تحيه طيبه ....
لناس الحكومه .... والساده المشرفين .... لزوم كسير تلج وكده ....
والتحيه ممتده لتشمل جميع الاعضاء داخل وخارج الوطن .... بمناسبة اعياد الاستقلال المجيد .... بال (غ) ولا (ق) ما مشكله ...
مع الإعتزار لجميع خرجى كليات التربيه قسم اللغة العربيه والدراسات الإسلاميه ....
ولا شكر ولا تقدير للمستعمر الاجنبى الذى تركنا فى نص المسافه وزاق ( كبر اللفه )....
قايتو المستعمرين ديل ثقيلين جنس ثقاله .....
الحسنه الوحيده فيهم خلوا لينا عيد الاستقلال يوم 1/1 صبحية راس السنه إجازه .... يعنى ممكن الواحد اساهر للصباح ....
والتحيه ممتده لتشمل المرحوم حسن خليفه العطبراوى صاحب اغنية يلا يا غريب يلا لبلدك ....
ولا تحيه ولا تحيات لناس زين بمناسبة ذيادة القيمه المضافه لعملية تحويل الرصيد ....
والتحيه موصوله لعريس العام المنصرم نزار الصغمبروتى بمناسبة دخوله القفص الذهبى رغم الذياده المشهوده لسعر غرام الذهب ....
بمناسبة راس السنه .... انا عندى فكره بتراود فينى .... داير ابقى مشرف ... رايكم شنو ....
والله جادى معاكم ....
وكمان حاعمل حمله انتخابيه .... واترشح لمنصب قيادى كبير بالمنتدى .....
انشاء الله المشرف العام .... يعنى انا هين ولا لين .....
والله انا من يوم الشمعه الفاتت حاسى بانى مفروض اكون وزير دوله عديل كده ...
من ناحية هدوم .... عندى بنطلون وقميص جايات مع بعض .... يعنى ممكن اقطع نص فى برشلونه ماف ....
مش ذى ناس كده بأجروا البدل وما بدفعوا حق الإجار .....
مع الإعتزار لاحمد علقم وكل من لم يجد مقاسو فى ذلك اليوم ....
وكل التحايا للأستاذ مصطفى هاترك للمجهودات القيمه التى يبزلها لترقية الزوق العام .....
ولا تحيه ولا تحيات لرواد ومشرفى المنتدى العام ..... بعد ما حذفوا لى مشاركتى معاهم ......
وده السبب الرئيسى الخلانى اترشح لمنصب مشرف بالمنتدى العام .....
على بالطلاق ابقى المشرف ..... ناس ود المطامير ديل اتجدعوا جنس تجدع .....
اول حاجه حارحل البوست بتاع ( اضحك شويه ) للعام .... مالكم بتعاينوا لى كده .... اول مره تشوفوا ليكم مشرف ولا شنو ...!!
وتانى حاجه حاسحب السيد عمر الماحى من وزارة الماليه ....
تخيلوا الزول ده من ما الاقينى بقول لى ( جيب رسوم الإشتراك ) .....
ياخى ده بشيل رسوم الشهر كل تلاته يوم .... مع انو متزوج مننا ....
والتحيه موصوله لمن كانوا وراء حريق محلية ودمدنى الكبرى ....
ولا تحيه ولا تحيات للسيد الادمن بعد ما ضرب بجميع وعوده لنا عرض الحائط ..... بعد استقراره فى دوحة العرب .... ونسى العشره .... وجزمة كوره ساااى ما رسلها لينا ....
والتحيه موصوله لكل من اصلح بين السيد محمد النور وحكومة المنتدى .....
ولا تحيه ولا تحيات لكل من صج ولج وحاول الإصطياد فى المياه العكره قاصداً تشتيت الشمل وبث الفتنه .....
بالمناسبه ..... بعد ما ابقى مشرف ..... حافك تثبيت البوست بتاع ( نواعم منتديات ود مدنى ) ....
وحامنع منع بات الوصفات الغذائيه والبوستات الطعاميه داخل النفاج .....
وسوف احارب بما اوتيت من منعه اهداء الاوسمه والنياشين للجنس الناعم .....
ولا تحيه ولا تحيات للمشرفه اليمين ( ام رقبه ) وهى تواصل غيابها عن مزاولة نشاطها وتصرف مستحقاتها على الوجه الاكمل فى ذات الوقت .... بالمناسبه انا طالبها قروش ....
والتحيه موصوله للعضو المجتهد شلبى بمناسبة حصوله على وسام الفكاهه .....
ولا تحيه ولا تحيات للعضو عكاشه وهو يبعد بقلمه عن المنتدى .......
بالمناسبه عندى مروحه للبيع ..... على الراغبين الاتصال على هاتفى بعد الساعه 12 باليل .... علشان اقدر اسمع كويس .... اصلوا صوت المروحه عالى ....
مع العلم بأن هذه المروحه ولو لا الظروف الماديه السيئه وإيماناً منى بضرورة التجديد والمواكبه ما كنت ببيعها .... اصلها عزيزه على شديد ....
ولا تحيه ولا تحيات للهيئه القوميه للكهرباء وهى تذيد من العبء على كاهل المواطن البسيط باسعارها الغير متناوله باليد ....
والتحيه موصوله للشاعره نضال الحاج وهى تشعرنا بشِعرها الجميل .....
ولا تحيه ولا تحيات للسيد علونى وهو يواصل زرف دموعه على طِرح السيدات ....
بالمناسبه عيد ميلادى قرب ..... وهى دعوه للمستطيعين فقط لحضوره ..... ولا عزاء للفقراء والمستضعفين وعامة الشعب ....
والدعوه غير عامه ....
ومن يأنس فى روحه الشجاعه الماديه فاليأتى غير مبالى .... اصلوا انا عامل لى كشف .... وهذا ما لزم التنويه له ....
بالمناسبه انا ما بحب الإهداءت والهدايا العينيه .....
عينك بالتقدها ليك ..... شحاد وعينك قويه ....
قايتو جنس ثقاله عليك يا بحيرى .....!!!
رد مع اقتباس
المشاركة الأصلية كتبت بواسطة بحيرى
المفضلات