حسن كوشه

[الشمشار]

سلام من الله عليكم بعد غياب كم يوم عن المنتدي لظروف خاصه وزي ماقلت ليكم في بوست ثقافه العمل التلفزيوني الايام دي مدور تدريس هههه ماتتخلعو وتقولو الشمشار ده يقول لينا المابهمك وصي علي راجل امك ويجي يدرس ما تدريس مدارس ياجماعه بدي محاضرات لعدد من الاعلاميين الجدد نخش في موضوعنا بتاع الليله
حكينا كتير عن حلتنا الا انو اهم شخصيات الحله لم احكي عنه
حسن كوشه
لقب حسن بلقب كوشه لانه كان يتمتع بهوايه غريبه شويه بحب الكوش * وطوالي بتلقاهو يا اما في الكوشه يا اما جاي من الكوشه يا اما ماشي للكوشه
حريم حلتنا مابدورن حسن لانو عود اولاد الحله كلهم علي ارتياد الكوش
لحظه جاي احكي ليكم عن حسن كوشه واوريكم الذكرني ليهو شنو من اصبحت
نواصل بعد فاصل
تكويشه
كوشه تعني مكب النفايات وليست كوشه العريس الله يوعد العزابه ويكتر الجلابه قولو آمييين

[الشمشار]

جينا
يعتبر حسن كوشه من اوائل الاطفال (في ذلك الزمن ) الذي اقتحم المجهول المعروف بكوشه الجبل
وهو مكب نفايات جنوب مدينه الصحافه ويبعد عن حلتنا مسافه 3الي 5 دقائق بالعربيه هذه المسافه يقطعها حسن كل يوم ثلاثه مرات جيئه وذهابا علي الاقل (يعني زي الوجبات ) اول شئ بمشي الصباح بدري ههههههه طبعا في الزمن البمشي فيهو ده بشوف جديد الكوشه شنو ؟ لانو نفايات المطار بيجيبوها بليل وطبعا مرات كتيره بكون فيها بواقي اكل الطيارات وحاجات كتيره بتنفع مع حسن
وبالنهار ينكفئ حسن كوشه علي نفايات المصانع وطبعا المصانع دي معظمها مصانع مواد غذائيه في ذلك الزمان اي حاجه مدتها منتهيه برموها في كوشه الجبل وبعد الفراغ من نفايات المصانع التي تصنع المواد الغذائيه بقبل علي نفايات المستشفيات ويجمع امبولات الحقن منتهيه الصلاحيه لاستخدامها كمفرقعات عند وضعها في النار وهذه المعلومه اكتشفها حسن كوشه بالصدفه وعلم ناس الحله كلهم
والمشيه الثالثه للكوشه بتكون العصر للملمه الاشياء المفيده من نفايات المنازل
قبل نطلع فاصل داير الفت نظركم لحاجه بسيطه انو كوشه الجبل دي كانت مكب نفايات الوحيد لمدينه الخرطوم نواصل هسي

[الشمشار]

قبيل في بدايه كلامي كتبت انو حسن هو الوحيد البدأ استكشاف المجهول في كوشه الجبل لانو كان في اعتقاد سائد في اذهاننا ونحن صغار انو كوشه الجبل دي فيها ناس بمصو دم الزول (دراكولات وكده بس علي سوداني )
والاعتقاد ده اوجدو في اذهاننا اهلنا الكبار وكم سمعنا من اساطير تحكي عن كوشه الجبل التي وصفت بانها مقر اب سفنجه وابسفنجه ده شخصيه خياليه من وحي ذهن اطفال ذاك الزمن ويقال ان اب سفنجه شخص دميم الملامح طويل القامه يحمل في يده هراوه حديد وينتعل سفنجه ويقتل الاطفال
في ذات صباح باكر دق باب بيتنا خرجت لاجد حسن كوشه ومعه زروق صديقه وعدد من اطفال الحله
ابتدر حسن الحديث
ارحك كوشه الجبل معانا
دفعني الفضول الي ان اذهب لذلك المجهول رغم هواجسي من مصاصي الدماء واب سفنجه لكن اتوكلت علي الحي الذي لايموت وذهبت بصحبه حسن وزروق وبقيه الاطفال
تحركنا الي كوشه الجبل التي وصلناها في ساعه الاربع تقريبا
(ماتنسو اني بمشي علي راحتي والقافله تسير علي حسب قوه اضعف اعضائها هههه اللهو انا )

ووصلنا الكوشه وطبعا انا اندهشت
جبل نفايات وكل شئ في الكوشه موجود ومتاح
وانكفينا نلقط بس سمعنا صوت الاطفال المعاي جرو وانا مابقدر اجري تجمد الدم في عروقي ولم استطع حتي بلع ريقي و..........
نواصل بعد شويه

[الشمشار]

خرج رجل طويل القامه من خلف احد جبال النفايات وتوجه نحوي ولطمني حتي فقدت توازني ووقعت علي الارض وانهالت ثوره الحجاره من حسن كوشه وبقيه رفقائي تجاه الرجل الذي لاذ بالفرار مما مكنني ان ابتعد بعيدا عن مكانه والتحق باصدقائي
واعدنا الكره مره آخري ورغم ان لطمه الرجل الغريب الشكل كانت مؤلمه الا انني لم ابكي كحال كل الاطفال في ذلك العمر ربما لان الدهشه جمدت الدموع في عيني حينها لاني ولدمامه الرجل اعتقدت انه اب سفنجه وتاني مافهمت شئ لغايه مارجعنا علي الحله
ومشيت البيت وانا بضرب اخماس في اسداس
من هو اب سفنجه ؟
وهل هو ذلك الشخص الذي لطمني ؟
من اين لحسن كوشه بهذه الشجاعه حتي يقتحم المجهول دون خوف من اب سفنجه ولا شرابين الدم البحكو لينا عنهم
اسئله كثيره طافت بخاطري وتذكرت حسن كوشه صباح اليوم
تري اين هو الان ؟
وهل مازال وفيا لهوايته الغريبه
رحل حسن كوشه عن الحله
لكن بقيت سيرته نتناولها في الحله ونتذكر ايام الكوشه والمفرقعات (امبولات الحقن ) ومشوار الصباح للكوشه عشان نلم نفايات الطيارات
ونضحك علي خيالنا الخصب الذي
اوجد مصاصي الدماء واب سفنجه رغم عدم وجودهم
الا في خيال اطفال اشتاقو لي ايام الكوشه وافتقدو قائدهم حسن كوشه
فتكم بي عافيه

[عنكوليب]

زماان برضو يا شماشيرو في مارنجان كان في واحد

اسمو " اللعوته " اللعوته جنو كوش ، والأكياس المربطة

والدلاقين بتاعة الشارع كلها هو ململما وعاملها هدوم ،،،

اللهم عافهم ،،، اللهم لا تجعل لنا من يرتادون الكوش

اللهم انا نسألك العافية في الدنيا والآخرة ،،،،

بوست لطيف ،،، ودمو خفيف ،،،،

تسلم شماشيرو ،،،وبطل تمشي للكوش !!!

[الشمشار]

زماان برضو يا شماشيرو في مارنجان كان في واحد

اسمو " اللعوته " اللعوته جنو كوش ، والأكياس المربطة

والدلاقين بتاعة الشارع كلها هو ململما وعاملها هدوم ،،،

اللهم عافهم ،،، اللهم لا تجعل لنا من يرتادون الكوش

اللهم انا نسألك العافية في الدنيا والآخرة ،،،،

بوست لطيف ،،، ودمو خفيف ،،،،

تسلم شماشيرو ،،،وبطل تمشي للكوش !!!

هههههههههه لعوته ده بكون زي اب سفنجه عنكوليب اللهم آمييييييييين

[مايسة]

انت برضو جابوك هنا
شكلو المكنه شغلها نضيف شديد
وشغالة بضمير جدا

[mahagoub]

ده منو يا مايسه
حسن كوشه ولا الشمشار