وانت ياكابور (كابور ده اسم حركي لانو الشماسه ما بدوك اساميهم الحقيقه بالساهل وعرف بكابور لحبه للافلام الهنديه ) قال لي انا ماعارف ابوي منو ولا انا ساكن وين انا فتحت لقيت نفسي في الشارع
سالت ثالثهم وانت يا تسالي (سموهو تسالي لانو امه بتبيع تسالي كانت ) قال لي انا من الابيض ونحن تسعه اخوان امي الله يرحمه ماتت وابوي كان مطلقها قبل تموت هي الربتنا لكن لامن ماتت كلنا فرتقنا عشان خالي قال ما بستحملنا وما بربينا
اسمع يامعلم جيب حبكتين نجيب سلس كدوس ما عندنا
قلت لي انا عندي قروش لكن مابديك ليها تضر بيها نفسك وبقيت اشرح لي انو السلس مضر بالصحه وكده لكن وحاتكم كلامي في وادي وهو في وزملانو في وادي تاني
لقيت انو لحدي هنا كفايه وكانت عندي مواعيد مهمه فنهيت الحوار لحدي هنا ومشيت علي المواصلات وركبت وفي بالي سؤال زي ديل السبب في الهم فيهو شنو ؟؟؟ كدي انتو ادوني الاسباب وانا قااااعد منتظر الردود
ودعتكم الله